1 O Isus phengja pe učenikonge: "O iskušenie mora te avel, ama pharo okoleske so preku leste avela. 2 Pošukar ka ovel leske te phanden le ki men baro bar hem te ovel frdimo ko more, nego te čhivel jekh akale tikne čhavendar te perel ko grevo. 3 Arakhen tumen! Ako to phral grešinela tuke, opomenin le, i te pokajngja pe, oprostin leske. 4 Ako grešingja tuke efta puti ko dive hem efta puti avela ki tute hem vakerela tuke: ‘Kajnava man,’ oprostin leske."

5 O apostojla vakerge e Gospodareske e Isuseske: "Bajlar amari vera!"

6 A o Gospodari odgovoringja: "Ako isi tumen vera sar o tikno sinapovo zrno, ka phenen sine akale kašteske: ‘Ikal tut taro koreno hem sadin tut ko more!’ I ov ka šunel tumen.

7 Ako nekas tumendar isi le sluga so randela hem arakhela e bakhren, koga ov ka iranela pe tari niva koj tumendar ka vakerel leske: ‘Sigjar ava akate hem beš te ha maro’? 8 Nane li prvo te phene leske: ‘Ker mange te hav, spremin tut hem služin mange dži kote hava hem pijava, a palo adava tu šaj te ha hem te pije’? 9 Trebela li o gospodari te blagodarinel e slugaske so kergja sa adava so sine leske naredimo? Na. 10 Agjar tumen da, koga kerena sa so naredinela tumenge o Devel, vakeren: ‘Amen sijem sluge so na trebela te blagodarinel pe! Amen samo keraja amari buti!’ "

11 Koga o Isus gelo ko Erusalim, nakhla maškar i granica tari Samarija hem tari Galileja. 12 Dži kote khuvela sine ko jekh gav, ki leste ale deš leprozna manuša so terdile podur lestar 13 hem vikinge sa pe glasoja: "Isuse, Učitele, ov milostlivo upra amende!"

14 Koga dikhla len o Isus, vakergja lenge: "Džan hem sikaven tumen e sveštenikonge!"

I dži kote džana sine ko drumo, sine sasljarde tari lepra.

15 I jekh lendar koga dikhla deka saslilo, irangja pe ko Isus slavindor e Devle sa pe glasoja. 16 Pelo anglo leskere pre mujeja dži ki phuv hem blagodaringja leske. A ov sine Samarijanco.

17 Togaš o Isus pučlja le: "Na saslilen li so deš džene? Kaj tane okola enja? 18 Nijekh li lendar na irangja pe te slavinel e Devle, osven akava manuš so nane Evrejco?"

19 I vakergja e manušeske: "Ušti hem dža! Ti vera sasljargja tut!"

20 Jekh dive o fariseja pučle e Isuse koga ka avel o carstvo e Devleskoro. A o Isus odgovoringja lenge: "O carstvo e Devleskoro nane nešto so šaj te dikhen le. 21 Ni nane sar te phenel pe: ‘Akje akate tano!’ ili ‘Akje okote tano!’ Adaleske so o carstvo e Devleskoro tano maškar tumende!"

22 Togaš phengja pe učenikonge: "Avela o vreme koga ka mangen te dikhen samo jekh dive taro o Čhavo Manušeskoro, ama nane te dikhen le. 23 O manuša ka vakeren tumenge: ‘Akje akate tano!’ ili ‘Akje okote tano!’ Ama ma džan adathe hem ma prastan pali lende! 24 Adaleske so o ajbe taro o Čhavo Manušeskoro ko leskoro dive ka ovel sar koga o gromi so khuvela hem svetinela o nebo taro jekh krajo dži ko javer. 25 Ama prvo mora but te cidel hem te ovel otfrlimo tari akaja generacija.

26 Sar so sine ko vreme e Noeskoro, agjar ka ovel hem koga o Čhavo Manušeskoro ka avel. 27 O manuša hana sine hem pijena, lena pe sine maškar peste, sa dži ko adava dive koga o Noe khugja ko brodi. Togaš ali i poplava hem uništingja sarinen.

28 Isto agjar sine ko vreme e Loteskoro. O manuša hana sine hem pijena, kinena sine hem biknena, sadinena sine hem kerena khera. 29 Ama ko dive koga o Lot iklilo taro Sodom, taro nebo peli jag hem sulfur hem uništingja sarinen.

30 Agjar ka ovel ko dive koga o Čhavo Manušeskoro ka pojavinel pe. 31 Ko adava dive koj ka ovel ko krovi, a leskere bukja tane ko kher, ma te hulel te lel len. Isto agjar, koj ka ovel ki niva, ma te iranel pe khere palo pe bukja. 32 Setinen tumen so ulo e Loteskere romnaja! 33 Soske koj mangela te spasinel po životo, ka našavel le, a koj mangela te našavel po životo, ka spasinel le. 34 Vakerava tumenge: ki adaja rat duj džene ka pašlon ko jekh kreveti; jekh ka ovel lelo, a o dujto ka ovel mukhlo. 35 Duj džuvla ka melinen giv; jekh ka ovel leli, a i dujto ka ovel mukhli. 36 [Duj manuša ka oven ki niva; jekh ka ovel lelo, a o dujto ka ovel mukhlo.]"

37 I ola pučle e Isuse: "Kaj, Gospode?"

A ov odgovoringja lenge: "Kaj soj isi mulo telo, adathe khedena pe o mršojadcija."