1 Coríntios 5

Əpʉ ərə gana lə Laglizə

1 Azü djî tə̂ ətshe nɔ̂ ə pa lə takpa tə̂ e əpʉ ə̂trû sə je marä tə̂ əpʉ ə̂trû ə̂në əzü sə sə kə sɔtə̂ nə ndje lə takpa tə̂ azü ə̂në əndje wusə̂ Ndjapä wu ne kɔ ne: ə̈bə̈ əzü lə takpa tə̂ e zâ əwɔ abä nə. 2 Gâ pâ nə, e sə kə da əkro e. E lî kəmə ndə kə pa e sə lə mbadja ə grɔ əzü nə ə̂në tshə mâ marä tə̂ ərə səkɔ lə takpa tə̂ e gashe. 3 Ənə̂ əmə, ə̂në mə sə sə lə takpa tə̂ e ne kɔ, yîrə̂ əmə sə lə takpa tə̂ e. Mə wâ ənə̂ əmə ngbanga gâ lə kumu awoma marä tə̂ ərə səkɔ gâ ye a pa də mə sə lə takpa tə̂ e je. 4 Alɔ ə̂në e sə kə ngbo tə̂ e gâ tə̂ nə də əɨrɨ Âgbɔ̂ Əyïngerə nə̂ əzə̂ Jezu də awlra nə̂ ye, mə sə kə sə lə takpa tə̂ e tê äwä yîrə̂ əmə, 5 e zä marä tə̂ əzü rə gâ lə kəna Sataa ndə kə pa Sataa nə ndɨ əndu ye nə̂ əzü nə kanika Ndjapä she yîrə̂ ye lə kuzu tə̂ alɔ kə gu Âgbɔ̂ Əyïngerə Jezu.

6 Ərə nə ə̂në e da əkro e tə̂ nə kɔ ga ga ne. E wusə̂ nə wu ə pa əyï mapa kʉ teashe kə sə̂ â omɔ mbəde ndjuwu nɔ̂ kɔ ne a? 7 E yütu angbrɔ əyï mapa tə̂ e kanika e sə mata tafa mbəde ndjuwu, mbrə ə̂në e sə sə də əyï mapa lə e ne, mbrə ə̂në əndje zâ Kristə nə, aya ndalimi Pakə nə̂ əzə̂ nə, ə tô əkrɔ də ətshə gâ ye.*5.7 Wu Wutu 13.7; 12.3,5,21. 8 Rəkɔ, a mbrə̈ mbrə̈ sandaga Pakə nə də angbrɔ əyï mapa ə̂në ə tə nə də̂ əmbrʉ lɔsu də əmbʉ ərə kɔ ne. A mbrə̈ sandaga nə də mapa ə̂në əyï nə sə sə lə nə ne kɔ tə̂ äwä ə̂rɔ̂ lɔsu də djatra əpʉ.

9 Mə tâ gâ lə fraka ə̂në mə wlâ kə e kɔ ə pa e na na gâ tə̂ alayïə̂trû ne. 10 Mə pâ pâ ndə azü tshepashɔ səye nɔ̂ ə̂në əndje sə tə alayïə̂trû, wala tə aawoyində aərə tshepashɔ ngbatshe, wala tə alayïangba, wala tə aawovrɔ aamba andjapä kɔ ne. Də̂ ne, e sə kə wutu lə takpa tə̂ azü pâ ashɔ səye gashu. 11 Əpʉ nə ə̂në mə tâ gâ lə fraka nə kə e kɔ, mə yində kə pa kə e ə pa e tɔ tɔ gâ tə̂ əzü ə̂në tshə pa əne sə tə aye e lə Kristə â sə tə əyïə̂trû, wala tə awoyində aərə tshepashɔ ngbatshe, wala tə awovrɔ aamba andjapä, wala tə əyïə̂gû, wala tə awondju ərə wala tə əyïangba kɔ ne. E zɨ̈ zɨ̈ ndje ərə də marä tə̂ əzü rə ne.

12 Yekɔ, əmə kə wa tshelə ngbanga azü tsheshu nə a? Ə də̂ azü tshelə aangbɔ nə̂ e nə də̂ e wa ngbanga əndje ne a? 13 Azü tsheshu nə, Ndjapä kə wa ngbanga əndje je. Fraka nə̂ Ndjapä pâ əpʉ ə pa: «E grɔ̈ əmbrʉ əzü lə takpa tə̂ e gashu.»*5.13 Wu Əpʉ 17.7.