Marcos 9

17 Ta emumu e bato moto omɔti amosɔmbedjaka: «Molehi, nolwɛki mwana o mbi momi, tengasa atungeamaka na mwembo mobe mokamoimedje emimi. 18 Polo esusu mwembo momina ekatane mo mwana, bomodumbaka ta kpɔtɔ, na bea mapuli boimaka na nde ta monɔkɔ ko bokpɛkɛlɛkɛ mino, mokuku mosusu bopingaka. Nongɔnɔki batingami ba wɛ boo babengane mwembo momina, endolo bamohɔniti.» 19 Yesu abalaka na bu: «Bato bataka e bodima! Mbunoko ehole nda edabi mbi na nu? Mbunoko ehole nda nohɔneni? Duani na mwana!» 20 Baduaka na mwana. Ehole enɛkɛ mwana Yesu, mwembo mobe mopukusaka mwana na ngulu mɛnɛ ko akwaka ta kpɔtɔ; aimeaka bobilingana ko mapuli maimaka ta monɔkɔ. 21 Yesu ahɔdjɔkɔ sange e nde: «Bihole beka biyeyoi yogo emina na nde?» Sange e nde asɔmbedjaka: «Donga ta bobwɛngɛ bo nde. 22 Mbala isusu mwembo momina bomodumbaka ta mosa kaoko ta madiba bɛngi agwɛ. Endolo okapala, lokea ndjokwa ko lokamoa!» 23 Yesu abalaka na nde: «Okakoka! Misusu mikoki adi yona okadime.»

24 Mbala emɔti, Sange mwana alɛbɛkɛ: «Nadimi, kamoani tine taka e bodima!» 25 Yesu aenɛkɛ emumu e bato baduaka mbuti na bu; agameaka mwembo mobe: «Wɛ mwembo mu mokimedje moto emimi, ima adi mwana pɛ bosɔmbɔ naikina!» 26 Mwembo mobe moimaka adi mwana na bolɛbɛ ko na bopukusa mwana na ngulu mɛnɛ. Mwana aimeaka elenge moto agwi, ko bato banɛnɛ babalaka: «Agwi.» 27 Endolo Yesu amopeaka ta ebɔ, amoangɔdjɔkɔ ko mwana aemaka.