1 Togaš o Isus vikingja pe dešuduje učenikon hem dengja len sila hem avtoriteti te ikalen sa e demonen hem te sasljaren nasvalipe. 2 I bičhalgja len te propovedinen bašo carstvo e Devleskoro hem te sasljaren e nasvalen.

3 I phengja lenge: "Ma len tumencar ništo ko drumo: ni kaš phiribaske, ni torba, ni maro, ni pare, ni javer gad. 4 Ako khugjen ko jekh kher hem ola priminge tumen, ačhoven adathe sa dži kote na džana tumenge taro adava gradi. 5 Ako na priminge tumen, ikloven taro adava gradi hem tresinen i prašina taro tumare pre sar znako deka nane tumen ništo lencar."

6 I ola gele taro gav ko gav, propovedindor o evangelije hem sasljarindor e nasvalen ko sa o thana.

7 A o Irod, o vladiteli e Galilejakoro, šungja sa so ulo hem sine bunimo adaleske so nesave manuša vakerge deka o Jovan Krstitel uštilo taro mule. 8 A javera vakerge deka o prorok Ilija pojavisalilo, a nesave javera vakerge deka uštilo taro mule nesavo proroko taro purano vreme.

9 Ama o Irod phengja: "Me čhingjum e Jovaneskoro šero. A koj tano akava so šunava baši leske asavke bukja?"

I mangla te dikhel e Isuse.

10 Koga o apostojla irange pe ko Isus, vakerge leske sa so kerge. I o Isus lela len peja hem cidinge pe ko gradi Vitsaida te šaj te oven korkori. 11 Ama o narodo šungja bašo adava i gelo palo lende. A o Isus primingja len hem vakerela sine lenge bašo carstvo e Devleskoro hem sasljargja adalen kaske so trebingja sastipe.

12 I koga počmingja te perel o kham, o dešuduj apostojla ale ko Isus hem phenge leske: "Mukh e manušen te džan ko najpaše gava hem thana te šaj arakhena nešto hajbaske hem than sojbaske. Adaleske so amen sijem akate ko čučo than kote so nane ništo."

13 O Isus odgovoringja lenge: "Den len tumen nešto hajbaske!"

Ola phenge: "Amen isi amen samo pandž mare hem duj mačhe, osven ako gelem te kina maro bašo sa akava narodo." 14 A adathe sine pandž ilade murša.

Togaš o Isus phengja pe učenikonge: "Neka bešen ko grupe po pinda."

15 I ola kerge agjar, hem čhige sarinen te bešen. 16 O Isus lela o pandž mare hem o duj mačhe, dikhla upre ko nebo, hem blagodaringja bašo hajbe. Phagla len hem dengja pe učenikonge te delinen e manušencar. 17 I sarinen hale hem čalile, a taro adava so ačhilo o učenikija khedinge dešuduj korpe hajbe.

18 Jekh dive o Isus molingja pe korkori, a leja sine leskere učenikija. I ov pučlja len: "So phenena o manuša, koj sijum me?"

19 Ola odgovoringe leske: "Nekoj phenela o Jovan Krstitel, a javera phenena deka sijan o prorok Ilija, a nesave javera phenena deka tu sijan jekh taro prorokija taro purano vreme so uštilo taro mule."

20 Togaš o Isus pučlja len: "A tumen? So phenena, koj sijum me?"

O Petar odgovoringja leske: "Tu sijan o Hristos e Devleskoro."

21 A o Isus zapovedingja pe učenikonge te na vakeren nikaske deka ov tano o Hristos, 22 hem vakergja: "O Čhavo Manušeskoro mora but te cidel, hem nane te ovel prifatimo taro starešine, taro prvosveštenikija hem taro učitejla e Zakoneskere, hem ka ovel mudardo. Ama o trito dive ka uštel taro mule."

23 Togaš o Isus phengja sarinenge: "Koj mangela te ovel mo učeniko, neka otkažinel pe pestar hem neka lel po krsto sekova dive hem neka phirel pala mande. 24 Soske koj mangela te spasinel po životo, ka našavel le, a koj mangela te našavel po životo baši mange, ka spasinel le. 25 So džabe e manušeske celo sveto te lel, ako našavela ili upropastinela korkori pes? 26 Soske koj ladžala mandar hem me lafendar, o Čhavo Manušeskoro da ka ladžal lestar, koga ka avel ki pi slava hem ki slava pe Dadeske hem e sveto angelengiri. 27 Čače vakerava tumenge, isi nesave maškar tumende so nane te meren, dži kote na dikhena o carstvo e Devleskoro."

28 Koga nakhle ofto dive palo adava, o Isus lela peja e Petare, e Jovane hem e Jakove hem uklile ki gora te molinel pe. 29 I dži kote molinela pe sine, leskoro muj promenisalilo, a o šeja leskere ule parne sar e gromeskiri svetlina. 30 I taro jekh puti adathe pojavisalile duj manuša hem počminge te keren e Isuseja lafi. Adala sine o Mojsej hem o Ilija. 31 Lengoro izgled sine ki bari svetlina hem kerge leja lafi bašo meribe so adžikerela le ko Erusalim.

32 A o Petar hem okola so sine leja, zasuke. Koga uštile, dikhle e Isuse ki bari svetlina hem e duje manušen so tergjona sine leja.

33 Koga o Mojsej hem o Ilija počminge te ciden pe e Isusestar, o Petar phengja e Isuseske: "Učitele, šukar amenge so sijem akate. Te kera trin šatojra – jekh tuke, jekh e Mojsijaske, hem jekh e Ilijaske." Ov na džanela sine so vakerela.

34 Dži kote o Petar kerela sine lafi, pojavingja pe jekh oblako hem učhargja len. A koga učhargja len o oblako, ola darandile.

35 I šundilo glaso taro oblako: "Akava tano mo birimo Čhavo. Le šunen!"

36 Koga šundilo adava glaso, o učenikija dikhle samo e Isuse korkori. A o učenikija arakhena sine adava ki peste hem nikaske na vakerge so dikhle ko adava momenti.

37 Tajsutno dive, koga o Isus hem o trin učenikija hulile tari gora, bari gužva ale te dikhen e Isuse.

38 I akje, jekh manuš tari gužva vikingja: "Učitele, molinava tut te pomožine me čhave, adaleske soj tano mange jekh čhavo! 39 O lošno duho but puti astarela le hem taro jekh puti vikinela; peravela le ki phuv hem o čhavo ikalela pena taro muj; edvaj mukhela le hem uništinela le. 40 I rodingjem te učenikondar te ikalen le, ama ola našti sine te keren adava."

41 A o Isus odgovoringja: "O, bez verno hem rumimi generacijo, dži koga ka ovav tumencar hem ka trpinav tumen? Ana te čhave akate!"

42 Dži kote o čhavo avela sine ko Isus, o demoni frdingja le tele ki phuv. A o Isus zapovedingja e lošno duhoske te cidel pe e čhavestar, sasljargja e čhave hem dengja le palal ko dad. 43 Togaš sarinen sine začudime so dikhle e Devleskiri bari sila.

Dži kote sarinen čudinena pe sine bašo adava so kergja o Isus, ov phengja pe učenikonge: 44 "Šunen šukar akala lafija: o Čhavo Manušeskoro, ka ovel predajmo ko vasta e manušenge."

45 Ama o učenikija na svatinge e Isuse so mangla te vakerel adaleja. Adava sine garavdo lendar i adaleske našti svatinge le, a darana sine te pučen le bašo adava.

46 O učenikija počminge maškar peste te akošen pe koj lendar tano najbaro. 47 A o Isus džangja lengere misle, i lela jekhe tikne čhave, čhigja le uza peste, 48 hem phengja lenge: "Koj priminela akale tikne čhave ko mo anav, priminela man. A koj priminela man, priminela okole so bičhalgja man. Adaleske so, koj tano najtikno maškar tumende, ov tano najbaro."

49 O Jovan phengja e Isuseske: "Učitele, dikhlem nesave manuše sar ikalela demonen ko to anav hem amen na mukhlem le te kerel adava, soske ov na džala amencar pala tute."

50 A o Isus phengja leske: "Mukhen le te kerel adava, soske okova so nane protiv tumende, ov tano tumencar."

51 A koga sine paše o dive o Isus te ovel voznesimo ko nebo, ov odlučingja te džal ko Erusalim. 52 I bičhalgja nesave glasnikon angla leste. Ola gele hem khuge ko nesavo Samarijansko gav te spreminen leske sa. 53 Ama o manuša na priminge e Isuse soske džanena sine deka džala ko Erusalim.

54 Koga o učenikija o Jakov hem o Jovan dikhle adava, pučle e Isuse: "Gospode, mangeja li te vakera te hulel taro nebo jag hem te tharel len sa?"

55 Ama o Isus irangja pe hem zaptingja len. 56 Palo adava ov hem leskere učenikija gele ko javer gav.

57 Dži kote džana sine ko drumo, nesavo manuš alo hem phengja e Isuseske: "Ka avav pala tute kaj i te dža."

58 A o Isus odgovoringja leske: "E lisicen isi len pe thana kaj te soven hem e čiriklen gnezdija, ama o Čhavo Manušeskoro nane kaj te čhivel po šero."

59 A javere manušeske phengja: "Ava pala mande!"

Ama ov odgovoringja: "Gospode ač te parunav prvo me dade."

60 I o Isus phengja leske: "Mukh e mulen, te parunen pe mulen, a tu dža hem propovedin bašo carstvo e Devleskoro."

61 Togaš javer manuš phengja: "Ka avav pala tute Gospode, ama ač prvo te džav hem te pozdravinav man me familijaja."

62 Ama o Isus odgovoringja leske: "Koj čhivela pe vasta ko plugo te randel hem dikhela palal, nane dostojno bašo carstvo e Devleskoro."