1 Jekh dive dži kote o Isus tergjola sine uza ko Galilejsko ezero, i gužva gurinena pe sine uza leste hem šunena sine o lafi e Devleskoro. 2 Ov dikhla duj čamcija uza ko ezero, so o ribajra mukhle len adathe, soske thovena sine pumare mreže. 3 I khugja ko jekh čamco, so sine e Simoneskoro, i zamolingja le te cidel pe hari taro kopno. Palo adava bešla ko čamco hem sikavela sine e manušen.

4 Koga završingja vakerindor, phengja e Simoneske: "Dža e čamcoja ko hor hem frden tumare mreže te astaren mačhe."

5 A o Simon odgovoringja leske: "Gospodare, celo rat mučingjem amen hem ništo na astargjem, ama ako tu pheneja, ka frdav o mreže."

6 Koga kerge adava, astarge sa doborom mačhe so o mreže počminge te pharavgjoven. 7 I vastencar vikinge pumare amalen, so sine ko javer čamco, te aven te pomožinen len. I ola ale hem pherge o solduj čamcija doborom so počminge te batinen ko pani.

8 A koga dikhla adava o Simon o Petar, pelo ko kočaka anglo Isus hem phengja leske: "Dža tuke mandar, Gospode, me sijum grešno manuš!" 9 Adaleske so uklingja le dar, le hem sarinen so sine leja bašo o baro astariba e mačhengoro. 10 A isto agjar uklingja len dar e Jakove hem e Jovane, e Zavedejeskere čhaven so sine e Simoneskere amala.

Togaš o Isus phengja e Simoneske: "Ma dara! Taro akava dive nane te astare mačhe, nego manušen."

11 I koga cidinge o čamcija ko kopno, mukhle sa hem gele palo Isus.

12 Dži kote o Isus sine ko jekh gradi, alo jekh manuš so sine le lepra ko celo telo. Koga dikhla e Isuse, pelo anglo leste mujeja dži ki phuv hem molingja le vakerindor: "Gospode, te manglan tu šaj te sasljare man."

13 O Isus pružingja po vas, pipingja le hem vakergja: "Mangava! Saslov!"

I odma i lepra našavdili lestar.

14 Togaš o Isus zapovedingja leske: "Ma vaker nikaske akava, samo dža hem sikav e sveštenikoske deka sijan sasto, hem de žrtva baši to očistiba, sar so o Mojsej naredingja, te šaj te ovel svedoštvo lenge."

15 A e Isuseske šungjola sine sa poviše, agjar so but džene avena sine te šunen le hem te oven sasljarde taro pumaro nasvalipe. 16 A ov cidela pe sine ko čuče thana hem molinela pe sine.

17 Jekh dive dži kote o Isus sikavela sine ko jekh kher, o fariseja hem o učitejla e Zakoneskere so ale taro sa o gava e Galilejakere e Judejakere hem taro Erusalim, bešle adathe. A i sila e Gospodareskiri sine e Isuseja te sasljarel e nasvalen. 18 I nesave manuša legarena sine jekhe sakate manuše, pašlo ki postela. Ola mangle te anen le andre hem te čhiven le anglo Isus, 19 i adaleske so našti sine taro narodo te arakhen kotar te khuven, uklinge upro kher, phrage o krovi hem mukhle le sa e postelaja anglo Isus.

20 Koga o Isus dikhla lengiri vera, vakergja: "Manušeja, oprostime tane te grevija!"

21 A o fariseja hem o učitejla e Zakoneskere pučle pe ki peste: "Koj tano akava so hulinela? Koj šaj te oprostinela o grevija, osven o Devel?"

22 A o Isus džangja so mislinena i pučlja len: "Soske agjar mislinena ko tumare srcija? 23 Soj polokhe te vakerel pe: ‘Oprostime tane te grevija’, ili te vakerel pe: ‘Ušti hem phir’? 24 Ama ka dokažinav tumenge deka o Čhavo Manušeskoro isi le vlast ki phuv te oprostinel o grevija." Togaš phengja e sakateske: "Ušti! Le ti postela hem dža tuke khere."

25 I o manuš odma uštilo anglo lende, lela pi postela hem gelo khere slavindor e Devle. 26 Sarinen čudinge pe hem slavinge e Devle. Pherdile dar hem vakerge: "Avdive dikhlem bare čudija!"

27 Palo adava, o Isus iklilo adathar hem dikhla e danočniko so vikinela pe Levija, sar bešela ko than kote so khedela pe danok hem phengja leske: "Ava pala mande!"

28 Ov uštilo, mukhla sa hem gelo pala leste.

29 Togaš o Levij spremingja ko po kher baro hajbe pijbe e Isuseske hem adathe sine but danočnikija hem javera so bešle lencar ki sofra.

30 Ama o fariseja hem lengere učitejla e Zakoneskere počminge te buninen pe vakerindor e Isuseskere učenikonge: "Soske hana hem pijena e danočnikoncar hem javere grešnikoncar?"

31 A o Isus odgovoringja lenge: "E sastenge na trebela doktori, nego e nasvalenge. 32 Me na alum e pravednikon te vikinav, nego e grešnikon."

33 O fariseja hem lengere učitejla e Zakoneskere phenge leske: "E Jovane Krstiteleskere učenikija but postinena, agjar hem e farisejengere učenikija, ama te učenikija hana hem pijena."

34 A o Isus odgovoringja lenge: "Sar šaj te čhiven e džamutreskere amalen te postinen koga lencar tano o džamutro? 35 Ama ka avel dive, koga ka ovel lelo o džamutro lendar, i togaš ko adala dive ola da ka postinen."

36 I vakergja lenge akaja parabola: "Nikoj na čhivela kotor taro nevo gad te šaj te phandel i dupka ko purano gad, soske o nevo ka pharavgjovel, a o nevo nane te odgovorinel e puraneja. 37 I nikoj na čhorela nevi mol ko purane mevija*; ako kerge adava, koga i mol ka reslol o mevija ka phajron; i mol ka čhorgol, hem o mevija ka rumingjoven. 38 Nego o nevo mol mora te čhivel pe ko neve mevija. 39 I nijekh so pila i purani mol, na mangela i nevi, adaleske so vakerela: ‘I purani mol tani pošukar.’ "