1 ସବୁ ପୁର୍ତିନିକାର୍‌ ବାର୍‌ବିନ୍‌ କୁଟୁମ୍‌, ଦେସ୍‌ନିକାର୍‌ ଆରି ବାସାନିକାର୍‌ ଲକୁ କାଜିଂ ନବୁକଦ୍‌ନିତ୍ସର୍‌ ରାଜାନି ସୁଣାୟ୍‌ କିତାକା; ମିଦାଂ ବେଜେକ୍‌ ରଚେ ସାନ୍ତି ଆଏତ୍‌ । 2 ସବୁତିଂଆଗେନି ପର୍‌ମେସ୍ୱର୍‌ ନା ପାକ୍ୟାତ ଇମ୍‌ଣି ଇମ୍‌ଣି ଚିନ୍‌ ଆରି କାବାନି କାମାୟ୍‌ ପୁରା କିତାନ୍ନା, ହେଦାଂ ସବୁ ପର୍‌ଚାର୍‌ କିଦେଂ ନା ହାର୍‌ ମାନ୍‌ ଆତାତ୍‌ । 3 ହେୱାନ୍ତି ଚିନ୍ ସବୁ ଇନେସ୍ ଗାଜା ଆରି ହେୱାନ୍ତି କାବାନି କାମାୟ୍‌ ସବୁ ଇନେସ୍‌ ସାକ୍ତିନିକା! ହେୱାନ୍ତି ରାଜି ୱିଜ଼୍‌ୱିକାଡ଼୍‌ ରାଜି ଆରି ହେୱାନ୍ତି ସାସନ୍‌କିନାକା ଆଣ୍ଡ୍ରାଂ ଲାତ୍ରା ଦାଡ଼ିତାଂ ମାନ୍‌ଗାନାତ୍‌ ।

4 ଆନ୍‌ ନବୁକଦ୍‌ନିତ୍ସର୍‌ ଜାର୍‌ ଇଞ୍ଜ ସୁସ୍ତାତ ମାଚାଙ୍ଗ୍‌ ଆରି ଜାର୍‌ କଟାଗାର୍‌ତ ୱାରିତାଂ ମାଚାଙ୍ଗ୍‌ । 5 ଆନ୍‌ ର କ୍ଡେଞ୍ଜ୍‌କଣ୍‌ ହୁଡ଼୍‌ତାଂ, ହେଦାଂ ନାଂ ପାଣ୍ଡ୍ରୁ ହତ୍‌ତାତ୍‌ ଆରି ଅଚନା ଜପି ନା ଚିନ୍ତା ଆରି ମାନ୍‌ନି ଦର୍‌ସନ୍ ନାଂ ଗାବ୍‌ରା କିତ୍‌ତାତ୍ । 6 ଇଦାଂକାଜିଂ କ୍ଡେଞ୍ଜ୍‌କଣ୍‌ନି ଅରତ୍‌ ନାଂ ୱେଚ୍‌ଚିନି କାଜିଂ ଆନ୍ ବାବିଲ୍‌ନି ୱିଜ଼ାର୍‌ ଗିୟାନିରିଂ ନା ଲାଗାୟ୍ ତାନି କାଜିଂ ବଲ୍‌ ହିତାଂ; 7 ପାଚେ ଚୁଟ୍‌କିଆର୍‌, ଡିହୁରି, କଲଦିୟ ଆରି ବେଣ୍‌ବାକ୍‌ଣାୟ୍‌କିନାକାର୍‌ ନା ଲାଗାୟ୍‌ ୱାତାର୍‌; ଆରେ, ଆନ୍‌ ହେୱାରିଂ କ୍ଡେଞ୍ଜ୍‌କଣ୍‌ ୱେଚ୍‌ଚାଙ୍ଗ୍; ମତର୍‌ ହେୱାର୍‌ ହେବେନି ଅରତ୍‌ ନାଂ ୱେଚ୍‌ଚେଦେଂ ଆଡ୍‌ୱାତାର୍‌ । 8 ମତର୍‌ ହାରିହାରା ନା ପେନ୍‌ନି ତର୍‌ ଇସାବ୍ରେ ବେଲ୍‌ଟସତ୍ସର ତର୍‌ଦାକାନ୍‌ ଦାନିୟେଲ୍‌ ନା ଲାଗାୟ୍‌ ୱାତାନ୍‌, ତା ୱାସ୍କିତ ପୁଇପୁୟା ପେନ୍‌କୁନି ଜିବୁନ୍ ମାନାତ୍‌; ଆରେ, ଆନ୍‌ ତାଂ କ୍ଡେଞ୍ଜ୍‌କଣ୍‌ ୱେଚ୍‌ଚି ଇଚାଙ୍ଗ୍‌, 9 ଏ ଚୁଟ୍‌କିଆର୍‌ନି ମୁଡ଼୍‌ଦାକାୟ୍‌ ବେଲ୍‌ଟସତ୍ସର୍‌, ଆନ୍‌ ପୁନାଙ୍ଗ୍‌, ପୁଇପୁୟା ପେନ୍‌କୁନିକାନି ଜିବୁନ୍‌ ନି ୱାସ୍କିତ ମାନାନ୍‌ ଆରି ଇମ୍‌ଣାକାପା ବିତ୍ରି କାତା ନି କାଜିଂ କସ୍ଟନିକା ଆଉତ୍‌, ଇଦାଂକାଜିଂ ଆନ୍ କ୍ଡେଞ୍ଜ୍‌କଣ୍‌ତ ଇମ୍‌ଣା ଇମ୍‌ଣାକା ଦର୍‌ସନ୍‌ ପାୟାତାଂନା, ହେଦାଂ ଆରି ହେବେନି ଅରତ୍ ନାଂ ୱେଚ୍‌ଚା ।

10 ଅଚ୍‌ନା ଜପି ନା ମାନ୍‌ନି ଦର୍‌ସନ୍‌ ଇ ବାନି ମାଚାତ୍‌; ଆନ୍‌ ହୁଡ଼୍‌ତାଂ, ଆରେ ହୁଡ଼ା, ମେଦ୍‌ନି ମାଦ୍‌ଣି ବାହାତ ର ମାର୍‌ ଆରି ହେଦାଂ ବେସି ଉଚ୍‌ । 11 ହେ ମାର୍‌ ପାନ୍ତାତ୍‌ ଆରି ଆଟ୍‌ୱା ଆତାତ୍‌ ଆରି ହେବେନି ଉଚା ସାର୍ଗେ ଡୁତାତ୍‌, ଆରେ ସବୁ ପୁର୍ତିନି ହାନ୍ଦି ପାତେକ୍‌ ହେଦାଂ ଚଞ୍ଜ୍‌ଞ୍ଜି ମାଚାତ୍‌ । 12 ପାଚେ ଆକିଂ ହଲ୍‌ନାକା ଆରି ହେବେନି ପାଡ଼୍‌ ବେସି ମାଚାତ୍, ଆରେ ହେବେନିକା ୱିଜ଼ାର୍‌ କାଜିଂ କାଦି ମାଚାତ୍‌ । ଜମିନି ପସୁଂ ତା ତାରେନ୍‌ ହିତ୍‌ଡ଼ି ଗାଟାତିକ୍‌ ଆରି ଆକାସ୍‌ନିକିଂ ପଟିଂ ତା କେନ୍ଦାକାଂ ବାହା କିତିକ୍‌ ଆରି ୱିଜ଼ୁ ପାରାଣିଂ ହେବେଣ୍ଡାଂ କାଦି ଗାଟାତିକ୍‌ ।

13 ଆନ୍‌ ଅଚ୍‌ନା ଜପି ନା ମାନ୍‌ନି ଦର୍‌ସନ୍‌ଦାଡ଼ିରେ ହୁଡ଼୍‌ତାଂ, ଆରେ ହୁଡ଼ାଟ୍‌, ର ଜାଗ୍‌ୱାଡ଼୍‌ ଆରି ସାର୍ଗେତାଂ ଦୁତ ଜୁଜ଼ି ୱାତାନ୍ । 14 ହେୱାନ୍‌ ଗାଜା କାଟ୍‌ କିଜ଼ି ଇ କାତା ଇଚାନ୍‌, ଇ ମାର୍‌ତିଂ କାତାଟ୍‌ ଆରି ହେବେନି କେନ୍ଦାଙ୍ଗ୍‌ ଡ଼ତ୍‌ତି ତୁହିଆ, ହେବେନି ଆକିଂ ଡ଼ାତ୍‌ତି ତୁହିଆ ଆରି ପାଡ଼୍‌ସବୁ ଡ଼ିଉଜି ତୁହିଆ; ହେବେନି ତାରେନ୍ନି ପସୁଙ୍ଗ୍‌, ହେବେନି ଡାଡ଼୍‌ତାଂ ପଟିଙ୍ଗ୍‌ ହନ୍‌ଞ୍ଚି ହାଲେକ୍ । 15 ଆତିସ୍ପା ମେଦ୍ନିତ ତା ମୁଣ୍ଡି-ଗାଣ୍ଡିତିଂ ଲୱା ଆରି ପିତାଡ଼୍‌ନିକା ହିକ୍‌ଡ଼ିତ ଗାଚ୍‌ଚି ଜମିନିକା କଆଣ୍‌ କାଚ୍ରା ବିତ୍ରେ ଇଟା ଆରି ଆକାସ୍‌ନି କାକାର୍‌ତ ଉଦେତ୍‌, ଆରେ ପସୁକ୍ତି ଲାହାଂ ପୁର୍ତିନି କାଚ୍ରାତ ତା ବାଗ୍‌ ଆଏତ୍‌; 16 ତା ମାନାୟ୍‌ ନେଞ୍ଜେଡାକି ବାଦ୍‌ଲା ଆଏତ୍‌ ଆରି ହେଦେଲିଂ ପସୁତି ନେଞ୍ଜେଡାକି ହିଆ ଆଏତ୍‌, ଆରେ, ତା ଜପି ସାତ୍‌ କାଡ଼୍‌ ବଡ଼ାଜ଼ି ହାଲେତ୍‌ । 17 ଇନେର୍‌ ୱିଜ଼ୁତିଂ ମୁଡ଼୍‌ଦାକାନ୍‌, ହେୱାନ୍‌ ଜେ ନାର୍‌ନିକାର୍‌ ରାଜିତ ରାଜ୍‌ କିନାନ୍‌ ଆରି ଇନେରିଂ ହେୱାନ୍ତି ମାନ୍‌, ହେୱାନିଂ ହେୱାନ୍‌ ହିନାନ୍‌, ଆରେ ମାନାୟ୍‌ତି ବିତ୍ରେ ନିଚ୍‌ ଲୁଗାଂ ତା ଜପି ବାଚି କିନାନ୍‌, ଜିତି ଲକୁ ଇନେସ୍‌ ଇଦାଂ ପୁନାର୍‌, ଇଦାଂକାଜିଂ ଇ କାତା ଜାଗ୍‌ୱାଡ଼ାର୍‌ ଆଦିକାର୍‌ତାଂ ଆରି ଇ ଦାବା ପୁଇପୁୟାନିକାର୍‌ ବଚନ୍‌ ହୁଦାଂ ଆତାତ୍‌ନା ।

18 ଆନ୍‌ ରାଜା ନବୁକଦ୍‌ନିତ୍ସର୍‌ ଇ କ୍ଡେଞ୍ଜ୍‌କଣ୍‌ ହୁଡ଼୍‌ତାଂନା; ନଂ ଏ ବେଲ୍‌ଟସତ୍ସର, ଏନ୍‌ ଅରତ୍‌ ୱେଚ୍‌ଚା, ଇନାକିଦେଂକି ନା ରାଜିନି ୱିଜ଼ାର୍‌ ଗିୟାନିର୍‌ ଲଗୁ ହେବେନି ଅରତ୍‌ ନାଂ ୱେଚ୍‌ଚେଦେଂ ଆଡୁର୍‌; ମତର୍‌ ଏନ୍‌ ଆଡ୍‌ନାୟ୍‌, ଇନାକିଦେଂକି ନି ପୁଇପୁୟା ପେନ୍‌କୁନିକା ଜିବୁନ୍‌ ମାନିଙ୍ଗ୍‌ ।

19 ପାଚେ ବେଲ୍‌ଟସତ୍ସର୍‌ ତର୍‌ଦାକାନ୍‌ ଦାନିୟେଲ୍‌ ଅଲପ୍‍କାଡ଼୍‌ କାବା ଆଜ଼ି ଟେବାତାନ୍‌ ଆରି ତା ବାବ୍‌ନା ତାଂ ଗାବ୍‌ରା କିତାତ୍‌ । ରାଜା ଉତର୍‌ କିଜ଼ି ଇଚାନ୍‌, ଏ ବେଲ୍‌ଟସତ୍ସର୍‌, ହେ କ୍ଡେଞ୍ଜ୍‌କଣ୍‌ କି ହେବେନି ଅରତ୍‌ ନିଂ ଗାବ୍‌ରା କିଦ୍‌ମେତ୍‌ । ବେଲ୍‌ଟସତ୍ସର୍‌ ଉତର୍‌ କିଜ଼ି ଇଚାନ୍‌, ଏ ନା ଗାଜାରାଜା, ଇମ୍‌ଣାକାର୍‌ ନିଂ ଗିଣ୍‌ କିଦ୍‌ନାର୍‌, ହେୱାର୍‌ତି କାଜିଂ ଇ କ୍ଡଞ୍ଜ୍‌କଣ୍‌ ଆଏତ୍‌ ଆରି ନି ଆଣ୍ଟିପାକ୍ୟା କାଜିଂ ଇବେନି ଅରତ୍‌ ଗିଟାୟେତ୍‌ । 20 ଏନ୍‌ ଇମ୍‌ଣି ମାର୍‌ ହୁଡ଼୍‌ତାୟ୍‌, ଇନାକା ଗାଜାଜ଼ି ବାଡ଼୍‌କାସ୍‌ ଆତାତ୍‌, ଇମ୍‌ଣାକାକି ଉଚା ବାଦାଡ଼୍‌ତ ଡୁତାତ୍‌ ଆରି ସବୁ ପୁର୍ତିତ ଚଞ୍ଜ୍‌ୟା ଆତାତ୍; 21 ଇମ୍‌ଣାକା ଆକିଂ ସବୁ ହଲ୍‌ନାକା ଆରି ପାଡ଼୍‌ ଗାଦେକ୍‌ ମାଚାତ୍‌ ଆରି ଇମ୍‌ଣାକାକି ୱିଜ଼ାର୍‌ କାଜିଂ କାଦି ମାଚାତ୍‌; ଇମ୍‌ଣାକାକି ତାରେନ୍‌ ଜମିତ ପସୁଙ୍ଗ୍‌ ବାହା କିତିକ୍, ଇମ୍‌ଣାକାକି କେନ୍ଦାକାଂ ଜପି ଆକାସ୍‌ନିକା ପଟିଂ କୁଚ୍‌ନାକା ମାଚାତ୍‌;

22 ଏ ଗାଜା ରାଜା, ହେ ମାର୍‌ ଏନ୍, ଏନ୍‌ ଗାଜା ଆଜ଼ି ବାଡ଼୍‌କାସ୍‌ ଆତାୟ୍‌ନା, ଇନାକିଦେଂକି ନି ଗାଜାନାକା ବାଡା ଆତାତ୍‌ନା ଆରି ହେଦାଂ ବାଦାଡ଼୍‌ ଡୁତାତ୍‌ନା ଆରି ନି ରାଜ୍‌ ପୁର୍ତିନି ହାନ୍ଦି ପାତେକ୍‌ ମେଙ୍ଗ୍‌ତାତ୍‌ନା । 23 ଆରେ, ରାଜା ଜେ ହୁଡ଼୍‌ତାୟ୍‌, ସାର୍ଗେତାଂ ର ଜାଗ୍‌ୱାଡ଼ାର୍‌ ଆରି ଦୁତ୍‌ ଜୁଜ଼ି ୱାଜ଼ି ଇଞ୍ଚାନ୍‌, ଇ ମାର୍‌ଦିଂ କାଦ୍‌ଦି ନସ୍ଟ କିଆ; ଆତିସ୍ପା ମେଦ୍ନିତ ତା ଦଲ୍‌ ଗାଣ୍ଡିତିଂ ଲୱା ଆରି ପିତାଡ଼୍‌ ହିକ୍‌ଡ଼ିତ ଗାଚ୍‌ଚି ଜମିନିକା କଆଣ୍‌ କାଚ୍ରା ବିତ୍ରେ ଇଟା; ଆରେ; ହେଦାଂ ଆକାସ୍‌ନି କାକାର୍‌ତ ଉଦେତ୍‌ ଆରି ତା ଜପି ସାତ୍‌ ବାର୍‌ହୁ ବଡ଼ାଜ଼ି ହାନି ପାତେକ୍‌ ଜମିନିକା ପସୁଙ୍ଗ୍‌ ଲାହାଂ ତା ବାଗ୍‌ ଆଏତ୍‌ ।

24 ଏ ଗାଜା ରାଜା, ଇବେନି ଅରତ୍‌ ଇଦାଂ, ଆରେ ନା ମାପ୍ରୁ ଗାଜାରାଜାତି ବିସ୍ରେ ୱିଜ଼ୁତିଂ ମୁଡ଼୍‌ଦାକାନ୍‌ ତିର୍‌କିତାକା ଇଦାଂ ଗିଟାନାତ୍‌ । 25 ଏନ୍‌ ମାନାୟ୍‌ତି ବିତ୍ରେତାଂ ଦେହାକିୟା ଆନାୟ୍‌ ଆରି ଜମିନିକା ପସୁଙ୍ଗ୍‌ତି ଲାହାଂ ନିଦାଂ କୁଚ୍‌ନାକା ଆନାତ୍‌, ବାଡ଼୍‌ଦୁନି ନିୟାୟ୍‌ ନିଂ କାଚ୍ରା ତିନାୟ୍‌, ଆରେ ଏନ୍‌ ଆକାସ୍‌ନି କାକାର୍‌ତ ଉଦ୍‌ନାୟ୍‌, ଇଲାକେ ନି ଜପି ସାତ୍‌ ବାର୍‌ହୁ ବଡ଼ାଜ଼ି ହାନାତ୍‌; ହାରିହାରା ଇନେନ୍‌ ୱିଜ଼ୁତିଂ ମୁଡ଼୍‌ଦାକାନ୍‌, ହେୱାନ୍‌ ଜେ ମାନାୟ୍‌ତି ରାଜିତ ରାଜ୍‌ କିନାନ୍‌ ଆରି ଇନେରିଂ ହେଦାଂ ହିଦେଂ ମାନ୍‌ କିନାନ୍‌, ହେୱାନିଂ ହେୱାନ୍‌ ହିନାନ୍‌, ଇଦାଂ ଏନ୍‌ ପୁନାୟ୍‌ । 26 ଆରେ, ମାର୍‌ନି ଦଲ୍‌-ଗାଣ୍ଡି ପିହ୍‌ନି କାଜିଂ ବଲ୍‌ ହିୟାନି ଅରତ୍‌ ଇଦାଂ; ସରଗ୍‌ ନେ ରାଜି କିନାତ୍‌, ଇଦାଂ ଏନ୍‌ ପୁଚି ପାଚେ ନି ରାଜି ନି କାଜିଂ ନିଚୟ୍‌ ଆନାତ୍ । 27 ଇଦାଂକାଜିଂ ଏ ଗାଜା ରାଜା, ନା ଇଞ୍ଜ୍‌ନାକା ନି ଲାଗାୟ୍‌ ଇଟ୍ୟା ଆଏତ୍‌, ଆରେ ଏନ୍‌ ଦାର୍ମିନିକା ହୁଦାଂ ଏନ୍‌ ପାପ୍‍ସବୁ ଆରି ଅର୍କିତ୍‌ତି କାଜିଂ ଦୟା ଚଚ୍‌ନି ହୁଦାଂ ଏନ୍‌ ଅଦାରୁମ୍‌ସବୁ ଦେହା କିଆ; ତାଆତିସ୍‌ ଆଜ଼ିମାନାତ୍‌, ନିଦାଂ ସାନ୍ତିନି କାଡ଼୍‌ ବାଡାନାତ୍‌ ।

28 ରାଜା ନବୁକଦ୍‌ନିତ୍ସର୍‌ କାଜିଂ ଇସବୁ ଗିଟାତାତ୍‌ । 29 ବାର୍‌ ମାସ୍‌ନି ହାରିହାରାତ ହେୱାନ୍‌ ବାବିଲ୍‌ନି ରାଜାର୍‌-ମେଡ଼୍‌ ଇଞ୍ଜ ବୁଲାଜ଼ିମାଚାନ୍‌ । 30 ରାଜା ଇ କାତା ଇଚାନ୍‌, ଆନ୍‌ ଜାର୍‌ ବାଡ଼୍‌କାସ୍‌ନି ସାସ୍‌ତ ଆରି ଜାର୍‌ ସାକ୍ତିନି ପାଣ୍‌ କାଜିଂ ରାଜ୍‌ଦାନି କିନି କାଜିଂ ଇନାକା ରଚ୍‌ଚାଙ୍ଗ୍‌ନା, ଇଦାଂ କି ହେ ଗାଜା ବାବିଲ୍‌ ଆକାୟ୍‌ ?

31 ରାଜାତି ୱେଇଦ ଇ କାତା ମାନୁ ମାନୁ ଇ ସାର୍ଗେନିକା କାତା ଆତାତ୍‌, ଏ ରାଜା ନବୁକଦ୍‌ନିତ୍ସର୍‌, ନିଂ ଇ କାତା ଇଞ୍ଜ୍‌ନାଙ୍ଗା, ନି ତାଂ ରାଜି ହାଚାତ୍‌ । 32 ଆରେ, ଏନ୍‌ ଲକୁ ବିତ୍ରେତାଂ ଦେହାକିୟା ଆନାୟ୍‌ ଆରି ଜମିନିକା ପସୁକ୍‌ତି ଲାହାଂ ନି କୁଚ୍‌ନାକା ଆନାତ୍‌; ବାଡ଼୍‌ଦୁ ନିୟାୟ୍‌ ନିଂ କାଚ୍ରା ତିନ୍ୟା କିୟାନାତ୍‌; ଇଲାକେ ନି ଜପି ସାତ୍‌ ବାର୍‌ହୁ ବଡ଼ାଜ଼ି ହାନାତ୍‌; ହାରିହାରା ଇନେନ୍‌ ୱିଜ଼ୁତିଂ ମୁଡ଼୍‌ଦାକାନ୍‌, ହେୱାନ୍‌ ଜେ ମାନାୟାର୍‌ ରାଜିତ ରାଜ୍ କିନାନ୍‌ ଆରି ଇନେରିଂ ହେୱାନ୍ତି ମାନ୍‌, ହେୱାନିଂ ହେୱାନ୍‌ ହେଦାଂ ହିନାନ୍‌, ଇଦାଂ ଏନ୍‌ ପୁନାୟ୍‌ ।

33 ହେ ଦାପ୍ରେ ନବୁକଦ୍‌ନିତ୍ସର୍‌ କାଜିଂ ହେ କାତା ପୁରା ଆତାତ୍‌; ଆରେ, ହେୱାନ୍‌ ମାନାୟ୍‌ତି ବିତ୍ରେତାଂ ଦେହାକିୟା ଆଜ଼ି ବାଡ଼୍‌ଦୁ ଲାକେ କାଚ୍ରା ଚିଚାନ୍‌, ଆରେ ତା ଗାଗାଡ଼୍‌ ଆକାସ୍‌ନି କାକାର୍‌ତ ଉତ୍‌ତାତ୍‌, ହାରିହାରା ତା ତେମୁଲ୍‌ ଚେଚାଣ୍‌ ପଟିନି କେଲ୍‌ ଲାକେ ଆରି ତା ୱାଚ୍‌କାପାଡ଼ି ପଟିନି ୱାଚ୍‌କାପାଡ଼ି ଲାକେ ଗାଜାତାତ୍‌ ।

34 ଇଦାଂପାଚେ ହେ ୱେଡ଼ାନି ହାରିହାରାତ ଆନ୍‌ ନବୁକଦ୍‌ନିତ୍ସର୍‌ ସରଗ୍‌ ନିପ ଜପି ହୁଡ଼୍‌ତାଂ, ସାତ୍‌ ବାର୍‌ହୁ ପାଚେ ନା ବୁଦି ନା ଲାଗାୟ୍‌ ମାସ୍‌ଦି ୱାତାତ୍‌, ହେବେ ଆନ୍‌ ୱିଜ଼ୁତିଂ ମୁଡ଼୍‌ଦାକାନ୍‌ନି ଦନ୍ୟବାଦ୍‌ କିତାଂ ଆରି ଇନେନ୍‌ ୱିଜ଼୍‌ୱିଜିନାକାନ୍‌, ହେୱାନ୍ତି ଗୁଣ୍‌କେର୍‌ତାଂ ଆରି ହମାନ୍‌ୱାରି କିତାଂ; ଇନାକିଦେଂକି ହେୱାନ୍ତି ରାଜି ୱିଜ଼୍‌ୱିକାଡ଼୍‌ ଆରି ହେୱାନ୍ତି ରାଜି ଆଣ୍ଡ୍ରେନ୍‌ଦାଡ଼ିରେ ମାନ୍‌ଗାନାତ୍‌ । 35 ହେୱାନ୍‌, ପୁର୍ତିନିକାରିଂ ଲକୁରିଂ ଅଲପ୍‌ପା ହୁଡ଼ୁର୍‌; ଆରେ ହେୱାନ୍‌ ସାର୍ଗେନିକା ମେଲ୍ୟାର୍‌ ବିତ୍ରେ ଆରି ପୁର୍ତିନି ନିକାର୍‌ନି ବିତ୍ରେ ଜାର୍‌ ଇଚା ଇସାପ୍ରେ କାମାୟ୍ କିନାର୍‌; ଆରେ, ଇନେର୍‌ ହେୱାନ୍ତି କେଇ ଟେବାୟ୍‌ କିଦେଂ ଆଡୁର୍‌ ଆରି ଏନ୍ ଇନାକା କିନାୟା ଇଦାଂ ହେୱାନିଂ ଇଞ୍ଜେଙ୍ଗ୍‌ ଆଡୁର୍‌ । 36 ହେ ୱେଡ଼ାଲିଂ ନା ବୁଦି ନା ଲାଗାୟ୍‌ ମାସ୍‍ଦି ୱାତାତ୍‌ ଆରି ନା ରାଜିନି ଜାଜ୍‌ମାଲ୍‌ କାଜିଂ ନା ସାକ୍ତି ଆରି ଅଜଡ଼୍‌ ନା ଲାଗାୟ୍‌ ମାସ୍‌ଦି ୱାତାତ୍‌; ପାଚେ ନା ମତ୍ରି ଆରି ମାନିନିକାର୍‌ ନାଂ ଡେକ୍ତାତାର୍; ଆରେ, ଆନ୍‌ ଜାର୍‌ ରାଜିତ ରଚ୍‌ୟା ଆତାଂ ଆରି ନା ପାଣ୍‌ ବେସି ବାଡା ଆତାତ୍ ।

37 ଲାଗ୍‌ ଆନ୍‌ ନବୁକଦ୍‌ନିତ୍ସର୍‌ ହେ ସାର୍ଗେନିକା ରାଜାତିନି ଗୁଣ୍‍କେର୍‌ନାକା, ହାଂନାକା ଆରି ହମାନ୍‌ୱାରି କିନାଙ୍ଗା; ଇନାକିଦେଂକି ହେୱାନ୍ତି ସବୁ କାମାୟ୍‌ ହାତ୍‌ପା ଆରି ହେୱାନ୍ତି ହାଜ଼ି ସବୁ ନିୟାୟ୍‌ନିକା; ଆରେ, ଇମ୍‌ଣାକାର୍‌ ଗରବ୍‌ବେବାର୍‌ କିନାର୍‌, ହେୱାରିଂ ତାରେନ୍‌ କିଦେଂ ହେୱାନ୍ତି କେମ୍‌ତା ମାନାତ୍‌ ।