1 Jekh sabota, o Isus gelo ko kher ko nesavo farisejsko vodači te hal. Sarinen so sine adathe, šukar pratinena le sine, 2 adaleske so adathe anglo leste sine jekh nasvalo manuš, so leskere vasta hem leskere pre sine pherde pani.

3 O Isus pučlja e farisejen hem e učitelen e Zakoneskere: "Dozvolimo li te sasljarel pe ki sabota ili na?" 4 Ama ola kjutinena sine. Togaš o Isus čhigja po vas upro nasvalo manuš, sasljargja le hem mukhla le te džal. 5 I pučlja len: "Koj tumendar ako leskoro čhavo ili guruv pelo ko bunari ki sabota, nane li odma te ikalel le adathar?"

6 Ama ola na sine len so te odgovorinen ko adava.

7 Koga dikhla o Isus sar o gostija birinena o najšukar thana ko astali, vakergja lenge akaja parabola: 8 "Koga nekoj ka kaninel tut ko bijav, ma beš ko najšukar than, soske šaj tano kanimo nesavo manuš soj tano popoštojmo tutar. 9 Togaš o gazda so kaningja hem tut hem le ka vakerel tuke: ‘Ušti taro leskoro than.’ Togaš ka ove ladžardo, i ka dža te beše ko posledno than. 10 Ama, koga sijan kanimo, dža hem beš ko posledno than. I koga ka dikhel adava o gazda ka vakerel tuke: ‘Amala, ava beš ko pošukar than!’ Togaš ka ove poštojmo anglo sa o gostija. 11 Soske sekoj so vazdela pe ka ovel ponižimo, a okova so ponižinela pe ka ovel vazdimo."

12 Togaš o Isus phengja adaleske so kaningja le: "Koga vikineja gostija ko ručko ili ki večera, ma vikin te amalen, ni te phralen, ni te familija ili te barvale komšijen. Te vikineja len, ola da ka vikinen tut ki pumende hem agjar ka iranen tuke. 13 Ama, koga vikineja ko hajbe pijbe, vikin e čorolen, e sakaten, e bangen hem e korolen. 14 Togaš ka ove blagoslovimo, adaleske so ola našti te iranen tuke, ama o Devel ka iranel tuke, koga ka vazdel taro mule e pravednikon."

15 Koga šungja akava jekh lendar so bešela sine ko astali, phengja e Isuseske: "Blago okoleske so ka hal maro ko carstvo e Devleskoro!"

16 O Isus odgovoringja leske: "Nesavo manuš kergja baro hajbe pijbe hem kaningja but gostija. 17 I koga sa sine spremno o hajbaske, bičhalgja pe sluga te phenel e kanimenge: ‘Aven sa i više spremno!’

18 Ama sarine jekh palo jekh počminge te vakeren deka našti te aven. O prvo phengja: ‘Kingjum niva i trebela te džav te dikhav la. Molinava tut, vaker e gospodareske deka našti te avav.’ 19 O dujto phengja: ‘Samo so kingjum deš guruva i džava te proverinav sar randena ki niva. Molinava tut, vaker e gospodareske deka našti te avav.’

20 O trito phengja: ‘Samo so ženingjum man i adaleske našti te avav.’ 21 I o sluga irangja pe hem vakergja sa adava pe gospodareske. Togaš o gospodari holangja hem phengja pe slugaske: ‘Iklov odma ko ulice e gradeskere hem ko ploštadija, i ana sa e čorolen, e sakaten, e korolen hem e bangen.’

22 Koga o sluga kergja adava, vakergja: ‘Gospodare, kergjum agjar sa so phengjan mange, ama panda isi thana.’

23 I o gospodari vakergja leske: ‘Iklov avrijal taro gradi ko drumija hem ko ulice e gavengere hem čhiv e manušen te aven, te phergjol mo kher.’ 24 Vakerava tumenge nijekh taro kanime nane te tatinel taro mo hajbe. "

25 I but manuša džana sine e Isuseja. Ov irangja pe ki lende hem phengja: 26 "Ako nekoj mangela te ovel mo učeniko, trebela te mangel man but poviše taro po dad, tari pi daj, tari pi romni, taro pe čhave, taro pe phrajla, taro pe phenja hem taro po životo. Ako ov na kergja agjar, našti te ovel mo učeniko. 27 Koj na phiravela po krsto hem na džala pala mande, našti te ovel mo učeniko.

28 Ako nekoj tumendar mangela te zidinel kula, nane li prvo angleder te bešel hem te računinel hem te dikhel kozom ka astarel le, hem dali isi le dovolno pare te završinel la? 29 Soske ako čhigja o temejla a na ačhola le pare te završinel dži ko krajo, sarinen so ka dikhen adava ka asan leske, 30 vakerindor: ‘Akava manuš počmingja te zidinel, a našti te završinel la!’

31 Ili te vakerav deka jekh caro spreminela pe ko mariba javere caroja, nane li prvo angleder te bešel hem te razmislinel dali šaj deše iljadencar te marel pe adaleja so avela protiv leste biše iljadencar? 32 Ako našti, ka bičhavel pe manušen ko adava caro, panda duraldan sar na alo po paše, te rodel mir. 33 Isto agjar, nijekh tumendar so na mukhela sa so isi le, našti te ovel mo učeniko."

34 Togaš o Isus phengja lenge: "O lon tano šukar, ama ako o lon našagja po vkus, soleja ka iranel pe leskoro vkus? 35 Više ništoske nane šukar, ni baši phuv ni bašo gjubre, nego ka frdel pe.

Kas isi kana, neka šunel."