1 Ko jekh sabotno dive o Isus pe učenikoncar nakhle maškar o nive. I leskere učenikija počminge te phagen klasija giv, lušpinge len pe vastencar hem hale len.

2 A nesave taro fariseja pučle e Isuse: "Soske kerena adava so nane dozvolimo ko sabotno dive taro Zakoni?"

3 O Isus odgovoringja lenge: "Na čitingjen li so o David kergja, koga sine bokhale ov hem o manuša so sine leja? 4 Khugja ko kher e Devleskoro, lela hem hala o maro so sine posvetimo, so nasminela sine nikoj te hal le osven o sveštenikija. I o David dengja okolenge da so sine leja."

5 I phengja lenge: "O Čhavo Manušeskoro tano Gospodari e sabotakoro."

6 Ki javer sabota, khugja palem o Isus ki sinagoga hem sikavela sine, a adathe sine jekh manuš so leskoro desno vas šukilo hem našti sine te koristinel le. 7 Togaš o učitejla e Zakoneskere hem o fariseja adžikerena sine te dikhen dali o Isus ka sasljarel e manuše ki sabota, te šaj te tužinen le.

8 Ama o Isus džangja lengere misle i phengja e manušeske so sine leskoro vas šuko: "Ušti hem tergjov maškaral!"

Ov uštilo hem terdilo.

9 Togaš vakergja lenge: "Te pučav tumen: soj dozvolimo te kerel pe ki sabota: šukaripe ili lošnipe? Te spasinel pe životo ili te mudarel pe?"

10 I o Isus dikhla sarinende, hem phengja e manušeske: "Pružin to vas!"

Ov pružingja po vas hem leskoro vas saslilo. 11 A o učitejla e Zakoneskere hem o fariseja pherdile bari holi hem phenge maškar peste so šaj te keren e Isuseske.

12 Ko adala dive, o Isus gelo ki jekh gora te molinel pe hem nakhagja i rat molindor e Devle. 13 A koga phravdilo o sabaj, vikingja pe učenikon te aven ki leste hem lendar biringja dešudujen, so vikingja len apostojla:

14 Simon so dengja le anav Petar,

hem leskoro phral Andrej,

o Jakov

hem o Jovan,

o Filip

hem o Vartelomej,

15 o Matej

hem o Toma,

o Jakov, o čhavo e Alfejeskoro,

hem o Simon, soj vikimo Zilot,

16 o Juda, o čhavo e Jakoveskoro,

hem o Juda Iskariot, so ulo predavniko.

17 O Isus hulilo lencar ko ramno than. A adathe sine khedime but taro leskere učenikija, hem but manuša tari celo Judeja hem Erusalim, hem taro Tirska hem Sidonska thana soj uza ko more. 18 Ola ale te šunen hem te oven sasljarde taro pumaro nasvalipe. A okola so sine mučime taro lošna duhija sine sasljarde. 19 I sa o manuša rodena sine te pipinen le, adaleske so lestar iklola sine sila hem sasljona sine sarinen.

20 O Isus dikhla ko pe učenikija, hem vakergja:

"Blagoslovime sijen tumen o čorole,

soske tumaro tano o carstvo e Devleskoro.

21 Blagoslovime sijen tumen akana so sijen bokhale,

soske ka čajloven.

Blagoslovime sijen tumen akana so rovena,

soske ka asan.

22 Blagoslovime sijen koga o manuša mrzinena tumen,

koga otfrlinena tumen hem uvredžinena tumen

hem ladžakerena tumen deka sijen lošna,

soske verujnena ko Čhavo Manušeskoro.

23 Radujnen tumen hem rupinen tari radost, soske bari tani tumari nagrada ko nebo! Adaleske so agjar kerge sine lengere parapapija e prorokonge.

24 Ama pharo tumenge e barvalenge,

soske više dobingjen tumari uteha.

25 Pharo tumenge so akana sijen čale,

soske ka oven bokhale.

Pharo tumenge so asana akana,

soske ka tugujnen hem ka roven.

26 Pharo tumenge so akana sa o manuša vakeren šukar tumendar,

adaleske so lengere parapapija agjar vakerena sine e hovavne prorokonge."

27 "Ama, tumen so šunena vakerava tumenge: Mangen tumare dušmanen! Keren šukaripe okolenge so mrzinena tumen! 28 Blagoslovinen okolen so dena tumen armanja! Molinen tumen okolenge so kerena tumenge lošnipe. 29 Ako nekoj khugja tut šamarka ki čham, iran leske okoja da čham. Ako nekoj lela to mantili, de le to gad da. 30 De sekaske so ka rodela tutar nešto, hem ako nekoj lela nešto soj tano tlo, ma rode adava palal. 31 Keren tumen adava so mangena te keren tumenge javera.

32 Ako mangena samo okolen so mangena tumen, savi nagrada ka dobinen? Soske o grešnikija da mangena okolen so mangena len. 33 Ako kerena šukaripe okolenge soj tane šukar tumencar, savi nagrada ka dobinen? Soske o grešnikija da kerena adava. 34 Ako dena ko zaem okolenge kastar so adžikereja te iranen tumenge, savi nagrada ka dobinen? O grešnikija da dena zaem e grešnikonge hem adžikerena te iranel pe lenge isto.

35 Nego mangen tumare dušmanen, keren šukaripe hem den zaem bizo te adžikeren te iranel pe tumenge adava. Togaš tumari nagrada ka ovel bari, hem ka oven čhave e Najbare Devleskere, soske ov tano milostlivo prema o neblagodarna hem o lošna. 36 Oven milostliva sar soj tumaro Dad milostlivo."

37 "Ma sudinen hem nane te sudinel pe tumenge! Ma osudinen hem nane te oven osudime! Oprostinen hem ka oprostinel pe tumenge! 38 Den hem ka del pe tumenge. Merka šukar nabimi, tresimi hem pherdi ka čhivel pe tumenge ki angali. Adaleske so, save merkaja merinena asavke merkaja ka merinel pe tumenge."

39 I phengja lenge akaja parabola: "Šaj li o korolo te phiravel e korole? Nane li te peren o solduj ki dupka? 40 O učeniko nane upreder po učiteli, nego sekoj soj sikavdo sa, ka ovel sar po učiteli.

41 Soske dikheja i delanka te phraleske ki jakh, a i greda ki ti jakh na dikheja? 42 Sar šaj te vakere te phraleske: ‘Mo phral, ač te ikalav i delanka tari ti jakh,’ a koga korkori na dikheja i greda ki ti jakh? Dujmujaleja! Prvo ikal i greda tari ti jakh, a poslem ka dikhe šukar sar te ikale i delanka tari jakh te phraleskiri."

43 "Nijekh šukar kaš na dela lošna plodija, hem nijekh lošno kaš na dela šukar plodija. 44 Adaleske so sekova kaš pendžarela pe taro leskere plodija. Sar so o manuša na khedena smokve taro kare, ni drakha taro bocke. 45 O šukar manuš ikalela šukar bukja adaleske so isi le šukaripe ko po srce, a o lošno manuš ikalela o lošna bukja. Adaleske so e manušeskoro muj vakerela adava soleja pherdo leskoro srce."

46 "Soske vikinena man: ‘Gospode, Gospode!’, a na kerena okova so vakerava? 47 Sekoj so avela ki mande hem šunela me lafija hem so pherela len, ka vakerav tumenge savo tano: 48 Ov tano sar manuš so kergja po kher, agjar so randla hor hem čhigja pe temejla ki karpa. I koga ale poplave hem o reke khuge ko adava kher, ama o kher na pelo, soske sine šukar kerdo.

49 Ama sekoj so šunela me lafija hem na pherela len, ov tano sar manuš so kergja po kher ki phuv bizo temejla. I koga ale o reke ko adava kher, odma o kher rušisalilo!"