1 A rö gâ pâ əpʉ ə̂në e tâ gâ lə ngrowô kə əmə kɔ. Ə sə tə ə̂rɔ̂nə ndə kə pa koshe za yashe za ne. 2 Bale, ndə kə pa əzü te te gâ lə əpʉ ə̂trû ne, koshe bale bale sə̈ də əwɔ nə, ndje yashe bale bale sə̈ də äkɔ̈ nə. 3 Koshe mbrə̈ ərə ə̂në tshə lï ndə kə pa tshə mbrə nə kɔ kə əwɔ nə, â yashe mbrə̈ ndje kʉ rə kə äkɔ̈ nə. 4 Yashe lï lï ndə kə pa tshə mbrə ərə gâ tə̂ akwa ye də ə̂tə̂ ye mata ə̂në tshelə ye yində kɔ ne: tshekotə̂ ye sə tə ənə̂ äkɔ̈ nə. Äwä bale ndje, koshe lï lï ndə kə pa tshə mbrə ərə ə̂në tshelə ye yində nə kɔ tə̂ akwa ye də ə̂tə̂ ye ne: tshekotə̂ ye sə tə ənə̂ əwɔ ne. 5 Əzü gbɔ̈ tə̂ tshekotə̂ ye gbɔ tə̂ bəngâ nə ne, dê ne, kʉ tə̂ alɔ ə̂në e dji tə̂ e â za ə̈bə̈ ə̈ndö əlo ndə kə pa e yu Ndjapä lə əlo nə səkɔ. Mandânə, e ngbö gâ tə̂ nə mata ənə̂ ətshinə, də̂ ne äwä kə ru əgo tshelə e sə sə kə sə je ne â Sataa sə kə tra e ndə kə pa e te.

6 Mə pa əpʉ səye mata ərə ə̂në e lï ndə kə pa e mbrə nə, ə sə sə tə əpʉ kə za ama ə za də̂ mə za kə e kɔ ne. 7 Mə yî kəmə ndə nə ə pa azü nɔ̂ sə mata əmə, bale Ndjapä zâ âkrâ kpî kpî kpî kə əzü bale bale: kə ə̈bə̈ əzü ənə̂ səye, kə ə̈bə̈ ata nə ənə̂ səkɔ.

8 Rəkɔ, mə pa kə azü ə̂në əndje sə tə akumbamba kɔ də ayashe koya ə pa ə sə tə ə̂rɔ̂nə ndə kə pa əndje sə kʉ rə mata əmə. 9 Bale, kədə əndje lï lï ndə kə pa əndje ru əgo tshelə əndje ne, əndje kö ayashe də akoshe. Mbrə ə̂në ə sə tə ə̂rɔ̂nə ndə kə za yashe wala koshe ə ro ndə kə pa əgo tshekotə̂ ju e tə əwo.

10 Ənə̂ azü ə̂në əndje kô ayashe də akoshe gâ ye kɔ, mə zâ ama, ə də̂ əmə də̂ ne, Âgbɔ̂ Əyïngerə kə zâ ama nə kɔ, ə pa yashe ä äfɔ lə kəna äkɔ̈ nə ne. 11 Kədə yashe afɔ tə̂ äkɔ̈ nə, tshə däka pə kʉ rə ə zä koshe zä ne wala əndje də äkɔ̈ nə djï tə̂ əndje tshə gu gâ ndə ye. Koshe ndje grɔ̈ əwɔ nə grɔ̈ ne.

12 Ənə̂ ə̂dû azü nə, mə sə kə pa əpʉ kə əndje, ə də̂ Âgbɔ̂ Əyïngerə də̂ kə pa kɔ ne, ə pa: kədə ə̈bə̈ aye sə də yashe, ə̂në tshə sə sə tə əzü nə̂ Kristə ne kɔ, â yashe nə yində kə daka pə ndə ye, koshe nə grɔ̈ ətshə grɔ̈ ne. 13 Kədə ə̈bə̈ yashe kə sə də äkɔ̈ nə ə̂në tshə sə sə tə əzü nə̂ Kristə ne, â koshe nə yində kə daka pə də ətshə, yashe nə grɔ̈ ətshə grɔ̈ ne. 14 Mbrə ə̂në, koshe ə̂në tshə sə sə tə əzü nə̂ Kristə nə ne, tshə sə trö də Ndjapä mbrə əwɔ nə, â yashe nə ə̂në tshə sə sə tə əzü nə̂ Kristə ne kɔ, tshə sə trö də Ndjapä mbrə äkɔ̈ nə. Də̂ ne, aneshe nə̂ e sə kə sə mata azü ə̂në əndje sə sə mvo ne, kandää, tə djatra əpʉ, əndje sə̂ trö də Ndjapä gâ ye. 15 Bale, kədə əzü ə̂në tshə sə sə tə əzü nə̂ Kristə nə ne kɔ kə yində kə afɔ, tshə äfɔ. Rəkɔ, äkɔ̈ nə wala əwɔ nə sə yera. Mbrə ə̂në Ndjapä ê e ndə kə pa e sə lə blatshe. 16 Əbə, yashe, bə wusə̂ nə ə pa bə she äkɔ̈ zə lə kuzu je a? Wala əbə, koshe, bə wusə̂ nə ə pa bə she əwɔ zə lə kuzu je a?

17 Ənə̂ ə̂dû azü nə, əzü bale bale däka pə lə kə sə ətshə Lïndə̂ ərə ə̂në Ndjapä ê ətshə ə zâ kə ətshə kɔ. Əpʉ nə sə rə â mə sə kə za ama də nə lə Alaglizə nɔ̂ kɔ. 18 Ə̈bə̈ əzü wâ gandja gâ ye â Ndjapä ê ətshə kɔ a? Tshə vʉ̈sə̂ əpʉ gandja nə̂ ye nə vʉ̈ ne. Ə̈bə̈ əzü sə tə amvɔ â Ndjapä ê ətshə kɔ a? Tshə prä äwä prä ndə kə pa əndje wa ətshə də gandja ne. 19 Gandja nə sə sə tə ə̈bə̈ ərə bale ne â kə sə tə amvɔ nə sə sə tə ə̈bə̈ ərə bale ne. Bale, âgbɔ̂ ərə nə, kə də̂ kə pa əzü mbrə ərə Lïndə̂ aəpʉ ama Ndjapä. 20 Əzü bale bale daka pə lə kə sə ətshə ə̂në Ndjapä ê ətshə lə nə kɔ. 21 Bə sə̂ leme-e tə kanga â Ndjapä ê əbə kɔ a? Lï tshelə zə lï gâ pâ nə ne. Bale, äwä nə â sə je ndə kə pa bə wutu lə kanga nə, wütu. 22 Mbrə ə̂në kanga ə̂në Âgbɔ̂ Əyïngerə ê ətshə gâ ye kɔ, Âgbɔ̂ Əyïngerə nə djɔ̂ ətshə lə kanga nə gâ ye. Äwä bale ndje, əzü ə̂në tshə sə sə tə kanga ne, ə̂në Âgbɔ̂ Əyïngerə nə ê ətshə gâ ye kɔ, tshə sə tə kanga nə̂ Kristə nə. 23 Ndjapä yɔ̂ e də əgerə ndogɔ gâ ye. Rəkɔ, e dö tə e dö tə akanga nə̂ azü ne. 24 Alaye, əzü bale bale däka pə ətshi Ndjapä, lə kə sə ətshə ə̂në Ndjapä ê ətshə lə nə kɔ.

25 Gâ pâ əpʉ nə̂ azü ə̂në əndje te te pa ə wusə̂ akoshe də ayashe ne kɔ, Âgbɔ̂ Əyïngerə zâ ama zâ kə əmə gâ pâ əpʉ nə ne. Bale, mə sə kə pa əpʉ ə̂në ə sə tə̂ lɔsu əmə, tə əpʉ nə̂ əzü ə̂në Âgbɔ̂ Əyïngerə, lə ə̂rɔ̂tə̂ ye, mbrə̂ ətshə tə əzü ə̂në azü lï ndə kə pa əndje za lɔsu əndje gâ pâ əpʉ ama ye kɔ.

26 Rəkɔ, mbrə aəmbrʉ aərə ə̂në ə sə kə wutu kpəsəye kɔ, ərə ə̂në mə wu tə ə̂rɔ̂nə kɔ kə də̂ kə pa: ə sə tə ə̂rɔ̂nə ndə kə pa əzü sə kʉ rə. 27 Bə sə də ə̈bə̈ yashe a? Bale, pä prä äwä ndə kə pa tshelə takpa tê e də ətshə sɔ ne. Bə sə sə də yashe ne a? Bale, prä yashe prä ne. 28 Bale, kədə bə za yashe, bə ma ma nyaka kôto ne. Bale, kədə yashe ə̂në tshə wusə̂ akoshe wu ne kɔ kə za koshe, tshə ma nyaka ma kôto ndje ne. Bale, azü ə̂në əndje kô ayashe də akoshe gâ ye kɔ, əndje sə kə wu əyo ngbatshe lə kə sə əndje nə. Â əmə, mə yində kə pa mə gi e gashe tə̂ əyo səkɔ.

29 Alaye, əpʉ ə̂në mə yində kə pa nə kɔ sə rəke: alɔ nə daka kʉ pə ndo. Mandânə səye, azü ə̂në əndje sə də ayashe kɔ, əndje sə̈ a pa də əndje sə sə də ayashe ne. 30 Azü ə̂në əndje sə kə kɨ əkɨ kɔ, əndje sə̈ a pa də əndje sə sə kə kɨ əkɨ ne. Azü ə̂në əndje sə lə ə̂rû kɔ, əndje sə̈ a pa də əndje sə sə lə ə̂rû ne. Azü ə̂në əndje sə kə yɔ aərə kɔ, əndje sə̈ a pa də əndje sə sə də aərə ne. 31 Azü ə̂në əndje sə kə sɔtə̂ aə̂rɔ̂ aərə tshepashɔ səye kɔ, əndje sə̈ a pa də əpʉ aərə nə za lɔsu əndje za ne. Mbrə ə̂në tshepashɔ səye, ə̂në a sə kə wu nə kɔ, sə kə ro nə.

32 Kandää, mə yində nə ə pa e li tshelə e li gâ pâ ə̈bə̈ ərə bale ne. Əzü ə̂në tshə za yashe za ne kɔ, tshə sə kə li tshelə ye kʉ gâ pâ aərə nə̂ Âgbɔ̂ Əyïngerə. Tshə sə kə pra äwä ndə kə pa tshelə Âgbɔ̂ Əyïngerə mɔ tə̂ ye. 33 Bale, əzü ə̂në tshə zâ yashe gâ ye kɔ, tshə sə kə li tshelə ye gâ pâ aərə tshepashɔ səye, ə sə kə pra äwä ndə kə pa tshelə əwɔ nə mɔ tə̂ ye. 34 Â rəkɔ, lɔsu ye sə tə̂ äwä ərə bishi. Äwä bale ndje, yashe ə̂në tshə sə sə də koshe ne kɔ, ndje də yashe ə̂në tshə wusə̂ akoshe wu ne kɔ, əndje sə kə li tshelə əndje kʉ gâ pâ aərə nə̂ Âgbɔ̂ Əyïngerə, ndə kə pa əndu əndje də yîrə̂ əndje sə kpî mbrə ətshə. Bale, yashe ə̂në tshə zâ koshe gâ ye kɔ, tshə sə kə li tshelə ye gâ pâ aərə tshepashɔ səye ə sə kə pra äwä ndə kə pa tshelə äkɔ̈ nə mɔ tə̂ ye.

35 Mə sə kə pa əpʉ səye mbrə ə̂rɔ̂ ərə nə̂ e, mə pa pa tə kə le ə̂kû tə̂ e ne. Mə yində nə ə pa e mbrə ərə ə̂në ə sə tə ə̂rɔ̂nə kɔ ə za lɔsu e nɔ̂ kʉ kə Âgbɔ̂ Əyïngerə bale.

36 Kədə ə̈bə̈ mɔdɔ wu ə pa əne lï ndə kə pa əne ma əmbrʉ ərə kə yashe ə̂në əne yû əpʉ ye gâ ye kɔ, â kədə əgo ye kə sə tə̂ lɔsu ye â tshə wu ə pa alane ə ko tə̂ alane, ə̂rɔ̂nə, əndje kö tə̂ əndje mata ə̂në tshelə ye yində nə kɔ. Ə də̂ nyaka də̂ tshə mbrə kɔ ne. 37 Bale, kədə mɔdɔ nə kə gâmba mâ tə̂ lɔsu ye, ə̂në əzü zâ ətshə zâ də awlra ne kɔ, â də tshelə ye nɔ̂ də̂ tshə yîndə nə â zâ ama ə pa əne sə sə kə za amvera nə ə̂në əne yû əpʉ ye gâ ye kɔ ne, ə sə sə kə goro ətshə ne, tshə mbrə tə ə̂rɔ̂nə. 38 Rəkɔ əzü ə̂në tshə za yashe ə̂në tshə yû əpʉ ye gâ ye kɔ tə əwɔ nə, tshə mbrə tə ə̂rɔ̂nə, â əzü ə̂në tshə wəra tə̂ ye ndə kə pa tshə za ətshə nə, tshə mbrə ə̂rɔ̂ ərə ə rô pâ nə kwatəndje.

39 Yashe tɔ̂ popo äkɔ̈ nə gâ ye lə sorô tə̂ äkɔ̈ nə nɔ̂. Bale, kədə äkɔ̈ nə nə kə tshû gâ ye, ə̈bə̈ ərə gbɔ tə̂ äwä gbɔ tə̂ ye ndə kə pa tshə za ə̈bə̈ koshe ə̂në tshelə ye yində nə kɔ ne. Kʉtə̂ əpʉ bale, koshe nə sə tə əzü nə̂ Kristə gâ ye kane. 40 Bale, ənə̂ əmə mâ tə̂ lɔsu əmə, yashe nə sə kə sə tə ə̂rɔ̂nə ro pâ nə, kədə tshə sə pə kʉ mata ə̂në tshə sə kɔ. Bale, mə wusə̂ nə mâ tə̂ lɔsu əmə ə pa, əmə ndje, mə sə də Yîrə̂ Ndjapä.