1 Koga o Isus sine ko Hrami, vazdingja po šero hem dikhla e barvalen sar mukhena pare ki kasa e Hrameskiri. 2 I dikhla jekhe čorole udovica sar mukhela duj tikne bakarna pare. 3 Togaš o Isus vakergja: "Čače vakerava tumenge, akaja čoroli udovica mukhla sarinendar najviše. 4 Soske sarinen denge taro adava so isi len poviše, ama oj, koja tani čoroli, dengja sa so sine la."

5 I dži kote nesave učenikija kerena sine lafi bašo Hrami, soj šukar ukrasimo šuže barencar hem poklonencar soj tane posvetime e Devleske, o Isus vakergja: 6 "Ka avel dive koga taro sa akava so dikhena nane te ačhol bar upro bar. Sa ka ovel rušimo."

7 Togaš o učenikija pučle e Isuse: "Učitele, koga ka ovel akava? Hem savo ka ovel o znako deka ka ovel adava?"

8 A o Isus odgovoringja lenge: "Pazinen te na oven hovavde. Soske but džene ka aven ko mo anav, hem ka vakeren: ‘Me sijum o Hristos,’ hem: ‘Alo paše o krajo akale vremeskoro.’ Ma džan pala lende! 9 Koga ka šunen deka isi vojne hem buniba, ma daran. Soske sa adava mora prvo te ovel, ama panda nane o krajo."

10 Togaš vakergja lenge: "Ka ušten nacija protiv nacija, hem carstvo protiv carstvo. 11 Ko but thana ka oven zemijotresija, bokhalipe hem zarazno nasvalipe. Ka oven strašna bukja hem bare znakija taro nebo.

12 Ama angleder sa akava te ovel, ka astaren tumen hem ka progoninen tumen, ka legaren tumen ko sudo ko sinagoge hem ka frden tumen ko zatvor, ka legaren tumen anglo cajra hem vlastija, i sa adava ka ovel baši mange. 13 Adava ka ovel tumenge te šaj svedočinena mandar. 14 Adaleske pamtinen akava: ma sekirinen tumen angleder save lafencar ka braninen tumen. 15 Soske me ka dav tumen lafija hem mudrost so nijekh taro tumare protivnikija ka našti te iranel tumenge lafi. 16 A ka oven predajme taro tumare dada hem daja, tumare phrajla, tumari familija hem amala; a nesave tumendar ka oven mudarde. 17 I sarinen ka mrzinen tumen baši mange, 18 ama ni jekh bal taro tumaro šero nane te perel. 19 Ačhoven verna hem ka dobinen o večno životo."

20 "Koga ka dikhen o Erusalim opkolimo taro vojske, džanen deka leskoro uništiba tano paše. 21 Togaš okola soj ki Judeja neka našen ko planine, a okola soj tane ko Erusalim neka iklon avrijal, a okola soj tane ko gava ma te khuven ko gradi. 22 Adaleske so adava ka ovel vreme tari e Devleskiri kazna te phergjol sa adava soj tano pišimo. 23 Ama but pharo ka ovel ko adala dive e khamne romnenge hem adalenge so dena thud! Soske bari muka ka ovel ki phuv hem e Devleskiri holi ka perel upro akava narodo. 24 Nekoj lendar ka oven mudarde čhurikaja, a javera ka oven legarde sar zatvorenikija maškar sa o nacije. A o Erusalim ka ovel gazimo taro manuša so nane Evreja, sa dži kote na phergjola lengoro vreme."

25 "I ka oven znakija ko kham, ki mesečina, hem ko čerenja, a ki phuv o manuša ka oven ki muka hem ka oven bunime tari bari galama hem taro bare talasija e moreskere. 26 O manuša ka meren tari dar hem taro adava so adžikerela pe so ka ovel e svetoja. Adaleske so o nebesna sile ka oven potresime. 27 Hem togaš o manuša ka dikhen o Čhavo Manušeskoro, sar avela upro oblakija bare silaja hem bare slavaja. 28 A koga ka počminel te ovel sa adava, ušten ko pre bizi dar hem vazden tumare šere, soske paše tano tumaro spasenije."

29 Togaš o Isus vakergja lenge akaja parabola: "Dikhen i smokva hem sa o kašta. 30 Koga ka iklon o listija, korkori džanen deka o nilaj tano paše. 31 Hem agjar tumen, koga ka dikhen deka sa adava ovela, džanen deka paše tano o carstvo e Devleskoro. 32 Čače vakerava tumenge: akaja generacija nane te nakhel dži kote sa akava na ovela. 33 O nebo hem i phuv ka nakhen, ama me lafija nikat nane te nakhen."

34 I o Isus vakergja lenge: "Pazinen tumen te na oven tumare srcija preukopirime hajbaja pijbaja, makjojbaja hem akale životoskere sekiribaja, i te resel tumen adava dive iznenadeno. 35 Soske adava dive ka avel sar zamka upro sa o manuša so živinena ki celo phuv. 36 Adaleske sekat oven džangavde hem molinen tumen te šaj te nakhaven sa adava so trebela te ovel hem te šaj te tergjoven anglo o Čhavo Manušeskoro."

37 Sekova dive o Isus sikavela sine ko Hrami, a sekoja rat iklola sine taro gradi hem džala sine te nakhavel i rat ki Maslinovo Gora. 38 I sa o manuša džana sine rano sabajleja ko Hrami te šunen le.