1 Kɛɗɔn n kɨnnɔɔ rɛ n zɛ jamɛ̃rɛ̃ a ɗɔshinɛ a kɔpɔ siyona, awuni si shɔzɛ laa maani ɓa kopi au jaa laaziti atu nɛ̃ɛ̃ti(144,000) shɔ gbeteyi u nii au ɓeye nii ni shɔ bee tɛttɔ ai nokɨn. 2 N nta yeenya wɔ shɛrɛ a kolapa naa mii ɗɔ ntɛɛnɛ, naa jalɛ ɗɔ lanɛ a gãgãni. Kaa nya naa viwaanɛ gbete shɔ viwaanɛ i waayi hɨmtaa yɛ. 3 Shɔzɛ (144,000) i shi a ɗekɨn lakpati, a vishɛshinɛ suru nɛ̃ɛ̃ti, a shɔpɛ̃niyi ɗekɨn; i ɗɔ soo sɔɔ ntoonɛ, au ji ikɔyi zɛunɔɔ ntoonɛ ji sheeli, atette shɛ̃ɛ̃shɔzɛyi kpai Ɗalapa raa ji ikɔ. 4 Ikɔyi ɔ̃rɛ Vɔshɔ ai pɔ̃ yuu wɔsɔ-wɔsɔ i ji roonɛ ɓa a soni ɓa; i pɛ nyarãyi, i gɨn jamɛ̃rɛ̃m yɛnɛ ɗɔgbete yɛ-yɛ kpai. I kɔyi shɔgbete shɔ raayi atette shɛ̃ɛ̃shɔzɛ yɛ, ikɔyi ɔ̃rɛ shɔ ɗekɨn a shɔ ã Ɗalapa a jamɛrɛ̃ɛ̃ ni. 5 Shɔ ji nta nyayeenɛ ɓa ai nyani shãni ɓa, i ɓa shɔruuvini ɓa.

6 Kɛɗɔn n zɛ Ɗajashonɛlapa wɔ u ɗɔ shàánɛ a konyasi feefee, a ruu tɔ̃vɨn au sɔ̃nya ɓayɛ aru u geli shɔ kotipi, ko-pi shɛ̃ɛ̃shɔzɛyi shɔpiya, laduru, nyakoo, a tipini. 7 Ɗenya a kakani a shanɛ, <<Ɔ nta Ɗalapa setitɔ, ɔ bassiutɔ, Ɔ bɛliu banɛtɔ! Aruviya ɗaa pɛlitɛ au yɛ yeeruu a shɔ yuu pitini. Ɔ bassiutɔ shɔ gbete shɛshi kolapa, kotipi, wapo, a ɗɔgbete mii ɓu ɗɔnyɛ!>>

8 Ɗajashonɛlapa au pɛsiyɛ gɨn shɔ ɗekɨn, a shanɛ, <<Nwesitɛǃ Babila pɛ̃niɓa nwesitɛǃ Shɔgbeteu pɔ̃ shɔ piti a koo shɔ ɓɔɔ mii inabi a shɔ wirirɛ a nyaba kpantang pɛlinɛ>>

9 Kɛɗɔn Ɗajashonɛlapa e taati gɨn shɔ ɗekɨn zitiwirɛ, u ɗɔ shanɛ a kakani nɛ, <<Shɔgbeteyi kɛ bassi viɓilin nɛ au jasuru ni, ayi tɛu nɔmba ai nɔkɨn, ko ai naa, 10 ikɔ yɛ ɓoo mii inabi Ɗalapa sisɨng lɛsinɛrɛ ai yuu, ukɔ tẽẽrɛ loti au yɛti waa sisɨn lɛsinɛǃ A ɗajashonɛlapa wɔsɔ wɔsɔ a jamɛrɛ̃ ɗekɨn Ɗalapa yɛ tasiyi raatɔ fɛ̃ɛm a yaa, a kolo yaa. 11 Zɨnri yaa i raaɓoonɛu yɛ-yɛ ɗekɨn dangdang. Shɔgbeteyi bassi viɓiliu au jasuru ni shɔ yɛ ntayi raa ɓa ko a niti ko a zɨbani kpai, a shɔgbeteyi tɛyi nɔmba ayi niiyɛ ni.>>

12 Vim kã shɔ sisɨn ãnɛyi i sisɨnmɛɛnɛ, shɔgbeteyi gɨn Ɗalapa nya-ãsinɛtɔ, ai ã sisɨntɔ a Yɛsɔ kirisi biini.

13 Kɛɗɔn n nta yeenya a kolapa shanɛ, <<Bee vimnɛ: Ɗa u tasi shɔ gbeteyi vɔ au yuu nyaba vishonɛ pɛlinɛ susãri abiini dɔdɔrim yɛnɛ ɗekɨn!>>

Ɗa suru kasinyanɛ,<<Nankɔ nizɛ, i yɛ susutɔ ai raaɓoonɛ fɛ̃ɛm ni, aruviya ɗɔnwanɛ vishonɛ gbeteyi pɛliyɛ a ɗɔgbete gɨnyɛ!>>

14 Kɛɗɔn n kɨnnɔɔ n zɛ sabu puru, n zɛ viwɔ ɔ̃tɛ ayuu sabuuni naa shɔzɛ, u salabu kpati a yuuni e tarimɛɛ, a gesini pii-pipi au naa. 15 Kɛɗɔn Ɗajashonɛlapa wɔ shɛrɛ a wɛrɛ Ɗa, a ɓaa shɔgbeteu aɗɔ ɔ̃nɛ atette sabu nya a kakani shanɛ, <<Shɛshaa gesinɛ a gaa viyeenɛ aru ɗaa viyeenɛ pɛlitɛ, visha kotipi zɔ̃ tɛttɔ.>> 16 Kɛɗɔn shɔgbeteu ɔ̃ a sabuu lokiu gesirɛ a kotipi. Shɔ yee visha kotipirɛ.

17 Kɛɗɔn n zɛ Ɗajashonɛlapa wɔrɛ shɛ wɛrɛ Ɗa a kolapa, u gesi sɔ̃njo ɗɔn pii-pipi.

18 Ɗajashonɛlapa wɔsɔ̃n ɗɔn, gbeteu pɛli vishonɛ aka yaa shɛ a laazã. A ɓaa Ɗajashonɛlapa gbeteu a gesi ni a naa nya a kakani shanɛ, <<Gɨn a gesinɛ a yee nɔlaa inabi kotipirɛ, aru u jaa zɔ̃ tɛttɔ!>> 19 Kɛɗɔn Ɗajashonɛlapau lokiu gesirɛ ayuu kotipi, a yee nɔlaa inabiirɛ a laa, a lokiyirɛ aɗɔgbete shɔ kamii inabii au lɛsi Ɗalapa sisɨn yɛ. 20 Shɔ nali inabiurɛ a koomo ɓili, kpaa shɛkirɛ a ɗɔuni au shɔkɛ teesinɛ a laa viteesinɛ, u kpɛlɛ yɛ ɔ̃tɔ laa maani ɓa kopi atu mangbete (1600) ukɔ ɔ̃rɛ kilomita laamaani ɓa taati, u jangba yɛ ɔ̃ naa gbɛntɛn dɔɔ maangbete.