Gênesis 14

अब्राम द्वारा लुताह सोड़ेवणे

1 शिनार देसान राजा अम्रापेल, एने एल्लासार ने राजा अर्योक, एने एलाम ने राजा कदोर्लाओमेर, एने गोयीमान राजा तिदाल ने टेम माय ओहलो एनो। 2 काय ता सदोम ने राजा बेरा, एने अमोरान राजा बिर्शा, एने अदमान राजा शिनाब एने सबोयीमान राजा शमबेर, एने बेला जो सोअर बी केवाथे, न्या राजान विरोद लेड़ाय किऱ्यो। 3 ज्या सोब राजा तान सिपायाह सिद्दिम नावान खोयराम जो खारली नेदीन आहने हे टुलो केऱ्या। 4 ज्या पाच राजा बारा वोरह्या वोर कदोर्लाओमेर राजान ताबाम रेना; पुण तेरावी वोरीह ज्या चारू राजान विरूद उठना। 5 चोवदावी वोरीह कदोर्लाओमेर, एने तान जोड़ीदार राजा लेड़ाय केरने चालीन आवा, एने अश्तारोत्कनम माय रापाइयोम, एने हाम माय जुजियो माय, एने शावे किर्यातेम माय एमियोह। 6 एने सेईर नावान बोयड़ाम होरी जाती माणहाह, मारती मारतेन एल्पारान वोर जो जेंगलान आहने हे, ताहरी पोच गीया। 7 ताहरी रेन फिरीन ता मिशपात माय आवा, जो कादेश बी केवाथे, एने अमालेकी माणहाह आखा देसाह, एने ता एमोरीह बी जिक लेदा, जा हससोन्तामार माय रेताला।

8 ती टेम माय सदोम, अमोरा, अदमा सबोयीम एने बेला मतलब सोअरान राजा ज्या तान सिपायड़ाह टुलो केऱ्या। एने तान दुसमोना हेऱ्या लेड़ाणेन केरता सिद्दीम नावान खोयरा उगे गीया। 9 मतलब एलाम ने राजा कदोर्लाओमेर गीयोमान राजा तिदाल, शिनारान राजा अम्रापेल, एने एल्लासार ने राजा अर्योक न्या चारान विरोद माय लेड़ाय केऱ्या। 10 सिद्दीम नावान खोयराम जाहरो लसार माटड्यान खाडाच खाडा एता; सदोम एने अमोरान राजा नाहती नाहतीन ता माय जाय पोड़ना, एने जा वोचना ता बोयड़ाम नाह गीया। 11 तेवी तान दुसमोन सदोम एने अमोरा न्या वाला आखो मालदेन, खाणेन वोस्तुह लुट लादीन लेन जात रेना। 12 एने अब्राहाम ने बोतेरजोक लुत जो सदोम माय रेतालो ताह बी मालदेन एने खाणेन वोस्तु हेऱ्या लुटीन लिजात रेना।

13 ती लेड़ायी माय जो माणुह वोच जायेल एतो, तो जाईन इब्री अब्राहामाह खुबेर पोचाड्यो; अब्राहाम ते एमोरी मम्रे, जो एशकोल, एने आनेर ने बाहख इतो, तान चोखाला जाड़ान विचीम रेतालो; एने न्या माणहे अब्राहामा हेऱ्या वाचा बांदिल एता।

14 तान बोतेरजाहख लुताह देरीन ली जात रेनाह ज्य होमलीन अब्राहाम तीन होव आठरा हिकेल लेड़ाय उशार पावराह लेन जा तान गेराणा माय पायदा इयेल एता, आथ्यारे लेन दान हेयराम वोर तान पासाण पोड़ना। 15 एने रातीम रात आंगे आंगे टुलो बाणावीन ता पोर हामलो केरीन ताह मार देना एने होबा वोर दमिश्क ने उत्तर उगे हे, तान पासाण पोड़ना। 16 तेवी तो दुसमोन लुटेल आखो मालदेनाह, एने तान बोतेरजाहक लुताह, एने तान मालदेनाह, बायकुह, एने पावोराह, अब्राहाम पुशो फिराव लियावो।

मलकिसिदक अब्राहामाह बोरकेत आपणो

17 उवतो तो कदोर्लाओमेर एने तान जोड़ीदार राजाह जिकीन आवतालो, तेवी सदोमान राजा शावे नावान खोयरा माय जो राजान खोयारो बी केवाथे ताह मिलनेन केरता आवो। 18 तेवी शालेमान राजा मलकिसिदक जो मुखी बोगवानान चाकऱ्यो इतो, तो रूटो एने मोवाल लेन आवो।✝14:18 इब्रानियो 7:1-10; बजन 110:4 19 एने मलकिसिदक अब्राहामाह ज्यी बोरकेत आपीन केयो, "हिरोग एने देरती बाणावणार मुखी बोगवाना उगे रेन तु बोरकेत वालो बुणे। 20 एने बोरकेत वालो हे मुखी बोगवान, जो तारा दुसमोनाह तारा ताबाम केर दियेल हे। तेवी अब्राहाम ताह सोब वोस्तुन दोहवो ईसो आप्यो।"

21 तेवी सदोमान राजा अब्राहामाह केयो, "माहु निस्तो देरीन ली जाईल ता माणहाह आप दे, एने मालदेनाह तार फाय मेल।"

22 पुण अब्राहाम सदोमान राजाह केयो, "हिरोग एने देरतीह बाणावणार मुखी बोगवानान मी वचन आपथु, 23 मी ओहलो कायच नाय मेलु, मी न्या माय रेन एक हुत बी एने नाहते खाहड़ान दोयड़ी, नाय ते काल्ली दिहरी वोस्तु मेलुह; काय तु ओहलो नाय केणे जुवे काय अब्राहाम मार कारेण मालमातो बुणेल हे। 24 पुण जो काय ज्या जुवान्या खायेल हेते, एने तान ईसो जा मार हेऱ्या जायेल एता; मतलब आनेर, एशकोल, मम्रे मी नाय फिरावो, ता ते तान तान हिसो राख लेय।"