निर्गमन 3

हेलेगतालो जुरखील्यो

1 मुसा तान हाहरोक यित्रो नावान मिद्यान ने चाकऱ्यान मेंड्रा बोकड्याह चारतालो; एने तो ताह जेंगला माय दिह बुड़ता उगे होरेब नावान बोगवानान बोयड़ान आहने ली गीयो। 2 ✝3:2 प्रेरितान काम 7:30-34एने बोगवानान एक दुत काटाल्या जुरखील्यान विचीम हेलेगताला आस माय ताह देखानो; एने तो नेजेर उची केरीन दिख्यो काय जुरखील्यो हेलेगणे बाज रेनोह, पुण कोल्या नाह वुलीत। 3 तेवी मुसा मोनाम विचार किऱ्यो, "ज्यो जुरखील्यो हिलगिह, पुण कोल्या काहा नाह एत? मी जारीक आहने जाएन देखुह।"

4 जेवी यहोवा दिख्यो काय मुसा आहनी आवणे बाज रिनोह, तेवी बोगवान जुरखील्यान विच माय रेन ताह आयड्यो एने केयो, "मुसा! एय मुसा!"

तेवी तो केयो, "ओय मी न्याच हे।"

5 तेवी बोगवान ताह केयो, "उरो आहने मा आवही। एने तारा पायावाला खाहड़ा काड़ ले, काहाकाय जा जागा पोर तु उब रिनोह तो चोखालो जागो हे।" 6 पुशो तो केयो, "मी तारा बाप दादान बोगवान, एने अब्राहाम, इसहाक एने याकुब ने बोगवान हे।" काहाकाय मुसा बोगवानाह देखीन बिय जायेल इतो, केरीन तो तान मुय डाप लिदो।

7 तेवी बोगवान केयो, "मिस्र माय मार माणहाह कोहलोक दुख वेठणे पोड़ने बाज रेनोह; एने ठेकेदार ताह कोहलाक विताड़ने बाज रेनाह, ज्यो मी दिखेल हे, एने मेहनेत केरावणारान कारेण ता माणहान आयेड़नो बी मी हुमलेल हे; तान हाल एने दुख माहु सोमेज माय आव जायेल हे। 8 ✝3:8 उत्पत्ती 15:19-21तान केरता एवी मी उतेर आयेल हे काय ताह मिस्रीन ताबाम रेन सोड़वु, एने ता देसाम रेन काड़ीन एक हाजा एने मोटला देसा माय जा माय दुद एने मोवालान दार वुयेह, मतलब कनानी, हित्ती, एमोरी, परिज्जी, हिब्बी, एने यबूसी माणहान जागे पोचाडुह। 9 तानकेरता एवी हुमेल, इस्राएली माणहान आयेड़नो मी हुमलेल हे, एने मिस्री ता माणहा पोर वेला केरतेह तो बी माहु देखाह। 10 तान केरता आव, मी तुवाह फिरोन राजा फाय मोकेलथु काय तु मार इस्राएली माणहाह मिस्र माय रेन काड़ लावज्ये।"

11 पुण मुसा बोगवानाह केयो, "मी कुण हे जो फिरोन राजा फाय जाव, एने इस्राएली माणहाह मिस्र माय रेन निकाल लावु?"

12 तेवी बोगवान जापाप आप्यो, "मी खेरीस तार हिऱ्यो रेह, एने जुलबूखे तु ता माणहाह मिस्र माय रेन बाहेर काड़हे, तेवी तु ज्या बोयड़ा पोर मार बोक्ती किरहे। ज्योस पुरावो रेय काय मी तुवाह मुकलेल हे।"

13 ✝ 3:13 निर्गमन 6:2-3 तेवी मुसा बोगवानाह केयो, "जुलबूखे मी इस्राएली माणहा फाय जाएन ताह इह केरीन केह, ‘तुमरा डायलान बोगवान माहु तुमरी फाय मुकलेल हे,’ ताहार केदी ता माहु फुसती, ‘तान नाव काय हे?’ तेवी मी ताह काय केह?"

14 ✝ 3:14 प्रकाशितवाक्य 1:4,8 तेवी बोगवान मुसाह केयो, "मी जो हे तोच हे*3:14 मी जो हे तोच हे मी बोगवान हे।।" पुशो तो केयो, "तु इस्राएलीह ज्य किज्ये, ‘जान नाव मी हे,’ तोच माहु तुमरी फाय मुकलेल हे।" 15 ओवतो बोगवान ज्य बी केयो, "तु इस्राएल ने माणहाह इह केरीन किज्ये, ‘तुमरा डायलान बोगवान, मतलब अब्राहाम, इसहाक एने याकुब ने बोगवान तोच माहु तुमरी फाय मुकलेल हे। एने देख, जेलेम वोर मारो नाव ज्योस रेय, एने पिढ़ी पिढ़ी माय मारी एर ज्यास केरीन इती रेय। 16 तान केरता एवी जाएन इस्राएली माणहान डायलाह टुलो केर, एने ताह कि, तुमरा डायला अब्राहाम, इसाहाक, एने याकुब ने बोगवान माहु देखायीन ज्य कियेल हे काय मी तुमू पोर एने तुमू हेऱ्यो जो वेवारो मिस्र माय इथे, ता पोर बी द्यान दियेल हे, 17 एने मी फिसलो किर लियेल हे काय मी तुमूह मिस्र ने दुखा माय रेन बाहेर काड़ीन कनानी, हित्ती, एमोरी, परिज्जी हिब्बी, एने यबूसी माणहान देसा माय लेन जाह, ता ओहला देस हेते ज्या माय दुद एने मोवाल ने दार वुयेह।’ "

18 तेवी ता तारी होमेलती; एने तु इस्राएली माणहान डायला हिऱ्यो मिस्र ने राजा फाय जाज्यो एने ताह किज्यो, "इब्रानीन बोगवान सोताह आमरी ओंगाण देखाड़ेल हे, केरीन एवी आमुह तीन दिह्यान वाट पोर जेंगला माय जाणे दे काय आमरो बोगवान यहोवाह बोलीदान चेड़ावज्यो।" 19 पुण मी जाणथु काय मिस्र ने राजा तुमूह ताह वोर जाणे नाय देय, जाह वोर ताकेतीन आथ नाय देखाड़ी। 20 तान केरीन मी आथ ओंगाण केरीन ता आखा चोमेत्कारा केरीन जा मिस्र ने विच माय मी केरूह, ता देसाह मारूह; एने तान पासाण तो तुमूह जाणे देय।

21 ✝ 3:21 निर्गमन 12:35-36 "तेवी मी मिस्री माणहाह लागाड़ीन ज्या माणहा पोर गीण केरावुह; एने जेवी तुमू निकेलहो तेवी ठाल्ला आथ लेन नाय निकेलहो। 22 तुमरी एकेक बायकु त्युन त्युन आहेंल्युह, एने जिन तीन गेराम रेणारी फाय रेन होना चांदीन गेयणो, एने फाड़का मांग लेती, एने तुमू तो तुमरा सोरा सोरीह पेरावज्यो; इहकेरीन तुमू मिस्रीह लुटज्यो।"