1 Jekh dive, dži kote o Isus sikavela sine e manušen ko dvoro e Hrameskoro hem propovedinela sine o evangelije, ale ki leste o prvosveštenikija, o učitejla e Zakoneskere hem o starešine 2 hem pučle le: "Vaker amenge kotar tuke akava avtoriteti te kere akala bukja? Koj dengja tut pravo te kere akava?"

3 O Isus odgovoringja lenge: "Ka pučav tumen me da nešto, hem odgovorinen mange: 4 Kotar e Jovaneske o avtoriteti te krstinel – taro Devel ili taro manuš?"

5 A ola počminge te pučen pe hem te keren lafi maškar peste: "Ako vakergjem: ‘Taro Devel,’ ka vakerel, ‘Soske na verujngjen le?’ 6 Ama ako vakergjem: ‘Taro manuš’, sa o manuša ka mudaren amen barencar, soske sarine tane sigurna deka o Jovan sine proroko."

7 I odgovoringe e Isuseske: "Na džanaja koj dengja le avtoriteti."

8 A o Isus phengja lenge: "Ni me da na phenava tumenge kotar mange pravo te kerav sa akava."

9 Togaš o Isus vakergja e narodoske akaja parabola: "Jekh manuš sadingja drakha, dengja le ki kirija nesave lozarenge hem gelo ko drumo ko but vreme. 10 I koga alo vreme te kheden o drakha, bičhalgja e sluga ko lozajra te den le taro plodija e drakhakoro. Ama o lozajra marge le hem bičhalge le palal čuče vastencar. 11 Ov bičhalgja javere sluga, ama ola le da marge, ladžakerge le hem bičhalge le palal čuče vastencar. 12 Ov bičhalgja e trito da sluga ki lende, ola le da raninge le hem frdinge le avrik taro adava than.

13 Togaš o gazda e drakhengoro phengja: ‘So te kerav? Ka bičhavav me mangle čhave ki lende. Šaj ola ka poštojnen me čhave.’

14 Ama o lozajra koga dikhle leskere čhave, dogovoringe pe maškar peste: ‘Akavaj o nasledniko. Ajde te mudara le hem leskoro nasledstvo ka ačhol amenge.’ 15 I frdinge le avrik taro adava than hem mudarge le.

So ka kerel o gazda e drakhengoro adale lozarenge? 16 Ka avel hem ka mudarel adale lozaren, a o drakha ka del len javerenge."

Adala so šunge akaja parabola, vakerge: "Ma te del o Devel adava te ovel!"

17 O Isus dikhla ki lende hem phengja: "A so značinela adava soj pišimo ko Sveto Lil:

‘O bar so sine frdimo taro zidajra

adava bar ulo najvažno bar e khereskoro’? ✝

18 Sekoj so ka perel ko akava bar ka ovel phago ko kotora, a upra kaste ka perel adava bar ka ovel mečimo."

19 A o učitejla e Zakoneskere hem o prvosveštenikija rodena sine odma te astaren e Isuse, adaleske so džanena sine deka akaja parabola vakergja lenge, ama darana sine taro narodo.

20 A o učitejla e Zakoneskere hem o prvosveštenikija pratinena sine e Isuse. Bičhalge ki leste špijonen, so kerena pe sine iskrena, sar te astaren e Isuse ko lafi, te šaj te predajnen le ko upravniko e Rimeskoro te sudinel le.

21 I o špijojna pučle e Isuse: "Učitele, džanaja deka vakereja o čačipe hem na ikereja nikaskiri strana, soske na dikheja koj tano koj, nego čače sikaveja o drumo e Devleskoro. 22 Trebela li te da e Cezareske o danok ili na?"

23 A o Isus džangja deka tane hovavne, i phengja lenge: 24 "Sikav mange o dinari soleja platinena o danok. Kaskiri slika hem kaskoro anav tano ko dinari?"

A ola phenge: "E Cezareskoro."

25 Togaš o Isus vakergja lenge: "Adava soj e Cezareskoro, den le e Cezareske, a adava soj e Devleskoro, den le e Devleske."

26 Hem našti sine o špijojna te astaren e Isuse ko adava lafi so vakergja anglo narodo, i kjutinge adaleske so sine čudime taro leskoro odgovor.

27 I ale nesave taro sadukeja, so vakerena sine deka nane uštibe taro mule, i pučle e Isuse: 28 "Učitele, o Mojsej pišingja amenge, ako mulo jekh manuš hem mukhla pala peste romni bizo čhave, leskoro phral trebela te le pe bojra romnake, te šaj oj te bijanel čhave so ka ovel nasledniko e muleskoro. 29 Agjar sine efta phrajla. O prvo lela romni hem mulo, a pala peste na mukhla čhaven. 30 O dujto phral lela pe phraleskere romna, hem ov da mulo, a pala peste na mukhla čhaven. 31 Togaš o trito phral lela pe phraleskere romna, i agjar kerge sa o efta phrajla. I ki krajka nijekh taro efta phrajla na mukhle pala peste čhaven. 32 Ki krajka muli i romni da. 33 Kaskiri romni ka ovel oj, koga ka uštel pe taro mule, a sa o phrajla ikerge la?"

34 O Isus odgovoringja lenge: "O manuša taro akava sveto lena pe hem ženinena pe. 35 Ama okola so ka oven dostojna te dobinen okova sveto hem so ka oven vazdime taro mule, nane te len pe. 36 Adaleske so našti više te meren: soske ka oven sar angejla. Ola tane e Devleskere čhave, soske o Devel ka vazdel len taro mule. 37 A deka o mule uštena, sikavgja o Mojsej ko Sveto Lil so pišinela sine baši grmuška so thablola sine. Adathe bašo Gospodari phenela deka tano ‘Devel e Avraameskoro, e Isakoskoro hem e Jakoveskoro’ iako ola togaš sine mule.✝ 38 Ov nane Devel e mulengoro, nego e dživdengoro. Adaleske so ki leste sarine tane dživde."

39 Nesave učitejla e Zakoneskere vakerge e Isuseske: "Učitele šukar vakergjan!"

40 Palo adava nikoj više na alo te pučel le.

41 Togaš o Isus pučlja okolen so šunena le sine: "Soske vakerena deka o Hristos tano čhavo e Davideskoro? 42 Koga korkori o David phenela ko lil taro Psalmija:

‘O Gospodari phengja me Gospodareske:

Beš tari mi desno strana,

43 sa dži kote na čhivava te dušmanen

telo te pre.’✝

44 Ako o David vikingja le ‘Gospode’ sar šaj togaš o Hristos te ovel leskoro čhavo?"

45 Togaš anglo sa o manuša, o Isus vakergja pe učenikonge: 46 "Pazinen tumen taro učitejla e Zakoneskere! Ola mangena te phiren uravde ko skupa šeja, hem te pozdravinen len o manuša ko pazari. Mangena te bešen ko prva thana ko sinagoge hem ko najšukar thana ko hajbe pijbe. 47 Hana o barvalipe e udovicengoro hem molinena pe bare molitve te sikaven pe deka tane pobožna. Akala manuša ka oven but posilno kaznime."