1 Wanhu wolonda kulamuligwa iviya wolonda umanyi,

mbali wanhu wabozi hawalonda kuzumigwa.

2 Mndewa Mulungu kowatogola wanhu wotenda mbuli zinogile,

mbali kowatagusa wanhu waselesi.

3 Wanhu hawadaha kugangamizigwa kwa kutenda mbuli zihile,

mbali wanhu wotenda mbuli zinogile wezagangamala.

4 Muke yeli na ugenzi unogile ni kombelo da mulumake,

mbali muke yoguma chinyala kalinga fana chinhu chiwolile muna yamavuha ya mulumake.

5 Malungilo ya wanhu wotenda mbuli zinogile yagoloka,

mbali magesa ya wanhu wotenda mbuli zihile ni uvwizi.

6 Mbuli ziwolonga wanhu wotenda mbuli zihile zoilungila kukoma,

mbali mbuli ziwolonga waminika zowakombola.

7 Wanhu wotenda mbuli zihile wezadanganika,

mbali kaye za wanhu wotenda mbuli zinogile zizagangamala.

8 Wanhu weli na nzewele wotogoligwa,

mbali wabozi watatali wokwehuligwa.

9 Muhavu munhu yozehigwa kuno kana msang'hani,

kufosa kuitenda munhu mkulu mbali kwabule ndiya.

10 Wanhu wotenda mbuli zinogile wolola goya wanyama wawo,

mbali wanhu wotenda mbuli zihile wasede ng'hani.

11 Wanhu wolima migunda yawo wezakuwa na ndiya nyingi,

mbali wanhu wotenda mbuli za chakachaka wabule nzewele.

12 Wanhu wotenda mbuli zihile womelela mate vinhu viwahokile wanhu wehi,

mbali sina da wanhu wotenda mbuli zinogile dokwima matunda.

13 Wabananzi wonamatigwa na mbuli zawo zihile,

mbali wanhu wotenda mbuli zinogile woyepula na magayo.

14 Wanhu wezakwiguta mbuli zinogile kwa matunda ya milomo yawo,

na wezabwelezeligwa sang'hano za makono yawo.

15 Nzila ya wabozi watatali iwanogela wawo wenyewo,

mbali wanhu wabala wotegeleza magesa yanogile.

16 Wanhu wabozi watatali wolagusa ludoko lwawo bahobaho,

mbali wanhu wovimanya wowehula wanhu wowazeha.

17 Wanhu waminika wolava ukalangama wa ukweli,

mbali wasindila wa uvwizi wolonga uvwizi.

18 Mbuli ziwolonga wanhu bila kugesa zohoma fana zele,

mbali mbuli ziwolonga wanhu wabala zohonya.

19 Mulomo ulonga ukweli wofunya umoyo siku zose,

mbali lulimi lwa uvwizi lokala chidogo.

20 Uvwizi wamuna imizoyo ya waja wogesa wihi,

mbali waja wogala tindiwalo wana deng'ho kulu.

21 Habule mbuli ihile yondaiwapate wanhu wotenda mbuli zinogile,

mbali wanhu wotenda mbuli zihile wezamemezigwa magayo.

22 Mndewa Mulungu kowehila wanhu wolonga uvwizi,

mbali kowadeng'helela wanhu wolonga kweli.

23 Wanhu wabala wofisa umanyi wawo,

mbali mizoyo ya wanhu wabozi yogong'onda ubozi.

24 Makono ya wanhu woiyoha yezatawala,

mbali wanhu wabwa wezakuwa watumwa.

25 Moyo kusinha wowatenda wanhu wawe na mnamilo,

mbali mbuli za kuguma moyo zowasangalaza wanhu.

26 Wanhu wotenda mbuli zinogile wosagula wambwiya wanogile,

mbali wanhu wotenda mbuli zihile woyagiza wenyewo.

27 Wanhu wabwa hawabanika nyama ziwapatile kuukala,

mbali wanhu woiyoha wezapata vinhu va hela nyingi.

28 Muna inzila inogile kuna ugima mbali siyo ifa.