1 Togaš celo Evrejsko Sovet uštilo hem legargja e Isuse ko Pilat, o upravniko e Rimeskoro, 2 i počmingja te vakeren protiv leste: "Arakhlem akale manuše sar pherela amare narodo hem vakerela lenge te na platinen o danok e caroske, a peske vakerela deka tano o Hristos, o caro."

3 Togaš o Pilat pučlja e Isuse: "Tu li sijan o caro e Evrejengoro?"

O Isus odgovoringja leske: "Adava tu pheneja."

4 Togaš o Pilat vakergja e prvosveštenikonge hem e narodoske: "Na arakhava nisavi krivica upro akava manuš!"

5 Ama ola panda poviše phenena sine: "Ov pe učibaja buninela sa e manušen ki celo phuv e Evrejengiri. Počmingja tari Galileja hem akana resla dži akate ko Erusalim!"

6 Koga šungja adava o Pilat, pučlja len dali o Isus Galilejco. 7 I koga phenge leske deka o Isus Galilejco, o Pilat bičhalgja le ko Irod, so vladinela sine ki Galileja. A ko adava dive isto o Irod sine ko Erusalim.

8 Koga o Irod dikhla e Isuse, but radujngja pe, soske but vreme adžikerela sine te dikhel le, adaleske so but šungja baši leske hem nadinela pe sine deka o Isus ka kerel nesavo čudo anglo leste. 9 Ov pučlja le but pučiba, ama o Isus na dela le sine nisavo odgovor. 10 A o prvosveštenikija hem o učitejla e Zakoneskere tergjona sine hem silno vakerena sine protiv o Isus. 11 Togaš o Irod hem leskere vojnikija ponižinge hem asandile e Isuseske. Urage le carska šeja hem o Irod bičhalgja le palal ko Pilat. 12 Ko adava dive o Irod hem o Pilat ule amala, a angleder adava ola sine dušmajna.

13 O Pilat vikingja ki peste e prvosveštenikon, e vodačen hem e narodo, 14 i vakergja lenge: "Angjen ki mande akale manuše vakerindor deka kerela buna maškar o narodo. Akje, angla tumende pučljum le adalestar, ama na arakhlum nisavi krivica baši so tumen tužinena le. 15 A ni o Irod na arakhla upra leste krivica, i adaleske bičhalgja le palal ki amende. Akava manuš na kergja ništo so zaslužinela meriba. 16 Adaleske samo ka naredinav te kamšikujnen le hem ka mukhav le." 17 [A trebingja bašo prazniko, palo adeti, te oslobodinel lenge jekhe zatvoreniko.]

18 Ama sa o manuša vikinge: "Mudar akale manuše, a mukh amenge e Varava!" 19 (O Varava sine phandlo ko zatvor, soske sine ki nesavi buna ko Erusalim hem so mudargja nekas.)

20 A o Pilat palem kergja lencar lafi, adaleske so mangla te mukhel e Isuse.

21 Ama ola vikinge: "Čhiv le ko krsto! Čhiv le ko krsto!"

22 A o Pilat trito puti phengja lenge: "Soske? Savo lošnipe kergja? Me na arakhlum ništo ki leste so zaslužinela te merel. Ka naredinav te kamšikujnen le hem ka mukhav le."

23 Ama ola na čhinage hem sa pe glasoja vikinge rodindor te čhivel e Isuse ko krsto. A lengiri vika sine sa posilno. 24 I adaleske o Pilat odlučingja te del len adava so mangena. 25 Mukhla lenge okole manuše so mangena, so sine ko zatvor baši buna hem bašo mudariba, a e Isuse dengja ko vojnikija te keren leja adava so o manuša mangle.

26 Dži kote o vojnikija legarena sine e Isuse, astarge nesave Simone tari Kirineea sar avela sine tari niva. Čhige o krsto upro leste hem čhige le te phiravel le palo Isus. 27 But manuša džana sine palo Isus, a maškar lende sine o džuvla da so rovena sine hem žalinena le.

28 Ama o Isus irangja pe ki lende hem phengja lenge: "Čhajalen taro Erusalim, ma roven baši mange, nego roven tumenge hem tumare čhavenge. 29 Soske ka avel o dive koga ka vakeren: ‘Blagoslovime tane o romnja soj bizo čhave, so na bijange hem so na denge thud.’ 30 Togaš

‘ka vakeren e planinenge: "Peren upra amende!"

hem e ridonge: "Učharen amen!"’✝

31 Soske ako o manuša kerena akala bukja koga o kaš tano zeleno, so ka ovel koga o kaš ka ovel šuko?"

32 E Isuseja sine legarde panda duje buntovnikon te oven mudarde. 33 I koga resle ko than so vikinela pe sine Čerep, adathe o vojnikija čhige e Isuse ko krsto hem leja čhige adale buntovnikon, jekh tari desno strana, hem jekh tari levo strana.

34 O Isus phengja: "Mo dad, oprostin lenge, soske na džanena so kerena."

Togaš o vojnikija frdinge ždrepka hem agjar delinge maškar peste e Isuseskere šeja.

35 O narodo tergjola sine hem dikhela, a o vodačija e Evrejengere asana sine e Isuseske vakerindor: "Javeren spasingja, a akana neka spasinel korkori pes ako tano čače ov o Hristos e Devleskoro, o Birimo!"

36 Hem o vojnikija asana sine e Isuseske. Ale uza leste hem ponudinge le šut, 37 vakerindor: "Ako sijan o caro e Evrejengoro, spasin tut!"

38 A upreder leskoro šero sine natpis kote so pišinela sine:

"AKAVAJ O CARO E EVREJENGORO."

39 Jekh taro buntovnikija so sine čhivdo ko krsto uvredžingja e Isuse vakerindor: "Ako sijan o Hristos, soske na spasineja tut hem amen?"

40 A o dujto buntovniko opomeningja adale so uvredžingja e Isuse: "Na daraja li e Devlestar? Soske tu da sijan agjar osudimo sar soj ov. 41 Amen pravedno sijem kaznime baši amare lošna dejla, ama akava manuš na kergja ništo lošnipe."

42 Togaš vakergja: "Isuse, setin tut ki mande koga ka ave ko to carstvo."

43 A o Isus odgovoringja leske: "Čače vakerava tuke, avdive ka ove mancar ko raj."

44 A ko dešuduj o sati, temnisalilo ki celo phuv hem agjar sine trin satija, 45 soske o kham kalilo. A e Hrameskiri zavesa pharavdili ko ekvaš.

46 A o Isus vikingja sa pe glasoja: "Mo dad, tuke ko vasta mukhava mo duho!" Koga phengja adava, mukhla pi duša.

47 A koga o Rimsko kapetani dikhla so ulo, počmingja te slavinel e Devle vakerindor: "Čače akava manuš sine pravedno!"

48 Koga sa o narodo khedinge pe te dikhen adava, dikhle so ulo hem iranindor khere khuvena pe sine ko kolin adaleske so sine lenge žal. 49 A sarinen so džanena sine e Isuse, dži o romnja so džana sine palo leste panda tari Galileja, duraldan tergjona sine hem dikhena sine adava.

50,51 A adathe sine jekh manuš so vikinela pe sine Josif tari Arimateja, gradi ki Judeja. Ov sine šukar hem pravedno manuš so adžikerela sine o carstvo e Devleskoro. Iako sine členi taro Sovet e Evrejengoro, na soglasingja pe adaleja so sine odlučimo te roden e Isuse te ovel mudardo. 52 Ov gelo ko Pilat hem rodingja o telo e Isuseskoro. 53 Togaš hujlargja o telo e Isuseskoro taro krsto, pakjargja le laneno čaršafeja hem čhigja le ko grobo savo sine kerdo ki karpa, ko savo panda nikoj na sine čhivdo. 54 Sine dive bašo spremiba, a i sabota avela sine.

55 A o romnja so ale e Isuseja tari Galileja, gele e Josifeja hem dikhle sar e Isuseskoro telo sine čhivdo ko grobo. 56 I irange pe khere hem spreminge mirisija hem mastija te makhen o telo e Isuseskoro. Ama ki sabota odmoringe pe, poštojndor i naredba taro Zakoni e Mojsijaskoro.