João 2

Bal ke Kana

1 Ke mbee ãtsoo mbuaal, éli ye bal k’ola bo Kana, ke Ngalile. Ngoo a Yeso áli oŋɔ̃. 2 Áti Yeso hɛ̃ mbel ke bal olɔ, y’ayio a ndɛ. 3 Onge bɛn mbal ã bvine ãywɛn, ngoo a Yeso olieel ndɛ ndiri: «Bɔ k’abekal ye mbal wɛ.» 4 Kɛn a Yeso obveel ndɛ ndiri: «Ngu, ndɔɔ mã mpɛ̃-a-mpɛ̃ a bia-yɛ? Lio e mɛ̃ kɛn ekoo wɛ.» 5 Ngoo a Yeso olieel asal ndiri: «Esa mbueel m’ètam ndɛ byɛ osa.» 6 Oŋɔ̃, éli y’ãmbuu ãsɛɛn m’ábuo m’ãnkɔɔn, m’ékesa Ayuda ɛ̃kiri mi osuɔɔl o nzuru. Mbuu bwɛn a mbuu éli m’alitele onse ab’ɔ̃nkam (100). 7 Yeso olieel asal ndiri: «Eluul ãmbuu mã m’ãdza. Bɔ aluul mɔ̃ ãpal mpu.» 8 Ndɛ bu alieel bɔ ndiri: «Oŋɔ̃ etob ãdza omɔ̃, ebiri mɔ̃ ola mfam a pfuun.» Bɔ abiri mɔ̃. 9 Mfam a pfuun ombio ãdza m’ãkɔɔl mbal ã bvine. Ndɛ k’áyɛɛ mboo yi éfi mɔ̃ wɛ, kɛn asal b’átob ãdza áyɛɛ. Ndɛ oti ɔ̃baal mbel, 10 bu alieel ndɛ ndiri: «Mbuul wueel abewa baal mbal m’ãnduru obvie ɛ̃kwel, baal mɔ̃ ãbɔɔ, ndɛ fi abewa m’ãnkuaal-a-nkuaal. Bɛn yɛ bu kwee m’ãnduru obvie tiil meba!» 11 Okyɛ emvieel ki ɛ̃kwel ki ési Yeso ke Kana ke nsie yi Ngalile. Ndɛ osuo omfam o ndɛ, ayio bu alɔ okiool onse ndɛ.

12 Ke mbee oŋɔ̃, Yeso oyɛn Kapelanahum ye ngoo a ndɛ, ye baan-ngoo a ndɛ, y’ayio a ndɛ. Bɔ asi ãtso ke kwɛ okɔ.

Yeso onse Nzɔ a Nziã

13 Pfuun li Onduru li Ayuda al’eyii tsotsoo, Yeso bu ayɛn Yelusalem. 14 Onse ekɔɔ e Nzɔ a Nziã, ndɛ oyemwɛn baal atiɔ angwɛmbɛ, y’emɛmɛɛ̃, y’ãkuun. Ndɛ omwɛn hɛ̃ b’ákeswɛɛl nzi me nsɛn. 15 Ndɛ obuo sukɔrɔ m’ɛ̃sii mi akool-kool, bu atswɛɛl bɔ ke Nzɔ a Nziã, y’emɛmɛɛ̃, y’angwɛmbɛ. Ndɛ opoo nzi e b’ákeswɛɛl yɔ, ofɛɛn amisa. 16 Ndɛ olieel b’atiɔ ãkuun bubu: «Embaal eluɔ obvɛ bvieel! Ebee Nzɔ a tal a mɛ̃ nzɔ a obɔɔ̃ okaal!» 17 Ayio a ndɛ bu ayeyeel m’ákel ndiri: «Mfam, dzii li nzii mɛ̃ Nzɔ a yɛ edziool mɛ̃ onge mbaa✝2.17 Ãnz 69.10.» 18 Ayuda abvuru oyɛɛn, afuul ndɛ bubu: «Emvieel emã kyɛn yɛ koo k’asuo bee kwɛn awi yɛ nkuul yi asa obobɔ?» 19 Yeso bu abveel bɔ bubu: «Etsal Nzɔ a Nziã yi, mɛ̃ ètuu yɔ bvool m’ãtsoo ãtyel.» 20 Ayuda abveel ndɛ bubu: «Ési mvel ãku-ãnã ye sɛɛn m’otuu o Nzɔ a Nziã yi, bɛn yɛ bu atɛɛl yɔ m’ãtsoo ãtyel?» 21 Kɛn a Nzɔ a Nziã yi ékeyɛɛn ndɛ, éli nzuru a ndɛ. 22 Obɔ otsɛn bɛn, ŋ’ésiool ndɛ onse b’ákwi-ákwi, ayio a ndɛ ayeel kwɛn ndɛ ál’ayɛɛn obobɔ. Bɔ bu olɔ okiool onse m’ákel y’endɔɔ li élieel Yeso.

Yeso oyɛɛ ɛ̃kwal ɛ̃ baal

23 Ŋ’éli ndɛ ke Yelusalem, ke pfuun li Onduru, baal bibi alɔ okiool onse ndɛ, ŋ’emwɛn bɔ emvieel bvi ékesa ndɛ. 24 Kɛn a ndɛ k’ákelɔ ɔ̃kwal onse bɔ wɛ, ke ngwel wɛ ndɛ ákeyɛɛ bɔ bueel. 25 Ndɛ hɛ̃ k’áli ye kɔɔ kwɛn ayɛɛn ndɛ ndɔɔ me b’otal mbuul wɛ, ke ngwel wɛ ndɛ ákeyɛɛ m’ãli onse mbuul me ndyam.