Rute 3

Naomi osi nttọhna s’ọbada kw’Rut

1 Ewu danẹ, Naomi kw’ode ọkka kw’odim kw’Rut oben Rut bẹ́, "Nnwa kwaam, ma, wura kojibhẹ bẹ́, nnor odim kw’im’okker-ọ yirẹ? 2 Boaz nwo kw’ad-asi ọtọhm amaana panọngva pẹ, ode ochinọng kwamina. Menda m’erungọ, m’ogwuma barli z’ọgbaarẹ kw’nd-aninga aduk barli. 3 Zọhng gbobha asi, achọkọ ana p’alebh eruk, afọra ẹnya ọkkọkka, pira achina z’ọgbaarẹ nwo kw’mad-aduk barli. Kàchera bẹ́, ọzọ-ọ, oyebẹ, kk’ọttọhk ọcha maphyir, obir ogwo atuk. 4 M’ake otum mawuriji, aze ibyi s’im’oyima. Ó̱de ikk’oyima, zọhng wong-ẹ ibara, ayim-ẹ ny’mmokpatọkọ. Kẹ m’otek-ọ ọttọhk f’im’asi."

5 Rut ọpọhn-ẹ bẹ́, "Ose kpenamkpen kw’abenẹ, kaam m’nsi minna."

6 Minna kw’ofon ochina z’ọgbaarẹ kw’mad-aduk barli, osi k’ose kw’ọkka kw’odim ọtọhn-ẹ. 7 K’ogbe kw’Boaz kk’ọttọhk ọcha maphyir, obir ogwo atuk, ettem elebh-ẹ, od-oyima z’eso danẹ ch’ọbarli-kkin nwo, ọttaabha ọda. Rut ozenga bẹ́ bẹẹm okwu okpen-ẹ ibara ny’mmokpatọkọ, oyima nya. 8 Otum ny’orungittem, Boaz ogbe z’ọda, okkon-ẹ ch’oze kwanọng nwo kw’oyim nya.

9 Ọbọbh-ẹ bẹ́, "Kọ anyi wọ?"

Rut ọpọhn-ẹ bẹ́, "Kaam Rut kw’nde ọtọhmnọng kwọ wọ e. Ototo, tima ibara sọ bubh-m, ch’ode kọ wọ ade ochinọng kw’ode ọkkaan kw’echimma."

10 Boaz oben-ẹ bẹ́, "Nnwa kwaam, tte Ọvaar Ibinọkpaabyi ọdọ-ọ. Ejibha ndoma ẹyọhng ndoza ch’akkikken asi. Kọ adikkobh p’ojibhẹ bẹ ojibh, wanẹma, p’opyibh bẹ opyibh, kakwubhọ. 11 Nnwa kwaam, oning-ọ ojor. M’nsi ọttọhk kpenamkpen f’arorọ nnang-ọ. Ayok-obhon paam maphyir mazong bẹ́, kọ ade kwanọng kw’ojibhẹ ẹmmaana mawuriji. 12 Ode odik ọkkọkka bẹ́, kaam nde ọkkaan kw’echimma. Okenaka, ochinọng oning za kw’ọnyọm-ọ ọtam ọyọhnga kaam. 13 Yima ma m’erungọ nda. Ophyinẹ k’ekpebha, óde ọdaak-ẹ bẹ́, okwu obhek-ọ, m’ojibh ojibh. Ó̱de ina kẹ ọdaakẹ bẹ́, obhek-ọ, k’ose kw’Ọvaar Ibinọkpaabyi orukọ akpen, kaam m’nsi-osi minna. Yima ma maa, ewu esobha."

14 Ofona nya o, Rut oyima ny’izek-izek kw’mmo sẹ maa, ewu esobha. Okenaka, okkikken obina pira ewu nẹttaanẹ. Boaz oben-ẹ bẹ́ "Tte ọnọng kpenamkpen oning ozong bẹ́, kwanọng okwu oyima m’ọgbaarẹ kw’nd-aduk barli."

15 Obir oben-ẹ bẹ́, "Tima ibara njo s’abubh nya, kwu jẹ ny’ọgbaarẹ." K’ose kw’otim okwu ọjẹ nya o, Boaz okpukọ abarli-mọma p’afu ọkariba ọchadanẹ, ọkẹ-ẹ nya, otinẹ ọyẹ-ẹ. Pira Boaz ọbhana z’obhon.

16 Rut opyirẹ z’oter o, ọkka kw’odim ọbọbh-ẹ bẹ, "Nnwa kwaam, chena ode yen za?" Rut otek-ẹ ọttọhk kpenamkpen f’Boaz ikk’ọsa ọnang-ẹ. 17 Obir ọttara bẹ́, "Boaz ọnang-m ọkariba mvoma ọchadanẹ f’barli, oben-m bẹ́, nning mbọhk-mbọhk nzeng nkebha ọkka kw’odim kwaam za."

18 Naomi oben-ẹ bẹ́, "Nnwa kwaam, ninga ma tik maa, aze odik kw’im’oyin. Ojinọng nwo ọwọhng mòkwoka maa, ọttọhna odik nwa menda."