1 तेवी बोगवान मुसाह केयो, 2 "इस्राएली माणहाह इह केरीन किज्ये काय ता मार केरता बेट लावे; एने जोला बी तान उगे रेन खुसी केरीन आपणे होद्ती, ता आखा फाय रेन मार केरता बेट ली आवज्यो। 3 एने जी वोस्तुन बेट ता फाय रेन लेणो हे त्यु ज्यु हेत्यु; होनो, चांदी, पितेल, 4 निल्ला, जामण्या एने रातला रेंगान फाड़का, हुवाल्ला दोरान फाड़का, बोकड्यान बुरा, 5 रातला रेंगा केरीन रिंगेल मेंड्रान चामड़ा, सूस नावान मोटला मासान खाल, बाबल्यान लाकोड़, 6 उजालान केरता तेल, अबिशेक तेलान केरता एने दुणीन केरता गेंदाणी वोस्तु, 7 एपोद *एने कवच ने केरता सुलेमानी दिगोड़, एने लागाड़नेन केरता मोणी। 8 एने ता मार केरता एक चोखालो जागो बाणावती, काय मी तान विच माय रेव। 9 जो काय मी तुवाह देखाड़थु, मतलब रेणेन जागो एने तान आखा सोमानान नमुना, तिहेस केरीन तुमू ताह बाणावज्यो।"

10 बाबल्यान लाकड़ान एक पेटी बाणावज्यो; तान लांबाय डेढ़ आथ, एने चोवड़ी एने उची डेढ़ डेढ़ आथान रेणे जुवी। 11 एने तीह चोखाला होनान पाणी फिरावज्यो, एने पेटीन चार चोमखेर होनान वाड़ बाणावज्यो। 12 एने होनान चार केड़ा बाणावीन तान चारू पाया पोर, एक उगे दुय केड़ा एने दिहरी उगे दुय केड़ा बी लागाड़ज्यो। 13 पोशा बाबल्यान लाकड़ान डेंगा बाणावज्यो, एने ता पोर बी होनान पाणी फिरावज्यो। 14 एने डेंगाह पेटीन दुय उगेन केड़ा माय टाकज्ये, ता केरीन पेटी उखलाणे जुवे। 15 ता डेंगा पेटीन केड़ा माय लागीन रेणे जुवे; एने पेटी हेऱ्या रेन आंगे मा किरहो। 16 एने जो गोवायीन चिट्ठी मी तुवाह आपुह, ताह बी पेटीम मिलज्यी।

17 पुशो चोखाला होनान एक पास्तावान ढापण्यो बाणावज्ये; तान लांबाय डेढ़ आथ, एने चोवड़ाय डेढ़ आथास ने रेणे जुवी।✝ 18 एने होनान दुय करूब *बाणावीन पास्तावान ढापण्यान दुयू उगे लागाड़ज्ये। 19 एक करूब एक सेंडा पोर एने दुसरो करूब दिहरा सेंडा पोर लागाड़ज्यो; एने करूबाह एने पासतावान ढापणाह तास ने टुकड़ा केरीन बाणावीन तान दुय सेंडा पोर लागाड़ज्ये। 20 एने करूब ढापणान आर पार एका दिहरान आमने सामने हेते, एने तान बाहेरल्या फाका ढापणाह डापणेन केरता हेते। 21 एने पास्तावान ढापणाह पेटीन उपेर लागाड़ज्ये; एने जी गोवायीन पोत्र मी तुवाह आपुह, तो पेटीम मिलज्ये। 22 मी ताहरी रेन तुवाह मिलते रेह; एने इस्राएली माणहान केरता जोलो उकुम माहु तुवाह आपणु हे, ता आखान बाराम पासतावान ढापण्यान उपेर रेन एने ता करूबान विच माय रेन जा गोवायीन पोत्र पेटी पोर रेती, तुवा हिऱ्यो वातु किरते रेह।

23 उवतो बाबल्यान लाकड़ान एक टेबल बाणावजी; तान लांबाय दुय आथ, एने चोवड़ो एक आथ, एने उचाय डेढ़ आथ रेणे जुवी। 24 ता पोर चोखाला होनान पाणी फिराव दिज्ये, एने तान कावदेन होनान एक मिरो बाणाव दिज्ये। 25 एने तान कावदेन चार आंगल्या चोवड़ी एक पोट्टी बाणावज्ये, एने ती पोट्टीन कावदेन होनान एक मिरो बाणावज्ये। 26 एने होनान चार केड़ा बाणावीन ता चार कोपराम लागाड़ज्ये, जा तान चार पायाम रेती। 27 ता केड़ा पोट्टीन जागेस रेणे जुवी, एने टेबल विसीन ली जाणेन केरता ज्या केड़ा कामाम आवती। 28 एने बाबल्यान लाकड़ान डेंगा बाणावीन होनान पाणी फिरावजी, एने तास केरीन टेबल उखेलज्यो। 29 ता पोर वापेर केरनेन पारात, सिंगोल, मुग्गो एने वोचणेन केरता वाटका, आखो चोखाला होनान बाणावज्ये। 30 ✝एने टेबला पोर मार ओंगाण बेटीन रोटा दाड़ीन दिह मिलज्यो।

31 "पुशो हाजो होनान एक दिवो मेलनेन खांम बाणावज्ये। होनो टाकाड़ीन तो दिवो, पाये एने डेंगी हेऱ्यो बाणावज्ये; गुमसा, गाठ एने फुल आखो एकुस टुकड़ान बोणने जुवे; 32 एने तान मीरे रेन सोव डालख्यु निकेलने जुवे, तीन डाल्यु ते दिवान एक उगे रेन एने तीन डाल्यु तान दिहरी उगे रेन निकेलने जुवे; 33 एक एक डालीम बादामान फुलान होस तीन तीन गुमसा, एने एक एक गाठ, एने एक एक फुल रेणे जुवे; दिवाम रेन निकलेल सोव डाल्युन ज्योस आकार एने रूप रेणे जुवे; 34 एने दिवान डेंगाम बादामान फुलान गेत चार गुमसा जान तान गाठ एने फुला हेऱ्या रेती; 35 एने दिवाम रेन निकलेल सोव डालख्युम रेन दुय दुय डाल्युन बुंदे एक एक गाठ रेणे जुवी, ता दिवा हेऱ्यास एकुस टुकड़ान बुणेल जुवे। 36 तान गाठ्यु एने डालख्यु, आखा दिवा हेऱ्यु एकुस टुकड़ान रेणे जुवे, चोखालो होनो टाकीन पुरो दिवो एकुस टुकड़ान बाणावज्ये। 37 एने उंजु सात दिवा बाणावज्ये; एने ताह पेटाड़ती रिज्ये काय ता दिवान सोमोर उजोड़ देखाय। 38 तान चिमटा एने आक्‍ठो विसणेन केरता चोखाला होनान ठामलो बाणावज्ये। 39 ज्य पुरो सामान कोमीत कोमी चोवतीस किलो चोखाला होना केरीन बुणेल जुवे। 40 ✝ एने चेकचिल्यो रेन ज्यु सोब वोस्तु तिहेच केरीन बाणावज्ये, जिह केरीन मी तुवाह बोयड़ा पोर देखाड़ेल हे।"