1 Cenimeja Teofile, but džene počminge te pišinen bašo adava so ulo maškar amende. 2 Ola pišinge agjar sar so vakerge amenge okola so taro početok sine svedokija hem sine sluge bašo lafi e Devleskoro. 3 Agjar me tuke pišinava sa redoja, adaleske so sa taro početok proveringjum, 4 te šaj oveja sigurno deka čače tano sa adava so sijan sikavdo.

5 Ko vreme koga o Irod sine caro ki Judeja, sine nesavo svešteniko so vikinela pe sine Zaharija taro redo e Avijaskoro. E Zaharijaskiri romni i Elisaveta isto agjar sine taro seme e Aroneskoro. 6 O Zaharija hem i Elisaveta sine pravedna anglo Devel, adaleske so živinge palo sa o zapovedija hem o zakonja e Gospodareskere. 7 Ama len na sine len čhave soske i Elisaveta našti sine te ačhol khamni, a solduj džene više sine phure.

8 Jekh dive koga o Zaharijaskiri grupa taro sveštenikija thargja temjan, togaš o Zaharija da kerela sine pi buti sar svešteniko anglo Devel. 9 Ov palo adeti e sveštenikongoro, ždrepkaja sine birimo te khuvel ko Hrami e Gospodareskoro hem te tharel temjan. 10 Dži kote o Zaharija tharela sine o temjan ko Hrami, sa o manuša molinena pe sine avrik.

11 Togaš e Zaharijaske pojavisalilo angeli e Gospodareskoro, so terdilo ki desno strana taro oltari kote so tharela pe sine o temjan. 12 Koga dikhla le o Zaharija, bunisalilo hem uklingja le dar.

13 A o angeli vakergja leske: "Ma dara, Zaharija! O Devel šungja ti molitva. Ti romni i Elisaveta ka bijanel tuke čhavo, i ka de le o anav Jovan. 14 Ka ove but radosno baši leske hem but džene ka radujnen pe bašo leskoro bijanibe. 15 Adaleske so ka ovel baro manuš anglo Gospodari hem nikat nane te pijel mol hem jako pijbe.* Ov ka ovel pherdo e Sveti Duhoja panda pred te bijangjovel. 16 Ov ka iranel bute Izraelcon anglo Gospodari, lengoro Devel. 17 Ka džal anglo Gospodari sar glasniko ko duho hem ki sila e prorokoskiri e Ilijaskiri. Ka smirinel e daden lengere čhavencar hem okolen so na šunena ka iranel len prema i mudrost e pravednikongiri. Ka spreminel e narodo te oven spremna bašo e Gospodareskoro ajbe."

18 I o Zaharija pučlja e angele: "Sar me ka džanav deka čače ka ovel adava so phengjan? Me sijum phuro hem mi romni da ko berša."

19 A o angeli odgovoringja leske: "Me sijum o Gabrijel, o angeli so tergjola anglo Devel. Ov bičhalgja man te kerav tuja lafi hem te vakerav tuke akava šukar lafi. 20 I akana ka ove laloro hem ka našti te kere lafi dži ko adava dive koga ka ovel, soske na verujngjan me lafende, so ka phergjoven ko pravo vreme."

21 Ko adava momenti o narodo adžikerela sine e Zaharija hem čudingja pe so doborom ačhilo ko Hrami. 22 A koga iklilo o Zaharija, našti sine te kerel lafi. I ola svatinge deka sine le vizija ko Hrami, adaleske so kerela lenge sine vastencar, ama našti kerela sine lafi.

23 Koga završinge o dive tari leskiri služba ko Hrami, o Zaharija irangja pe khere. 24 Palo adava leskiri romni i Elisaveta ačhili khamni hem pandž masek phandla pe ko kher hem vakergja: 25 "O Gospodari kergja te ačhovav khamni. Akana sikavgja mange pi milost hem cidingja mi ladž maškar o manuša."

26 Koga i Elisaveta sine šofto masek khamni, o Devel bičhalgja e angele e Gabrijele ko Galilejsko gradi, Nazaret, 27 ki Marija so sine čhaj hem sine manglardi e Josifeske, so sine taro seme e caroskoro e Davideskoro.

28 Koga alo o angeli, phengja e Marijake: "Radujn tut! O Gospodari tano tuja! Ov tano but milostlivo prema tute!"

29 A i Marija but voznemiringja pe taro leskere lafija, i pučlja pe so značinela akava pozdrav.

30 A o angeli phengja lake: "Ma dara, Marije! Adaleske so arakhlan milost anglo Devel. 31 Tu ka ačhove khamni hem ka bijane čhavo, i ka de le o anav Isus. 32 Ov ka ovel baro hem ka vikinel pe Čhavo e Najbare Devleskoro. O Devel o Gospodari ka del le o troni leskere parapaposkoro e Davideskoro. 33 Hem ov ka carujnel upro pleme e Jakoveskoro zasekogaš hem leskoro carstvo nane te ovel le kraj."

34 Togaš i Marija pučlja e angele: "Sar šaj te ovel adava koga me sijum čhaj?"

35 A o angeli odgovoringja lake: "O Sveti Duh ka hulel upra tute hem i sila e Najbare Devleskiri ka avel upri tute. Adaleske adava čhavo, so ka bijane, ka ovel sveto hem ka vikinel pe Čhavo e Devleskoro. 36 Akje, ti familija i Elisaveta da ko phure berša ačhili khamni hem ka bijanel murš. A oj tani adaja kaske so vakerena sine deka našti te ačhol khamni, a akana i šov masek khamni. 37 Adaleske so o Devel šaj te kerel sa so vakerela!"

38 Togaš i Marija phengja: "Akje me i sluginka e Gospodareskiri, neka ovel spored leskiri vojla."

I o angeli gelo peske latar.

39 Adala dive i Marija spremingja pe hem sigjargja te džal ko ridsko than, ko jekh gradi tari Judeja. 40 Koga resla adathe, khugja ko kher e Zaharijaskoro hem pozdravingja pe e Elisavetaja.

41 Koga i Elisaveta šungja e Marijakoro pozdrav, mrdingja o čhavo lake ko vogi hem i Elisaveta pherdili e Sveti Duhoja. 42 Hem vikingja sa pe glasoja: "Najblagoslovimi sijan tu, Marije, maškar o džuvla hem blagoslovimo o čhavo ko to vogi! 43 Ama kotar mange akaja čest so tu i daj me Gospodareskiri alan ki mande? 44 Adaleske so, koga šungjum to pozdrav, o čhavo tari radost mrdingja mange ko vogi. 45 Blagoslovimi sijan tu, Marije, so verujngjan deka ka phergjol adava so phengja o Gospodari."

46 Togaš i Marija phengja:

"Mi duša slavinela e Gospodare,

47 hem mo duho radujnela pe ko Devel, mo Spasiteli,

48 so ulo milostlivo upri pi ponizno sluginka.

I taro akava dive sa o generacije ka phenen deka sijum blagoslovimi džuvli,

49 adaleske so baro šukaripe kergja mange o Zoralo Devel.

Sveto tano leskoro anav.

50 Ov tano milostlivo e manušenge tari generacija ki generacija

so darana lestar.

51 Pe silno vasteja kergja bare bukja;

rasturingja okolen so kerena pe bare ko pumare srcija.

52 Peravgja e vladitelen taro lengoro tronija,

a vazdingja e poniznon.

53 Čajlargja e bokhalen šukar bukjencar,

a e barvalen mukhla len čuče vastencar.

54 Pomožingja e Izraelconge, pe slugenge.

Na bistergja te ovel milostlivo,

55 e Avraameske hem leskere semeske zasekogaš,

sar so vetingja amare parapaponge."

56 I Marija ačhili ki Elisaveta trin masek, a palo adava irangja pe khere.

57 Koga alo o vreme te bijanel i Elisaveta, bijangja murš. 58 Lakiri familija hem o komšije šunge deka o Gospodari sikavgja lake bari milost hem ola da radujnge pe laja.

59 A koga e čhave sine le ofto dive, ko Zaharija khedinge pe o manuša te obrezinen e čhave, i mangle te den le leskere dadeskoro anav – Zaharija. 60 Ama i Elisaveta phengja: "Na! Leskoro anav ka ovel Jovan!"

61 A ola phenge lake: "Nikoj tari ti familija na vikinela pe agjar."

62 I vastencar pučle e Zaharija savo anav mangela te del pe e čhaveske.

63 Togaš o Zaharija rodingja te den le jekh tikni phal bašo pišiba hem pišingja: "Leskoro anav tano Jovan."

I sarinen čudinge pe.

64 Hem taro jekh puti e Zaharijaskoro muj phravdilo hem šaj sine palem te kerel lafi, i počmingja te slavinel e Devle.

65 Hem uklingja dar sa komšijen. A ko celo ridsko than e Judejakoro kergja pe lafi adalestar so ulo. 66 Sarinen so šunge adava, pučena pe sine: "So ka ovel akale čhavestar?" Adaleske so o vas e Gospodareskoro sine leja.

67 A o Zaharija, e Jovaneskoro dad, pherdilo e Sveti Duhoja hem prorokujngja:

68 "Slava e Gospodareske e Izraeleskere Devleske,

soske alo hem otkupingja pe narodo.

69 Vazdingja amenge zoralo Spasiteli,

taro seme e caroskoro e Davideskoro, pe slugaskoro.

70 Sar so vakergja panda angleder,

preku pe sveta prorokija,

71 vazdingja amenge zoralo Spasiteli te spasinel amen taro amare dušmajna,

hem sa e manušengere vastendar so mrzinena amen.

72 Sikavgja pi milost amare parapaponge,

hem phergja po sveto zavet,

73 i sovli so dengja e Avraameske amare parapaposke:

74 te ikalel amen amare dušmanengere vastendar,

te šaj služinaja leske bizi dar,

75 ko svetost hem ki pravednost anglo leste sa dži kote sijem dživde.

76 A tu Jovan, mo čhavo, ka ove vikimo proroko e Najbareskoro,

adaleske so ka dža anglo Gospodari te spremine leske o drumo.

77 Ka sikave leskere narodon sar te pendžaren o spasenije

preku o oprostiba taro lengere grevija.

78 Adaleske so e Devleskoro srce tano milostlivo,

preku so o kham ka avel ki amende taro nebo

79 te šaj te svetinel okolenge so živinena ki temnina

hem ki senka e meribaskiri,

te vodinel amen ko drumo e mireskoro."

80 A o čhavo o Jovan bajrola sine hem ovela sine silno ko duho. Koga barilo, živinela sine ki pustina sa dži kote na iklilo anglo Izraelcija te propovedinel.