1 ଇଦାଂପାଚେ ନବୁକଦ୍‌ନିତ୍ସର୍‌ତି ସାସନ୍‌ କାଡ଼୍‌ନି ଜେତି ବାର୍ହୁତ, ନବୁକଦ୍‌ନିତ୍ସର୍‌ କ୍ଡେଞ୍ଜ୍‌କଣ୍ ହୁଡ଼୍‌ତାନ୍; ହେବେ ତା ଜିବୁନ୍‌ ତ୍ରିଗ୍‌ତାତ୍‌ ଆରି ତା ହୁଚ୍‌କାଣ୍‌କୁ ରିଙ୍ଗ୍‌ତିକ୍ । 2 ପାଚେ ରାଜାତି ତା କ୍ଡେଞ୍ଜ୍‌କଣ୍‌ ୱେଚ୍‌ନି କାଜିଂ ରାଜା ବେଣ୍‌ବାକ୍‌ଣାୟ୍‌କିନାକାନ୍‌ ଚୁଟ୍‌କିୟାର୍‌, ଡିହୁରିର୍‌, ଜାଦୁକିନାକାର୍‌ ଆରି କଲ୍‌ଦିୟରିଂ କୁକ୍‌ନି କାଜିଂ ବଲ୍‌ ହିତାନ୍ । ଇବେ ହେୱାର୍‌ ୱାଜ଼ି ରାଜାତି ମୁମ୍‌ଦ ନିଲ୍‌ତାର୍‌ । 3 ଆରେ, ରାଜା ହେୱାରିଂ ଇଚାନ୍‌, ଆନ୍‌ ର କ୍ଡେଞ୍ଜ୍‌କଣ୍‌ ହୁଡ଼୍‌ତାଂନା, ଆରେ ହେ କ୍ଡେଞ୍ଜ୍‌କଣ୍‌ ବୁଜାନି କାଜିଂ ନା ମାନ୍‌ ଚିନ୍ତା ଆନାତା । 4 ହେବେ କଲ୍‌ଦିୟର୍‌ ଅରାମିୟ ବେରଣ୍‌ତ ରାଜାଙ୍ଗ୍‌ ଇଚାର୍‌, "ଏ ରାଜା, ନିତ୍ରେଜିଜ଼ି ମାନା; ନି ଆଡ଼ିୟାରିଂ କ୍ଡେଞ୍ଜ୍‌କଣ୍‌ ୱେଚ୍‌ଚା, ଆପେଙ୍ଗ୍‌ ହେବେନି ଅରତ୍‌ ହପ୍‌ନାପ୍ ।" 5 ରାଜା କଲଦିୟରିଂ ଉତର୍‌ ହିଜ଼ି ଇଚାନ୍‌, ନା ତାଂ କାତା ହସି ହାଚାତେ; ଏପେଙ୍ଗ୍‌ ଜଦି ହେ କ୍ଡେଞ୍ଜ୍‌କଣ୍ ଆରି ହେବେନି ଅରତ୍‌ ନାଂ ୱେଚ୍‌ଚିୱିତିସ୍‌, ତେବେ ଏପେଙ୍ଗ୍‌ ଗନ୍ଦା ଗନ୍ଦା ଆଜ଼ି କାତ୍ୟାନାଦେର୍‌ ଆରି ମି ଇଲ୍‌ ଡ଼ାପିଗାତ୍‌ କିଆନାତ୍‌ । 6 ମତର୍‌ ଜଦି ଏପେଙ୍ଗ୍‌ କ୍ଡେଞ୍ଜ୍‌କଣ୍‌ ଆରି ହେବେନି ଅରତ୍‌ ହପ୍‌ତିସ୍‌, ତେବେ ଏପେଙ୍ଗ୍‌ ନା ତାଂ ଦାନ୍‌, ଇନାମ୍‌ ଆରି ବେସିୱାରି ଗାଟାନାଦେର୍‌; ଇଦାଂକାଜିଂ ହେ କ୍ଡେଞ୍ଜ୍‌କଣ୍‌ ଆରି ହେବେନି ଅରତ୍‌ ନା ଲାଗେ ହପାଟ୍‌ । 7 ହେୱାର୍‌ ରି ହଟ୍‌ ଉତର୍‌ ହିଜ଼ି ଇଚାର୍‌, "ଏ ରାଜା, ଜାର୍‌ ଆଡ଼୍‌ୟାରିଂ କ୍ଡେଞ୍ଜ୍‌କଣ୍‌ତିଂ ୱେଚ୍‌ଚା, ହେବେ ଆପେଙ୍ଗ୍‌ ଅରତ୍‌ ହପ୍‌ନାପ୍‌ ।"

8 ରାଜା ଉତର୍‌ କିଜ଼ି ଇଚାନ୍‌, ନା ତାଂ କାତା ହସି ହାଚାତ୍‌ନା, ଇଦାଂ ହୁଡ଼୍‌ଜି ଏପେଙ୍ଗ୍‌ ସମୁ ବିଲମ୍‌ କିନି କାଜିଂ ଇଚା କିନାଦେରା, ଇଦାଂ ଆନ୍‌ ନିଚୟ୍‌ ପୁନାଙ୍ଗ୍‌ । 9 ମତର୍‌ ଏପେଙ୍ଗ୍‌ ଜଦି ହେ କ୍ଡେଞ୍ଜ୍‌କଣ୍‌ ନାଂ ୱେଚ୍‌ଚିୱିତିସ୍‌; ତେବେ ମି କାଜିଂ ରଞ୍ଜାଙ୍ଗ୍‌ ମତର୍‌ ବିଦି ମାନାତ୍‌; ଇନାକିଦେଂକି ସମୁନି ବାଦ୍‌ଲି ଆନି ପାତେକ୍‌ ଏପେଙ୍ଗ୍‌ ନା ଲାଗେ ମିଚ୍‌ ଆରି ଆକାର୍‌ କାତା ଇନି କାଜିଂ ଜାଲ୍‌ଦି କିତାଦେର୍ଣ୍ଣା; ଇଦାଂକାଜିଂ ଏପେଙ୍ଗ୍‌ କ୍ଡେଞ୍ଜ୍‌କଣ୍‌ ନାଂ ୱେଚ୍‌ଚାଟ୍‌, ତାଆତିସ୍ ଏପେଙ୍ଗ୍‌ ଜେ ହେବେନି ଅରତ୍‌ ନା ଲାଗାୟ୍‌ ହପ୍‌ତେଂ ଆଡ୍‌ନାଦେର୍‌, ଇଦାଂ ଆନ୍‌ ପୁନାଂ ।

10 କଲ୍‌ଦିୟର୍‌ ରାଜାତି ମୁମ୍‌ଦ ଉତର୍‌ କିଜ଼ି ଇଚାର୍‌, ଗାଜାରାଜାତି ବିସ୍ରେ ଜେ ହପ୍‌ତେଂ ଆଡ୍‌ନାଦେର୍‌, ପୁର୍ତିତ ଏଲେଙ୍ଗ୍‌ ଇମ୍‌ଣାକାପା ଚୁଟ୍‌କିୟା କିବା ଡିସାରିରିଂ କି କଲଦିୟରିଂ ଏଲେଙ୍ଗ୍‌ କାତା ୱେନ୍‍ବାୱାତାନ୍‌ନା । 11 ଆରେ, ଗାଜା ରାଜା ଇନାକା ମାନ୍‌ କିନାନ୍‌, ହେଦାଂ ଉଣାନି ବିସ୍ରେ ଆକାୟ୍‌ ଆରି ଇମ୍‌ଣାକାର୍‌ ଇଲ୍‌ ନାସ୍‌ଆନି ଗାଗାଡ଼୍‌ତ ଆକାୟ୍‌, ହେ ପେନ୍‌କୁ ପିସ୍ତି ଆରେ ଇନେର୍‌ ଗାଜାରାଜାତି ମୁମ୍‌ଦ ହେଦାଂ ହପ୍‌ତେଂ ଆଡୁନ୍‌ ।

12 ଇ କାରଣ୍‌ତାଂ ରାଜା ରିସା ଆରି ଜବର୍‌ କାକ୍ରି ଆଜ଼ି ବାବିଲ୍‌ନି ସବୁ ଗିୟାନ୍‌ ଲଗାଂ ଅସ୍ତେଙ୍ଗ୍‌ ବଲ୍‌ ହିତାନ୍ । 13 ହେବେ ବଲ୍‌ ପର୍‌ଚାର୍‌ ଆତାତ୍‌ ଜେ, ଗିୟାନି ଲଗୁ ହାନାର୍‌; ଆରେ, ଲକୁ ଦାନିୟେଲ୍‌ ଆରି ତା ହାଂୱାରିଂ ଅସ୍ତେଙ୍ଗ୍‌ ଡେକ୍‌ତାର୍‌ ।

14 ହେଏଚେକାଡ଼୍‌ଦ ଅରିୟକ୍‌ ତର୍‌ଦ ଇମ୍‌ଣି ରାଜାମୁଡ଼୍‌ମେଲ୍ୟା ବାବିଲ୍‌ୟ ଗିୟାନିରିଂ ଅହ୍ନି କାଜିଂ ହସି ମାଚାନ୍‌, ହେୱାନିଂ ଦାନିୟେଲ୍‌ ଚିନ୍ତା କିଜ଼ି ଆରି ଗିୟାନ୍‌ତ ଉତର୍‌ ହିତାନ୍; 15 ହେୱାନ୍‌ ରାଜାମୁଡ଼୍‌ମେଲ୍ୟା ଅରିୟକ୍‌ତିଂ ଉତର୍‌ କିଜ଼ି ଇଚାନ୍‌, ରାଜାତି ବଲ୍‌ ଏଚେକ୍‌ ବିପ୍ତି ଇନେକିଦେଂ ? ହେବେ ଅରିୟକ୍ ଦାନିୟେଲ୍‌ତିଂ ସବୁ ୱେଚ୍‌ଚାନ୍‌ ।

16 ଇବେଣ୍ଡାଂ ଦାନିୟେଲ୍‌ ରାଜାତି ଲାଗେ ହାଲ୍‌ଜି ଜାର୍‌ କାଜିଂ ର ସମୁ ତିର୍‌ କିଦେଂ ପାର୍ତାନା କିତାନ୍‌, ହେଦାଂ କିତିସ୍‌ ଗାଜାରାଜାତି ଲାଗାୟ୍‌ କ୍ଡେଞ୍ଜ୍‌କଣ୍‌ନି ଅରତ୍‌ ହପ୍‌ନାଂ ଇଞ୍ଜି ଇଚାନ୍ । 17 ଇବେଣ୍ଡାଂ ଦାନିୟେଲ୍‌ ଜାର୍‌ ଇଞ୍ଜ ହାଚାନ୍‌, ଆରେ ହେୱାନ୍‌ ଆରି ହେୱାନ୍ତି ହାଙ୍ଗ୍‌ଦାକାର୍‌ ଇନେସ୍ ବାବିଲ୍‌ନି ବିନ୍‌ନିକାର୍‌ ଗିଆନିର୍‌ ଲାହାଂ ବୁଡା ଆଉର୍‌, 18 ଇଦାଂକାଜିଂ ଇ ବିତ୍ରି ବିସ୍ରେ ସାର୍ଗେନିକା ପର୍‌ମେସ୍ୱର୍‌ତିନି ଉପ୍‌କାର୍‌ ପାର୍ତାନା କିନି କାଜିଂ ଜାର୍‌ ହାଂଦାକାନ୍ ହନନିୟ, ମିସାୟେଲ୍‌ ଆରି ଅସରିୟତିଂ ହେ କାତା ୱେଚ୍‌ଚାନ୍‌ । 19 ଇଦାଂପାଚେ ନାଣାକାଡ଼୍‌ନି ଦର୍‌ସନ୍‌ତ ହେ ବିତ୍ରେନି ବିସ୍ରେ ଦାନିୟେଲ୍‌ତି କାଜିଂ ହତାତ୍‌ । ହେବେ ଦାନିୟେଲ୍‌ ସାର୍ଗେନିକା ପର୍‌ମେସ୍ୱର୍‌ତି ଦନ୍ୟବାଦ୍‌ କିତାନ୍ । 20 ଦାନିୟେଲ୍‌ ଉତର୍‌ କିଜ଼ି ଇଚାନ୍‌, ପର୍‌ମେସ୍ୱର୍ ତର୍‌ ନିତ୍ରେ ନିତ୍ରେ ଦନ୍ୟବାଦ୍‌ ଆଏତ୍‌; ଇନାକିଦେଂକି ଗିୟାନ୍‌ ଆରି ସାକ୍ତି ହେୱାନ୍ତି; 21 ଆରେ, ହେୱାନ୍‌ ସମୁ ଆରି କାଡ଼୍‌ ବାଦ୍‌ଲାୟ୍‌ କିନାନ୍‌; ହେୱାନ୍‌ ରାଜାରିଂ ପାଦ୍‌ପିହି କିନାନ୍ ଆରି ରାଜାରିଂ ପାଦ୍‌ତ ହିନାନ୍‌; ହେୱାନ୍‌ ଗିୟାନିରିଂ ଗିୟାନ୍‌ ଆରି ବୁଦିନିକାରିଂ ଚିନ୍ତା କିଦେଂ ସାକ୍ତି ହିନାନ୍‌; 22 ହେୱାନ୍‌ ବିତ୍ରେନିକା ଆରି ଡ଼ୁକ୍ତି ବିସ୍ରେ ସବୁ ହପ୍‌ନାନ୍; ମାଜ୍‌ଗାତ ଇନାକା ମାନାତ୍‌, ହେଦାଂ ହେୱାନ୍‌ ପୁନାନ୍‌ ଆରି ହେୱାନ୍ତି ଲାଗେ ଅଜଡ଼୍‌ ବାହା କିନାତ୍‌ । 23 ଏ ନା ଆବାଲାତ୍ରାନି ପର୍‌ମେସ୍ୱର୍‌, ଆନ୍‌ ନି ଦନ୍ୟବାଦ୍‌ ଆରି ଗୁଣ୍‌ କିଦ୍‌ନାଙ୍ଗା, ଏନ୍‌ ନାଂ ଗିୟାନ୍‌ ଆରି ସାକ୍ତି ହିତ୍‌ତାୟ୍‌ନା ଆରି ନି ଲାଗାୟ୍‌ ମାଦାଂ ଗୱାରି ବିସ୍ରେ ନଂ ନାଂ ୱେଚ୍‌ଚାତାୟ୍‌ନା; ଇନାକିଦେଂକି ଏନ୍‌ ରାଜାତି କାତା ମାଂ ୱେଚ୍‌ଚାତାୟ୍‍ନା ।

24 ଇଦାଂକାଜିଂ ବାବିଲ୍‌ୟ ଗିୟାନିର୍‌ତିଂ ନାସ୍‌ କିନି କାଜିଂ ଅରିୟକ୍‌ ଲାଗାୟ୍‌ ଦାନିୟେଲ୍‌ ହାଚାନ୍; ହେୱାନ୍‌ ହାଲ୍‌ଜି ହେୱାନିଂ ଏଲେଙ୍ଗ୍‌ ଇଚାନ୍‌, ବାବିଲିୟ ଗିୟାନିରିଂ ଅସ୍ତାମାଡୁ; ରାଜାତି ମୁମ୍‌ଦ ନାଂ ଅସି ହାଞ୍ଜା, ଆନ୍‌ ରାଜାତି ମୁମ୍‌ଦ ନାଂ ଅସି ହାଞ୍ଜେର୍‌, ଆନ୍‌ ରାଜାତି ଲାଗାୟ୍‌ ଅରତ୍‌ ହପ୍‌ନାଙ୍ଗ୍‌ ।

25 ହେବେ ଅରିୟକ୍‌ ଦାନିୟେଲ୍‌ତିଂ ବେଗି ରାଜା ମୁମ୍‌ଦ ଅଜ଼ି ରାଜାଙ୍ଗ୍‌ ଏଲେଂ ଇଚାନ୍‌, ପେଜ଼୍ୟାତି ଜିହୁଦାନି ହିମ୍‌ଣାଂ ବିତ୍ରେ ଆନ୍‌ ରୱାନ୍‌ ମାନାୟ୍‌ ଗାଟାତାଂନା, ହେୱାନ୍‌ ଗାଜାରାଜାଙ୍ଗ୍‌ ଅରତ୍‌ ୱେଚ୍‌ନାନ୍‌ । 26 ରାଜା ହେ ଦାନିୟେଲ୍‌, ଇନେର୍‌ତି ତର୍‌ ବେଲ୍‌ଟସତ୍ସର ମାଚାତ୍‌, ହେୱାନିଂ ଉତର୍‌ କିଜ଼ି ଇଚାନ୍‌, ଆନ୍‌ ଇମ୍‌ଣି କ୍ଡେଞ୍ଜ୍‌କଣ୍‌ ହୁଡ଼୍‌ତାଂନା, ଏନ୍‌ କି ହେଦାଂ ଆରି ହେବେନି ଅରତ୍ ନାଂ ୱେଚ୍‌ଚେଦେଂ ଆଡ୍‌ନାୟ୍‌ ? 27 ଦାନିୟେଲ୍‌ ରାଜାତି ମୁମ୍‌ଦ ଉତର୍‌ କିଜ଼ି ଇଚାନ୍‌, ଗାଜାରାଜା ଇମ୍‌ଣି ବିତ୍ରେନି କାତା ୱେନ୍‌ବା ଆତ୍‌ତାୟ୍‌, ହେଦାଂ ଗିୟାନି ଲଗୁ କିବା ଚୁଟ୍‌କିୟା କିବା ଜଗ୍‌ଜୁଗାଲ୍‌ ଲଗୁ ପଣ୍ଡିତାର୍‌ ଗାଜାରାଜାତି ମୁମ୍‌ଦ ହପ୍‍ତେଂ ଆଡୁର୍‌; 28 ମତର୍‌ ଇନେନ୍‌ ବିତ୍ରେନି ବିସ୍ରେନାକା ହପ୍‌ନାର୍‌, ଏଲେଂ ର ପର୍‌ମେସ୍ୱର୍‌ ସାର୍ଗେତ ମାନାନ୍‌, ଆରେ ହାରିହାରା କାଡ଼୍‌ଦ ଇନା ଇନାକା ଗିଟାନାତ୍‌, ହେଦାଂ ହେୱାନ୍‌ ଗାଜା ରାଜା ନବୁକଦ୍‌ନିତ୍ସରତିଂ ୱେଚ୍‌ଚାନ୍‌ନା । ନି କ୍ଡେଞ୍ଜ୍‌କଣ୍‌ ଆରି କାଟେଲ୍‌ ଜପିନି ନିଦାଂ ମାନ୍‌ନି ଦର୍‌ସନ୍‌ ଇଦାଂ; 29 ଏ ଗାଜା ରାଜା, କାଟେଲ୍‌ ଜପି ନି ମାନ୍‌ତ ୱାନିଦିନ୍ତ ଗଟ୍‌ଣା ବିସ୍ରେନିକା ଚିନ୍ତା ଏକାୱାତାତ୍‌; ଆରେ ଇନେନ୍‌ ବିତ୍ରି ବିସ୍ରେନିକା ହପ୍‌ନାନ୍, ହେୱାନ୍‌ ଇନାକା ଗିଟାନାତ୍‌, ହେଦାଂ ନି କାଜିଂ ହପ୍‌ତାନ୍ନା । 30 ମତର୍‌ ଇମ୍‌ଣାକାନ୍‌ପା ଜିତି ଲଗୁତି ଗିୟାନ୍‌ ବାଟା ନା ଗିୟାନ୍‌ ଆଦିକ୍‌ ମାନାତ୍‌ ଇଞ୍ଜି ଇନେନ୍‌ ଇ ବିତ୍ରେନି ବିସ୍ରେ ହତାତ୍‌ନା, ହେଦାଂ ଆକାୟ୍‌, ମତର୍‌ ଗାଜା ରାଜାଙ୍ଗ୍‌ ଇନେସ୍‌ ଅରତ୍‌ ପୁନିକିୟ୍‌ କିନାତ୍‌ ଆରି ଏନେଙ୍ଗ୍‌ ଇନେସ୍‌ ଜାର୍‌ ମାନ୍‌ନି ଚିନ୍ତା ପୁନାୟ୍‌, ଇଦାଂକାଜିଂ ହେଦାଂ ନା କାଜିଂ ହତାତ୍‌ନା ।

31 ଏ ଗାଜା ରାଜା, ଏନ୍‌ ହୁଡ଼ୁ ହୁଡ଼ୁ ର ଗାଜା ପୁତ୍‌ଡ଼ା ହୁଡ଼୍‌ତାୟ୍‌, ବେସି ସାକ୍ତିନିକା ଆରି ବେସି ପଙ୍ଗ୍‌ନାକା ହେ ପୁତ୍‌ଡ଼ା ନି ମୁମ୍‌ଦ ନିଲ୍‌ତାତ୍‌ ଆରି ହେବେନି ହୁଡ଼୍‌ୱେଲ୍‌ ବୟଙ୍କାର୍‌ ମାଚାତ୍‌ । 32 ହେ ପୁତ୍‌ଡ଼ାନି କାପ୍‌ଡ଼ା କାଣ୍ଟି ହନାନିକା, ତା ନେଞ୍ଜେଡାକି ଆରି ମାରା ରୁପାନିକା, ତା ପଟ ଆରି କୁଟା ପିତାଡ଼୍‌ନିକା, 33 ତା କାଲ୍‌କୁ ଲୱାନିକା ଆରି ତା ପାନାନି ଅଲପ୍‌ ବାଗ୍‌ ଲୱାନିକା, ଅଲପ୍‌ ଚିକ୍‌ଲାନିକା ମାଚାତ୍‌ । 34 ଏନ୍‌ ହୁଡ଼ୁ ହୁଡ଼ୁ ହାରିହାରା କେଇ ପିସ୍ତି ରାସ୍ତି ର କାଲ୍‌ ପୁତ୍‌ଡ଼ାତି ଲୱା ଆରି ଚିକ୍‌ଲାନିକା ପାନାତିଂ ଇଡ଼୍‌ଜି ଗନ୍ଦା ଗନ୍ଦା କିଜ଼ି ଡ୍ରିକ୍‌ଚି ତୁହିତାତ୍‌ । 35 ଇବେଣ୍ଡାଂ ଲୱା, ଚିକ୍‌ଲା, ପିତାଡ଼୍‌, ରୁପା ଆରି ହନା ରଞ୍ଜେ ମାଡ୍‌ ଗାଣ୍ଡ୍ରା ଗାଣ୍ଡ୍ରା ଆଜ଼ି ଡ୍ରିକ୍‌ତାତ୍‌, ଆରେ କାରାୱେଡ଼ାନି କଟେର୍‌ନି ପୁଟା ଲାକେ ଆତାତ୍‌; ଆରେ, ଡ଼ୁଇ ହେ ସବୁତିଂ ଉପ୍‌ଚି ଅସିହାଚାତ୍‌ ଆରି ହେ ସବୁନି କାଜିଂ ଆରେ ବାହା ଗାଟା ଆୱାତାତ୍‌; ଆରେ, ହେ ପୁତ୍‌ଡ଼ାତିଂ ଇଡ଼୍‌ତାତ୍‌ ଇମ୍‌ଣି କାଲ୍‌, ହେଦାଂ ଗାଜାଜ଼ି ର ଗାଜାମାଡ଼ି ଆତାତ୍‌, ଆରେ ସବୁ ପୁର୍ତିତିଂ ବାର୍ତି କିତାତ୍‌ । 36 କ୍ଡେଞ୍ଜ୍‌କଣ୍‌ ଇଦାଂ, ନଂ ଆପ୍‌ ଗାଜା ରାଜାତି ମୁମ୍‌ଦ ହେବେନି ଅରତ୍‌ ୱେଚ୍‌ନାପ୍ । 37 ଏ ଗାଜାରାଜା, ଏନ୍‌ ରାଜାର୍‌ଜପିରାଜା; ସାର୍ଗେନିକା ପର୍‌ମେସ୍ୱର୍‌ ନିଂ ରାଜି, ସାକ୍ତି, କେମ୍‌ତା ଆରି ପାଣ୍‌ ହିତ୍‌ତାର୍ଣ୍ଣା । 38 ଆରେ, ଇମ୍‌ଣି ଇମ୍‌ଣାକାପା ବାହାତ ମାନାୟ୍‌ ହିମ୍‌ଣାଂ ବାହା କିନାର୍‌, ହେ ବାହାନି ବୁଇଁହାରାନି ପସୁଙ୍ଗ୍‌ ଆରି ଆକାସ୍‌ନିକିଂ ପଟିକାଂ ହେୱାନ୍‌ ନି କେଇଦ ହେଲାୟ୍‌ କିତ୍‌ତାନ୍‌ନା ଆରି ହେ ସବୁନି ଜପି ନିଂ ସାସନ୍‌ କିଦେଂ ହିତ୍‌ତାନ୍‌ନା; ଏନ୍‌ ନେ ହେ ହନାନି କାପ୍‌ଡ଼ା ନିକାୟ୍‌ । 39 ଆରେ, ନି ପାଚେ ନି ତାଂ ତାରେନ୍‌ ଆରେ ରଞ୍ଜାଙ୍ଗ୍‌ ରାଜି ନିଂନାତ୍‌, ହେଦାଂ ସବୁନିକା ପୁର୍ତି ଜପି ରାଜ୍‌ କିନାନ୍‌ । 40 ଆରେ, ଚାରି ରାଜି ଲୱା ଲାକେ ଆଟ୍‌ୱା ଆନାତ୍‌; ଇନାକିଦେଂକି ଲୱା ଇନେସ୍‌ ସବୁ ଜିନିସ୍‌ ଗନ୍ଦା ଗନ୍ଦା କିଜ଼ି ମୁକ୍‌ନାନ୍‌ ଆରି ଲୱା ଇନେସ୍‌ ଇ ସବୁତିଂ ଗୁଣ୍ଡା କିନାତ୍‌, ହେ ଲାକେ ହେ ରାଜି ଗନ୍ଦା ଗନ୍ଦା କିଜ଼ି ଡ୍ରିକ୍‌ଚି ସବୁ ଗୁଣ୍ଡା କିନାତ୍‌ । 41 ଆରେରଗ, ଏନ୍‌ ହୁଡ଼୍‌ତାୟ୍‌ ଜେ, ପାନା ଆରି ପାନାନି ୱାଚ୍‌କାଂ ଅଲପ୍‌ କୁମ୍ରେନ୍‌ ଚିକ୍‌ଲାନିକା ଆରି ଅଲପ୍‌ ଲୱାନିକା ମାଚାତ୍‌, ହେ ଲାକେ ହେ ରାଜି ବାଗ୍‌ ରାଜି ଆନାତ୍‌; ମତର୍‌ ହେବେନି ଲୱାନି ଆଟ୍‌ୱା ମାନ୍‌ଗାନାତ୍‌, ଇନାକିଦେଂକି ଲାଦିତ ଲୱା ମେହାଜ଼ି ମାନାକା ଏନ୍‌ ହୁଡ଼୍‌ତାୟ୍‌ । 42 ଆରେ, ପାନାନି ୱାଚ୍‌କାଂସବୁ ଇନେସ୍ ଅଲପ୍‌ ଲୱାନିକା ଆରି ଅଲପ୍‌ ଚିକ୍‌ଲାନିକା ମାଚାତ୍‌, ହେଲାକେ ରାଜିନି ର ବାଗ୍‌ ଆଟ୍‌ୱା ଆରି ର ବାଗ୍‌ ନାଦାର୍‌ ଆନାତ୍‌ । 43 ଆରେ, ଏନ୍‌ ଇନେସ୍ ଲାଦି ଲାହାଂ ଲୱା ମେହାତାକା ହୁଡ଼୍‌ତାୟ୍‌, ହେଲାକେ ହେୱାର୍‌ ମାନାୟ୍‌ତି ବଁସ୍‌ ଲାହାଂ ତାମାନ୍‌ତିଂ ମେହା ଆନାତ୍‌; ମତର୍‌ ଲୱା ଇନେସ୍ ଚିକ୍‌ଲାତ ମେହା ଆଉତ୍‌, ହେଲାକେ ହେୱାର୍‌ ହାରି ମେହାଜ଼ି ମାନୁର୍‌ । 44 ଆରେ, ହେ ରାଜାର୍‌ତି ସମୁତ ସାର୍ଗେନିକା ପର୍‌ମେସ୍ୱର୍‌ ର ରାଜି ରଚ୍‌ନାନ୍‌, ହେଦାଂ ଇନାୱାଡ଼ାଂପା ବୁଡା ଆଉତ୍‌, କି ହେବେନି ଆଦିକାର୍‌ ବିନ୍ କୁଟୁମ୍‌ନି କେଇଦ ପିହ୍ୟାଉତ୍‌; ମତର୍‌ ହେଦାଂ ଇ ସବୁ ରାଜିତିଂ ଗନ୍ଦା ଗନ୍ଦା ଆରି ବୁଡାୟ୍‌ କିଜ଼ି ତାମାନ୍‌ତିଂ ସସବୁଦିନ୍ତାକା ଆନାତ୍‌ । 45 ଇନାକିଦେଂକି ମାଡ଼ିତାଂ କେଇ ହିଲ୍‌ୱି ରାସ୍ତି ର କାଲ୍‌ ଜେ ହେ ଲୱା, ପିତାଡ଼୍‌, ଚିକ୍‍ଲା, ରୁପା ଆରି ହନାତିଂ ଗୁଣ୍ଡା କିତାତ୍‌, ଇଦାଂ ଏନ୍‌ ହୁଡ଼୍‌ତାୟ୍‌; ଇନାକା ଇଦାଂପାଚେ ଗିଟାନାତ୍‌, ହେଦାଂ ଗାଜା ପର୍‌ମେସ୍ୱର୍‌ ଗାଜା ରାଜାତିଂ ପୁନି କିତାନ୍‌ନା; ଆରେ, ଇ କ୍ଡେଞ୍ଜ୍‌କଣ୍‌ ନିଚୟ୍‌ ଆରି ହେବେନି ଅରତ୍‌ ହାତ୍‌ପା ।

46 ହେଏଚେକାଡ଼୍‌ଦ ରାଜା ନବୁକଦ୍‌ନିତ୍ସର ମୁମ୍‌ ଇଡ଼୍‌ଜି ଗୁର୍ଜି ଦାନିୟେଲ୍‌ତିଂ ଜୱାର୍‌ କିତାନ୍‌ ଆରି ଲକୁ ଇନେସ୍‌ ତା ଉଦେସ୍‌ତ ଆକାତ୍‌ ଆରି ହାର୍‌ବାସ୍ନା ଦୁପ୍ନି ହିନାର୍‌, ଇଦାଂ ବଲ୍‌ ହିତାନ୍ । 47 ରାଜା ଦାନିୟେଲ୍‌ତିଂ ଉତର୍‌ କିଜ଼ି ଇଚାନ୍‌, ଏନ୍‌ ଇ ବିତ୍ରେନି କାତା ହପ୍‌ତେଂ ଆଡ଼୍‌ତାୟ୍‌ନା, ଇଦାଂକାଜିଂ ନିଚୟ ନିଦାଂ ପର୍‌ମେସ୍ୱର୍‌ ଇସ୍ୱରନିକିକ୍ତାଂ ଇସ୍ୱର୍‌ ଆରି ରାଜାର୍‌ତି ମାପ୍ରୁ ଆରି ବିତ୍ରେନିକା ବିସ୍ରେନିକିଂ ହପ୍‌ନାକାନ୍‌ । 48 ପାଚେ ରାଜା ଦାନିୟେଲ୍‌ତିଂ ଗାଜା କିଜ଼ି ବେସି ମଲ୍‌ଦି ଇନାମ୍‌ ହିତାନ୍, ଆରେ ବାବିଲ୍‌ନି ସବୁ ରାଜି ଜପି ରାଜ୍ ପାଦ୍‌ ହିଜ଼ି ବାବିଲ୍‌ନିକା ୱିଜ଼ାର୍‌ ଗିୟାନିର୍‌ ଜପି ତାଂ ମୁଡ଼୍‌ ଆଦିକାରି କିତାନ୍‌ । 49 ଆରେ, ଦାନିୟେଲ୍‌ ରାଜା ଲାଗାୟ୍‌ ଗୱାରି କିତିଲେ, ରାଜା ସଦ୍ରକ୍‌, ମୈସକ୍‌ ଆରି ଆବେଦ୍‌ ନଗତିଂ ବାବିଲ୍‌ ରାଜିନି କାମାୟ୍‌ତ ବାଚି କିତାନ୍‌; ମତର୍‌ ଦାନିୟେଲ୍‌ ରାଜାଦୁୱେର୍‌ତ ମାନ୍‌ଗାତାନ୍‌ ।