Apocalipse 4

Bassinɛ a Kolapa

1 A knti shɔnkɔ n zɛ vitasinɛ wɔ nyajaa ɓelinɛ a kolapa.

N nta yeenya naa n ntasiyɛ, kaa nya naa gãnti. Yeenyau shanɛ, <<Gẽ arɛ yɛm, ɔ̃tɛ kaka jazɨn ang kɔrɔ n tasaa vigbete a yɛ pɛliyɛ a knti vim.>> 2 Ɗa Suru nɔ ang yuu weze tɛ̃ɛ̃ti a tuunrɛ, n zɛ shɔwɔ aɗɔ ɔ̃nɛ a lakpati a kolapa. 3 U nɔkɨn si naa tari au saa yuu fɛ̃ɛm a shɔ ɓaanɛ yasipa a kanɛliya, tagãngɗaa knti lakpatiu atette u mii si naa tari zumurutu. 4 A ɗɔ gigiliu, lakpati wɔyi siɗɔn bmati atu nɛ̃ɛ̃ti, shɔpẽniyi si sɔ̃njo bmati atu nɛ̃ɛ̃ti i ɔ̃li aɗɔn, i toli fãrã puru aka salabu kpati tarimɛɛ ai yuu. 5 A lakpatiukɔ yaa shɛrɛ kɛ kolinɛ shẽshẽku shẽshẽku, vikalinɛ a jalɛ nyakaanɛni. A ɗekɨn lakpatiu laazɔrɔ̃n siɗɔn manzii aɗɔ shaanɛ, ai pɛ Ɗalapa Suru manzii. 6 Sɔ̃n a ɗekɨn lakpatiuni viwɔ tasi naa zɛlivini wapo, kɔli wasak naa takolo.

Vi suru nɛ̃ɛ̃ti wɔyi i shili a ɗɔ lakpatiuni i kɨntiu atette kopikapiya, i nɔɔ a ɗekɨn a kɨnti ni. 7 Shɔu si ɗekɨn tasi naa zɨnggãng; shɔu pɛsiyɛ tasi naa gunapu, e taati au pɛsiyɛ u nɔkɨn naa shɔzɛ nɔkɨn; e nɛ̃ɛ̃ti au pɛsiyɛ u si naa subɔɔ aɗɔ dunɛ. 8 Vi suru nɛ̃ɛ̃tiu kopishɔpiya u nakoshẽnti ɗɔn mangbete, kopishɔpiya nɔɔ aɗɔn, ɓuzɨn a ɓilini. Niti a zɨbani i ɗɔɔ soo ntɔnɛ nɛ:

<<Wɔsɔ-wɔsɔ, Wɔsɔ-wɔsɔ, Wɔsɔ-wɔsɔ, pɛ Uɓeyelapa Ɗalapa shɔgbete vitɛu kakaɓayɛ,

shɔu si yɛ, shɔu ɗɔn, a shɔgbete yɛ a yɛ.>>

9 Vi suru nɛ̃ɛ̃timiyi i ntɔ soo bassinɛ a bɛlinɛni, i dɔ̃ri shɔu ɔ̃li a lakpaurɛ, shɔgbeteu ɔ̃nɛ dangdang yɛ. 10 shɔpẽniyi bmati atu nɛ̃ɛ̃tiwi i nwesi a tipi a shɔu ɔ̃ a lakpatiu ɗekɨn, i bassi shɔu ɔ̃ dangdang yɛrɛ. I loki i salabu kpatiurɛ au ɗekɨn lakpatiu i shanɛ,

11 <<Uɓeyelapa au Ɗalapa! A yɛtɛtɔ

a tɛ bassinɛ, banɛ, a kakani.

Aruviya mɔkaa shɛshi virɛ piti kpai,

jo a kasinɛni a pɔ̃rɛ i ɔ̃ a suruni.>>