ଦାନିୟେଲ୍ ଦର୍ସନ୍ ହପ୍ନାନ୍
1 ବାବିଲ୍ନି ରାଜା ବେଲ୍ସତ୍ସର୍ତି ରାଜ୍ନି ପର୍ତୁମ୍ ବାର୍ହୁତ ଦାନିୟେଲ୍ ଜାର୍ ଅଚ୍ନା ଜପି କ୍ଡେଞ୍ଜ୍କଣ୍ ଆରି ଚିନ୍ତାନି ଦର୍ସନ୍ ପାୟାତାନ୍; ପାଚେ ହେୱାନ୍ ହେ କ୍ଡେଞ୍ଜ୍କଣ୍ ଲେକିକିଜ଼ି କାତାନି ରାହାଣ୍ ହପ୍ତାନ୍ । 2 ଦାନିୟେଲ୍ ଇଚାନ୍, "ଆନ୍ ନାଣାୱେଡ଼ାଲିଂ ଦର୍ସନ୍ଦାଡ଼ିରେ ହୁଡ଼୍ତାଂ ଜେ, ହୁଡ଼ାଟ୍, ଗାଜାହାମ୍ଦୁର୍ ଜପି ଆକାସ୍ନି ଚାର୍ ଦିଗ୍ତାଂ ଡ଼ୁଇ ବେସି ପଡ଼୍ତାତ୍ । 3 ଆରେ, ରୱାନ୍ଆରେରକାନ୍ତାଂ ବିନ୍ ଚାର୍ ଗାଜା ପସୁ ହାମ୍ଦୁର୍ତାଂ ନିଂଜି ୱାତିକ୍ ।
4 ପର୍ତୁମ୍ ପସୁ ସିୟଁ ଲାକେ ଆରି ରାମାଣ୍ ପଟି ଲାକେ ତା ମାରା ମାଚାତ୍; ଆନ୍ ହୁଡ଼ୁ ହୁଡ଼ୁ ତା ହେ ମାରା ଉନ୍ଦ୍ଆ ଆତାତ୍, ଆରେ ହେଦାଂ ପୁର୍ତିତାଂ ନିକ୍ୟାଆତାତ୍, ଆରି ମାନାୟ୍ ଲାକେ ରି କାଲ୍କୁତ ତାଂ ନିଲି କିଆ ଆତାତ୍, ଆରେ ହେଦେଲିଂ ମାନାୟ୍ତି ୱାସ୍କି ହିଆତାତ୍ । 5 ଇଦାଂପାଚେ ହୁଡ଼ାଟ୍, ଆରେ ରଞ୍ଜାଙ୍ଗ୍, ଇଚିସ୍, ଜେତି ପସୁ ବାଲୁ ଲାକେ ମାଚାତ୍, ହେଦାଂ ର ପାଡ୍କା ନିକ୍ୟାତାତ୍ ଆରି ତା ମୁମ୍ଦ ଟାଡା ବିତ୍ରେ ତିନ୍ ଗଟା ମାର୍ଙ୍ଗାଣା ମାଚିକ୍; ଆରେ, ହେଦେଲିଂ ଇ କାତା ଇନ୍ୟା ଆତାତ୍, ‘ନିଙ୍ଗା, ବେସି ଜେଇ ତିନା ।’
6 ଇଦାଂପାଚେ ଆନ୍ ହୁଡ଼୍ତାଂ, ହୁଡ଼ାଟ୍, ବିଜାପୁଲ୍ୟାବୁର୍କା ଲାକେ ଆରେ ରଞ୍ଜାଙ୍ଗ୍ ପସୁ, ତା ଗାଗାଡ଼ତ ପଟିନି ଚାର୍ ମାରା ମାଚାତ୍; ପା ହେଦାଂ ପସୁତି ଚାର୍ କାପ୍ଡ଼ା ମାଚାତ୍ ଆରେ, ହେଦେଲିଂ ରାଜ୍ କିଦେଂ ହିଆତାତ୍ । 7 ଇଦାଂପାଚେ ଆନ୍ ନାଣାକାଡ଼୍ନି ଦର୍ସନ୍ତ ହୁଡ଼୍ତାଂ, ହୁଡ଼ାଟ୍, ଚାର୍ ପସୁ, ହେଦାଂ ବୟଙ୍କାର୍, କେମ୍ତାନିକା ଆରି ବେସି ବାଡ଼୍କାସ୍ ଆରି ଗାଜା ଗାଜା ଲୱାନିକା ଟାଡା ମାଚାତ୍; ହେଦେଲ୍ ଗୁସ୍ତାତ୍ ଆରି ଡ୍ରିକ୍ଚି ଗୁଣ୍ଡା କିତାତ୍ ଆରି ବାକି ଇନାକା ମାଚାତ୍, ହେଦାଂ ପାନା ତାରେନ୍ ୱିସ୍ତାତ୍; ଆରେ, ହେଦାଂ ତା ଆଗେନି ସବୁ ପସୁଂତାଂ ବିନ୍; ଆରେ ତାଦି ଦସ୍ଗଟା କମଙ୍ଗ୍ ମାଚିକ୍ । 8 ଆନ୍ ହେ କମକାଂନି ବିସ୍ରେ ବାବ୍ନା କିଉ କିଉ ହୁଡ଼ାଟ୍, ହେ ସବୁନି ବିତ୍ରେ ଆରେ ରଞ୍ଜାଙ୍ଗ୍ କମଙ୍ଗ୍ ନିଂତାତ୍, ହେଦାଂ ହାରୁ, ହେଦାଂ ମୁମ୍ଦ ପର୍ତୁମ୍ କମକାଂନି ବିତ୍ରେତାଂ ତିନ୍ ଗଟା କମଙ୍ଗ୍ ଦଲ୍ଦାଂ ଉଟ୍କାତାତ୍: ଆରେ ହୁଡ଼ାଟ୍, ଇ କମଙ୍ଗ୍ତ ମାନାୟ୍ତି କାଣ୍ଗା ଲାକେ କାଣ୍ଗା ଆରି ଆକାର୍ନି କାତାନିକା ୱେଇ ମାଚାତ୍ ।
ଆଗେକାଡ଼୍ନି ଇସ୍ୱର୍ତି ଦର୍ସନ୍
9 ଆନ୍ ହୁଡ଼ୁ ହୁଡ଼ୁ, କେତ୍ଗଟା ଗାଦି ରଚ୍ୟା ଆତାତ୍, ଆରେ ବେସି କାଡ଼୍ନି ବୁଡ଼୍ହି କୁଚ୍ଚାନ୍ । ହେୱାନ୍ତି ହେନ୍ଦ୍ରା ଆଞ୍ଜ୍ଗା ଲାକେ ଡ଼ିଞ୍ଜ୍ନାକା, ଆରି ହେୱାନ୍ତି କାପ୍ଡ଼ାନି ତେମୁଲ୍ ହାର୍ଦି ମେଣ୍ଡାନି ତେମୁଲ୍ ଲାକେ ମାଚାତ୍ । ହେୱାନ୍ତି ଗାଦି ନାଣିଦୁଦ୍ୱାନିକା ଆରି ହେବେନି ସିଲିଂସବୁ ଆହ୍ନି ନାଣି । 10 ହେୱାନ୍ତି ମୁମ୍ଦାଂ ନାଣିଜାରାଣ୍ ହସି ବଡ଼ାତାତ୍; ହାଜାର୍ ହାଜାର୍ ହେୱାନ୍ତି ହେମାଣ୍ କିତାର୍ ଆରି ଅୟୁତ ଅୟୁତ ହେୱାନ୍ତି ମୁମ୍ଦ ନିଲ୍ତାର୍ । ବିଚାର୍ସବା କୁଚ୍ଚାର୍ ଆରି ପତିଂ ରିକ୍ତାର୍ ।
11 ହେ କମଙ୍ଗ୍ନି ଇଚି ଗାର୍ବି କାତାନି ଗାର୍ଜେନ୍ କାଜିଂ ହେ ୱେଡ଼ାଲିଂ ଆନ୍ ମାସ୍ଦିହୁଡ଼୍ତାଂ ଜେ; ଆନ୍ ହୁଡ଼୍ତାଂ ଜେ, ହାରିହାରା ହେ ପସୁ ହାତାତ୍ ଆରି ତା ଗାଗାଡ଼୍ ନାସ୍ ଆତାତ୍ ଆରି ହେ ନାଣିତ କାଡ୍ନି କାଜିଂ ହେଲାୟ୍ ଆତାତ୍ । 12 ଆରେ, ବିନ୍ ପସୁଂତାଂ ହେୱେକ୍ତି ଆଦିକାର୍ ଅୟାତାତ୍; ଆତିସ୍ପା ର ସମୁ ପାତେକ୍ ହେୱେକ୍ତି ଆୟଁସ୍ ଲାମା କିଆତାତ୍ । 13 ଆନ୍ ନାଣାକାଡ଼୍ନି ଦର୍ସନ୍ତ ହୁଡ଼୍ତାଂ, ଆରେ ହୁଡ଼ାଟ୍, ମାନାୟ୍ମାଜ଼ି ନିୟାୟ୍ ର ଆଣ୍ଡ୍ରେନ୍ ଆକାସ୍ନି ବାଦାଡ଼୍ତ ୱାତାନ୍; ହେୱାନ୍ ବେସି କାଡ଼୍ନି ବୁଡ଼୍ହିତି ଲାଗାୟ୍ ଏକିତିଲେ, ହେୱାର୍ ହେୱାନ୍ତି ଲାଗାୟ୍ ହେୱାନିଂ ତାହିୱାତାର୍ । 14 ଆରେ, ସବୁ କୁଟୁମ୍, ଦେସ୍ନିକାର୍ ଆରି ବେଣ୍ନିକାର୍ ଇନେସ୍ ହେୱାନ୍ତି ହେବା କିନାର୍, ଇଦାଂକାଜିଂ ହେୱାନିଂ ରାଜ୍, ପାଣ୍ ଆରି ରାଜି ହିଆ ଆତାତ୍; ହେୱାନ୍ତି ରାଜ୍ ୱିଜ଼୍ୱିକାଡ଼୍ ରାଜ୍, ହେଦାଂ ବୁଡା ଆଉତ୍, ଆରେ ହେୱାନ୍ତି ରାଜି ତାଇନାତ୍ ।
ଦାନିୟେଲ୍ତି ଦର୍ସନ୍ନି ଅରତ୍
15 ଆନ୍ ଦାନିୟେଲ୍, ନା ଜିବୁନ୍ ନା ଗାଗାଡ଼୍ ବିତ୍ରେ ଆଡ଼୍ବାତାତ୍ ଆରି ନା ଚିନ୍ତାନି ଦର୍ସନ୍ ନାଂ ଗାବ୍ରା କିତ୍ତାତ୍ ।
16 ନା ଲାଗାୟ୍ ଇମ୍ଣାକାର୍ ନିଲ୍ଚି ମାଚାର୍, ହେୱାର୍ତି ବିତ୍ରେତାଂ ରୱାନ୍ ଲଗୁ ଲାଗାୟ୍ ଆନ୍ ହାଲ୍ଜି ହେ ସବୁନି କାତା ୱେନ୍ବାତାଂ । ହେବେ ହେୱାନ୍ ନାଂ ହେ ସବୁନି ଅରତ୍ ୱେଚ୍ଚି ଇଞ୍ଚାନ୍ । 17 ହେ ଚାର୍ ଗାଜା ପସୁ ଚାର୍ ରାଜା, ହେୱାର୍ ପୁର୍ତିତାଂ ଉପ୍ଜାଣ୍ ଆନାର୍ । 18 ମତର୍ ୱିଜ଼ୁତିଂ ମୁଡ଼୍କାନ୍ ପର୍ମେସ୍ୱର୍ ପୁଇପୁୟାନିକାର୍ ରାଜି ପାୟାନାର୍ ଆରି ନିତ୍ରେ କାଡ଼୍, ଇଚିସ୍, ୱିଜ଼୍ୱି କାଡ଼୍ ପାତେକ୍ ରାଜି ବଗ୍ କିନାର୍ ।
19 ହେଏଚେକାଡ଼୍ଦ ଇମ୍ଣି ଚାର୍ ପସୁ, ଇମ୍ଣାକା ବିନ୍ ସବୁତାଂ ବିନ୍, ବେସି ପାଣ୍ଡ୍ରାନାକା, ଇମ୍ଣାକାତି ଟାଡା ଲୱାନିକା ଆରି ୱାଚ୍କାପାଡ଼ି ପିତାଡ଼୍ନିକା ମାଚାତ୍, ଇମ୍ଣାକା ଗୁସ୍ତାତ୍, ଡ୍ରିକ୍ଚି ଗୁଣ୍ଡା କିତାତ୍ ଆରି ବାକିସବୁତିଂ ପାନା ତାରେନ୍ ୱିସ୍ତାତ୍, ତା କାତା ପୁଞ୍ଜେଙ୍ଗ୍ ଆନ୍ ମାନ୍ କିତାଂ; 20 ଆରେ, ତା କାପ୍ଡ଼ାତ ଇମ୍ଣି ଦାସ୍ କମଙ୍ଗ୍ ମାଚିକ୍ ଆରି ବିନ୍ ଇମ୍ଣି କମ ନିଂତାତ୍ ଆରି ଇମ୍ଣି ମୁମ୍ଦ ତିନ୍ କମଙ୍ଗ୍ ଆର୍ତିକ୍; ଇଚିସ୍, ହେ ଇମ୍ଣି କମନି କାଣ୍ଗା ଆରି ଆକାର୍ କାତାନିକା ମୁମ୍ ମାଚାତ୍, ଇମ୍ଣାକାନି ଗାଗାଡ଼୍ତ ଜାର୍ ହାଂଦିତାଂ ବଇଁକାର୍ ମାଚାନ୍, ଇ କାତା ପୁଞ୍ଜେଙ୍ଗ୍ ଆନ୍ ମାନ୍ କିତାଂ ।
21 ଆନ୍ ହୁଡ଼୍ତାଂ, ଆରେ ହେ କମଙ୍ଗ୍ ପୁଇପୁୟାନିକାର୍ତି ଲାହାଂ ଜୁଜ୍ କିତାତ୍ ଆରି ହେୱାକାଂ ଜିଣା ଆତାତ୍; 22 ହାରିହାରା ହେ ବେସି କାଡ଼୍ନି ବୁଡ଼୍ହି ୱାତାନ୍ ଆରି ୱିଜ଼ୁତିଂ ମୁଡ଼୍ଦାକାନ୍ ପର୍ମେସ୍ୱର୍ ପୁଇପୁୟାନିକାର୍ ବିଚାର୍ ଦାୟିତ୍ ହିଆ ଆତାତ୍ ଆରି ପୁଇପୁୟାନିକାର୍ ରାଜି ବଗ୍ କିନାକା ସମୁ ଏକାୱାତାତ୍ ।
23 ହେୱାନ୍ ଇ ଲାକେ ଇଚାନ୍, ଚାର୍ ପସୁ ପୁର୍ତିନି ଚାର୍ ରାଜି ଆନାତ୍, ହେଦାଂ ବିନ୍ ସବୁ ରାଜିତାଂ ବିନ୍ ଆନାତ୍ ଆରି ସବୁ ପୁର୍ତିତିଂ ଗୁହ୍ନାତ୍, ଆରେ ୱିସ୍ସି ଗନ୍ଦା ଗନ୍ଦା କିନାତ୍ ଆରି ହେଦାଂ ଡ୍ରିକ୍ଚି ତୁହିନାତ୍ । 24 ଆରେ, ହେ ଦାସ୍ କମଙ୍ଗ୍ନି ବିନ୍ନିକା ଇଦାଂ ଜେ, ହେ ରାଜା ଉପ୍ଜା ଆନାନ୍; ହେୱାର୍ତି ପାଚେ ଆରେ ରୱାନ୍ ଉପ୍ଜା ଆନାନ୍ । ହେୱାନ୍ ଆଗେନିକାର୍ତାଂ ବିନ୍ ଆନାନ୍ ଆରି ତିନ୍ ରାଜାରିଂ ଦବାୟ୍ କିନାନ୍ । 25 ଆରେ, ହେୱାନ୍ ୱିଜ଼ୁତିଂ ମୁଡ଼୍ଦାକାନ୍ ତିନି ପୁଇପୁୟାନିକାର୍ତିଂ ଦବାୟ୍ କିନାନ୍; ଆରେ, ହେ ବାର୍ହୁ ଆରି ବିଦିନି ବାଦ୍ଲାୟ୍ କିଦେଂ ବିଚାର୍ କିନାନ୍; ଆରେ, ର ବାର୍ହୁ, ରିଣ୍ଡି ପୁଇପୁୟା ପାର୍ବୁ ଆରି ଆଦା ପୁଇପୁୟା ପାର୍ବୁ ପାତେକ୍ ହେୱାର୍ ତା କେଇଦ ହେଲାୟ୍ ଆନାତ୍ । 26 ମତର୍ ବିଚାର୍-ସବା କୁଚ୍ନାତ୍ ଆରି ହେୱାର୍ ହାରିହାରା ପାତେକ୍ ତା ରାଜ୍କିନାକା ଜିରାନାତ୍ ଆରି ନାସ୍ କିନି କାଜିଂ ତା ତାଂ ହେଦାଂ ଅନାର୍ । 27 ଆରେ, ସାସନ୍ କାଡ଼୍ ଆରି କାମାୟ୍ ଆରି ଆକାସ୍ନିକାନି ତାରେନ୍ନିକା ରାଜିସବୁନି ପାଣ୍, ୱିଜ଼ୁତିଂ ମୁଡ଼୍ଦାକାନ୍ ତିନି ପୁଇପୁୟା ଲକୁରିଂ ହିଆ ଆନାତ୍; ହେୱାନ୍ତି ରାଜି ୱିଜ଼୍ୱି-କାଡ଼୍ ରାଜି ଆରି ବାର୍ବିନ୍ ସାସନ୍କାର୍ୟା ହେୱାନ୍ତି ହେବା କିନାର୍ ଆରି ହେୱାନ୍ତି ବଲ୍ମାନିକାର୍ ଆନାର୍ । 28 ଇବେ କାତାନି ହାରିହାରା ଆନ୍ ଦାନିୟେଲ୍, ନା ବାବ୍ନା ନାଂ ଗାବ୍ରା କିତ୍ତାତ୍ ଆରି ନା ମୁମ୍ ୱାଚ୍ଚାତ୍, ମତର୍ ଆନ୍ ହେ କାତା ଜାର୍ ମାନ୍ତ ଇଟ୍ତାଂ ।"
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)