1 Palo adava, o Gospodari o Isus biringja javere eftavardešu dujen učenikon hem bičhalgja len duj po duj angla peste ko sa o gradija hem o thana kote so ov mangla te džal, 2 vakerindor: "I žetva tani bari ama rabotnikija isi hari. Adaleske, molinen tumare Gospodare e žetvakoro te bičhavel rabotnikija ki pi niva baši žetva. 3 Džan! Akje, bičhavav tumen sar bakhre maškar o ruva. 4 Ma len tumencar kesa parencar, ni torba, ni javera sandale. I ma našaven tumaro vreme agjar so ka tergjoven te pozdravinen tumen nekasaja ko drumo.

5 Koga ka khuven ko nesavo kher, prvo vakeren: ‘Mir akale khereste.’ 6 Ako isi nekoj so mangela mir, tumaro mir neka ačhol leja, a te na mangla mir, tumaro mir ka iranel pe tumende. 7 Koga ka oven adale khereste, ačhoven leste hem ma džan taro adava kher ko javer, nego han hem pijen adava so ka ikalen tumenge, soske o rabotniko zaslužinela pi plata.

8 Koga ka khuven ko nesavo gradi hem ka priminen tumen, han adava so ka ikalen angli tumende. 9 Sasljaren e nasvalen adathe hem vakeren lenge: ‘Alo tumenge paše o carstvo e Devleskoro!’ 10 Ama, ako khugjen ko nesavo gradi, a na priminge tumen, ikloven ko leskere ulice hem vakeren: 11 ‘I prašina taro tumaro gradi so pipinge la amare pre, amen kosaja la sar znako deka nane amen ništo tumencar. Ama, džanen akava: alo paše o carstvo e Devleskoro!’ 12 Vakerava tumenge polokhe ka ovel e Sodomeske ko sudno dive, nego akale gradeske."

13 "Pharo tuke, Horazin! Pharo tuke, Vitsaida! Soske, o čudija so ule tumende te oven sine kerde ko Tir hem Sidon, ola angleder ka pokajnen pe sine hem ka uraven pe ko vreke hem ka čhiven pravo upro pumare šere. 14 Ama e Tireske hem e Sidoneske ka ovel polokhe ko sudno dive nego tumenge. 15 A tu, Kapernaume, ka ove li vazdimo dži ko nebo? Na, tu ka hule dži ko than e mulengoro."

16 Togaš phengja pe učenikonge: "Koj šunela tumen, šunela man. A koj odbinela tumen, odbinela man. A koj odbinela man, odbinela okole so bičhalgja man."

17 Koga o eftavardešu duj učenikija irange pe taro drumo radosna, phenge e Isuseske: "Gospode, ko to anav o demojna da pokorinena pe amenge!"

18 A ov odgovoringja lenge: "Dikhlum e Benge sar perela taro nebo sar gromi. 19 Akje, dengjum tumen avtoriteti te gazinen e sapen hem e škorpijen hem te vladinen upri celo sila e dušmaneskiri hem ništo nane te ovel tumenge lošno. 20 Ama ma radujnen tumen so o lošna duhija pokorinena pe tumenge, nego radujnen tumen so tumare anava tane pišime ko nebo."

21 Togaš o Isus radujngja pe preku o Sveti Duh hem phengja: "Slavinava tut, Dade, Gospode e neboskoro hem e phuvijakoro, soske garagjan akava taro mudra hem taro učime, hem sikavgjan le okolenge soj tane sar tikne čhave. Oja, Dade, džanava deka kergjan adava adaleske so agjar manglan.

22 Sa i mange dendo taro mo Dad. Nikoj na džanela e Čhave, osven o Dad, hem nikoj na džanela e Dade, osven o Čhavo hem okolenge so o Čhavo birinela te sikavel le."

23 Togaš irangja pe ko pe učenikija hem phengja lenge: "Blagoslovime tane o jakha so dikhena adava so tumen dikhena. 24 Adaleske so vakerava tumenge deka but prorokija hem cajra mangle te dikhen adava so tumen dikhena, ama na dikhle, hem te šunen adava so tumen šunena, ama na šunge."

25 Jekh dive, jekh učiteli e Zakoneskoro uštilo te iskušinel e Isus, pučindor: "Učitele, so trebela te kerav te šaj te nasledinav o večno životo?"

26 I o Isus odgovoringja leske: "Soj pišimo ko Zakoni? So čitineja adathe?"

27 A ov odgovoringja: "Mang e Gospodare te Devle sa te srceja, sa te dušaja, sa te silaja hem sa te gogjaja✝ hem mang te pašutne sar tut so mangeja."✝

28 O Isus phengja leske: "Šukar vakergjan. Ker agjar hem ka živine."

29 Ama o učiteli e Zakoneskoro mangla te opravdinel pe i pučlja e Isuse: "A koj tano mo pašutno?"

30 A ko adava o Isus odgovoringja leske: "Jekh manuš, dži kote hulela sine taro Erusalim ko Erihon, sine napadimo taro čora. Ola marge le silno hem hulage leskere šeja hem gele peske, a e manuše mukhle le ko drumo ekvaš mulo.

31 Ko adava momenti nakhla nesavo svešteniko so hulela sine taro adava drumo, i koga dikhla adale manuše nakhla tari javer strana. 32 Isto agjar da nesavo leviti koga alo ko adava than hem dikhla e manuše pašlo, nakhla tari javer strana e drumoskiri.

33 Ama sine jekh Samarijanco so nakhela sine taro adava drumo. Koga resla ko adava than kote so pašlola sine o manuš, dikhla le, i pelo leske žal baši leske. 34 A koga alo uza leste, makhla leskere rane ujleja hem mojlaja hem pakjargja len. Palo adava uklargja le upro leskoro her hem legargja le ki jekh gostilnica, i adathe grižingja pe leske. 35 Tajsutno dive ikalgja duj srebrena pare hem dengja len e manušeske tari gostilnica hem vakergja leske: ‘Arakh akale manuše, hem sa so ka trošine poviše, ka platinav tuke koga ka iranav man taro drumo.’ "

36 Palo akava o Isus pučlja e učitele taro Zakoni: "So mislineja? Koj taro akala trin sine o pašutno adaleskoro so sine napadimo taro čora?"

37 Ov odgovoringja: "Okova so žalingja le."

Togaš o Isus phengja leske: "Oja, tu da dža hem ker agjar."

38 Dži kote o Isus hem leskere učenikija džana sine ko Erusalim, khuge ko nesavo gav, kote so živinela sine nesavi džuvli so lakoro anav sine Marta. Oj primingja len ko po kher. 39 La sine la phen so lakoro anav sine Marija, so bešela sine uza e Gospodareskere e Isuseskere pre hem šunela sine o lafija leskere.

40 Ama i Marta sine zafatimi ko sa o strane so trebela sine te spreminel pe, i ali uza ko Isus hem pučlja le: "Gospode, nane li tuke gajle so mi phen mukhla man korkori te kerav buti? Vaker lake te pomožinel man!"

41 A o Gospodari odgovoringja lake: "Marto, Marto! Tu but sekirineja tu hem voznemirineja tut bašo but bukja, 42 ama samo jekh buti trebela. I Marija biringja adava soj pošukar, i adava nane te lel pe latar."