11 Nokudalo, nokuziba kutya Tezi, tobabweta banhu, koga zwatili zwinozibikana kunaMwali, akale ndobimba kuti tozibikana mumiyeyo yenu. 12 Atijikumuzwisuma isu kunamwi kabili koga timumupa zwingata kuti mushiye nasu, kutila kuti mushandule yabo banoshiya nobukulwana bonhu usimoyo uwe. * 13 Nokuti kana tipenga, ngezwaMwali, kana tilimundangalilo jedu jizhele ngozwenu. 14 Nokuti ludo lwaKristo lunotichinga, nokuti tilogunchikana kuti unhu umwempela wakafila bose, nokudalo bose bakafa. 15 Akale iye wakafila bose, kuti yabo bapenyu besizwigalile ibo nokwabo koga begalile iye wakabafila akale akamuswa. 16 Kuva ngweno zwindilambeli, atichinolinga kana aanhi nenzila yobunhu, kojoba noumwe unshaji takabelinga Kristo nenzila yobunhu, koga ngweno atichinondinga alo. 17 Nokudalo, wose umo munaKristo, waba chibumbwa chipya, zwantolo zwapinda, chokomende zwipya zwezha. 18 Zwose yezwi zwinova kunaMwali, munaKristo wakatita kuti tibwilizane naye akale akatipa unshingo wokubwilizana, 19 kuti, munaKristo Mwali wakata kuti ebwilizana nenyika kwaali, esinolaba luchinyo lwabo, akale ebhatisa isu chilayo chokubwilizana. 20 Sezwo tilibamilili baKristo, Mwali unoteteja eshingisa isu. Tomubweta takamilila Kristo, bwilizanani naMwali. 21 Pezhulu pedu Mwali wakoonta luchinyo iye usakabeziba luchinyo, kutila kuti munaiye tibe balolulama baMwali.