1 Əmə, Palɔ, əzü-awla nə̂ Jezu Kristə tə̂ äwä ərə ə̂në tshelə Ndjapä yîndə nə gâ ye kɔ, gâ ndə aye əzü Timɔte, ä ta fraka səye kə Laglizə nə̂ Ndjapä, ə̂në ə sə mâ Kɔratə kɔ, ndje kə azü nə̂ Ndjapä nɔ̂ ə̂në əndje sə̂ lə ashɔ Akayi nɔ̂ kɔ:

2 Abä əzə̂ də Ndjapä gâ ndə Âgbɔ̂ Əyïngerə Jezu Kristə mbrə̈ ə̂rɔ̂tə̂ əndje kə e ə zä blatshe kə e!

3 A tɔ̈lɔ Ndjapä tə Abä Âgbɔ̂ Əyïngerə nə̂ əzə̂ Jezu Kristə, tə Abä ə̂në tshə wu əyo azü ə wu kɔ, ndje tə Ndjapä ə̂në tshə tru ngɔla azü ə tru lə aərə nɔ̂ kɔ! 4 Tshə sə kə tru ngɔla əzə̂ lə aərə əyo nə̂ əzə̂ nɔ̂, ndə kə pa kʉ mata ə̂në tshə tru ngɔla əzə̂ nə kɔ, a tru ndje ngɔla azü ə̂në əndje sə lə aâkâ aərə əyo nɔ̂ kɔ. 5 Mbrə ə̂në äwä bale ndje ə̂në əzə̂ sə kə wu əyo ngbatshe mata Kristə nə kɔ, Kristə nə ndje sə kə tru ngɔla əzə̂ ngbatshe ndje rə. 6 Kədə ä sə kə wu əyo, ə sə ndə kə pa ä tru ngɔla e, ndje e tshɔ lə kuzu. Kədə ngɔla ä nə kə kpɔ̂ gâ ye, ə sə ndə kə pa ä tru ngɔla e kanika e sə tə azü ə̂në e lï ndə kə ru tshelə e lə kʉtə̂ marä tə̂ aəyo sə̂ ə̂në ä wu kɔ. 7 Bale, ä za lɔsu ä kʉ gâ pâ e, mbrə ə̂në ä wusə̂ nə ə pa mata ə̂në e sə kə wu əyo kʉ mata ä kɔ, ngɔla e sə kə kpɔ nə ndje mata ənə̂ ä.

8 Alaye, ä yində nə ə pa e wusə̂ əpʉ gâ pâ ərə əyo ə̂në ə wûtu gâ tə̂ ä lə ashɔ Azi kɔ. Ä wû əyo ʉrrr ə rô pâ nə, ə rô pâ awlra nə̂ ä gâ ye, â ä wû ənə̂ ä ə pa ä sə̂ sə̂ kə daka pə ndje tə asorô ne. 9 Bale, ä-ä də ə̂tə̂ ä, ä yində ngbanga kuzu ä nə, kanika ä za lɔsu ä za kʉ gâ pâ ä də ə̂tə̂ ä ne, bale ä za lɔsu ä kʉ kə Ndjapä ə̂në tshə she akuzu kɔ. 10 Ətshə kə djɔ̂ ä lə kuzu â djɔ ä je lə marä tə̂ kuzu rə. Ayî, ä za lɔsu ä kʉ gâ pâ əpʉ səkɔ ə pa tshə djɔ ä kwatəndje rə je. 11 E-e də ə̂tə̂ e ndje, e sə kə tɨ ä gâ lafɔ tə̂ äwä kə yu Ndjapä mbrə ä. Rəkɔ, azü ə̂në əndje sə ngbatshe kɔ sə kə yu Ndjapä mbrə ä, â tshə sə kə dji nə â mbrə ə̂rɔ̂nə kə ä, â azü ə̂në əndje sə ngbatshe kɔ sə kə za mərshe kə ətshə mbrə ä.

12 Ərə ə̂në ä sə kə da əkro ä mbrə nə, kə də̂, mâ tə̂ lɔsu ä, ä wusə̂ nə ə pa ä mbrə̂ tə̂ ä pâ ashɔ səye, dîrî dîrî lə ala e, tə azü ə̂në ä sə aamba nə ə mbrə ərə də ə̂rɔ̂ lɔsu ə̂në Ndjapä zâ kə ä kɔ. Ä mbrə ərə mbrə tə̂ äwä kə wusə̂ âdâ ərə nə̂ azü ne, bale, ä mbrə ərə tə̂ äwä ə̂rɔ̂tə̂ Ndjapä nə. 13 Lə afraka ə̂në ä wlâ kə e kɔ, ä ta ə̈bə̈ əpʉ ta kpî tə̂ əpʉ ə̂në e sə kə dɨ nə ə dji tshelə nə kɔ ne. Mə wusə̂ nə ə pa e dji tshelə nə ʉrrr djɔ gâ tə̂ ama nə je, 14 mata ə̂në e djî tshelə nə teashe gâ ye ə pa ä sə tə ərə ə̂në e sə kə da əkro e tə̂ nə, â e sə ndje tə ərə ə̂në ä sə kə da əkro ä tə̂ nə kɔ, tə̂ alɔ kə gu Âgbɔ̂ Əyïngerə nə̂ əzə̂ də Jezu.

15 Bale, ə̂në mə wûsə̂ nə ngâ ə pa ərə nə sə rə kɔ, mə yîndə nə ə pa mə na ətshinə mâ ndə e je, ndə kə pa e sɔtə̂ bishi ə̂rɔ̂ ərə. 16 Mâ ndə e je, mə ro kəmə mâ Masedwanə, mandânə, mə afɔ mâ Masedwanə nə je ə gu mâ ndə e je, e za äwä kə əmə mə na mâ Jude. 17 Ə̂në mə zâ ama ə pâ əpʉ sə̂ rəkɔ, mə zâ kəmə əpʉ nə tə əpʉ ə̂rû a? Wala əpʉ nə ə̂në mə pâ rə kɔ ə sə tə̂ äwä əgo ərə lɔsu əzü â pa əmə bale, mə pa «ayî» ə pa ndje «a’awɔ̂» kɔ a? 18 Lə ala Ndjapä ə̂në tshə lï ndə kə pa ä za lɔsu əzə̂ kə ətshə kɔ, əpʉ ə̂në ä pâ kə e kɔ, ə sə sə tə əpʉ bishi «ayî» də «a’awɔ̂» ne. 19 Mbrə ə̂në Ɨrɨ Ndjapä nə, Jezu Kristə, ə̂në ä mʉ̂ əpʉ ye lə takpa tə̂ e kɔ, əmə də Silasə gâ ndə Timɔte kɔ, tshə sə sə tə «ayî» də «a’awɔ̂» ne, bale, tshə sə kʉ alɔnɔ̂ tə «ayî». 20 Aərə nɔ̂ ə̂në Ndjapä zâ ama də əpʉ nə gâ ye kɔ sə tə «ayî», tə̂ äwä ye. Rəkɔ, ə sə ndje tə̂ äwä ye də̂ a sə kə pa «asərəmə» kə Ndjapä ndə kə mbe ətshə kɔ. 21 Ətshə ə̂në tshə sə kə gbɔgbɔ əzə̂ də a-e lə Kristə nə ə kô əzə̂ kpî gashe mbrə ətshə kɔ, kə də̂ Ndjapä nə. 22 Tshə zâ ndje tapɔ nə̂ ye gâ pâ əzə̂ gâ ye ə zâ Âgbɔ̂ Yîrə̂ gâ tə̂ lɔsu əzə̂ mata aəlî aə̂rɔ̂ aərə ə̂në a sɔtə̂ nə je kɔ.

23 Əmə, mə za Ndjapä tə awowu aərə nɔ̂ lə kə sə əmə: mə kwâ tə̂ əmə kwâ mâ Kɔratə je ne mbrə ə̂në mə yî yîndə ndə kə pa mə za əyo gâ tə̂ e ne. 24 Ä yində nə yi ə pa ä sə gâ pâ e tə̂ äwä əpʉ lɔsu e mata makɔndji ne, bale a də a-e ngbo kəna əzə̂ ə ngbo gâ tə̂ nə ə mbrə kosəra mbrə ə̂rû nə̂ e, mbrə ə̂në lɔsu e gbɔ̂gbɔ tə̂ ye gâ ye.