1 Əlo mindû amanə bale mandânə, Jezu kô a-Piarə, də Zake gâ ndə aye nə də Zââ, ə ô də əndje gâ pâ ə̈bə̈ əgerə kaga â əndje sə̂ kʉtə̂ əndje mâ je. 2 Tshə dô tə̂ ye kpî lə ala əndje. Tshitshi ye tshê mata alɔ â aləba nə̂ ye dô tə̂ əndje tə ə̂mbînə, ə tshê. 3 Bə pa bə dji, Mayïzə də Eli wûtu gâ tə̂ əndje â sə̂ kə pa əpʉ kə ətshə. 4 Bale, Piarə zâ əpʉ ə pâ kə Jezu ə pa: «Âgbɔ̂ Əyïngerə, ə sə tə ə̂rɔ̂nə ndə kə pa a sə pə kotəye. Kədə bə yində nə, mə sə kə ma agbanda vəta kotəye, bale mbrə əbə, bale mbrə Mayïzə â bale mbrə Eli.»

5 Alɔ ə̂në tshə sə̂ pə kə pa əpʉ nə kɔ, ə̈bə̈ andra ə̂në ə tshe ə tshe kɔ wûtu ə zâ əndje. Ə̈bə̈ tshema tô lə andra nə ə pâ: «Ətshə tshə səye, tshə sə tə Ɨrɨ əmə ə̂në mə yində ye ngbatshe. Tshelə əmə mɔ tə̂ ye tə bandanə, e dji ətshə!»

6 Alɔ ə̂në atrawaya nə djî tshema səkɔ, rawa zâ əndje tə bandanə â əndje tê gâ tshekudu ye ə zâ tshitshi əndje su ashɔ. 7 Bale, Jezu nâ trö də əndje ə gôro əndje ə pâ: «E äfɔ, awa mä e mä ne!» 8 Əndje lîshi gâ lafɔ, bale, ə wû ə̈bə̈ əzü wû bale ne, kʉtə̂ Jezu nə tshî.

9 Alɔ ə̂në əndje tô pâ kaga nə ə sə̂ kə jerə nə kɔ, Jezu zâ ama kə əndje ə pa: «E pä ndə əpʉ ərə ə̂në e wû kɔ pä kə ə̈bə̈ əzü bale ne, ʉrrr Əgblə nə̂ Əzü she lə takpa tə̂ akuzu gâ ye kane.» 10 Mandânə, atrawaya nə yû ətshə ə pa: «Mbrə yekɔ də̂ aawoyisə̂ âgbɔ̂ əpʉ nə̂ Mayïzə pâ Eli lï ndə kə na angbʉlînə gâ ye kane kɔ?» 11 Tshə kîrə əpʉ kə əndje ə pa: «Ə sə tə djatra əpʉ, Eli lï ndə kə na ətshinə ə gamba aərə nɔ̂ də äwänə gâ ye kane. 12 Bale, mə pa kə e: Eli nâ gâ ye â azü nə yêrɔ ətshə yêrɔ ne, bale, əndje mâ ərə tshelə əndje gâ tə̂ ye. Ə sə kə sə ndje äwä bale rə, əndje sə kə gi əyo tə̂ Əgblə nə̂ Əzü.» 13 Bale, atrawaya nə wûsə̂ nə ə pa tshə sə kə pa əpʉ kə alane gâ pâ əpʉ nə̂ Zââ Batistə.

14 Alɔ ə̂në Jezu də atrawaya nə̂ ye gû trö də ə̂kpû azü nə kɔ, ə̈bə̈ koshe nâ ə tê gâ tshekudu Jezu 15 ə pâ: «Âgbɔ̂ Əyïngerə, wü əyo əgblə koshe nə̂ əmə. Tshə sə də äkɔ̈ tə̂ ye ə wu əyo tə bandanə, äwä ngbatshe, tshə tê gâ ala əwo ə tê gâ ala ə̂ngû. 16 Mə nâ də ətshə kə atrawaya nə̂ zə, bale, əndje grɔ̂ rəka nə tə̂ ye tro gâ ye.» 17 Jezu kîrə ə pa: «E-e, azü tshe kpəsəye ə̂në e sə sə də lɔsu ne ə sə tə aəmbrʉ azü kɔ! Mə sə kə daka pə ngotə̂ e ʉrrr gorɔ? Mə sə kə ru tshelə əmə tə̂ e ʉrrr gorɔ? E nä də əgblə nə kə əmə mâtəye.» 18 Jezu ngâ kə afrɔ yîrə̂ nə â tshə wûtu lə əgblə nə. Kʉ pə kôto səkɔ, rəka nə kâtə̂ əgblə nə gâ ye.

19 Bale, atrawaya nə də a-Jezu sə̂ kʉtə̂ əndje â əndje nâ trö də ətshə ə yû ətshə ə pa: «Mbrə yekɔ də̂ ä grɔ̂ afrɔ yîrə̂ səkɔ tro kɔ?» 20 Jezu kîrə əpʉ kə əndje ə pa: «Mbrə ə̂në lɔsu e sə kʉ teashe. Djatra əpʉ, mə pa kə e: kədə lɔsu e â sə mə mata ə̂ndjî ayɔ ə̂në əɨrɨ nə kə də̂ mutardə ə̂në ə sə teashe kɔ, e sə kə pa kə kaga səye ə pa: "Äfɔ kotəye ə kä mâ koye", ə sə kə afɔ. Ə̈bə̈ ərə bale sə sə kə ro pâ e ne. [21 Bale, marä tə̂ afrɔ yîrə̂ rə lï ndə kə wutu nə kʉ tə̂ äwä kə yu Ndjapä də kə ru tshelə tə̂ rəgo.]»*17.21 Əpʉ səye sə sə lə alabə̈ aangbrɔ afraka Ndjapä də ama grakə ne.

22 Alɔ ə̂në Jezu də atrawaya nə̂ ye ngbô tə̂ əndje gâ tə̂ nə mâ Galile kɔ, tshə pâ kə əndje ə pa: «Əndje sə kə za Əgblə nə̂ Əzü gâ lə kəna azü. 23 Əndje sə kə wo ətshə, tshə sə kə she tə̂ vəta əlo nə.» Bale, əyo mâ atrawaya nə rô pâ nə.

24 Alɔ ə̂në Jezu də atrawaya nə̂ ye yî kumu əndje mâ Kaprənayɔmə kɔ, aaworɔ ngendja lapɔ Anda Ndjapä nâ gâ ngotə̂ Piarə ə yû ətshə ə pa: «Awoyisə̂ ərə nə̂ e sə sə kə piyi lapɔ Anda Ndjapä nə ne a?» 25 Piarə nə kîrə əpʉ ə pa: «Ayî, tshə sə kə piyi nə.»

Alɔ ə̂në Piarə nə nâ ə lî gâ lə anda gâ ye kɔ, Jezu zâ əpʉ angbʉlînə ə pâ: «Shemɔ, mâ tə̂ lɔsu zə, əde kə lï ndə kə piyi lapɔ kə alayïngerə tshepashɔ səye? Azü əgɔ nə̂ əndje wala atshângâ a?» 26 Piarə nə kîrə əpʉ ə pa: «Atshângâ.» Jezu pâ kə ətshə ə pa: «Rəkɔ, azü əgɔ nə lï lï ndə kə piyi nə ne. 27 Bale, ndə kə pa tshelə əndje ko əndje ko tə̂ əzə̂ ne, nä mâ ala dala ə̂ngû ə wlï yangɔ. Əlî giangû ə̂në bə sə kə za ətshə kɔ, ä tshelə ama ye, bə sə kə sɔtə̂ ngendja. Zä ə pïyi lapɔ nə lə kumu əzə̂ də aəmə kə əndje.»