17 Bonto ɔmɔɔ nde banto baayalaki aiko abobelɛ: «Bolaki, ngokoyelɛ bona ookimi o loondo, atungyama la bolimo bo bobe bobokityake luumi. 18 Ndye inkuma iya bɔkɔ yobobuta, bobobokake nde babu, bona aolyake mpulo mpe akiɛtɛke baino, byonge biikinde byoketa. Mboobele bakɛndi la wɛ baolye bolimo buuko, yaa tabauha.» 19 Yesu ababelɛ: «Nyo elelo epa la waambi! Tii elaka nɔ eenga emi nkihe la nyo? Ngoluukela botema tii elaka nɔ? Londjele bona ɔkɔ anɛ.» 20 Baboyelɛ bona. Nko bolimo bo bobe bɔɔyɛne Yesu, bopukuhɛ bona la nguya; ayahombɛ nde babu, ayabilingolɛ mpe aolɛ mpulo nde bonya. 21 Yesu aubolɛ ihe eeki bona: «Mbo inɛ ibokelɛ mbula inga?» Mpe ihe abobelɛ: «Ima boboha bookinde. 22 Mpe mbala la mbala, bolimo bo bobe bobobokake nde ntyɛ laa mpe nde bahi itina iki bobolyake. Yaa kaki ɔɔhɔ yobobikya, yaka otokambole, otookele ihɛi!» 23 Yesu abobelɛ: «Itina iitepela wɛ kaki ɔɔhɔ nɔ! Yaa, inkuma yɔɔhɔ yokelama eka bonto oyali la waambi.» 24 Nko aiko, ihe eki bona abobɛ: «Nyumeya! onkambole nde bobya waambi!»
25 Anɛ e ɛnɛ Yesu banto baoye buuke, aangwelɛ bolimo bo bobe mpe abobelɛ: «Wɛ bolimo bɔnɛ bokitya bonto luumi mpe ekinda, nkopa botindo: ola eka bona ɔnɛ mpe tunwake yoya lenkina ekande!» 26 Bolimo bobe bobobɛ, bopukuhɛ bona la nguya, mpe boolɛ. Bona akitɛ lohi angowɛ, banto buuke bayalaki aiko bahangɛ: «Angowɛ.» 27 Yaa Yesu abobutɛ nde lɔbɔ, abouleyɛ mpe bona aemalɛ.
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)