1 Lewɔɔ Yesɔ u ɗɔɔ Ɗa gakinɛ a ɗɔwɔɔ, naa yisi Ɗa gakinɛtɛ, u jaɗɔ gbete wɔɔ geliunɛ, <<Uɓeyelapa, matiu nɔgbete u gaki Ɗa pɛ, nɔgbete Yɔhana mati u jaɗɔyiyɛ.>>

2 Yesɔ geli u jadɔyi nɛ, ɔkɛ tɔnɛyi gaki Ɗa ɔ shanɛ: <<

<< <Uɓeye,

mɛnɛ shɔu bassaa niitɔ,

mɛnɛ a kpati roonɛ u atɔ.

3 ãu vishaanɛ gbete u kasitɔ a lee-lee.

4 A yasiu ruuvini gbeteu pɛliyɛ tɔ, nagbete u yasi shɔ gbeteyi pɛliu ruuvini yɛ,

mɔkɔ yaa japɛ̃pɛ̃ɛ̃ nɛ u ntau sisɨn a vigbete yɛ tɛu kaka yɛ.> >>

5 A Yesɔ geliu jaɗɔyinɛ, shɔu tɔpɛnɛ shɔzɛ gbete awɔ tetem u ɓɛsa ɗɔn, yɛu wɛrɛ a atette zɨmba a shanɛ,<<Wesa, kɔ̃sing borodi pɛ taati,>> 6 <<Masa wɔɔ a zati ang wɛrɛ dɔdɔrim, ama n vishaanɛ gbete n yɛn ãwuyɛ ɓa.>>

7 Kɛɗɔn shɔu tɔnɛ mɛsau kasinya au ɓuzɨn wɛrɛ nɛ, <<Yɛ kawa mɔkɔ ãng yukɔnɛ nɛ. Shɔ ku nyaɓa wɛrɛtɛ gboti, majaayi i to ɗɔɔ roonɛtɛ gboti a nkɔni, n yɛn zɛnɔɔ lapa yunɛ ɓa n ãa viwɔɔrɛ ɓa.>> 8 N gelaatɛ kooji kasi ɓa nɛn yulapa u ãu viwɔɔ aru naapɛ u ɓɛusa ɓa, ama aru a yɛ ɗekɨn a ji nta yusẽ vi gakinɛ ɓa au naani ɓa, yɛ yulapatɔ u ãu vigbete kasiyɛ.

9 N gelɔɔtɛ: Ɔ gakinɛ Ɗalapa yɛ ãwɔtɔ; ɔ kãnɛ ɔ yɛ kpaatɔ; wáánɛ shɔ yɛ ɓelaa nyejaatɔ. 10 Shɔu kɛ gakinɛ yɛ tɛttɔ, shɔu kɛ kãnɛ yɛ kpaatɔ, shɔgbete kɛ waa nyejanɛ shɔyɛ ɓɛliutɔ.

11 <<Pi awɔ tetteni naa ɓɛjaa kɛ gaki jazɨng nɛ au naa nɛn shaatɔ yɛ ãu sɔɔ piya? 12 Ko ɓɛɛ jaa kɛ gaki angki nɛ au naa yɛ ãu nɛng piya? 13 piti awɔ kɔ̃linɛni kpai ɔ zɛnɔɔ mɛjaayi vi tɔ̃vɨn ãnɛtɛ, a ntasɛrɛ mɛye gbete kolapa yɛ zãri shɔ gbete i gaki Ɗa Suru pikoviya?>>

14 Kɛɗɔn Yɛsɔ u ɗɔɔ suru kɔ̃linɛ shɛshinɛ a jawɔɔ shɔ nyalutu bi. naa suru kɔ̃linɛ yaa jautɛ, shɔ nyalutu nwanyarɛ, vibii-zaanɛ sã shɔgbete i a ɗɔu piti kpai. 15 Ama shɔzɛ gãsiyi i shanɛ, shɔmpɛǃ Bazabul, kpati rãman ãu kakanrɛ, shɛshi suru kɔ̃linɛnrɛ awuni. 16 Shɔ gãsiyi nta Yesɔ sisɨn i hɨurɛ nɛu tasiyi vibii zaanɛ pɛ gbete yɛ tasinɛ Ɗalapa ãu kaka a kolapa.

17 Yesɔ zɛ vigbete ai sisɨn tɛttɔ a shanɛ:<<koo gbete kɛ waabanɛ ai nɔɔ, kou yɛ shiɓa, toti wɛrɛ gbete kɛ vɔsinɛ ɗɔɔ ziti, wɛrɛu yɛ shiɓa.>> 18 Japɛ̃pɛ̃ɛ̃ kpati roonɛ kɛ vɔsinɛ kn ziti i ɗɔɔ bawaanɛ a zɔni, i kpati roonɛ yɛ shi pikoviya? Ɔ shanɛ n shɛshi suru kɔ̃linɛ Bazabul ãng kakarɛ. 19 N kɛ shɛshi suru kɔ̃linɛ nɛ a Bezabu kaka, ɔ jaɗɔyi i shɛshi ɓɛkɛpi kaka piya? Ɔ jaɗɔyi ikɔi yɛ ɔ̃rɛ ɔ shɔ ruu nwaanɛ. 20 Ama nkɛ shɛshi suru kɔ̃linɛ nɛ a Ɗalapa kaka, si Ɗa kpati roonɛ atɛ awɔ ɗɔbii gboti.

21 Naa shɔ kaka gbete u viyaa a naani waanɛ, u ɗɔɔ gbeteu ga wɛrɛ a viyaani naa, u vi wɛrɛ piti kpai ɓɔɔyi n ti naa ɓa ɗɔmɓa. 22 Ama shɔgbete kɛ tɛu kakanɛ, kanɛ kɛ waunɛ kɛ rau viyaa gbete pɔ̃ sisɨn a ɗɔnnɛ, kɛɗɔn yɛ sii vigbete kasi siinɛ piti a wɛrɛu kpai. 23 Shɔgbete u ɓa a nkɔng ni ɓa, u pɛ n shɔnɔpɔ̃, shɔgbete ji pɔ̃sing naa ɓa a ɗɔɔ vi tolinɛni ɓa u ɗɔɔ sãtinɛ.

24 Naa Suru kɔ̃linɛ kɛ shɛnɛ shɔ bi, witikɛ ɗɔgbete mii ɓa ɗɔm ɓa, aru u kpaa ɗɔɔ susunɛ, naa ji kpaa ɓa, kɛɗɔn geliu yuu nɛ n yɛn sɔɔsɔ̃n wɛrɛ gbete n shɛ ɗɔnyɛ. 25 Naa kɛ sɔɔnɛ kɛ kpaa wɛrɛunɛ shɔ kootɛ wɔsɔ-wɔsɔ, shɔ tɔ̃ritɛ. 26 Kɛɗɔn sɔɔrɛ ɓaa suru kɔ̃linɛ wɔɔ maanzii gbete i tɛu tɛttɔ a lanani, i to shɔu bi i ɔ̃ ɗɔn, a kɨntiuni biu yɛ yusurɛ u tɛɛ gbete si tɛ̃ɛ̃-tɛ̃ɛ̃tɔ.

27 Aɗagbete Yesɔ sha nam, suu wɔɔ atette shɔzɛ, ɓaa Yesɔ nya a geliunɛ, suu gbete yee a yɛ a bààrɛ, a barɛ Ɗalapa u tasi u susãri biini.

28 Yesɔ kasinya nɛ, <<Ama Ɗalapa u tasi ba shɔgbete i nta Ɗa nyaruubii i ɗɔgbete i gɨnyɛ vɔɔ susãri abiini.>>

29 Naa mɔɔyi i ɗɔɔ nya toli waanɛ a Yesɔ ɗɔbii, shanɛ, <<Shɔ jakɨntimiyi dɔdɔrim i pɛ shɔ kɔ̃linɛyi. I kãnɛ n tasi pɛ vibii zaanɛ u tasi kɛkn nɛn a a Ɗalapa ɗɔbii, ama n yɛn tasiyi ɓa see vibii zaanɛ Jona. 30 Jinankɔ vigbete Ɗalapa pɛli Jona yɛ ukɔ tasi shɔ Nenivarɛ nɛ Ɗa shourɛ, Shɔzɛja ukɔ yɛ ɔ̃rɛ vitasinɛ a jakɨntimiyi ɗɔbiini. 31 Suu gbete roo kpati Sheba yɛ yulapa yɛ tẽriyi shɔ jakɨntinimi ruuvini ayuu a lee gadi gbete Ɗalapa yɛ vɔsi ruu yɛ, aru shɛ a koo kpɛlɛ, u geliyinɛ ɔ ji pɛli ɓa tɔ̃vɨn ɓa, aru gbete apɛ ɗɔ kpɛlɛ-kpɛlɛ u nta vimatinɛ sẽrẽ a Solomon nya. Ama vigbete pẽniba tɛɛ kpati Solomon tɛ dɔdɔrim u yɛm. 32 A lee gadi shɔ Nenivayi wɔsɔ̃n shɔ jakɨntimiyi i yɛ yulapa i geliyinɛ i ji pɛli ɓa tɔ̃vɨn ɓa, aru gbete i yaa ruuvinitɛ i kɔsi sisɨn tɛttɔ a Jona nyawaanɛ au pɛliyɛ. Ama vigbete pẽniba tɛɛ Jona tɛ dɔdɔrim u yɛm.

33 << Shɔwɔɔ ɓa gbete dɔ̀ɔ́ yaa pitila u pɔ̃ a ɗɔɔ ɓusinɛyɛ ɓa, ko u zuu à ɓɛsɛ. Ama shɔ dɔ̀ɔ́ yaa pitila shɔ pɔ̃ a laa ɔ̃nɛ lapa, nɔgbete kopiya kɛ tonɛ yɛ zɛ ɗɔsẽsẽ kɛkn. 34 Ɔ nɔɔ kɔ ɔ̃rɛ pitila a bi, naa ɔ nɔɔ kɛ ɔ̃nɛ tɔ̃vɨn, a bi piti kpai yɛ ɔ̃ sɔ̃njo sẽsẽ. Ama ɔ nɔɔ kɛ ɔ̃nɛ vɔrɔ a bi piti kpai yɛ ɔ̃ ɗɔkɨnri gbiti-gbiti. 35 Zɛpɛ tɔ̃vɨn ko ɗɔsẽsẽ gbete ɔwuni pɛ ɗɔkɨnri. 36 Aruumkɔ a bi piti kpai kɛ ɔ̃nɛ sẽsẽ ɗɔwɔɔ ɓa kɨnri àá biini ɓa, a bi yɛ ɔ̃ sẽsẽ piti kpai, nɔgbete pitila ã ɗɔsẽsẽ yɛ.>>

37 Naa Yesɔ yisi nyanwanɛtɛ, kɛɗɔn shɔ Farasiya ɓaa Yesɔ nyanɛ u arɛ u shaa vishaanɛ au wɛrɛ. Yesɔ yɛrɛ a ɔ̃rɛ nɛn shaa vi. 38 Ama shɔ Farasiya zɛrɛ Yesɔ ji sɔ̀ɔ̀ naa ɓa gaa vishaanɛrɛ, vim ãkɛ vibii zaanɛ.

39 Kɛɗɔn Uɓeyelapa geliunɛ, ɔ shɔ Farasiya ɔ sɔ̀ɔ́ ɓɛɛjo jawàá mii u bi ɓilikɔ sheeli. Ama awɔ sisɨn ɓuzun see ba vikɔ̃linɛ. 40 Ɔ shɔ rãngyi weze! Ɓa ji Ɗalapa kɔ, shɔ gbete pɛli ɔ bi ɓili a ɓuzɨn biini ɓaya? 41 Ama ã vi awɔ sisɨn shɔ raayi, vigbete ɔkɛ pɛlinɛ piti kpai bi yɛ tɔ̃ Ɗalapa nyatɔ a ɔkɔni.

42 Yɛ ɔ̃rɔɔ vi yukɔnɛ ɔ shɔ Farasiyayi! Ɔ ã Ɗalapa vinaa tɔ a vigbete ɔ la awɔ jaa naa gãsãsã, timba gapayi ni piti kpai, ama ɔ yaa tɔ̃vɨn pɛlinɛtɛ a ɔrinɛ Ɗalapa ni. Ɔ pɛli vishonɛ a vimkɔ piti kpai ɔkɔɔ yaa wɔɔnɛ knti.

43 Ɔ kɔyuutɔ shɔ Farasiya! Aru ɔ kasinɛ shɔ ai ɗɔ ɔ̃nɛ pẽniba aɗɔgbete shɔ Yahudawayi i toli nya ɗɔnyɛ i nwa ruuyɛ, shɔu gee ɔ nya a lumɔɔyi.

44 Ɔ kɔyuutɔ, ɔ ɔ̃tɛ naa yusààyi gbete i tasi ɓa, shɔzɛyi raki ɗɔn ɓayi zɛnɛni ɓa.

45 Kɛɗɔn shɔzɛ gbete atette shɔmala nya-ãsinɛ Musa kasi Yesɔ nyanɛ,<<Shɔmala, akɛ shanɛ nankɔ a dãu tɛjo!>>

46 Yesɔ risinya nɛ, ɔ shɔmala nyaãsinɛ Musa ɔ kɔyuutɔ! Aru gbete ɔ tusu shɔzɛyi nyaãsinɛ gbete tɛɛ i kakatɛ nɛi gɨntɔ, ama ɔ piti kpai ɔ n ti jaanaa ɓa gbete nɛi pɔ̃sii naa pɛ a ɗɔnni ɓa.

47 Ɔ kɔyuutɔ, aru ɔ maari janyagadiyi sàà tɔ ɔ bɛrɛkitɔ tɛpɛ-tɛpɛ, janyagadiyi gbete mɛuruyi nyoyi yɛ. 48 Ɔ ji ɔ yuu ɔ kasinyatɛ a vigbete mɛuruuyi pɛliyɛ. I nyɔ janyagadiyi vɔrɔ, ɔkɔɔ ma ɔ bassi janyagadi ɓa, ɔ gbãriyi ɓɛɛ jo sàà kɔ sheeli. 49 Aruumkɔ Ɗalapa u sẽrẽ aɗɔn shanɛ, << N yɛn shoshiyi Ɗa jashonɛyi a Yesɔ jashonɛyi, i yɛ nyo wɔyitɔ, i tasi wɔyi raa.>> 50 Aru nankɔ Ɗalapa yɛ tasi shɔ jakɨntimiyi raatɔ, aru gbete shɔ nyoki Ɗa jashonɛ piti kpaa si tɛ̃ɛ̃-tɛ̃ɛ̃ a ɗagbete koo shɛyɛ, 51 Yunɛ Habila bi yɛnɛ Zakariya bi gbete shɔ nyokiyɛ atette lazãã a ɗɔ wɔsɔ-wɔsɔ a ɓuzɨn jàà Ɗa. Nn, n gelɔɔtɛ, Ɗalapa yɛ tasi shɔ jakɨntimiyi raatɔ ai yuuni!

52 <<Ɔ kɔyuutɔ shɔmala nya-ãsinɛ! Aru gbete ɔ ji yaa shɔ ɓa nɛ shɔu zɛ Ɗalapa nya ruubiirɛ ɓa, ɔ yɛ to ɓuzɨn wɛrɛ ɓa awɔ yuuni ɓa, ɔ yɛ yaɓa nɛ shɔyi torɛ ɓa!>>

53 Akɨnti gbete Yesɔ yisi nya vim shanɛtɛ a yaa ɗɔurɛ, Kɛɗɔn shɔ Farisiya a shɔmala nya-ãsinɛyi i gaa Yesɔ pɔ̃nɛ kɛ dekɨn, i kãu a ɗɔnya i ɗɔgbete i hɨliu ruu ayuu vi waanɛ. 54 I ɗa tari aru i nta vikɔ̃linɛ au nya nɛmɛnɛ yɛ wiitɔ aɗɔn.