João 18

Osiin o Yeso

1 Ke mbee a ŋ’ebuɛɛn Yeso, ndɛ opal y’ayio a ndɛ, me ndɔɔ yi ayi ongwel ɔ̃bwɔɔ wa Sedolon. Oŋɔ̃ éli ye nguun ngamɔ̃, ndɛ bu asam onse yɔ y’ayio a ndɛ. 2 Ŋ’esa oŋɔ̃, Yuda wu átiɔ ndɛ, áyɛɛ mboo oyɔ, ke ngwel wɛ, nsa bibi Yeso y’ayio a ndɛ ákebvɔɔn oŋɔ̃. 3 Yuda obiri nkel a ambwel-mbwel ba Lom, y’ankiaal a Nzɔ a Nziã b’éwi amfam b’angaa-a-Nziã y’afalisaye, bu atɔ ke nguun oyɔ. Baal obɔ áli y’ambunda, y’ɛ̃mpaã mi andɛɛl ã mbaa, y’ãta. 4 Yeso wu áyɛɛ ndɔɔ yi ékeya me ndɛ, osyel tsotsoo a bɔ, bu ofuul bɔ ndiri: «Wu ebii byɛ nã?» 5 Bɔ abveel ndɛ ndiri: «Wu ebii bee Yeso wa Nadzelet.» Yeso obveel bɔ ndiri: «Mɛ̃ mpii ndɛ.» Yuda wu átiɔ ndɛ áli ye bɔ. 6 Kɛn a ŋ’eyɛɛn Yeso bɔ ndiri: «Mɛ̃ mpii ndɛ», bɔ abvool mbee, bu ayiool me nsie. 7 Ndɛ bvool ofuul bɔ ndiri: «Wu ebii byɛ nã?» Bɔ abveel ndɛ ndiri: «Wu ebii bee Yeso wa Nadzalet.» 8 Yeso obveel bɔ ndiri: «Mɛ̃ ngyɛɛn byɛ wɛn, mɛ̃ ndyam ndɛ. Okɛɛn wu ebii byɛ mɛ̃, oŋɔ̃ eyɔɔl b’asiil ayi.» 9 Oŋɔ̃ ŋ’asi ndɔɔ yi élieel ndɛ wu Yeso ndiri: «Mɛ̃ ke nzeel mbuul si ngɔmɔ̃ onse b’ewi yɛ mɛ̃ wɛ.» 10 Simɔ̃ Piɛɛl wu áli y’epwel, odzuru kyɛ, opfel ɔ̃sal a ngaa-a-Nziã wu ɔ̃nɛn kyɛ, bu atsɔɔ ndɛ tswi li elam. Nkuũ a ɔ̃sal ondɛ Malekos. 11 Yeso bu alieel Piɛɛl ndiri: «Bveel epwel e yɛ onse nzɔ a kyɛ. Mɛ̃ k’enywã mbiɔ yi fool yi ewi Taal mɛ̃ wɛ?»

Abiri Yeso ola Ane

12 Nkel a ambwel-mbwel ye kapiri a bɔ, y’ankiaal b’amfam b’Ayuda asiin Yeso, bu akuru ndɛ ɛ̃sii. 13 Bɔ kɛn abiri ndɛ ola Ane, ke ngwel wɛ, ndɛ wu Ane áli tal ɔ̃kal a Kayif wu áli ngaa-a-Nziã wu ɔ̃nɛn me mvel ondɛ. 14 Ŋ’esa oŋɔ̃, Kayif mbuul wu áwi Ayuda luo li: «Eli ye bvel ngamfɛn kwɛn mbuul ngɔmɔ̃ akwa me ndɔɔ a yam e baal.»

Piɛɛl otwɛn ndiri ndɛ k’ali ɔ̃yio a Yeso wɛ

15 Simɔ̃ Piɛɛl bwɛn ɔ̃yio wukyɛ ákeluɛɛn a Yeso. Ngaa-a-Nziã wu ɔ̃nɛn áyɛɛ ɔ̃yio ondɛ. Obɔ otsɛn bɛn, ndɛ osam ye Yeso onse ekɔɔ e ngaa-a-Nziã wu ɔ̃nɛn. 16 Kɛn a Piɛɛl osiil o nkwel-a-nzi, tsotsoo a ɔ̃nywa wu ekɔɔ. Obobɔ, ɔ̃yio wukyɛ ondɛ, wɛn ngaa-a-Nziã wu ɔ̃nɛn áyɛɛ ndɛ, opal oyɛɛn y’ɔ̃kaal wu akekiaal ɔ̃nywã wu ekɔɔ, bu aswɛɛl Piɛɛl. 17 Obobɔ, ɔ̃kaal wu ákekiaal ɔ̃nywã wu ekɔɔ olieel Piɛɛl bubu: «Yɛ hɛ̃ ke ngɔmɔ̃ onse ayio a mbuul wu li wɛ?» Piɛɛl obveel ndɛ ndiri: «Hɛɛ̃-hɛ̃, mɛ̃ ke ndi ɔ̃yio a ndɛ wɛ!» 18 Onge bɛn mfyɛ ékesa, asal y’ankiaal ábvool mbaa m’ãkal, bvool ákeywal yɔ. Piɛɛl hɛ̃ áli ye bɔ, bvool ákeywal mbaa.

Ngaa-a-Nziã wu ɔ̃nɛn ofuul Yeso ɛ̃mfuul

19 Ngaa-a-Nziã wu ɔ̃nɛn ofuul Yeso ɛ̃mfuul me ndɔɔ ayio a ndɛ bvool me ndɔɔ ãndɔɔ m’ékeyiool ndɛ. 20 Yeso obveel ndɛ ndiri: «Mɛ̃ ndya ngyɛɛn ye baal bueel kal-a-kal. Mɛ̃ ndyam ke ngyiool ãlio mbueel onse nzɔ ãbuɛɛn, bvool onse Nzɔ a Nziã, ke mboo yi ebebvɔɔn Ayuda bueel. Mɛ̃ ke ndi ye ndɔɔ yi ngyɛɛn mɛ̃ m’edziɔɔn wɛ. 21 Otsɛn omã b’efuul yɛ mɛ̃ ɛ̃mfuul? Fuul baal b’akeyoo mɛ̃, ãndɔɔ me ngyɛɛn mɛ̃ bɔ. Bɔ bam ayɛɛ me ãndɔɔ mɛn mɛ̃ ndyam ngyɛɛn bɔ.» 22 Ŋ’eyɛɛn Yeso obobɔ, ngɔmɔ̃ onse ankiaal b’áli oŋɔ̃, opfel ndɛ empal y’oyɛɛn m’ɔ̃nywã ndiri: «Okyɛ emfa ki ebveel yɛ ngaa-a-Nziã wu ɔ̃nɛn?» 23 Yeso obveel ndɛ ndiri: «Okɛɛn mɛ̃ ngyɛɛn obi-obi, suo obi obɔ. Kɛn okɛɛn mɛ̃ ngyɛɛn ngesɛ, ke ki ebɛɛl yɛ mɛ̃ emã?» 24 Ane bu ayuɔɔl ndɛ m’ebwal ola Kayif wu ngaa-a-Nziã wu ɔ̃nɛn.

Piɛɛl bvool otwɛn Yeso

25 Ŋ’esa oŋɔ̃, Simɔ̃ Piɛɛl osiil ke mboo oyɔ me mbaa obeywal. Afuul ndɛ ndiri: «Yɛ hɛ̃ ke ngɔmɔ̃ onse ayio a mbuul wu li wɛ?» Kɛn a Piɛɛl otwɛn ndiri: «Hɛɛ̃-hɛ̃, mɛ̃ ke ndi ɔ̃yio a ndɛ wɛ!» 26 Ngɔmɔ̃ onse asal a ngaa-a-Nziã wu ɔ̃nɛn áli oŋɔ̃. Ndɛ áli eburu e mbuul wu étsɔɔ Piɛɛl tswi. Ndɛ ofuul Piɛɛl ndiri: «Wu emwɛn mɛ̃ ndyam ye Yeso onse nguun, ke yɛ wɛ?» 27 Kɛn a Piɛɛl bvool otwɛn. Kɛn a me lio olɔ, nswee okueel.

Yeso ke nkwel a Pilate

28 M’epal-epal kwɔɔl, ambal ye Yeso ola Kayif, bu abiri ndɛ ke nzɔ a ɔ̃kwɛn ngɔmɔ̃ wu áli mbuul a Lom. Kɛn a bam b’amfam b’Ayuda k’asam onse nzɔ a ɔ̃kwɛn wɛ, ke ngwel wɛ bɔ adzii k’akal tsɛtsɛ, me ndɔɔ yi adza pfuun li Onduru. 29 Obɔ otsɛn bɛn ɔ̃kwɛn ondɛ wɛn nkuũ Pilate opal onse nzɔ, oyemwɛɛn ye bɔ okwel-a-nzi bu afuul bɔ ndiri: «Ndɔɔ yi efɛn byɛ mbuul wu mã?» 30 Bɔ abveel ndɛ ndiri: «Okɛɛn ngamburu wu yi asi yi mbi pyɛ, kɛn bee ke k’ewa ndɛ me mviɔɔl ɛ̃ yɛ wɛ.» 31 Pilate obveel bɔ ndiri: «Ewal ndɛ, etsiil ndɔɔ a ndɛ byam onge b’etam ngel a byɛ.» Ayuda abveel ndɛ bubu: «K’awi bee nkuul yi ebam mbuul wɛ!» 32 Okyɛ emfa ki ekoo ndɔɔ yi éyɛɛn Yeso me ndɔɔ yi asuo emfa ki epfu li ekieel ekwa ndɛ. 33 Pilate obvool onse nzɔ, oti Yeso mbel, bu afuul ndɛ ndiri: «Yɛ ndyam mfam a Ayuda li?» 34 Yeso obveel ndɛ ndiri: «Yɛ omɔ̃ ãtsam ã yam, wuo baal akyam ayɛɛn yɛ obobɔ me ndɔɔ a mɛ̃?» 35 Pilate obveel ndɛ ndiri: «Yɛ mɛ̃ Ɔ̃yuda aloo? Baal b’ɔ̃kiri a yam y’angaa-a-Nziã b’anɛn, b’awi yɛ me mviɔɔl ɛ̃ mɛ̃! Ki esi yɛ emã?» 36 Yeso obveel ndɛ ndiri: «Okwɛn o mɛ̃ k’oli b’ɔ̃kiri wu wɛ. Okɛɛn bɔ oli b’ɔ̃kiri wu, kɛn asal a mɛ̃ akaadzwaan, kwɛn abee mɛ̃ me mviɔɔl mi Ayuda owa. Kɛn okwɛn o mɛ̃ k’oli bo nsie ŋã wɛ.» 37 Pilate bu afuul ndɛ ndiri: «Ŋɛn yɛ ndyam ɔ̃kwɛn li?» Yeso obveel ndɛ ndiri: «Yɛ ndyam mbuul wu yɛɛn yɔ ndiri mɛ̃ ndi ɔ̃kwɛn. Mɛ̃, okɛɛn áburu mɛ̃, bvool okɛɛn mɛ̃ ngyi onse ɔ̃kiri, me ndɔɔ yi etsweel otaa-taa. Mbuul wueel wu oli onse otaa-taa ayoo m’eyɛɛn mɛ̃.» 38 Pilate ofuul ndɛ ndiri: «Otaa-taa emã?»

Awi Yeso etumbu ki epfu

Ke mbee a ŋ’efuul Pilate Yeso obobɔ, ndɛ wu Pilate bvool opal onkwel-a-nzi ke mboo yi éli Ayuda, bu alieel bɔ bubu: «Mɛ̃ ndyam ke mbɔɔ elyal si emɔ̃ ki ewa mɛ̃ mbuul wu etumbu ki epfu wɛ. 39 Kɛn onkɔɔ o byɛ ontam kwɛn mɛ̃ mpaal mbuul a bwal ngɔmɔ̃ me ndɔɔ a pfuun li Onduru, oŋɔ̃ eyɛɛn b’edzii byɛ: Mpaal byɛ ɔ̃kwɛn a Ayuda?» 40 Bɔ abveel ndɛ m’ɛ̃sɔɔl ndiri: «Hɛɛ̃-hɛ̃, ke ngaburu ondɛ wɛ! Paal bee Balabas!» Ŋ’esa oŋɔ̃, Balabas ondɛ wu ákelɔ tsungaa onse etswi e nsie.