1 Koga o Isus završingja pe lafencar anglo manuša, khugja ko gradi Kapernaum. 2 A jekh Rimsko kapetani sine le sluga, so but poštojnela le sine, a o sluga sine meribaja jekh. 3 I koga o kapetani šungja bašo Isus, bičhalgja ki leste nesave Evrejska starešinen te molinen le te avel te sasljarel leskere sluga.

4 Koga ale ko Isus but molinge le vakerindor: "Ov zaslužinela te kere leske adava, 5 adaleske so ov mangela amare narodo hem kergja amenge i sinagoga."

6 I o Isus gelo lencar.

Koga sine paše uza ko kher, o kapetani bičhalgja leske pe amalen vakerindor: "Gospode, ma mučin tut, soske na zaslužinava te ave me khereste. 7 Adaleske so me na dikhava man dostojno te avav dži ki tute. Nego vaker samo jekh lafi hem mo sluga ka sasljol. 8 Soske me da sijum manuš telo avtoriteti, hem isi man vojnikija teli mande. Koga phenava jekheske: ‘Dža’ – ov džala, a javereske: ‘Ava’ – ov avela. Hem koga vakerava me slugaske: ‘Ker akava’ – ov kerela."

9 Koga šungja adava o Isus, čudingja pe, irangja pe ko narodo so džana sine pala leste hem phengja: "Vakerava tumenge, na arakhlum nikas ko Izrael, te ovel le doborom vera."

10 Togaš o manuša so sine bičhavde, irange pe ko kher hem arakhle e sluga sasto.

11 Palo adava, o Isus gelo ko gradi so vikinela pe sine Nain, a leja džana sine leskere učenikija hem but narodo. 12 I koga alo paše uza ko udar e gradeskoro, nesave manuša legarena sine jekhe terne čhave, so sine mulo. Ov sine jekh pe dajake, a oj sine udovica. But džene džana sine laja te parunen e čhave.

13 Koga dikhla la o Gospodari o Isus, pelo leske žal baši lake hem phengja lake: "Ma rov!"

14 Togaš alo paše hem pipingja i nosilka kote so sine o čhavo, i okola so phiravena le sine ačhile.

O Isus phengja: "Terneja, tuke vakerava ušti!"

15 I o mulo čhavo uštilo ki bul hem počmingja te kerel lafi hem o Isus dengja le leskere dajake.

16 Togaš sarinen darandile hem slavinge e Devle vakerindor: "Baro proroko pojavingja pe maškar amende!" hem: "O Devel alo te pomožinel pe narodo!"

17 I adava šundilo bašo Isus ki celo phuv e Evrejengiri hem ko sa o pašutne thana.

18 O učenikija e Jovane Krstiteleskere vakerge leske sa adava so ulo. Togaš o Jovan vikingja ki peste pe duje učenikon, 19 hem bičhalgja len ko Gospodari o Isus vakerindor: "Tu li sijan adava so trebela te avel ili te adžikera javere?"

20 Koga ale ko Isus o manuša vakerge: "O Jovan Krstitel bičhalgja amen ki tute te puča tut: ‘Tu li sijan adava so trebela te avel ili te adžikera javere?’ "

21 A ko adava momenti o Isus sasljargja buten taro nasvalipe, taro muke hem taro lošna duhija, hem bute korolen dengja te dikhen.

22 Togaš o Isus odgovoringja e Jovaneskere učenikonge: "Džan hem vakeren e Jovaneske so dikhlen hem so šungjen: o korole dikhena, o bange phirena, okolen so isi len lepra sasljona, o kašuke šunena, o mule uštena, hem o evangelije propovedinela pe e čorolenge. 23 Hem blagoslovimo tano sekoj so na našavela pi vera ki mande."

24 A koga gele peske e Jovaneskere učenikija, o Isus počmingja te vakerel e manušenge bašo Jovan: "So iklilen te dikhen ki pustina? I trska li so phudela la i bavlal? 25 Ako na, so iklilen te dikhen? Manuš uravdo ko šuže šeja? Na, okola so phiravena skupa šeja hem so živinena ko luksuz tane ko carska palate. 26 Ili so iklilen te dikhen? E proroko li? Oja, vakerava tumenge, ov tano poviše taro proroko. 27 Ov tano akava baši kaske sine pišimo:

‘Akje, me bičhavava me glasniko angla tute,

so ka spreminel to drumo angla tute✝.’

28 Vakerava tumenge, maškar sa o manuša soj bijame nijekh nane pobaro taro Jovan Krstitel, ama sekoj soj najtikno ko carstvo e Devleskoro tano pobaro lestar."

29 Koga šunge o lafija e Isuseskere sa o manuša dži o danočnikija, priznajnenge deka e Devleskoro drumo tano čačutno, adaleske so sine krstime e Jovanestar. 30 Ama o fariseja hem o učitejla e Zakoneskere odbinge e Devleskoro plani baši pumenge, adaleske so na sine krstime taro Jovan.

31 I o Isus phengja: "Togaš soleja te sporedinav akaja generacija? Soleja tani slično? 32 Ola tane sar čhave so bešena ko pazajra hem vakerena jekh jekheske:

‘Bašalgjem tumenge ki flejta,

a na khelgjen.

Gilagjem tumenge tažna gijla,

a na rungjen.’

33 Soske koga alo o Jovan Krstitel, ni hala ni pila sar javera, a tumen vakerena: ‘Isi le demoni.’ 34 Alo o Čhavo Manušeskoro, hala hem pijela, a tumen vakerena: ‘Akje o bokhalo hem o pijanica, amal e danočnikongoro hem e javere grešnikongoro.’ 35 Ama i mudrost dokažinela pe taro lakere čhave."

36 Jekh taro fariseja so sine leskoro anav Simon vikingja e Isuse te avel te hal ki leste. Ov khugja ko kher e farisejeske hem alo uza ko astali. 37 I akje ko adava gradi sine jekh džuvli so džanela pe deka sine grešnica. Koga šungja deka o Isus hala ko kher e farisejeskoro, ali hem angja šiši kerdo taro mermeri, a andre ki leste sine mirizlivo ujle. 38 I terdindor uza leskere pre, rungja hem počmingja te sapankerel leskere pre pe asvencar hem kosla len pe balencar. Palo adava čumingja leskere pre hem makhla len e ujleja.

39 Koga dikhla adava o farisejco so vikingja le, vakergja ki peste: "Ako akava manuš tano proroko, ka džanel sine koj hem savi tani akaja džuvli so pipinela le – deka tani grešnica."

40 A o Isus odgovoringja leske: "Simone, isi man nešto te phenav tuke."

A ov phengja leske: "Vaker učitele."

41 I o Isus phengja leske: "Duj džene dužinena sine pare jekhe manušeske so dela sine pare ko zaem. Jekh dužinela leske sine panšel Rimska dinajra*, a o dujto pinda*. 42 Adaleske so o solduj na sine len te iranen leske, ov oprostingja lenge sa o dugo. Koj lendar ka mangel le poviše?"

43 O Simon odgovoringja: "Mislinava deka okoleske so sine le pobaro dugo."

I o Isus phengja leske: "Oja, šukar phengjan."

44 Togaš irangja pe ki džuvli hem phengja e Simoneske: "Dikheja li akale džuvla? Khugjum ko to kher, tu pani na dengjan man me prenge, a oj sapankergja me pre pe asvencar hem kosla len pe balencar. 45 Tu na pozdravingjan man čumibaja, a oj sar khugjum na čhinagja te čuminel me pre. 46 Tu na makhla mo šero ujleja, a oj makhla me pre mirizlivo ujleja. 47 Adaleske phenava tuke, oj sikavgja but mangipe, adaleske soj oprostime lake but grevija. Ama kaske soj oprostimo hari, hari mangela."

48 Togaš o Isus phengja adale džuvlake: "Oprostime tane te grevija."

49 A okola manuša so sine uza ko astali počminge te vakeren maškar peste: "Koj akava so šaj o grevija da te oprostinel?"

50 Togaš o Isus vakergja adale džuvlake: "Ti vera spasingja tut. Dža tuke mireja."