निर्गमन 2

मुसान जेल्मो

1 लेवीन गेराणान एक एदमी एक लेवी वोस ने बायकु हिऱ्यो वाराड़ किऱ्यो। 2 ✝2:2 प्रेरितान काम 7:20; इब्रानियो 11:23ती बायकु पेट रेनो एने तीन एक सोरो पायदा इनो; एने ज्य देखीन काय ज्य सोरो हाजो हे, केरीन ती ताह तीन मोयना वोर लिकाड़ मेली। 3 एने जेवी ती ताह होवटा दिह वोर लिकाड़ नाह सेक्यी, ते तान केरता दुंगलान एक टोपली बाणावीन ता पोर बाहेर रेन मेण लागाड़ी, एने ता माय सोराह मेलीन निल नेदीन मीरे खेड़ान विच माय सोड़ आवी। 4 ता सोरान बोणीख सेटीच उबरीन देख रियेल एती काय ता हेऱ्यो काय इथे।

5 तेवी फिरोन ने सोरी उंगेलने नेदीन मीरे आवी; एने तीन पावेरन्यु हेऱ्यी नेदीन दिड़े दिड़े फिरने बाज गीयी; तेवी ती खेड़ान विच माय टोपली देखीन तीन पावेरनीह तो लेन आवणेन केरता मोकल्यी। 6 तेवी ती टोपली सोड़ीन देख्यी ती माय एक रेड़तालो सोरो हे; तेवी तीह किव आवी एने ती केयी, "ज्यो ते एगदा इब्रीन सोरो एय।"

7 तेवी सोरान बोणीख फिरोन ने बेटीख केयी, "काय मी जाएन इब्री बायकु माय रेन एगदीह तार फाय हाद लावु? जी तार केरता सोराह दुद पिवाड्या केरी।"

8 फिरोन ने सोरी केयी, "जा!" तेवी ती जाएन ता सोरान आईख हाद लावी। 9 फिरोन ने सोरी तीह केयी, "तु ज्या सोराह ली जाएन मार केरता दुद पिवाड्या केर, एने मी तुवाह मोंजरी आपुह।" तेवी ती बायकु ता सोराह ली जाएन दुद पिवाड़ने बाज गियी। 10 ✝2:10 प्रेरितान काम 7:21जेवी सोरो मोठो एय गीयो, तेवी ती ताह फिरोन ने बेटीख फाय ली आवी, एने तो तीन बिटोख ठेरानो; एने ती ज्यो किन तान नाव मुसा मेल्यी, "मी ज्याह पाण्याम रेन काड़ील एती।"