1 Ke mbee oŋɔ̃, éli ye pfuun li Ayuda, Yeso bu ayɛn Yelusalem. 2 Ŋ’esa oŋɔ̃, ke Yelusalem okɔ, éli y’edzii ngemɔ̃ ki ata m’ɔ̃nywã wu Ebele me Betedzata, tsotsoo a ɔ̃nywã wu emɛmɛɛ̃. Kyɛ éli m’ãpfoo ãtaan. 3 Ke nsɛn edzoo obvɛ, éli y’embuul bibi ki anga-ãluu: Ɛ̃nkwa-mviil, anga-elyam, y’ekal. [Bɔ ákekiaal kwɛn ãdza ãndziool nzuru. 4 Ke ngwel wɛ, m’ãlio mãkyɛ ãnzwel ã Mfam ngãmɔ̃ ãkesool onse edzii bvool ãkenziool ãdza. Nga-ãluu wu ɛ̃kwel wu ákesool onse ãdza m’ãnziool nzuru ákebvuul, oluu o ndɛ okal k’omã.]*5.4 Ndɔɔ yi, k’ákel yɔ onse ɛ̃nkaan mikyɛ mi tsɔɔn-tsɔɔn wɛ. 5 Oŋɔ̃ éli ye mbuul ngɔmɔ̃ wɛn oluu ómoosa mvel ãku-ãtyel ye mpuɔ̃. 6 Yeso omwɛn ndɛ bɔ. Onge bɛn ndɛ oyɛɛ kwɛn mbuul ondɛ amaayiil oŋɔ̃, ndɛ ofuul ndɛ ndiri: «Yɛ dzii k’akal nzuru kɛɛ-kɛɛ?» 7 Nga-ãluu obveel ndiri: «Taal, mɛ̃ ke ndi ye mbuul wu atyal mɛ̃ onse edzii wɛ, ŋ’enziool ãdza nzuru. Ŋe ngyii esyal mɛ̃, oŋɔ̃ mbuul ɔ̃kyam osool ɛ̃kwel ɛ̃ mɛ̃.» 8 Yeso bu alieel ndɛ ndiri: «Tɛɛn, wal ekal e yɛ, bvool dzuu!» 9 Kɛn ɛ̃kiri-anka, mbuul ondɛ oyii nzuru kɛɛ-kɛɛ. Ndɛ owel ekal e ndɛ, bu abvi odzuu. Ŋ’esa oŋɔ̃, tsoo olɔ éli li saba. 10 Obobɔ, Ayuda ákeyɛɛn mbuul wu ábvuul ondɛ ndiri: «Nonɔ̃ eli saba, k’awi yɛ nkuul yi abiri ekal e yɛ wɛ.» 11 Kɛn a ndɛ obveel bɔ ndiri: «Mbuul wu abvuul mɛ̃, wu alieel mɛ̃ ndiri: "Wal ekal e yɛ, bvool dzuu!"» 12 Bɔ afuul ndɛ ndiri: «Mbuul wu alieel yɛ ndiri: "Wal ekal e yɛ, bvool dzuu nã"?» 13 Kɛn a mbuul wu ábvuul ondɛ k’áyɛɛ wu ábvuul ndɛ wɛ, ke ngwel wɛ Yeso ál’adziɔɔn. Nzal-a-ŋɛn embuul e baal éli ke mboo oyɔ.

14 Ke mbee oŋɔ̃, Yeso omwɛn ndɛ onse Nzɔ a Nziã, bu alieel ndɛ ndiri: «Yɛ bu bvuul obɔ, oŋɔ̃ bee ãbi obesa, kwɛn ndɔɔ yi enduru obii ebee me yɛ obetɔ.» 15 Mbuul ondɛ oyeliaal Ayuda ndiri Yeso mbuul wu aboo ndɛ. 16 Ayuda bu abvi Yeso oweel, ɔ̃tswɛ-pa wu ési ndɛ ndɔɔ oyɔ me tsoo e saba. 17 Yeso obveel bɔ ndiri: «Tal a mɛ̃ abesal tiil meba, mɛ̃ hɛ̃ ebesal.» 18 Obɔ otsɛn bɛn Ayuda bvool ayii abii ndɛ bam wu abam, me ndɔɔ yɛn ndɛ ákesiaan saba, bvool ákeyɛɛn ndiri Nziã oli Tal a ndyam, m’emfa okyɛ ndɛ ŋ’ayɛɛn ndiri ndɛ ye Nziã ali emfa ngemɔ̃.

19 «Yeso abvuru oyɛɛn, olieel bɔ ndiri: Taa-taa bam mɛ̃ eyɛɛn byɛ wɛn, Muaan k’akoo k’asa ndɔɔ si ngamɔ̃ me ndyam wɛ. Ndɔɔ yi esa ndɛ, yi emwɛn ndɛ Tal asa. Ndɔɔ yueel yi esa Tal, muaan hɛ̃ asa yɔ emfa kiki. 20 Ke ngwel wɛ, Tal odzii muaan, bvool abesuo ndɛ mbueel m’esa ndɛ. Ndɛ bvool akieel asuo ndɛ ãndɔɔ m’ãnduru okuun, kwɛn byɛ, byɛ ekam. 21 Ke ngwel wɛ, emfa ngemɔ̃ ki eseel Tal b’ákwi-ákwi, bvool asuul bɔ mwiĩ, emfa kiki Muaan aseel wu edzii ndɛ. 22 Ndɔɔ yinkyɛ yɛn, Tal k’atsiil ndɔɔ a mbuul si ngɔmɔ̃ wɛ, kɛn a ndɛ owi otsiil b’ãndɔɔ bueel me Muaan. 23 M’emfa okyɛ, bueel alweel Muaan, onge b’elweel bɔ Tal. Wɛn k’alweel Muaan wɛ, k’alweel Tal wu ayuɔɔl ndɛ hɛ̃ wɛ.»

24 «Taa-taa bam, mɛ̃ eyɛɛn byɛ wɛn, mbuul wu ayoo eyɛɛn e mɛ̃, wu alɔ okiool onse wu ayuɔɔl mɛ̃, oli y’elaã li ɔ̃bu nkal ɔ̃bu. Ndɛ k’àbɔɔ etumbu wɛ, kɛn a ndɛ ombal k’epfu, obwel k’elaã. 25 Taa-taa bam, mɛ̃ eyɛɛn byɛ wɛn, lio èyeya, lɔ emeeya meba, lɛn b’ákwi-ákwi akieel ayoo nkii a Muaan a Nziã, b’akieel ayoo yɔ akieel akal y’elaã. 26 Taa-taa bam, m’emfa kyɛn Tal oli y’elaã me ndyam, emfa kiki hɛ̃ ndɛ osi kwɛn Muaan akal y’elaã me ndyam. 27 Ndɛ hɛ̃ owi ndɛ omfam b’atsiil ãndɔɔ ã baal, me ndɔɔ yi eli ndɛ Muaan a mbuul. 28 Ebee okam me ndɔɔ oyɔ, ke ngwel wɛ lio èyeya lɛn bueel b’ali onse ãmpiɛɛn akieel ayoo nkii a ndɛ, 29 bvool akieel apal: B’ási obvɛ akieel asiool me ndɔɔ elaã, b’ási obi akieel asiool me ndɔɔ etumbu. 30 Mɛ̃ bam ke nkoo k’esa ndɔɔ si ngamɔ̃ me myam wɛ, Mɛ̃ etsiil ãndɔɔ m’emfa ki eyoo mɛ̃. Mɛ̃ etsiil ãndɔɔ m’emfa ki dzu. Ke ngwel wɛ, mɛ̃ k’esa b’edzii mɛ̃ wɛ, mɛ̃ esa b’edzii wu ayuɔɔl mɛ̃.»

31 «Okɛɛn mɛ̃ ndyam wu etsweel nzuru a mɛ̃ myam, ŋɛn ãyɛɛn ã mɛ̃ k’ãli mɔ̃-a-mɔ̃ wɛ. 32 Wu atsweel mɛ̃ mbuul ɔ̃kyam. Mɛ̃ ngyɛɛ kwɛn m’eyɛɛn ndɛ me mɛ̃ ãli mã taa-taa. 33 Byɛ baal b’eyuɔɔl antam ola Dzaã, ndɛ bu atsweel otaa-taa. 34 Me b’otal mɛ̃, mɛ̃ ke ndi ye kɔɔ e mbuul wu atsweel mɛ̃ wɛ. Kɛn a mɛ̃ ngyɛɛn obobɔ, kwɛn byɛ ebvuul. 35 Dzaã áli mbunda wu akaan bvool wu anyɛɛn, kɛn a byɛ edzii k’esia mpaa m’onyɛɛn o ndɛ me lio etsi-tsiri. 36 Mɛ̃ ndyam ndi y’otsweel b’atsweel mɛ̃ b’onduru b’etsweel Dzaã. Ke ngwel wɛ, Ɛ̃sal mi etam Taal mɛ̃ osa, ɛ̃sal myam mi ebesa mɛ̃, myɛ̃ ɛ̃tsweel mɛ̃. Myɛ̃ ɛ̃suo kwɛn Taal mbuul wu atam mɛ̃. 37 Taal ndyam wu ayuɔɔl mɛ̃ otsweel mɛ̃. Byɛ lɔɔ-okal kɛn eyoo nkii a ndɛ wɛ, byɛ hɛ̃ kɛn emwɛn osu o ndɛ wɛ. 38 Endɔɔ e ndɛ k’eli onse byɛ wɛ, ke ngwel wɛ byɛ k’ekiool wu eyuɔɔl ndɛ wɛ. 39 Byɛ ebebwɛɛl m’ákel, me ndɔɔ yɛn byɛ bam etsam wɛn, onse mɔ̃ byɛ ol’ebɔɔ elaã li ɔ̃bu nkal ɔ̃bu. Kwɛn ŋɛn m’ákel omɔ̃ m’ãtsweel mɛ̃. 40 Kɛn a byɛ k’edzii k’eya ola mɛ̃ wɛ, m’obɔɔ b’elaã. 41 Mɛ̃ k’ebii lweel li efa ola baal wɛ. 42 Kɛn a mɛ̃ ngyɛɛ byɛ: Dzii e Nziã k’eli onse byɛ wɛ. 43 Mɛ̃ ndyam ngyi me nkuũ a Tal a mɛ̃, kɛn a byɛ k’eyɔɔ mɛ̃ wɛ. Ŋɛn mbuul ɔ̃kyam oyi me nkuũ a ndyam, ndɛ ondɛ wu eyɔɔ byɛ. 44 Emfa emã kyɛn byɛ ol’ekiool, byɛ b’ebebii lweel onse byam-a-byam, bvool bɛn k’ebii lweel li efa ola Nziã ndyam wɛ? 45 Ebee otsam wɛn mɛ̃ mbuul wu efɛn byɛ ola Taal, wu afɛn byɛ Moyize, ndɛ wu eti byɛ kaã me ndɛ. 46 Ke ngwel wɛ, byɛ al’okɛɛn ekiool Moyize, byɛ ekeekiool mɛ̃ hɛ̃. Nzal-a-ŋɛn, ndɛ wu Moyize me ndɔɔ a mɛ̃ ákel. 47 Kɛn onge bɛn byɛ k’ekiool m’ékel ndɛ wɛ, byɛ ãyɛɛn ã mɛ̃ bwɛn-a-bwɛn ekiool mɔ̃?»