1 Alaye əmə ə̂në mə yində e tə bandanə kɔ, aəpʉ ama Ndjapä səkɔ sə mbrə əzə̂. Rəkɔ, a yütu aəmbrʉ aərə ə̂në ə sə tə̂ əzə̂ də tə̂ lɔsu əzə̂ kɔ ə prä äwä nɔ̂ ndə kə pa a sə kpî ngâ mbrə Ndjapä nə ə kpë rawa ye.

2 E kö ä gâ tə̂ lɔsu e! Ä mbrə̂ ə̈bə̈ əmbrʉ ərə mbrə̂ kə ə̈bə̈ əzü bale ne, ə ndɨ̂ kə sə ə̈bə̈ əzü ndɨ̂ bale ne, ə kô ərə nə̂ ə̈bə̈ əzü kô tə̂ ye tə ambanə ne. 3 Mə pa pa rə ndə kə wa ngbanga gâ pâ e ne. Mbrə ə̂në mə pâ ətshinə gâ ye ə pa: sɔ lə sorô sɔ lə kuzu, e sə tə̂ lɔsu ä. 4 Mə za lɔsu əmə nɔ̂ gâ pâ e â sə kə da əkro əmə tə̂ e. Lə aərə əyo nə̂ ä nɔ̂, lɔsu əmə zɨ̂tɨ ə sû də âgbɔ̂ ə̂rû.

5 Mbrə ə̂në, alɔ ə̂në ä yî kumu ä mâ Masedwanə kɔ, ä sɔ̂tə̂ äwä sɔ̂ bale ndə kə wu tə̂ ä ne, bale ä wû adongo aəyo nɔ̂: awlra tə̂ ä gashu â awa djoko lə ä. 6 Bale, Ndjapä nə, ə̂në tshə gbɔgbɔ lɔsu azü ə̂në əndje mɔ̂ gâ ye kɔ, tshə zɨ̂tɨ lɔsu ä alɔ ə̂në Titə yî kumu ye gâ ye kɔ. 7 Ə də̂ kʉ mbrə kə na Titə nə də̂ ne, bale ndje mbrə e-e ə̂në e zɨ̂tɨ lɔsu ye ndje kɔ. Tshə pâ ndə əgo ə̂në e sə̂ də nə ndə kə wu əmə kɔ, də əkɨ ə̂në e kɨ̂ ndə əmə də əgo ndə kə pa e te awlra əmə kɔ kə ä gâ ye, â tshelə əmə mɔ ngbatshe.

8 Bale, kədə mə zâ əyo gâ tə̂ lɔsu e lə fraka nə ə̂në mə wlâ kə e kɔ, tshelə əmə ko əmə ko tə̂ nə ne. Bale, tshelə əmə kô əmə tə̂ nə ətshinə gâ ye, mbrə ə̂në mə wusə̂ nə ə pa ə zâ əyo gâ tə̂ lɔsu e gâ lə ə̈bə̈ əlo gâ ye. 9 Bale, kpəsəye tshelə əmə mɔ, ə də̂ mbrə əyo nə ə̂në mə zâ gâ tə̂ lɔsu e kɔ də̂ ne, bale mbrə ə̂në əyo nə tə̂ lɔsu e mbrə â e tshî äwä angbrɔ kə mbrə tə̂ e nə tʉ gâ ye. Mära tə̂ əyo nə tə̂ lɔsu e nə rə sə tə ərə ə̂në Ndjapä yində nə â rəkɔ, ä mbrə̂ ə̈bə̈ əmbrʉ ərə mbrə̂ kə e bale ne. 10 Mbrə ə̂në əyo tə̂ lɔsu Lïndə̂ ərə ə̂në Ndjapä yində nə kɔ, mbrə â əzü tshi äwä angbrɔ kə mbrə tə̂ ye tʉ â she lə kuzu, â tshelə əzü sə sə ko ətshə tə̂ nə ne. Bale, əyo tə̂ lɔsu ə̂në ə mbrə ndə kə pa əzü tshi äwä angbrɔ kə mbrə tə̂ ye tshi tʉ ne kɔ sə kə gi əzü nə gâ lə kuzu. 11 Mandânə səye, e wü aərə ə̂në ə nâ mandâ əyo tə̂ lɔsu nə Lïndə̂ ərə ə̂në tshelə Ndjapä yində nə kɔ: əgo kə mbrə ərə katshä, əgo kə pa əpʉ gâ pâ əpʉ lə kumu e! Tshelə e ko e mbrə əmbrʉ ərə, awa sə kə mbrə e, e sə də əgo ndə kə wu əmə, e sə də əgo kə mbrə kosəra, e sə də əgo kə wa ngbanga gâ pâ əmbrʉ ərə! Lə aərə nɔ̂, e yîsə̂ nə gashu ə pa, lə əpʉ səkɔ, ə̈bə̈ əpʉ sə sə lə kumu e ne.

12 Rəkɔ, kədə mə tâ fraka kə e, ə də̂ mbrə əzü ə̂në tshə mbrə̂ əmbrʉ ərə kə ngâ nə kɔ wala mbrə əzü nə ə̂në əndje mbrə̂ əmbrʉ ərə nə kə ətshə kɔ də̂ ne. Bale, mə tâ fraka nə kə e ndə kə pa ä wusə̂ nə ngâ, lə ala Ndjapä, ə pa e sə də əgo ä. 13 Âdârə ə̂në lɔsu ä zɨ̂tɨ gâ ye kɔ kə sə̂.

Bale, gâ pâ nə, tshelə ä mɔ̂ ngbatshe mbrə Titə ə̂në tshə sə də ə̂rû tə̂ lɔsu ye ndje tə̂ ərə ə̂në e mbrə̂ kə ətshə ndə kə zɨtɨ lɔsu ye kɔ. 14 Rəkɔ, ə̂në mə dâ əkro əmə tə̂ e kə ətshə kɔ, gana ngɔ̂ əmə ngɔ̂ ne. Bale, ə̂në ä pâ djatra əpʉ kə e alɔnɔ̂ kɔ, kə da əkro ä tə̂ e nə kə Titə nə sə̂ tə djatra əpʉ ndje gâ ye. 15 Bale, rəkɔ tshə yində e kwatə̂ye ngbatshe alɔ ə̂në tshə sə kə li tshelə ye gâ pâ äwä ə̂në e-e nɔ̂, e dji əpʉ ama ye ə gu ə gugu ndə kə za ətshə gâ tə̂ e də kə kpe rawa ye kɔ. 16 Tshelə əmə sə də ə̂rû mbrə ə̂në mə za lɔsu əmə nɔ̂, lə aərə nɔ̂, gâ pâ e kɔ.