1 ହେ ୱେଡ଼ାଲିଂ ନି ଲକୁ ହିମ୍‌ଣାଂନି ଉପ୍‌କାର୍‌କାରିର୍‌ ମିକାୟେଲ୍‌ ଗାଜା ଆଦିପତି ନିଲ୍‌ନାନ୍‌ ଆରି ମାନାୟ୍‌ କୁଟୁମ୍‌ନି ରଚ୍ୟାତିକାଡ଼୍‌ତାଂ ହେ ସମୁ ପାତେକ୍‌ ଇମ୍‌ଣି ବାନି କସ୍ଟ ସମୁ ଇନାୱେଡ଼ାଂ ଆୱାତାତ୍‌ନା, ଏଲେଂ କସ୍ଟନି କାଡ଼୍‌ ଏକାୱାନାତ୍‌, ଆରେ, ନି କୁଟୁମ୍‌ନିକାର୍‌ ଇମ୍‌ଣି ଜାଣ୍‌କେତି ପତିତ ତର୍‌ ଲେକା ଆତାତ୍‌ନା, ହେୱାର୍‌ ଜାଣ୍‌କେ ହେ ସମୁତ ଉଦାର୍‌ ପାୟାନାର୍‌ । 2 ଆରେ, ପୁର୍ତିନି ଦୁଡ଼ିତ ଇମ୍‌ଣାକାର୍‌ ହୁଞ୍ଜ୍‌ନାର୍‌, ହେୱାର୍‌ ବିତ୍ରେତାଂ ଆଦେକ୍‌ ନିଂନାର୍‌; କେତେକ୍‌ ୱିଜ଼୍‌ୱି ଜିବୁନ୍‌ ଆରି କେତେକ୍‌ ଲାଜ୍‌କୁଇନାର୍‌ ଆରି ୱିଜ଼୍‌ୱି ଉଡ଼ାନାକା ବଗ୍‌ କାଜିଂ ନିଂନାର୍‌ । 3 ଆରେ, ଇମ୍‌ଣାକାର୍‌ ଗିୟାନିର୍‌, ହେୱାର୍‌ ଆକାସ୍‍ନି ଅଜଡ଼୍‌ନି ଲାକେ ଆରି ଇମ୍‍ଣାକାର୍‌ ଆଦେକ୍‌ତିଂ ଦାର୍ମିନି କାଜିଂ ମାସ୍‌ସି ତାହିୱାନାର୍‌, ହେୱାର୍‌ ହୁକାଂନି ଲାକେ ୱିଜ଼୍‌ୱି କାଡ଼୍‌ ପାତେକ୍‌ ପଙ୍ଗ୍‌ନାର୍‌ ।

4 ମତର୍‌ ଏ ଦାନିୟେଲ୍‌, ଏନ୍‌ ହାରିହାରା କାଡ଼୍‌ ପାତେକ୍‌ ଇ ବଚନ୍‌ ସବୁ ବନ୍ଦ୍‌ କିଜ଼ି ଆରି ଇ ପତି ମୁଦା କିଜ଼ି ଇଟା; ଆଦେକ୍ ଇଣ୍ଟିଙ୍ଗ୍‌ ହାଣ୍ଟିଙ୍ଗ୍‌ ହନ୍‌ପାନାର୍‌ ଆରି ଗିୟାନ୍‌ନି ବାଡା ଆନାତ୍‌ ।

5 ହେଏଚେକାଡ଼୍‌ଦ ଆନ୍‌ ଦାନିୟେଲ୍‌ ମାଜ଼ିହୁଡ଼୍‌ତାଂ, ଆରେ ହୁଡ଼ାଟ୍‌, ବିନ୍‌ ରିୟାର୍‌ ନିଲ୍‌ତାର୍ଣ୍ଣା, ରୱାନ୍‌ ନାଗୁଡ଼୍‌ ଗୁଟିନି ଇଲାଗାୟ୍‌ ଆରି ବିନ୍ ରୱାନ୍‌ ନାଗୁଡ଼୍‌ଗୁଟିନି ହେ ଲାଗାୟ୍‌ତ । 6 ଆରେ, ଡ଼ିଞ୍ଜ୍‌ନି ହେନ୍ଦ୍ରାତ ଉସ୍ପାତାକାନ୍ ଆରି ନାଗୁଡ଼୍‌ ଏଜ଼ୁଙ୍ଗ୍‌ ଜପିନିକାନ୍ ଇମ୍‌ଣି ମାନାୟ୍‌, ତାଂ ରୱାନ୍ ଇଚାନ୍‌, ଇସବୁ କାବା ବିସ୍ରେନି ହାରିହାରା ପାତେକ୍‌ କେତେକ୍‌ ବାର୍‌ହୁ ଲାଗାନାତ୍‌ ?

7 ହେବେ ଆନ୍‌ ୱେଚାଙ୍ଗ୍‌, ଡ଼ିଞ୍ଜ୍‌ନି ହେନ୍ଦ୍ରାତ ଉସ୍ପାତାକାନ୍ ଆରି ନାଗୁଡ଼୍‌ ଏଜ଼ୁଙ୍ଗ୍‌ ଜପିନିକାର ମାନାୟ୍‌ ଜାର୍‌ ତିନାକେଇ ଆରି ଡେବ୍ଇ କେଇ ସାର୍ଗେ ନିପ ନିକ୍‌ଚି ନିତ୍ରେଜିତିତି ତର୍‌ଦ ପାର୍ମାଣ୍‌ କିଜ଼ି ଇଚାନ୍‌, ଇଦାଂ ତିନ୍ ବାର୍ହୁ ଆଦା ପାତେକ୍‌ ଆନାତ୍‌; ଆରେ, ହେୱାର୍‌ ପୁଇପୁୟା ଲଗାର୍ତି ବପୁ ଡ୍ରିକ୍‌ନାକା ସେସ୍‌ କିତାର୍‌, ଇ ସବୁ ବିସ୍ରେ ପୁରା ଆନାତ୍‌ ।

8 ଆରେ, ଆନ୍‌ ୱେଚାଙ୍ଗ୍‌, ମତର୍‌ ବୁଜା ଆୱାତାଂ; ପାଚେ ଆନ୍‌ ଇଚାଙ୍ଗ୍‌, ଏ ନା ମାପ୍ରୁ, ଇସବୁନି ହାରିହାରା କାଡ଼୍‌ଦ ଇନାକା ଆନାତ୍‌ ?

9 ହେବେ ହେୱାନ୍‌ ଇଚାନ୍‌, ଏ ଦାନିୟେଲ୍‌, ଏନ୍‌ ଜାର୍‌ ହାଜ଼ିତ ହାଲା; ଇନାକିଦେଂକି ହାରିହାରା କାଡ଼୍‌ ପାତେକ୍‌ ଇ ବଚନ୍‌ସବୁ ବନ୍ଦ୍‌ ଆରି ମୁଦ୍‌ ଆତାତ୍‌ନା । 10 ଆଦେକ୍‌ ଜାର୍‌ତିଂ ନିର୍ମଲ୍‌ ଆରି ଡ଼ିଞ୍ଜି କିଦ୍‌ନାନ୍‌ ଆରି ପୁଇପୁୟା କିତି ଆନାତ୍‌; ମତର୍‌ ଚୁଲ୍‌ଚୁଲିୟା ବାନ୍ୟାର୍‌ ବେବାର୍‌ କିନାର୍‌ ଆରି ଚୁଲ୍‌ଚଲିୟାର୍ତି ବିତ୍ରେତାଂ ଇନେର୍‌ ବୁଜାଉର୍‌; ମତର୍‌ ଗିୟାନି ଲକୁ ବୁଜାନାର୍‌ ।

11 ଆରେ, ଇମ୍‌ଣି ୱେଡ଼ାଲିଂ ନିତ୍ରେ ଆକାତ୍‌ ଟେବା ଆନାତ୍‌ ଆରି ନାସ୍‌କାର୍‌ୟା ଗିଣ୍‌ଜଗ୍‌ ଆଡ଼୍‌ମାଡ଼୍‌ ରଚ୍ୟା ଆନାତ୍‌, ହେ ସମୁତାଂ ଏକ୍‌ ହାଜାର୍‌ ଦୁୟ୍‌ ସ ନବେ ଦିନ୍‌ ଆନାତ୍‌ । 12 ଇମ୍‌ଣି ଲଗୁ କାସି ମାନାନ୍‌ ଆରି ଏକ୍‌ ହାଜାର୍‌ ତିନ୍‌ସ ତିରିସ୍‌ ପାଞ୍ଚ୍‌ ଦିନ୍‌ ପାତେକ୍‌ ମାନାତ୍‌, ହେୱାନ୍‌ ଦନ୍ୟ ।

13 ମତର୍‌ ହାରିହାରା ପାତେକ୍‌ ଏନ୍‌ ଜାର୍ ହାଜ଼ିତ ହାଲାଟ୍‌; ଇନାକିଦେଂକି ଏନ୍‌ ଜମ୍‌ନାୟ୍‌ ଆରି କାଡ଼୍‌ନି ହାରିହାରାତ ଜାର୍‌ ଆଦିକାର୍‌ତ ନିଲ୍‌ନାୟ୍‌ ।