ବେଲ୍ସତ୍ସର୍ କାଜିଂ ଗାର୍ଦ ଲେକା
1 ରାଜା ବେଲ୍ସତ୍ସର୍ ଜାର୍ତି ହାଜାର୍ ମାନିନିକାର୍ କାଜିଂ ର ଗାଜାବଜି ଜାଲ୍ଦି କିତାନ୍ ଆରି ହେ ହାଜାର୍ତି ମୁମ୍ଦ ଅଙ୍ଗୁର୍ରାସ୍ ଉଟାନ୍ । 2 ଆରେ, ତା ଲାତ୍ରାହି ନବୁକଦ୍ନିତ୍ସର୍ ଜିରୁସାଲମ୍ନିକା ମନ୍ଦିର୍ତାଂ ଇମ୍ଣି ସବୁ ହନା ଆରି ରୁପାନି ବାହା ଚରି କିଜ଼ିମାଚାନ୍, ହେବେନି ରାଜା ଆରି ତା ମାନିନିକାର୍, ଆରେ ତା ଡକ୍ରିକ୍ ଆରି ଉପ୍କାଡକ୍ରିକ୍ ଇନେସ୍ ଉଣିକ୍, ଇଦାଂକାଜିଂ ବେଲ୍ସତ୍ସର୍ ଅଙ୍ଗୁର୍ରାସ୍ ଉଣୁ ଉଣୁ ହେସବୁ ବାହା ତାନି କାଜିଂ ବଲ୍ ହିତାନ୍ । 3 ହେବେ ଜିରୁସାଲମ୍ନିକା ମନ୍ଦିର୍ତାଂ, ଇଚିସ୍, ପର୍ମେସ୍ୱର୍ତି ଇଞ୍ଜାଙ୍ଗ୍ ଇମ୍ଣି ସବୁ ହନା ବାହା ଚରି ଆଜ଼ି ମାଚାତ୍, ହେଦାଂ ଲକୁ ତାହିୱାତାର୍; ଆରେ, ରାଜା ଆରି ତା ମାନିନିକାର୍, ତା ଡକ୍ରିକ୍ ଆରି ଉପ୍କାଡକ୍ରିକ୍ ହେସବୁ ଉଟିକ୍ । 4 ହେୱାର୍ ଅଙ୍ଗୁର୍ରାସ୍ ଉଣୁ ଉଣୁ ହନା ଆରି ରୁପା, ପିତାଡ଼୍, ଲୱା, ୱେସ୍କୁ, ଆରି କାଲ୍ଦ ରଚ୍ଚି ପେନ୍କୁନି ଗୁଣ୍କେର୍ତାର୍ ।
5 ହେ ଦାପ୍ରେ ମାନାୟ୍ କେଇଦ ୱାଚ୍କା ୱାଜ଼ି ରାଜାର୍ଇଞ୍ଜିନି ଗାର୍ନି କାସ୍ତି ଜପି ବାଡ଼୍ତା ଲାଗାୟ୍ ଲେକିକିତାତ୍, ଆରେ କେଇନି ଇମ୍ଣି ବାଗ୍ ଲେକିକିତାତ୍, ରାଜା ହେଦାଂ ହୁଡ଼୍ତାନ୍ । 6 ହେବେ ରାଜାତି ମୁମ୍ ୱାଚ୍ଚାତ୍ ଆରି ତା ବାବ୍ନା ତାଂ ପାଣ୍ଡ୍ରୁ କିତାତ୍; ଆରେ, ତା ମ୍ଡେଙ୍ଗାନି ହାନ୍ଦ୍ଣିବାହା ସବୁ ଉଲ୍ଗା ଆଜ଼ି ହାଚାତ୍ ଆରି ତା ମେଣ୍ଡାତ ମେଣ୍ଡା ପଡ଼୍ତାତ୍ । 7 ରାଜା ଗାଣାକିନାକାର୍, କଲଦିୟ ଆରି ସୁଗ୍ହୁଗ୍ନିକାରିଂ ତାନି କାଜିଂ ଗାଜାକାଟ୍ କିଜ଼ି କୁକ୍ତାନ୍ । ରାଜା ବାବିଲ୍ୟ ଗିୟାନିରିଂ ଇଚାନ୍, ଇମ୍ଣାକାନ୍ ଇ ଲେକା ପଡ଼ିକିନାନ୍ ଆରି ହେବେନି ଅରତ୍ ନାଂ ୱେଚ୍ଚାନାନ୍, ହେୱାନ୍ ୱାଙ୍ଗା ବାନା ଉସ୍ପିନିତ ଉସ୍ପିୟାନାନ୍ ଆରି ତା ଗାଡେଲ୍ତ ହନା ହାସ୍କୁ ହିଆନାତ୍, ଆରେ ହେୱାନ୍ ରାଜିତ ତିନ୍ ସାସନ୍କାର୍ଆ ଆନାନ୍ । 8 ହେବେ ରାଜାତି ୱିଜ଼ାର୍ ଗିୟାନିର୍ ଲଗୁ ବିତ୍ରେ ୱାତାର୍; ମତର୍ ହେୱାର୍ ଲେକା ପଡ଼ିକିଦେଂ ଆଡ୍ୱାତାର୍, କି ରାଜାଙ୍ଗ୍ ହେବେନି ଅରତ୍ ୱେଚ୍ଚେଙ୍ଗ୍ ଆଡ୍ୱାତାର୍ । 9 ଲାଗ୍ ରାଜା ବେଲ୍ସତ୍ସର୍ ବେସି ବିପ୍ତି ଆତାନ୍ ଆରି ତା ମୁମ୍ ଆର୍ତାତ୍, ଆରେ ତା ମାନିନିକାର୍ କାବା ଆତାର୍ ।
10 ଇ ୱେଡ଼ାଲିଂ ରାଜାତି ଆରି ତା ମାନିନିର୍ତି କାତା କାଜିଂ ରାଣି ତିନିଇଞ୍ଜ ୱାତାତ୍; ରାଣି ଇଚାତ୍, ଏ ରାଜା, ନିତ୍ରେଜିଆ; ନି ବାବ୍ନା ନିଂ ପାଣ୍ଡ୍ରୁ କିଦ୍ମେତ୍, କି ନି ମୁମ୍ ୱାଚ୍ମେତ୍ । 11 ନି ରାଜି ବିତ୍ରେ ର ମାନାୟ୍ ମାନାନ୍, ତା ୱାସ୍କିତ ପୁଇପୁୟା ପେନ୍କୁନି ଜିବୁନ୍ ମାନାତ୍; ଆରେ, ମିଞ୍ଜି ଆବାତି ୱେଡ଼ାଲିଂ ପେନ୍କୁନି ଗିୟାନ୍ ଲାକେ ଗିୟାନ୍ଅଜଡ଼୍ ଆରି ବୁଦି ଆରି ଗିୟାନ୍ ତା ତାକେ ଚଞ୍ଜ୍ୟାଜ଼ି ମାଚାତ୍: ଆରେ, ମିଞ୍ଜ୍ବା ରାଜା ନବୁକଦ୍ନିତ୍ସର୍, ଆଁ, ମିଞ୍ଜ୍ବା ରାଜା, ତାଂ ଚୁଟ୍କିଆ, ଗାଣାନାକାର୍, କଲଦିୟ ଆରି ବେଣ୍ବାକ୍ଣାୟ୍କିନାକାର୍ ଜପି ମୁଡ଼୍ କିଜ଼ି ବାଚି କିଜ଼ି ମାଚାନ୍; 12 ଇନାକିଦେଂକି ହେ ଦାନିୟେଲ୍ତି ୱାସ୍କିତ ମୁଡ଼୍ ଜିବୁନ୍, ଗିୟାନ୍ ଆରି ବୁଦି, କ୍ଡେଞ୍ଜ୍କଣ୍ ଅରତ୍ କିନାକା ଆରି ବିତ୍ରି କାତା ହପ୍ନାକା ଆରି ତାରାମାରା ଲାଗ୍ଦି କିନାକା ସାକ୍ତି ଚଞ୍ଜ୍ୟା ଆଜ଼ି ମାଚାତ୍, ରାଜା ତାଂ ବେଲ୍ଟସତ୍ସର୍ ତର୍ ହିଜ଼ି ମାଚାନ୍ । ନଂ ଦାନିୟେଲ୍ତିଂ କୁକାଟ୍, ହେୱାନ୍ ଅରତ୍ ହପ୍ନାନ୍ ।
ଦାନିୟେଲ୍ତି ଲେକାନି ଅରତ୍ ହପ୍ନାକା
13 ପାଚେ ଦାନିୟେଲ୍ତିଂ ରାଜା ଲାଗାୟ୍ ତାହିୱାତାର୍ ରାଜା ଦାନିୟେଲ୍ତିଂ ଇଚାନ୍, ମାଞ୍ଜ୍ବା ଗାଜାରାଜା ଜିହୁଦା ଦେସ୍ତାଂ ଇମ୍ଣାକାରିଂ ତାହିୱାଜ଼ି ମାଚାନ୍, ହେ ଗାଚ୍ୟାଜ଼ି ୱାଜ଼ିମାଚି ଜିହୁଦି ଲକୁ ବିତ୍ରେ ଇମ୍ଣି ଦାନିୟେଲ୍ ମାଚାନ୍, ହେୱାନ୍ କି ଏନ୍ ? 14 ଆନ୍ ନି ବିସ୍ରେ ୱେଚାଙ୍ଗ୍ନା ଜେ, ନି ୱାସ୍କିତ ପେନ୍କୁନି ଜିବୁନ୍ ମାନାତ୍, ଆରେ ଗିୟାନ୍ ଆରି ଅଜଡ଼୍, ବୁଦି ଆରି ମୁଡ଼୍ ଗିୟାନ୍ ନି ତାକେ ହୁଡ଼୍ୟା ଆନାତ୍ । 15 ନଂ ଇ ଲେକା ପଡ଼ିକିନି କାଜିଂ ଆରି ହେବେନି ଅରତ୍ ନାଂ ୱେଚ୍ଚିନି କାଜିଂ ଗିୟାନିର୍ ଆରି ଗାଣାନାକାର୍ ନା ଲାଗାୟ୍ ତାହିୱାତାର୍; ମତର୍ ହେୱାର୍ ହେବେନି ଅରତ୍ ହପ୍ତେଂ ଆଡ୍ୱାତାର୍ । 16 ମତର୍ ନି ବିସ୍ରେ ଆନ୍ ୱେଚାଙ୍ଗ୍ନା ଜେ, ଏନ୍ ଅରତ୍ ହପ୍ନାୟ୍ ଆରି ଆବ୍ଡ଼ୁ ହାଚ୍ନାୟ୍; ନଂ ଏନ୍ ଜଦି ଇ ଲେକା ପଡ଼ି କିଜ଼ି ହେବେନି ଅରତ୍ ନା ୱେଚ୍ଚେଦେଂ ଆଡ୍ନାୟ୍, ତେବେ ଏନ୍ ୱାଙ୍ଗା ବାନି ହେନ୍ଦ୍ରାତ ଉସ୍ପାୟାନାୟ୍, ନି ଗାଡେଲ୍ତ ହନା ହାସ୍କୁ ହିଆନାତ୍ ଆରି ଏନ୍ ରାଜିତ ତିନ୍ ସାସନ୍କାର୍ୟା ଆନାୟ୍ ।
17 ହେଏଚେକାଡ଼୍ଦ ଦାନିୟେଲ୍ ରାଜାତି ମୁମ୍ଦ ଉତର୍ କିଜ଼ି ଇଚାନ୍, ନି ଦାନ୍ ନିବେ ମାନେତ୍ ଆରି ନି ଇନାମ୍ ବିନ୍ ଲଗାଂ ହିଆ; ଆତିସ୍ପା ଆନ୍ ଗାଜାରାଜାତି ଲାଗେ ଇ ଲେକା ପଡ଼ିକିନାଂ ଆରି ଅରତ୍ ତାଂ ୱେଚ୍ନାଂ ।
18 ଏ ଗାଜା ରାଜା, ୱିଜ଼ୁତିଂ ମୁଡ଼୍ଦାକାନ୍ ପର୍ମେସ୍ୱର୍ ମିଞ୍ଜ୍ବା ନବୁକଦ୍ନିତ୍ସର୍ତିଂ ରାଜି, ପାଣ୍, ଜାଜ୍ମାଲ୍ ଆରି ସାକ୍ତି ହିତାନ୍; 19 ଆରେ, ହେୱାନ୍ ତାଂ ଏଲେଂ ପାଣ୍ ହିତିଲେ ସବୁ କୁଟୁମ୍, ବାର୍ବିନ୍ ଦେସ୍ନିକାର୍ ଆରି ବାସାନିକାର୍ ଲକୁ ତା ଲାଗେ ତ୍ରିଗ୍ଜି ପାଣ୍ଡ୍ରା ଆତାର୍; ଇନେରିଂ ହେୱାନ୍ତି ଇଚା, ହେୱାନିଂ ହେୱାନ୍ ଅସ୍ତାନ୍ ଆରି ଇନେରିଂ ଇଚା, ହେୱାନିଂ ଜିମ୍ତା ଇଡ଼୍ତାନ୍: ଆରେ, ଇନେରିଂ ହେୱାନ୍ତି ଇଚା, ହେୱାନ୍ ହେୱାନିଂ ଉଚ୍ କିତାନ୍ ଆରି ଇନେରିଂ ହେୱାନ୍ତି ଇଚା, ହେୱାନିଂ ହେୱାନ୍ ତଲ୍ୟା କିତାନ୍ । 20 ମତର୍ ହେୱାନ୍ତି ୱାସ୍କି ଗରବ୍ ଆତିଲେ ଆରି ହେୱାନ୍ତି ଜିବୁନ୍ ଆଟ୍ୱା ଆଜ଼ି ହେୱାନ୍ ଆକାର୍ ବେବାର୍ କିତିଲେ, ହେୱାନ୍ ଜାର୍ ରାଜା ଗାଦିତାଂ ପେଜ଼୍ୟା ଆତାନ୍ ଆରି ହେୱାନ୍ତି ଜାଜ୍ମାଲ୍ ତା ତାଂ ଜେଲ୍ୟା ଆତାନ୍ । 21 ଆରେ, ହେୱାନ୍ ମାନାୟ୍ହିମ୍ଣାଂ ବିତ୍ରେତାଂ ଦେହାକିଆ ଆତାନ୍; ହେୱାନ୍ତି ୱାସ୍କି ପସୁ ଲାକେ ଆତାତ୍ ଆରି ରାନ୍ତି ଗଦଂ ଲାହାଂ ହେୱାନ୍ତି କୁଚ୍ନାକା ଆତାତ୍; ହେୱାନ୍ ବାଡ଼୍ଦୁ ଲାକେ କାଚ୍ରା ଚିଚାନ୍ ଆରି ହେୱାନ୍ତି ଗାଗାଡ଼୍ ଆକାସ୍ନି କାକାର୍ତ ଉତ୍ତାତ୍; ହାରିହାରା ହେୱାନ୍ ପୁଚାନ୍ ଜେ, ୱିଜ଼ୁତିଂ ମୁଡ଼୍ଦାକାନ୍ ପର୍ମେସ୍ୱର୍ ମାନାୟାର୍ତି ରାଜିତ ରାଜ୍ କିନାନ୍ ଆରି ତା ଜପି ଇନେରିଂ ହେୱାନ୍ତି ଇଚା, ହେୱାନିଂ ହେୱାନ୍ ବାଚି କିନାନ୍ ।
22 ଆରେ ଏ ବେଲ୍ସତ୍ସର୍, ହେୱାନ୍ତି ମାଜ଼ି ଜେ ଏନ୍, ଏନ୍ ଇସବୁ ପୁଚିସ୍ ପା ଜାର୍ ୱାସ୍କି ହୁଦାର୍ କିୱାତାୟ୍ନା; 23 ମତର୍ ସାର୍ଗେନି ଆଦିପତି ବିରୁଦ୍ତ ଜାର୍ତିଂ ଉନତି କିତାୟ୍ନା ଆରି ହେୱାନ୍ତି ଇଲ୍ନି ବାର୍ବିନ୍ ବାହା ନି ମୁମ୍ଦ ତାହିୱାତିଲେ, ଏନ୍ ଆରି ନି ମାନିନିର୍, ନି ଡକ୍ରିକ୍ ଆରି ଉପ୍କାଡକ୍ରିକ୍ ହେସବୁ ବାହାତ ଅଙ୍ଗୁର୍ରାସ୍ ଉଟାଦେର୍ଣ୍ଣା; ଆରେ ରୁପାନି, ହନାନି, ପିତାଡ଼୍ନି, ଲୱାନି, ୱେଜ଼୍ଗୁନି ଆରି କାଲ୍ନି ଇମ୍ଣି ପେନ୍କୁ ହୁଡ଼ୁକ୍, କି ୱେନୁକ୍, କି ପୁନୁକ୍, ହେୱାକାଂ ଗୁଣ୍କେର୍ତାଦେର୍ଣ୍ଣା; ଆରେ, ନି ପୁଣ୍ଡା ଇନେର୍ତି କେଇଦ ଆରି ନିଦାଂ ସବୁ ହାଜ଼ି ଇନେର୍ତି ତଲ୍ୟା, ଏନ୍ ହେ ପର୍ମେସ୍ୱର୍ତିନି ଜାଜ୍ମାଲ୍ କିୱାତାୟ୍ନା । 24 ଇ ୱେଡ଼ାଲିଂ ହେୱାନ୍ତି ଲାଗାୟ୍ତାଂ କେଇନି ବାଗ୍ ପକ୍ୟାତାତ୍, ଆରେ ଇ ଲେକା ଲେକା ଆତାତ୍ ।
25 ଆରେ, ଇନାକା ଲେକା ଆତାତ୍, ହେଦାଂ ଇଦାଂ, ମିନେ ମିନେ, ତକେଲ, ଉପାରସିନ । 26 ଇଦାଂନି ଅରତ୍ ଇ ମିନେ, ପର୍ମେସ୍ୱର୍ ନି ରାଜିନି ଗାଣା କିତାନ୍ନା ଆରି ହେଦାଂ ୱିସ୍ତାନ୍ନା । 27 ତକେଲ, ଏନ୍ ଲିଟ୍କିତ ତୁଲାୟ୍ କିଆତାୟ୍ନା ଆରି ଉଣା ଚଞ୍ଚାୟ୍ନା । 28 ପିରସ୍, ନି ରାଜି ବାଗ୍ ଆତାତ୍ନା, ଆରେ ମାଦିୟ ଆରି ପାରସିକରିଂ ହିଆ ଆତାତ୍ନା ।
29 ହେଏଚେକାଡ଼୍ଦ ବେଲ୍ସତ୍ସର୍ ବଲ୍ ହିତିଲେ, ଲକୁ ଦାନିୟେଲ୍ତିଂ ୱାଙ୍ଗା ବାନିନି ବସ୍ତର୍ ଉସ୍ପିକିତାର୍ ଆରି ହେୱାନ୍ତି ହାକ୍ତ ହନା ହାସ୍କୁ ହିତାର୍ ଆରି ହେୱାନ୍ ଜେ ରାଜିନି ତିନ୍ ରାଜ୍ କିନାକାନ୍ ଆନାନ୍, ହେୱାନ୍ତି ବିସ୍ରେ ଇଦାଂ ସୁଣାୟ୍ କିତାର୍ । 30 ହେ ନାଣାତ କଲଦିୟର୍ତି ରାଜା ବେଲ୍ସତ୍ସର୍ ଅହ୍ୟା ଆତାନ୍ । 31 ଆରେ, ମାଦିୟ ଦାରିୟାବସ ରାଜି ଗାଟା ଆତାନ୍, ହେ ୱେଡ଼ାଲିଂ ହେୱାନ୍ତି ଆନ୍ମାନ୍ରେ ବାସଟି ବାର୍ହୁ ବୟଁସ୍ ଆଜ଼ି ମାଚାତ୍ ।
/images/a/WG5FS9VaSWVnVmV3VI8yP)
/images/a/Tcg2NiV7ce24OT6kCIQGR)