1 ରାଜା ନବୁକଦ୍‌ନିତ୍ସର୍‌ ସାଟେ ଆତ୍‌ ଉଚ୍‌ ଆରି ଚ ଆତ୍‌ ଅହାର୍‌ ର ହନା ପୁତ୍‌ଡ଼ା ରଚ୍‌ଚାନ୍‌; ବାବିଲ୍‌ ରାଜିନି ଦୁରା ତର୍‌ଦି ବାଟାତ ହେୱାନ୍ ରଚ୍‌ଚାନ୍‌ । 2 ହେବେ ରାଜା ନବୁକଦ୍‌ନିତ୍ସର୍‌ ହେ ଇମ୍‌ଣି ପୁତ୍‌ଡ଼ା ରଚ୍‌ଚି ମାଚାନ୍‌, ହେବେନି ପୁଜା କିଦେଂ ୱାନି କାଜିଂ ଗବର୍‌ନର୍‌ରିଂ, ରାଜାର୍‌ ଆଦିକାରିର୍‌ରିଂ ଆରି ଦେସ୍‌ ଆଦିକାରିର୍‌ରିଂ, ବିଚାର୍‌କାର୍‌ୟାରିଂ, ବିଦିକିନାକାର୍‌ୟାରିଂ, ଡାବୁଂଇଟ୍‌ନାକାରିରିଂ, ବିଦିନିକାରିଂ, ମାନିନିକାରିଂ ଆରି ରାଜିନିକାରିଂ ସବୁ ସାସନ୍‌କାର୍‌ୟାରିଂ ରୁଣ୍ଡାୟ୍‌ କିନି କାଜିଂ ରାଜା ନବୁକଦ୍‌ନିତ୍ସର୍‌ ମାନାୟ୍‌ତିଂ ପକ୍ତାନ୍‌ । 3 ପାଚେ ଗବର୍‌ନର୍‌, ରାଜାବାଦୁଲ୍‌ମାନାର୍‌ ଆରି ଦେସ୍‌ ଆଦିକାରିର୍, ବିଚାର୍‌କାର୍‌ୟାର୍‌, ଡାବୁଂଇଟ୍‌ନାକାର୍‌, ବିଦିମାନିକିନାକାର୍‌, ମାନିନିର୍‌ ଆରି ରାଜିନିକାର୍‌ ସବୁ ସାସନ୍‌କାର୍‌ୟାର୍‌, ରାଜା ନବୁକଦ୍‌ନିତ୍ସର୍‌ତି ରଚ୍‌ଚି ପୁତ୍‌ଡ଼ାନି ପୁଜା କିନି କାଜିଂ ରୁଣ୍ଡା ଆତାର୍‌, ଆରେ ହେୱାର୍‌ ନବୁକଦ୍‌ନିତ୍ସର୍‌ତି ରଚ୍‌ଚି ପୁତ୍‌ଡ଼ା ମୁମ୍‌ଦ ନିଲ୍‌ତାର୍‌ । 4 ହେବେ ସୁଣାୟ୍‌ କିନାକାନ୍‌ ଗାଜାକାଟ୍‌ତାଂ ଇଚାନ୍‌, ଏ ୱିଜ଼ାର୍‌ଲକୁ, କୁଟୁମ୍‍ନିକାଦେର୍‌ ଆରି ବାର୍‌ବିନ୍‌ ବେରଣ୍‌ନିକାଦେର୍‌, ମିଂ ଇ ବଲ୍‌ ହିଦ୍ୟା ଆନାତା, 5 ଇମ୍‌ଣି ସମୁତ ଏପେଙ୍ଗ୍‌ ତୁତୁକମଂ, ହୁରୁଡ଼ି, ଡୁଡୁଙ୍ଗା, ଚାର୍‌ବାଜା ଆରି ନେବଲ, ମର୍‌ଦଲ୍ ଆରି ସବୁ ବାନି ବାଜା ୱେନାଦେର୍‌, ହେଏଚେକାଡ଼୍‌ଦ ଏପେଙ୍ଗ୍‌ ରାଜା ନବୁକଦ୍‌ନିତ୍ସର୍‌ତି ରଚ୍‌ଚି ହନା ପୁତ୍‌ଡ଼ା ମୁମ୍‌ଦ ଡାଣ୍ଡ୍‌ହାଡ଼୍‌ ଆଜ଼ି ଜୱାର୍‌ କିନାଦେର୍‌ । 6 ଆରେ, ଇମ୍‌ଣି ଇମ୍‌ଣାକାନ୍‌ପା ଲକୁ ମୁମ୍‌ ଇଡ଼୍‌ଜି ଜୱାର୍‌ କିୱିତିସ୍‌, ହେୱାନ୍‌ ହେ ସମୁତ କାଚାନି ନାଣିକ୍ଡଇଦ ତୁହିଆ ଆନାନ୍ । 7 ଇଦାଂ କାଜିଂ ଏଚେକାଡ଼୍‌ଦ ସବୁ ଲକୁ ଗବା, ହୁରୁଡ଼ି, ଡୁଡୁଙ୍ଗା, ଚାର୍‌ବାଜା, ନେବଲ୍‌ ଆରି ସବୁ ବାନି ବାଜା ୱେଚିସ୍‌, ହେ ଏଚେକାଡ଼୍‌ଦ ସବୁ ଲକୁ, କୁଟୁମ୍‌ନିକାର୍‌ ଆରି ବାସାନିକାର୍‌ ରାଜା ନବୁକଦ୍‌ନିତ୍ସର୍‌ତି ରଚ୍‌ଚି ପୁତ୍‌ଡ଼ାତିଂ ମୁମ୍‌ ଇଡ଼୍‌ଜି ଜୱାର୍‌ କିତାର୍‌ ।

8 ଇଦାଂକାଜିଂ ହେ ୱେଡ଼ାଲିଂ କେତେକ୍‌ କଲଦିୟ ଲକୁ ଲାଗାୟ୍‌ ୱାଜ଼ି ଜିହୁଦିନି ଲକୁତି ବିରୁଦ୍‌ତ ନିନ୍ଦା ତାହିୱାତାର୍‌ । 9 ହେୱାର୍‌ ନବୁକଦ୍‌ନିତ୍ସର୍‌ ରାଜାତିଂ ଉତର୍‌ କିଜ଼ି ଇଚାର୍‌, ଏ ଗାଜାରାଜା, ନିତ୍ରେଜିଜ଼ି ମାନା । 10 ଏ ଗାଜା ରାଜା, ଏନ୍‌ ବଲ୍‌ କିତାୟ୍‌ନା ଜେ, ଇମ୍‌ଣାକାର୍‌ ତୁତ୍‌କମଙ୍ଗ୍‌, ହୁରୁଡ଼ି, ଡୁଡୁଙ୍ଗା, ଚାର୍‌ବାଜା, ନେବଲ୍‌, ମର୍‌ଦଲ୍‌ ଆରି ସବୁ ବାନି ବାଜା ୱେନାଦେର୍‌, ହେୱାନ୍‌ ଡାଣ୍ଡ୍‌ହାଡ଼୍‌ ଆଜ଼ି ହନା ପୁତ୍‌ଡ଼ାତିଂ ଜୱାର୍‌ କିନାନ୍‌; 11 ଆରେ, ଇମ୍‌ଣି ଇମ୍‌ଣାକାପା ଲକୁ ଡାଣ୍ଡ୍‌ହାଡ଼୍‌ ଆଜ଼ି ଜୱାର୍‌ କିୱିତିସ୍‌, ହେୱାନ୍‌ କାଚାନି ନାଣିକ୍ଡଇଦ ତୁହିଆ ଆନାନ୍; 12 ଇବେ ସଦ୍ରକ୍‌, ମୈସକ୍‌ ଆରି ଅବେଦ୍‌ ତର୍‌ନି କେତେକ୍‌ ଜିହୁଦି ଲକୁ ମାନାର୍‌, ହେୱାରିଂ ଏନ୍‌ ବାବିଲ୍‌ ରାଜିନି ରାଜ୍‍କାମାୟ୍‌ତ ବାଚି କିତାୟ୍‌ନା; ଏ ଗାଜା ରାଜା, ହେ ଲକୁ ନିଂ ମାନି କିଦ୍‌ୱାତାର୍ଣ୍ଣା; ହେୱାର୍‌ ନିଂ ପେନ୍‌କୁକାଂ ହେବା କିଉର୍‌ କି ନି ରଚ୍‌ଚି ହନା ପୁତ୍‌ଡ଼ାତିଂ ଜୱାର୍‌ କିଉର୍‌ ।

13 ହେବେ ନବୁକଦ୍‌ନିତ୍ସର୍‌ ବେସି ରିସା ଆରି ଦୁକ୍‌ତ ସଦ୍ରକ୍‌, ମୈସକ୍‌ ଆରି ଅବେଦ୍‌ନଗତିଂ ତାନି କାଜିଂ ବଲ୍‌ ହିତାନ୍‌ । ପାଚେ ଲକୁ ହେୱାରିଂ ରାଜାତି ଲାଗେ ତାହିୱାତାର୍‌ । 14 ନବୁକଦ୍‌ନିତ୍ସର୍‌ ହେୱାରିଂ ଉତର୍‌ କିଜ଼ି ଇଚାନ୍‌, ଏ ସଦ୍ରକ୍‌, ମୈସକ୍‌ ଆରି ଅବେଦ୍‌ନଗ, ଏପେଙ୍ଗ୍‌ କି ବାବିକିଜ଼ି ନା ପେନ୍‌କୁନି ହେବା କିଉଦେରା, କି ନା ରଚ୍‌ଚି ହନାନିକା ପୁତ୍‌ଡ଼ାତିଂ ଜୱାର୍‌ କିଉଦେରା ? 15 ନଂ ତୁତୁକମ, ହୁରୁଡ଼ି, ଡୁଡୁଙ୍ଗା, ଚାର୍‌ବାଜା, ନେବଲ୍, ମର୍‌ଦଲ୍‌ ଆରି ସବୁ ବାନି ବାଜା ୱେଚିସ୍‌, ଏପେଙ୍ଗ୍‌ ଜଦି ନା ରଚ୍‌ଚି ପୁତ୍‌ଡ଼ାତିଂ ଡାଣ୍ଡ୍‌ହାଡ଼୍‌ ଆଜ଼ି ଜୱାର୍‌ କିଦେଂ ଜାଲ୍‌ଦି ଆଡ, ତେବେ ହାର୍‌; ମତର୍‌ ଜଦି ଏପେଙ୍ଗ୍‌ ଜୱାର୍‌ କିୱିତିସ୍‌, ତେବେ ହେ ସମୁତ ଏପେଙ୍ଗ୍‌ କାଚାନି ନାଣିକ୍ଡଇଦ ତୁହ୍ୟା ଆନାଦେର୍‌; ଆରେ, ଏଲେଂ ଇମ୍‌ଣି ପେନ୍ ମାନାତ୍‌ ଜେ ମିଂ ନା କେଇଦାଂ ଉଦାର୍‌ କିଦ୍‌ନାନ୍ ? 16 ସଦ୍ରକ୍‌, ମୈସକ୍‌, ଆରି ଅବେଦ୍‌ନଗ ରାଜାଙ୍ଗ୍‌ ଉତର୍‌ କିଜ଼ି ଇଚାର୍‌, ଏ ନବୁକଦ୍‌ନିତ୍ସର୍‌, ଇ ବିସ୍ରେ ନିଂ ଉତର୍‌ ହିନାକା ମା ଲଡ଼ା ଆକାୟ୍‌ । 17 ଜଦି ହେଲାକେ ଆତିସ୍‌, ତେବେ ଆପେଙ୍ଗ୍‌ ଇନେର୍‌ତି ହେବା କିନାପ୍, ମା ହେ ପର୍‌ମେସ୍ୱର୍‌ ମାଂ କାଚାନି ନାଣିକ୍ଡଇଦାଂ ରକ୍ୟା କିଦ୍‌ଦେଂ ଆଡ୍‌ନାନ୍‌; ଆରେ ଏ ଗାଜା ରାଜା, ହେୱାନ୍‌ ନି କେଇଦାଂ ମାଂ ଉଦାର୍‌ କିଦ୍‌ନାନ୍‌ । 18 ମତର୍‌ ଜଦି କିଦ୍‌ୱିତିସ୍‌, ତେବେ ଏ ଗାଜା ରାଜା, ଆପେଙ୍ଗ୍‌ ଜେ ନି ପେନ୍‍କୁକାଂ ହେବା କିଉପ୍‌, କିବା ନି ରଚ୍‌ଚି ହନା ପୁତ୍‌ଡ଼ାତିଂ ଜୱାର୍‌ କିଉପ୍‌, ଇଦାଂ ଏନ୍ ପୁନା ।

19 ଏବେଣ୍ଡାଂ ନବୁକଦ୍‌ନିତ୍ସର୍‌ ରିସା ଆତାନ୍ ଆରି ସଦ୍ରକ୍‌, ମୈସକ୍‌ ଆରି ଅବେଦ୍‌ନଗ ବିରୁଦ୍‌ତ ତା ମୁମ୍‌ ରାତା ଆତାତ୍‌ । ଇଦାଂକାଜିଂ ନାଣି କ୍ଡଇଦିଂ ବେସି କିଜ଼ି ଆଦିକ୍‌ ସାତ୍‌ ଗୁଣ୍‌ କେଦି କିନି କାଜିଂ ହେୱାନ୍‌ ବଲ୍‌ ହିତାନ୍‌ । 20 ଆରେ, ହେୱାନ୍‌ ଜାର୍‌ ମେଲ୍ୟା ବିତ୍ରେତାଂ କେତେକ୍ ବାଡ଼୍‌କାସ୍‌ ଲଗାଂ ସଦ୍ରକ୍‌, ମୈସକ୍‌ ଆରି ଅବେଦ୍‌ନଗତିଂ ଗାଚ୍‌ଚି କାଚାନି ନାଣି କ୍ଡଇଦ ତୁହିଦେଂ ବଲ୍‌ ହିତାନ୍‌ । 21 ପାଚେ ହେ ଆଣ୍ଡ୍ରାଂ ଜାର୍‌ ଜାର୍‌ ଲାଲ୍‌ଚି, ଉସ୍ପାନାକା, ଜୁତାକା ଆରି ବିନ୍‌ନିକା ହେନ୍ଦ୍ରା ଲାହାଂ ଗାଚ୍‌ଚି କାଚାନି ନାଣିକ୍ଡଇ ବିତ୍ରେ ତୁହିତାର୍‌ । 22 ରାଜାତି ବଲ୍ ବେସି ବିପ୍ତି ଆରି ନାଣିକ୍ଡଇ ବେସି କେଦ୍‍ଦି ମାଚାତ୍‌, ଇଦାଂକାଜିଂ ଇମ୍‌ଣି ଲକୁ ସଦ୍ରକ୍‌, ମୈସକ୍‌ ଆରି ଅବେଦ୍‌ନଗତିଂ ପେସ୍‌ଦି ଆସ୍‌ସି ମାଚାର୍‌, ହେୱାର୍‌ ନାଣିଦୁଦ୍‌ୱାତ କାଡ଼୍‌ଜି ହାତାର୍‌ । 23 ଆରେ, ସଦ୍ରକ୍‌, ମୈସକ୍‌ ଆରି ଅବେଦ୍‌ନଗ, ଇ ତିନ୍‌ ଜାଣ୍‌ ଗାଚ୍ୟା ଆଜ଼ି କାଚାନି ନାଣିକ୍ଡଇ ବିତ୍ରେ ତୁଇତାର୍‌ ।

24 ଇବେ ରାଜା ନବୁକଦ୍‌ନିତ୍ସର୍‌ କାବା ଆଜ଼ି ବେଗି ନିଂତାନ୍‌ । ହେୱାନ୍ ଜାର୍‌ ମତ୍ରିରିଂ ଇଚାନ୍‌, ଆସେଙ୍ଗ୍‌ କି ତିନ୍ ଜାଣ୍‌ ମାନାୟ୍‌ତିଂ ଗାଚ୍‌ଚି ନାଣି ବିତ୍ରେ ତୁହିୱାଦାଂ ମାଚାସ୍ ? ହେୱାର୍‌ ରାଜାତିଂ ଉତର୍‌ କିଜ଼ି ଇଚାର୍‌, ହାତ୍‌ପା ଗାଜାରାଜା । 25 ରାଜା ଉତର୍‌ କିଜ଼ି ଇଚାନ୍‌, ହୁଡ଼ାଟ୍‌, ଆନ୍‌ ନାଣି ବିତ୍ରେ ବୁଲାନାକାର୍‌ ଚାର୍‌ ୱାରି ଲକୁ ହୁଡ଼୍‌ନାଙ୍ଗା ଆରି ହେୱାର୍‌ତି ଇମ୍‌ଣାକାପା କେତି ଆୱାତାତ୍ନା; ଆରେ, ଚାର୍‌ ଲକୁନି ମୁର୍ତି ପର୍‌ମେସ୍ୱର୍‌ତି ମାଜ଼ି ଲାକେ ।

26 ହେଏଚେକାଡ଼୍‌ଦ ନବୁକଦ୍‌ନିତ୍ସର୍‌ କାଚାନି ନାଣିକ୍ଡଇନି ମୁମ୍‌ ଲାଗାୟ୍‌ ହାଲ୍‌ଜି ଇଚାନ୍‌, ଏ ସବୁତାକେମାନି ପର୍‌ମେସ୍ୱର୍‌ତି ଆଡ଼୍‌ୟା, ସଦ୍ରକ୍‌, ମୈସକ୍‌ ଆରି ଅବେଦ୍‌ନଗ, ଏପେଙ୍ଗ୍‌ ହସି ଇବେ ୱାଡ । ହେବେ ସଦ୍ରକ୍‌, ମୈସକ୍‌ ଆରି ଅବେଦ୍‌ନଗ ନାଣି ବିତ୍ରେତାଂ ହସି ୱାତାର୍‌ । 27 ଆରେ, ଗବର୍‌ନର୍‌, ରାଜାଲକୁ ଆରି ଦେସ୍‌ ଆଦିକାରି ଆରି ରାଜାମତ୍ରିର୍‌ ରବେ ଆଜ଼ି ହେ ତିନ୍‌ ଜାଣ୍‌ତିଂ ମାସ୍‌ଦି ହୁଡ଼୍‌ତାନ୍‌ ଜେ, ନାଣି ହେୱାର୍‌ତି ଗାଗାଡ଼୍‌ ଜପି ମୁଡ଼େ ପା ସାକ୍ତି କିଦେଂ ଆଡ୍‌ୱାତାତ୍‌, କିବା ହେୱାର୍‌ତି କାପ୍‌ଡ଼ାନି ତେମୁଲ୍‌ ପା ମୁଡ଼େ କାଡ୍‌ୱାଦାଂ ମାଚାତ୍‌, କି ହେୱାର୍‌ତି ଲାଲ୍‌ଚି ବାନ୍ୟା ଆୱାତାତ୍‌ନା, କି ହେୱାର୍‌ତି ଗାଗାଡ଼୍‌ତ ନାଣି ଗାନ୍ଦା ହିଲୁତ୍‌ । 28 ନବୁକଦ୍‌ନିତ୍ସର୍ ଇଚାନ୍‌, ସଦ୍ରକ୍‌, ମୈସକ୍‌ ଆରି ଅବେଦ୍‌ନଗତି ପର୍‌ମେସ୍ୱର୍‌ ଦନ୍ୟ, ଇନେକିଦେଂକି ହେୱାନ୍ ଜାର୍‌ ଦୁତ୍‌ ପକ୍ତାତାନ୍ ଆରି ହେୱାର୍‌ତି ଇମ୍‌ଣି ଆଡ଼୍‌ୟାର୍‌ ହେୱାନ୍‌ ତାକେ ପାର୍ତି କିତାର୍‌ ଆରି ଜାର୍ତି ପର୍‌ମେସ୍ୱର୍‌ ପିସ୍ତି ଇନେସ୍‌ ବିନ୍‌ ଇମ୍‌ଣାକାପା ପେନ୍‌ଦିଂ ହେବା କି ଜୱାର୍‌ କିଉର୍‌, ଇଦାଂକାଜିଂ ରାଜାତି ବଚନ୍‌ ବିନ୍‌କିଜ଼ି ଜାର୍‌ ଜାର୍‌ ଗାଗାଡ଼୍‌ ହେଲାୟ୍‌ କିତାର୍‌, ହେୱାନ୍‌ ହେୱାରିଂ ଉଦାର୍‌ କିତାନ୍ । 29 ଇଦାଂକାଜିଂ ଆନ୍‌ ଇ ବଲ୍‌ କିନାଙ୍ଗା ଜେ, ଇମ୍‌ଣି ଜାଣ୍‌କେ କୁଟୁମ୍‌, ଦେସ୍‌ନିକା ଆରି ବେଣ୍‌ନିକାର୍‌ ଲକୁ, ସଦ୍ରକ୍‌, ମୈସକ୍‌ ଆରି ଅବେଦ୍‌ନଗତି ପର୍‌ମେସ୍ୱର୍‌ତି ବିରୁଦ୍‌ତ ଇମ୍‌ଣାକାପା ବୁଲ୍‌କାନି କାତା ଇନାର୍‌, ହେୱାର୍‌ ଗନ୍ଦା ଗନ୍ଦା ଆଜ଼ି କାତ୍ୟା ଆନାର୍‌ ଆରି ହେୱାର୍‌ତି ଇଲ୍‌ ଡ଼ାପିଗାତ୍‌ ଆନାତ୍‌; ଇନାକିଦେଂକି ଇବାନି ଉଦାର୍‌ କିଦେଂ ଆଡ୍‌ନାକାର୍‌ ଆରେ ଇମ୍‌ଣାକାପା ପେନ୍‌ ହିଲୁତ୍‌ । 30 ଇବେ ରାଜା ସଦ୍ରକ୍‌, ମୈସକ୍‌ ଆରି ଅବେଦ୍‌ନଗତି ବାବିଲ୍‌ ରାଜିତ ପାଦ୍‌ ବାଡାୟ୍‌ କିତାନ୍ ।