Marcos 9

17 Moto omɔti ta ndanda ɛ bato bia amosɔmbɛdja boo: «Molehi, nadoi na mwana ɔ mbai odii wɛ, akatungeame na mwembo mobe imokamosie boo atabala. 18 Bisika bisusu bikamopee mwembo mua, mokamodumbe ta kpɔtɔ, mapuli makaimwane na nde ta monɔkɔ, akakpɛkɛne mino, ko mokuku ma nde mokandindime. Naongɔɔni batingami ba wɛ boo bamobengane, endolo bahɔniti omoimusedja.» 19 Yesu abasɔmbɛdja boo: «Bato ba taka ɛ edhimeli! Mbunoko ehole ndani naboani odikama nanu? Mbunoko ehole ndani nalwalea mandi ma boono? Doani na mwana.» 20 Badoa na nde odii yo. Ɔenɛ mwembo mobe mua Yesu, mapukusa mwana na ngulu; mamodumba ta kpɔtɔ, abilingana ko aimusedja mapuli ta monɔkɔ. 21 Yesu ahɔdja sango boo: «Mondumba ma modjɔ mu monɛngɛdjai na nde maswi meka?» Ko sango amosɔmbɛdja boo: «Donga obwɛngɛ ba nde. 22 Mbala djike mwembo mua mobe mokamodumbe ta mosa kaoko ta madiba bɛngɛ boo mamowoe. Endolo lookea ndjokwa ko doa alokɔmɛdjae, okapala!» 23 Yesu asɔmbɛdja boo: «Tina ebali wɛ boo okahɔnɔ okɔ maa modjɔ? Endolo, midjɔ misusu miboani okokedjama odii moto ona odhimi.» 24 Oko ta ehole ena, sɛngɛ mwana agama na ngulu boo: «Nadhimi, kɔmɛdjani, tin’ɛ bo nadii na taka ɛ edhimeli!»

25 Ɔenɛ Yesu bato bike bapete ebango mbuti na bu; bea, agamea mwembo mobe ko abala na mu boo: «Mwembo mokaimedjae moto emimi na ohoka, nabali na wɛ: imana odii mwana hoo ko pɛpɛ osɔmbɔ koko odii yo!» 26 Mwembo mobe magama, madumba mwana na ngulu, ko maimana. Mwana aimea elengɛɛ moto mogo, bato bike babala boo: «Agwii.» 27 Endolo Yesu amopea ta ebɔ, amoemedja ko mwana aema.