Mateus 23

Jezu pâ tə̂ aâgbɔ̂ azü əpʉ Ndjapä

1 Bale, Jezu pâ əpʉ kə ə̂kpû azü də atrawaya nə̂ ye ə pa: 2 «Kosəra nə̂ aawoyisə̂ âgbɔ̂ əpʉ nə̂ Mayïzə də ənə̂ Afariza kə də̂ kə yisə̂ tshelə âdâ âgbɔ̂ əpʉ nə̂ Mayïzə kə azü. 3 Rəkɔ, e djï aəpʉ ama əndje ə mä aərə nɔ̂ ə̂në əndje sə kə yisə̂ nə kə e kɔ. Bale, e mä tə̂ e mä mata əndje ne, mbrə ə̂në, əndje sə kə pa əpʉ nə, ə ma tə̂ əndje ma ə lï də nə ne. 4 Ə sə mata ə də, əndje î akongbɔ ə̂në ə lʉ̂ wââ kɔ ə ko gâ lə kumu azü, bale, əndje go goro də ə̂tə̂ əndje də mato kəna əndje bale ne. 5 Əndje sə kə ma aərə nə̂ əndje nɔ̂ ndə kə pa azü wu alane də nə. Əndje sû aya angbede akwa nə̂ əndje ə̂në əndje î gâ tə̂ matshi əndje gâ ndə kəna əndje kɔ gerətshe. Əndje sû aama aləba nə̂ əndje klakpa klakpa. 6 Əndje yində kə sə kʉ gâ ətshinə tə̂ asandaga, kʉ gâ pâ angende tshitshinə lə aanda aangbɔ. 7 Əndje yində nə ə pa azü bla alane lə aangbɔ, əndje e alane "Awoyisə̂ ərə". 8 Bale, ənə̂ e, e pä pä kə azü ə pa əndje e e "Awoyisə̂ ərə" ne, mbrə ə̂në awoyisə̂ ərə nə̂ e sə kʉ bale â e-e nɔ̂, e sə tə alaye azü. 9 E ë ë ə̈bə̈ əzü bale pâ ashɔ ə pa "Abä" ne, mbrə ə̂në Abä e sə kʉ bale, ətshə ə̂në tshə sə mâ lafɔ kɔ. 10 E pä pä kə azü ə pa əndje e e "Makɔndji" ne, mbrə ə̂në, Kristə, Makɔndji nə̂ e sə kʉ bale. 11 Âgbɔ̂ əzü lə takpa tə̂ e nɔ̂ sə tə əyïkosəra nə̂ e. 12 Əzü ə̂në tshə ma tə̂ ye tə âgbɔ̂ əzü, əndje sə kə ma ətshə tə əngʉ əzü. Əzü ə̂në tshə ma tə̂ ye tə əngʉ əzü, əndje sə kə ma ətshə tə âgbɔ̂ əzü.»

Əpʉ əyo gâ pâ aâgbɔ̂ azü əpʉ Ndjapä

13 «Əyo gâ pâ e, aawoyisə̂ âgbɔ̂ əpʉ nə̂ Mayïzə də Afariza, alayïama bishi! E sə kə gbɔ tə̂ äwä Əgɔngerə tshelafɔ tə̂ azü; e-e də ə̂tə̂ e, e li li gâ lə nə ne, â katə̂ äwä ka kə azü ə̂në əndje yîndə kə li gâ lə nə kɔ ne. [14 Əyo gâ pâ e, aawoyisə̂ âgbɔ̂ əpʉ nə̂ Mayïzə də Afariza, alayïama bishi! E sə kə ko aərə tshelə aanda nə̂ ayashe koya nɔ̂, â kwatəndje, e â sə kə yu Ndjapä, e yu Ndjapä nə ʉrrr əndʉ nə dɨ ndə kə pa azü wu e. Mbrə aərə səkɔ, Ndjapä sə kə wa ngbanga gâ pâ e rô pâ nə.]*23.14 Əpʉ səke sə sə lə alabə̈ aangbrɔ afraka Ndjapä də ama grakə ne.

15 «Əyo gâ pâ e, aawoyisə̂ âgbɔ̂ əpʉ də Afariza, alayïama bishi! E sə kə na ana tə̂ ətshe nɔ̂ na na ye pâ ashɔ ndje la ə̂ngû əngbrʉ ndə kə pa e ma ə̈bə̈ əzü bale tə awoza äwä e. Bale, alɔ ə̂në e mâ əzü nə tə əzü nə̂ e gâ ye kɔ, e ma ətshə tə əzü ə̂në tshə lï də ə̂sə̂ əyo äwä bishi ə rô e.

16 «Əyo gâ pâ e, e-e, alayïbula ə̂në e sə kə yisə̂ äwä kə azü kɔ! E pa: "Əzü â dra tə̂ ye də əɨrɨ Anda Ndjapä, ə ma ə̈bə̈ ərə ma ne. Bale, tshə â dra tə̂ ye də əɨrɨ lɔrə ə̂në ə sə lə Anda Ndjapä nə kɔ, kandää, əpʉ nə sə tə âgbɔ̂ əpʉ." 17 Aəndɨ də alayïbula! Ərə yekɔ kə sə tə âgbɔ̂ ərə â rô ə̈bə̈ nə? Lɔrə nə wala Anda Ndjapä nə ə̂në ə mâ â lɔrə nə sə kpî mbrə Ndjapä nə kɔ a? 18 E kwatə̂ e ə pa: "Kədə əzü kə dra tə̂ ye də əɨrɨ gblaka əkrɔ, ə ma ə̈bə̈ ərə ma ne. Bale, kədə tshə dra tə̂ ye də əɨrɨ ərə kə to də əkrɔ nə ə̂në ə sə gâ pâ gblaka nə kɔ, əpʉ nə sə tə âgbɔ̂ əpʉ." 19 Alayïbula! Ərə yekɔ kə sə tə âgbɔ̂ ərə â rô ə̈bə̈ nə? Ərə kə to də əkrɔ nə wala gblaka nə ə̂në ə mâ â ərə kə to də əkrɔ nə sə kpî mbrə Ndjapä nə kɔ a? 20 Rəkɔ, əzü ə̂në tshə dra tə̂ ye də əɨrɨ gblaka, tshə dra tə̂ ye də əɨrɨ gblaka nə ndje gâ ndə aərə nɔ̂ ə̂në ə sə pâ gblaka nə kɔ. 21 Əzü ə̂në tshə dra tə̂ ye də əɨrɨ Anda Ndjapä, tshə dra tə̂ ye də əɨrɨ Anda Ndjapä nə ndje də əɨrɨ Ndjapä ə̂në tshə sə lə Anda Ndjapä nə kɔ. 22 Əzü ə̂në tshə dra tə̂ ye də əɨrɨ tshelafɔ, tshə dra tə̂ ye də əɨrɨ mbata ngerə nə̂ Ndjapä ndje də əɨrɨ Ndjapä ə̂në tshə sə gâ pâ mbata ngerə nə kɔ.

23 «Əyo gâ pâ e, aawoyisə̂ âgbɔ̂ əpʉ də Afariza, alayïama bishi! Mbrə ə̂në e sə kə ko dimə kako aayɔ kəndɨ nə̂ e, bale, e tshi ərə ə̂në ə sə tə âgbɔ̂ ərə ə̂në ə rô ə̂dû aərə kɔ lə âgbɔ̂ əpʉ gâ ye, aərə mata kə ma ərə də äwänə, kə wu əyo azü, kə tɔ popo Ndjapä. Kandää aərə ə̂në e lï ndə kə ma nə kɔ kə sə̂ â ma ə̂dû aərə nə gâ ndə nə. 24 Alayïbula ə̂në e sə kə yisə̂ äwä kə azü kɔ! E sə kə sɨ ə̂ngû gâ lə seke ndə kə pa jenda ro ro ne, bale e sə kə moro agia ə̂në əndje dji əɨrɨ ye ə pa shamo kɔ.

25 «Əyo gâ pâ e, aawoyisə̂ âgbɔ̂ əpʉ də Afariza, alayïama bishi! E sə kə yutu tshepa kopo də sambe, bale, tshelə kopo nə də sambe nə sû də aərə angba də əgo aəmbrʉ aərə gâ ye. 26 Əbə Fariza, əyïbula! Yütu tshelə kopo nə də sambe nə angbʉlînə gâ ye kane ka tshepa nə ndje sə mvo.

27 «Əyo gâ pâ e, aawoyisə̂ âgbɔ̂ əpʉ də Afariza, alayïama bishi! Mbrə ə̂në, e sə mata aə̂dû akuzu ə̂në əndje tshê ə̂mbî əmbru gâ pâ nə â ə fʉ ə fʉ djoko ə̂shû kɔ, bale, â tshelə nə sû də agbagbi akuzu nə də adongo aəfu aərə nɔ̂ kɔ. 28 E-e ndje, gashu, lə ala azü, e sə mata aə̂rɔ̂ azü, bale, djoko lə e, kʉtə̂ afrɔ də aəmbrʉ aərə kə rô pâ nə.

29 «Əyo gâ pâ e, aawoyisə̂ âgbɔ̂ əpʉ də Afariza, alayïama bishi! Mbrə ə̂në e sə kə so aə̂dû aawopandəma Ndjapä, ə sə kə gamba aərə gao də aə̂rɔ̂ aərə gâ pâ aə̂dû aə̂rɔ̂ azü. 30 Mandânə, e pa: "Kədə̂ ä sə̂ leme-e tə̂ tshekɨ alätä ä, ä sə sə kə te gâ ndə əndje ndə kə wo aawopandəma Ndjapä nə ne." 31 Rəkɔ, e sə kə yisə̂ nə də ə̂tə̂ e gashu ə pa, e sə tə aləvu azü ə̂në əndje wô aawopandəma Ndjapä nə kɔ. 32 Ə̂rɔ̂nə! E sə̈ pə tə̂ nə ə mä ə̂dû kosəra ə̂në alätä e vɔ̂tə̂ nə leme-e kɔ. 33 E-e, aəkrɔ, angwa alɔngɔ! E sə kə ma atâ â kpe ngbanga ə̂sə̂ əyo? 34 Âdârə ə̂në, mə sə kə wla aawopandəma Ndjapä, də aawowusə̂ âdâ aərə gâ ndə aawoyisə̂ âgbɔ̂ əpʉ nə̂ Mayïzə kɔ kə sə̂. E sə kə wo alabə̈ nə, ə ku alabə̈ əndje gâ ala masheyɔ, e sə kə da alabə̈ aata əndje də djakwa lə aanda aangbɔ nə̂ e â sə kə ma awlra tə̂ əndje lə gala bale bale na na ye. 35 Bale, kanika ə̈ndjï aə̂rɔ̂ azü nɔ̂ ə̂në ə tû gâ tə̂ ashɔ kɔ sə gâ lə kumu e, ə vɔ̂tə̂ nə tə̂ ə̈ndjï Abalə ə̂në tshə sə̂ tə ə̂rɔ̂ əzü kɔ ʉrrr ndjɔ gâ tə̂ ə̈ndjï Zakari, əgblə nə̂ Barashi, ə̂në e wô ətshə lə əpro tə̂ Anda Ndjapä də gblaka kɔ. 36 Djatra əpʉ, mə pa kə e, ngbanga aərə sə̂ nɔ̂ sə kə te gâ lə kumu azü tshe kpəsəye!»

Jezu gâ ndə gala Jeruzalamə

37 «Azü əgɔ Jeruzalamə! Azü əgɔ Jeruzalamə, e-e ə̂në e wo aawopandəma Ndjapä, ə gbo azü ə̂në Ndjapä wlâ əndje kə e kɔ də badja ndə kə wo əndje kɔ! Äwä ngbatshe, mə yîndə kə ngbo e gâ tə̂ əmə mata ə̂në əyï ngatə ə ngbo aaya nə gâ tshekudu kombo ye kɔ, bale, e yîndə nə yî ne. 38 E wü-a, mandânə səye, Ndjapä kâtə̂ anda nə̂ e kə e ndawu gâ ye. 39 Mbrə ə̂në, mə pa kə e: e sə sə kə wu əmə kwatə̂-e mandânə səye ne ʉrrr ndjɔ gâ tə̂ əlo ə̂në e sə kə pa nə ə pa: "Ndjapä tö ngwarə gâ pâ ətshə ə̂në tshə sə kə na də əɨrɨ Əyïlingû kɔ!"»