O Isus sikavela pe ko but thana
9 [Rano sabajle ko prvo dive taro kurko, koga o Isus uštilo taro mule, prvo sikavgja pe e Marijake tari Magdala, so latar angleder ikalgja efta demonen. 10 Oj geli hem vakergja adava okolenge so sine leja, so tugujnena sine hem rovena. 11 Koga šunge ola deka o Isus dživdo hem deka oj dikhla le, na verujnge la.
12 Palo adava o Isus sikavgja pe ko javer izgled pe duje učenikonge, sar džana sine ko jekh gav. 13 Ola irange pe hem vakerge e javere učenikonge, ama ni len da na verujnge.
14 Palo adava, o Isus sikavgja pe e dešujekhe učenikonge sar hana sine maro zaedno. I opomeningja len so na sine len vera hem soj lengere vile barale, soske na verujnge okolen so dikhle le deka uštilo taro mule.
15 Hem phengja lenge: "Džan ko celo sveto hem propovedinen o evangelije sa e manušenge. 16 Koj ka verujnel hem ka ovel krstimo, ka ovel spasimo, ama koj na verujnela, ka ovel osudimo. 17 A akala znakija ka oven adalencar so ka verujnen: Ko mo anav ka ikalen demonen; ka keren lafi ko neve čhibja; 18 te astarge sapa pe vastencar hem te pile nešto otrovno, nane te ovel lenge ništo; ka čhiven pumare vasta upro nasvale hem ola ka sasljoven."
O Isus voznesinela pe ko nebo
19 Koga phengja akava, o Gospodari o Isus voznesisalilo ko nebo hem bešla tari desno strana e Devleskiri.
20 Hem o učenikija gele ko sa o thana te propovedinen, a o Gospodari kerela sine buti lencar adaleja so potvrdinela sine leskoro lafi e znakoncar.]