1 Ko adava vreme nesave manuša vakerge e Isuseske deka o Pilat, o upravniko e Rimeskoro, naredingja nesave Galilejcija te oven mudarde sar anena žrtva ko Hrami.

2 A o Isus phengja lenge: "Tumen mislinena deka adala Galilejcija sine pobare grešnikija taro sa okola Galilejcija, i adaleske agjar mudarge len? 3 Vakerava tumenge na! Ama te na pokajngjen tumen, tumen da ka meren! 4 Ili okola dešuofto so mule koga i kula peli upra lende ko Siloam, tumen mislinena deka ola sine pobare grešnikija sa e manušendar so živinena ko Erusalim? 5 Vakerava tumenge na! Ama te na pokajngjen tumen, tumen da ka meren!"

6 Togaš o Isus vakergja lenge akaja parabola: "Jekh manuš sine le smokva so sine sadimi ki niva e drakhencar, i alo te rodel lakoro plodi, ama ništo na arakhla.

7 Togaš phengja e manušeske so arakhela sine i drakh: ‘Akje, trin berš sar avava te rodav plodi tari akaja smokva, ama na arakhava. Čhin la! Soske te šukjarel i phuv?’

8 A ov phengja: ‘Gospodare, mukh la panda akava berš. A me ka randav uza late hem ka frdav lake gjubrivo. 9 Ako dengja plodi dži berše, šukar i. A te na dengja plodi, togaš čhin la.’ "

10 Jekh sabota o Isus sikavela sine ki jekh sinagoga. 11 A adathe sine jekh romni, so o lošno duho kerela la sine te ovel nasvali. Oj sine grbalika dešuofto berš hem našti sine nisar te ispravinel pe.

12 Koga o Isus dikhla la, vikingja la ki peste hem phengja lake: "Manušnije, oslobodimi sijan taro to nasvalipe!"

13 I o Isus čhigja pe vasta upro late, i oj odma ispravingja pe hem počmingja te slavinel e Devle.

14 Togaš e sinagogakoro vodači holangja so o Isus sasljargja ki sabota i vakergja e manušenge: "Isi šov dive ko kurko kote so šaj kerela pe buti! Ko adala dive aven hem oven sasljarde, a na ki sabota!"

15 A o Gospodari o Isus odgovoringja leske: "Dujmujale sijen! Tumen ki sabota na phravena li tumare guruve ili tumare here tari štala te legaren le te pijel pani? 16 A akaja manušni tani taro seme e Avraameskoro so o Beng ikergja la phandli dešuofto berš. Oj na trebela li te ovel ki sabota oslobodimi taro akava nasvalipe?"

17 Koga phengja adava, sa adala so sine protiv leste ladžandile, a sa okola manuša radujnge pe bašo sa o šukar dejla so kerela len sine o Isus.

18 Togaš o Isus phengja: "Soleja tano slično o carstvo e Devleskoro? Soleja te sporedinav le? 19 O carstvo nebesno tano sar o sinapovo zrno, so manuš lela le hem sadingja le ki pi bavča. Ov barilo hem ulo kaš hem o čirikla kerge gnezdija upro leskere granke."

20 I palem phengja lenge: "Soleja te sporedinav o carstvo e Devleskoro? 21 Ov tano sar o kvasaci, so jekh džuvli lela le hem mešingja le ko biš kile varo sa dži kote na ušlilo."

22 Dži kote džala sine o Isus ko Erusalim, nakhela sine ko gradija hem ko gava hem sikavela sine e narodo.

23 I nekoj pučlja le: "Gospode, samo hari li manuša ka oven spasime?"

A o Isus phengja lenge: 24 "Den sa tumendar te khuven taro tesno udar, soske vakerava tumenge but džene ka roden te khuven, ama ka našti te khuven. 25 Koga o domakini ka uštel hem ka phandel o udar, ka ovel kasno. Togaš ka tergjoven avrijal hem ka khuven ko udar vikindor: ‘Gospode, phrav amenge!’

Ama ov ka vakerel tumenge: ‘Na džanava kotar sijen.’

26 Togaš ka vakeren: ‘Halem hem pilem tuja, hem tu sikaveja amen sine ko amare ulice.’

27 A ov ka odgovorinel: ‘Na džanava kotar sijen. Ciden tumen mandar, sarinen tumen so kerena lošnipe!’

28 Adathe ka ovel baro rojba hem krckjiba dandencar, koga ka dikhen e Avraame, e Isako, e Jakove hem sa o prorokon ko carstvo e Devleskoro, a tumen frdime avrijal. 29 Ka aven manuša taro istok hem taro zapad, taro sever hem taro jug hem ka oven ko astali ko hajbe hem ko pijbe ko carstvo e Devleskoro. 30 Čače isi posledna so ka oven prva hem prva so ka oven posledna."

31 Ko adava vreme ko Isus ale nesave fariseja hem phenge leske: "Iklov taro akava than hem dža ko javer than, soske o car Irod mangela te mudarel tut."

32 A o Isus odgovoringja lenge: "Džan hem vakeren adale lisicake: ‘Ka ikalav demonen hem ka sasljarav manušen avdive hem tajsa, a ko trito dive ka završinav mi buti.’ 33 Ama avdive, tajsa hem pretajsa mora te džav me drumoja, soske sigurno nijekh proroko našti merela avrijal taro Erusalim.

34 Erusalime, Erusalime, tu so mudareja e prorokon hem frdeja bara upro okola soj tuke bičhavde, but puti manglum te khedav te čhaven, sar so i khani khedela pe piličken telo pe paka, ama tumen na manglen. 35 Akje, to kher ka ovel napuštimo, i vakerava tumenge nane te dikhen man dži kote na phenena: ‘Blagoslovimo tano okova so avela ko anav e Gospodareskoro!’ "