1 Avela sine paše o prazniko e Beskvasno Mareskoro so vikinela pe sine Pasha. 2 O prvosveštenikija hem o učitejla e Zakoneskere rodena sine sar te mudaren e Isuse, ama darana sine taro narodo.

3 Togaš o Beng khugja ko Juda, so vikinela pe Iskariot, so sine jekh taro dešuduj apostojla. 4 Ov gelo ko prvosveštenikija hem ko čuvajra e Hrameskere hem dogovoringja pe lencar sar te predajnel e Isuse. 5 Koga ola šunge adava, radujnge pe hem vakerge leske deka ka den le pare. 6 Ov soglasingja pe hem rodela sine šužo momenti te predajnel e Isuse koga nane te ovel i gužva uza leste.

7 Koga alo o prvo dive taro prazniko e Beskvasno Mareske, ko savo trebela sine te čhinen e bakhre baši Pasha, 8 o Isus bičhalgja e Petare hem e Jovane vakerindor: "Džan hem spreminen amenge te ha o hajbe e Pashakoro!"

9 Ola pučle le: "Kaj mangeja te kera o hajbe?"

10 O Isus odgovoringja lenge: "Koga ka khuven ko gradi, ka arakhen jekh manuš so phiravela pani ko bukali. Džan pala leste hem ko kova kher ka khuvel, 11 vakeren e gazdaske: ‘O učiteli pučela ki savi soba ka hal pe učenikoncar o hajbe baši Pasha?’ 12 Ov ka sikavel tumenge i bari upruni soba soj više spremimi. Adathe keren amenge o hajbe."

13 I ola gele hem arakhle agjar sar so phengja lenge o Isus hem adathe kerge o hajbe e Pashakoro.

14 Koga alo o vreme, o Isus alo uza ko astali pe apostolencar.

15 I phengja lenge: "Kozom manglum te hav akaja Pasha tumencar angleder te cidav sa o pharipe. 16 Adaleske so vakerava tumenge, nane te hav više i Pasha sa dži kote na phergjola ko carstvo e Devleskoro."

17 Togaš lela i čaša, blagodaringja hem vakergja e apostolenge: "Len akaja mol hem delinen la maškar tumende. 18 Adaleske so vakerava tumenge, nane te pijav više mol, sa dži kote na avela o carstvo e Devleskoro."

19 I lela o maro o Isus, blagodaringja, phagla le hem dengja e apostolenge vakerindor: "Akavaj mo telo so dela pe baši tumenge. Keren akava te setinen tumen ki mande."

20 Isto agjar, pali večera lela i čaša e mojlaja hem phengja: "Akaja čaša e mojlaja tano o Nevo Zavet ko mo rat, so čhorgjola tumenge.✝ 21 Ama akje, o manuš so predajngja man tano mancar ki sofra. 22 Adaleske so o Čhavo Manušeskoro mora te merel sar soj vakerdo, ama pharo adale manušeske so ka predajnel le!" 23 I o učenikija počminge te pučen pe maškar peste, koj tano adava lendar so ka kerel akava.

24 I o učenikija počminge te akošen pe koj tano lendar najbaro.

25 A o Isus phengja lenge: "Javere nacijengere cajra so na džanena e Devle vladinena upro lende hem o upravnikija da lengere vladinena silaja upro lende hem vikinena len ‘manuša so kerena šukaripe’. 26 Ama tumen ma oven asavke! Nego, o najbaro maškar tumende, neka ovel najtikno, a o vodači neka ovel sar sluga. 27 Koj tano pobaro? Adava soj ki sofra ili okova so služinela? Nane li adava soj tano uza ki sofra? Ama me sijum maškar tumende sar okova so služinela. 28 A tumen sijen sine adala so tergjona sine mancar ko me iskušenia. 29 I me dava tumen o carstvo, sar so mo Dad dengja man, 30 te šaj te han hem te pijen ko mo astali ko mo carstvo hem te bešen ko tronija te sudinen upro dešuduj plemija e Izraeleskere."

31 O Isus phengja: "Simone, Simone, akje, o Beng rodingja te iskušinel tumen sar koga sejnela pe o giv ki sita. 32 Ama me molingjum man tuke te na našave ti vera. A tu, koga ka pokajne tut hem ka irane tut ki mande, ohrabrin te phralen."

33 Ama o Petar odgovoringja leske: "Gospode, me sijum spremno te džav tuja hem ko zatvor hem ko meriba."

34 A o Isus odgovoringja leske: "Vakerava tuke, Petar, avdive angleder o bašno te gilavel tu trin puti ka phene deka na pendžareja man."

35 I o Isus pučlja e apostolen: "Koga bičhalgjum tumen ko drumo bizo kesa parencar, bizo torba hem bizo javera sandale, falingja li nešto tumenge?"

Ola odgovoringe: "Ništo."

36 Togaš o Isus vakergja lenge: "Ama akana kas isi kesa parencar, neka lel la! Isto agjar i torba da! A kas nane čhurik, neka bikinel po mantili hem neka kinel peske jekh čhurik. 37 Soske vakerava tumenge, mora te phergjol adava soj mandar pišimo ko Sveto Lil:

‘Dikhle le sar jekh kriminalco.’✝

Čače adava soj pišimo baši mange phergjola."

38 A ola vakerge: "Gospode, akje isi amen duj čhurika!"

I ov odgovoringja: "Dovolno i."

39 I o Isus iklilo adathar hem sar stalno gelo ki Maslinovo Gora. A leja gele leskere učenikija. 40 Koga resla adathe, vakergja lenge: "Molinen tumen te na peren ko iskušenie!"

41 I cidingja pe lendar, doborom kozom so šaj te frdel pe o bar, pelo ko kočaka hem molingja pe 42 vakerindor: "Dade, te manglan cide mandar akaja čaša e pharipaja, ama neka ovel ti vojla, a na mli." 43 Togaš pojavisalilo angeli taro nebo hem ohrabringja le. 44 A koga sine leske po pharo, molingja pe po silno, a leskoro poti sine sar kapke rat so perena sine ki phuv.

45 Koga uštilo tari molitva, irangja pe ko pe učenikija hem arakhla len sar sovena, adaleske so sine umorna tari žal. 46 I pučlja len: "Soske sovena? Ušten hem molinen tumen te na peren ko iskušenie!"

47 Dži kote o Isus panda kerela sine lafi, ale ki leste but manuša, so angja len o Juda, jekh taro dešuduj apostojla. Ov alo uza ko Isus te čuminel le ki čham. 48 A o Isus pučlja le: "Juda, čumindor li ka predajne e Čhave Manušeskere?"

49 Koga o učenikija e Isuseskere dikhle so ka ovel, pučle le: "Gospode, te khuva li len čhurikencar?"

50 I jekh lendar khugja e bare sveštenikoskere sluga hem čhingja leskoro desno kan.

51 A o Isus odgovoringja pe učenikonge: "Ačhoven, mukhen više akava!" I čhigja po vas upro leskoro kan hem sasljargja le.

52 Togaš o Isus phengja okolenge so ale te astaren le, e prvosveštenikonge, e čuvarenge taro Hrami hem e starešinenge: "Sar buntovnikoske ko than alen čhurikencar hem kaštencar te astaren man. 53 Sekova dive sijum sine tumencar ko Hrami hem tumen na astargjen man. Ama akavaj tumaro vreme hem i sila e temninakiri vladinela."

54 I astarge e Isuse hem adathar legarge le ko kher e bare sveštenikoske. Ama o Petar duraldan džala sine pala lende. 55 Koga nekoj tharge jag maškar ko dvoro hem bešle uza late, o Petar da bešla uza ki jag lencar.

56 I nesavi slugjinka dikhla e Petare sar bešela uza ki jag, dikhla le šukar hem phengja: "Akava da manuš sine e Isuseja!"

57 Ama ov otkažisalilo vakerindor: "Manušnije, na pendžarava le."

58 Na nakhla but palo adava, nesavo javer manuš dikhla le hem phengja leske: "Tu da sijan jekh lendar!"

A o Petar odgovoringja: "Manušeja, na sijum!"

59 Koga nakhla paše jekh sati, nesavo javer počmingja te tvrdinel vakerindor: "Čače akava da manuš sine e Isuseja, soske ov da tano Galilejco."

60 A o Petar odgovoringja: "Manušeja, na džanava bašo so pheneja!"

I dži kote vakerela sine adava, odma o bašno gilagja.

61 Togaš o Gospodari o Isus irangja pe hem dikhla e Petare. A ov setingja pe ko lafija e Isuseskere so phengja leske: "Avdive angleder o bašno te gilavel, tu trin puti ka phene deka na pendžareja man." 62 I iklilo avrik hem silno rungja.

63 O čuvajra so arakhena sine e Isus, počminge te asan leske hem te maren le. 64 Phandle leskere jakha hem phenge: "Prorokujn! Koj khugja tut?" 65 I bute javere lafencar uvredžinena sine e Isuse.

66 Koga phravdilo o sabaj, khedisalile o starešine e narodoskere; o prvosveštenikija hem o učitejla e Zakoneskere, ange e Isus anglo Evrejsko Sovet, 67 hem phenge leske: "Ako tu sijan o Hristos, vaker amenge!"

A ov odgovoringja: "Ako phengjum tumenge, nane te verujnen, 68 i te pučljum tumen, nane te odgovorinen. 69 Ama taro akava dive, o Čhavo Manušeskoro ka bešela tari desno strana e Najsilno Devleskiri."

70 I sarine pučle le: "Znači tu sijan o Čhavo e Devleskoro?"

A ov odgovoringja: "Agjar i sar so vakerena: Me sijum."

71 Togaš ola vakerge: "Na trebela amen više svedokija. Sarine amen šungjem so ov korkori vakergja!"