1 ଦାରିୟାବସ ସବୁ ରାଜିତ ଏକ୍‌ସ କଡ଼େ ଜାଣ୍‌ ଆଦିକାରିର୍‌ ରାଜି ଜପି ବାଚି କିତାର୍‌ । 2 ଆରି ହେ ଆଦିକାରିର୍‌ ଇନେସ୍‌ ଇସାବ୍‌ ହିନାର୍‌ ଆରି ରାଜାତି ମୁଡ଼େ ଲାସ୍‌ ଆଉତ୍‌, ଇଦାଂକାଜିଂ ହେୱାର୍‌ ଜପି ତିନ୍ ଜାଣ୍‌ ମୁଣିକାରିଂ ବାଚିକିଦେଂ ହାର୍‌ ବୁଜାତାନ୍; ଇ ତିନ୍ ଜାଣ୍‌ ବିତ୍ରେ ଦାନିୟେଲ୍‌ ରୱାନ୍‌ ମାଚାନ୍‌ । 3 ଇ ଦାନିୟେଲ୍‌ତିନି ୱାସ୍କିତ ମୁଡ଼୍‌ ଜିବୁନ୍ ମାଚିଲେ ହେୱାନ୍‌ ମୁଣିକାର୍‌ ଆରି ଆଦିକାରିର୍‌ ବାଟା ଡାକ୍‌ପୁଟା ଆଜ଼ି ମାଚାନ୍; ଆରେ, ରାଜା ତାଙ୍ଗେଙ୍ଗ୍ ସବୁ ରାଜି ଜପି ବାଚି କିଦେଂ ମାନ୍‌ କିତାନ୍‌ । 4 ଇବେଣ୍ଡାଂ ମୁଣିକା ଆରି ଆଦିକାରିର୍‌ ରାଜାକାମାୟ୍‌ ବିସ୍ରେ ଦାନିୟେଲ୍‌ତି ଦସ୍‌ ଡେକ୍ତାର୍‌; ମତର୍‌ ହେୱାର୍‌ ଇମ୍‌ଣାକାପା ଦସ୍‌ କିବା ଅପ୍‌ରାଦ୍‌ ଗାଟାୱାତାର୍‌, ଇନାକିଦେଂକି ହେୱାନ୍‌ ପାର୍ତିନିକାନ୍‌ ମାଚାନ୍‌ ଆରି ହେୱାନ୍ତି ଇମ୍‌ଣାକାପା ବୁଲ୍‌କାନାକା କିବା ଅପ୍‌ରାଦ୍‌ ହୁଡ଼ୟାୱାତାତ୍‌ । 5 ପାଚେ ହେ ଲକୁ ଇଚାର୍‌, ଆପେଙ୍ଗ୍‌ ଦାନିୟେଲ୍‌ତି ପର୍‌ମେସ୍ୱର୍‌ତି ବିଦି ବିସ୍ରେ, ତା ଦସ୍‌ ଆହ୍‌ୱିତିସ୍‌ ଆରେ ଇମ୍‌ଣାକାପା ବିସ୍ରେ ଦସ୍‌ ଗାଟା ଆଉସ୍‌ ।

6 ଇବେ ମୁଣିକାର୍‌ ଆରି ଆଦିକାରିର୍‌ ରାଜା ଲାଗେ ରୁଣ୍ଡା ଆଜ଼ି ହେୱାନିଂ ଇ ବାନି ଇଚାର୍‌, ଗାଜାରାଜା ଦାରିୟାବସ୍‌, ନିତ୍ରେଜିଆ । 7 ରାଜିନି ମୁଣିକାର୍‌, ରାଜାର୍‌ଲକୁର୍‌ ଆରି ଆଦିକାରିର୍‌, ମତ୍ରି ଆରି ଦେସ୍‌ମୁଣିକାର୍‌ ୱିଜ଼ାର୍‌ ରଣ୍ଡାଜ଼ି ଗାଣ୍‌ଜୁ କିଜ଼ି ଏଲେଙ୍ଗ୍‌ ର ରାଜା ବଲ୍‌ ଆରି ଆଟ୍‌ୱା ମୁନା-ବିଦି ରଚ୍‌ନି କାଜିଂ ବିଚାର୍‌ କିତାନ୍ନା ଜେ, ଜଦି ଇନେର୍‌ ତିରିସ୍‌ ଦିନ୍ ପାତେକ୍‌ ଗାଜାରାଜାତି ପିସ୍‌ସି ଇମ୍‌ଣାକାପା ପେନ୍‌ କିବା ମାନାୟ୍‌ନି ଲାଗାୟ୍‌ ପାର୍ତନା କିନାନ୍‌, ହେୱାନ୍‌ ସିୟଁକ୍ତି କ୍ଡଇଦ ତୁହିୟା ଆନାନ୍ । 8 ନଂ ଏ ଗାଜା ରାଜା, ମାଦିୟ ଆରି ପାରସିକର୍ତିନି ଗୁଚାୱି ବିଦି ଇସାବ୍ରେ ଇ ମୁନା-ବିଦି ଇନେସ୍‌ ବାଦ୍‌ଲା ଆଉତ୍‌, ଇଦାଂକାଜିଂ ହେଦାଂ ତିର୍‌ କିଆ ଆରି ଇ ଲେକାତ ସତକ୍‌ କିଆ । 9 ଲାଗିଂ ରାଜା ଦାରିୟାବସ୍‌ ହେ ଲେକା ଆରି ମୁନା-ବିଦିତ ସତକ୍‌ କିତାନ୍‌ । 10 ଇଦାଂପାଚେ ଇ ଲେକା ସତକ୍‌ ଆତାତ୍‌ନା ଇଞ୍ଜି ପୁଚି ପାଚେ ଦାନିୟେଲ୍‌ ଜାର୍‌ ଇଞ୍ଜ ହାଚାନ୍‌; ତାଦି ବାକ୍ରାନି କିଟ୍‍କି ଜିରୁସାଲମ୍‌ ନିପ ମେଲା ମାଚାତ୍‌; ଆରେ, ହେୱାନ୍‌ ଆଗେ ଇନେସ୍‌ କିଜ଼ି ମାଚାନ୍, ହେ ଇସାବ୍ରେ ଦିନ୍‌ ବିତ୍ରେ ତିନ୍‌ ହଟ୍‌ ମେଣ୍ଡାଂକୁନ୍ଦିକିଜ଼ି ପାର୍ତନା କିତାନ୍‌ ଆରି ଜାର୍‌ ପର୍‌ମେସ୍ୱର୍‌ତି ଲାଗେ ଦନ୍ୟବାଦ୍‌ କିତାନ୍ ।

11 ଇବେ ହେ ଲକୁ ରଣ୍ଡାଜ଼ି ଦାନିୟେଲ୍‌ତିଂ ହେୱାନ୍ତି ପର୍‌ମେସ୍ୱର୍‌ତି ଲାଗାୟ୍‌ ପାର୍ତନା ଆରି ଗୱାରି କିନାକା ହୁଡ଼୍‌ତାର୍‌ । 12 ହେଏଚେକାଡ଼୍‌ଦ ହେୱାର୍‌ ରାଜା ଲାଗାୟ୍‌ ହାଲ୍‌ଜି ରାଜାର୍ତି ମୁନା-ବିଦି ବିସ୍ରେ ତା ମୁମ୍‍ଦ ଇଚାର୍‌, ଇଚିସ୍‌; ଏ ଗାଜାରାଜା, ଇମ୍‌ଣି ଇମ୍‌ଣାକାପା ମାନାୟ୍‌ ତିରିସ୍‌ ଦିନ୍‌ ବିତ୍ରେ ନିଂ ପିସ୍ତି ଇମ୍‌ଣାକାପା ପେନ୍‌ କି ମାନାୟ୍‌ତି ଲାଗାୟ୍‌ ପାର୍ତନା କିନାନ୍‌, ହେୱାନ୍‌ ସିୟଁକ୍ତି କ୍ଡଇଦ ତୁହିୟା ଆନାନ୍‌, ଏଲେଂ ର ମୁନା ଆକିତ କି ଏନ୍‌ ସତକ୍‌ କିୱାତାୟ୍‌ନା ? ରାଜା ଉତର୍‌ କିଜ଼ି ଇଚାନ୍‌, ମାଦିୟ ଆରି ପାରସିକର୍ତିନି ଆଟ୍‌ୱା ବିଦି ଇସାବ୍ରେ ହେଦାଂ ତିର୍‌ ଆତାତ୍‌ନା ।

13 ହେବେ ହେୱାର୍‌ ରାଜାତି ମୁମ୍‌ଦ ଉତର୍‌ କିଜ଼ି ଇଚାର୍‌, "ଏ ଗାଜାରାଜା, ପେଜ଼୍‌ୟାତି ଜିହୁଦା ହିମ୍‌ଣାଂ ବିତ୍ରେ ରୱାନ୍‌ ଜେ ଦାନିୟେଲ୍‌, ହେୱାନ୍‌ ନିଂ କିବା ନି ସତକ୍‌ନିକା ମୁନା ଆକିତିଂ ମାନି କିଉନ୍‌, ମତର୍‌ ଦିନ୍‌ ବିତ୍ରେ ତିନ୍‌ ହଟ୍‌ ପାର୍ତନା କିନାନ୍‌ ।"

14 ପାଚେ ରାଜା ଇ କାତା ୱେନ୍‌ଞ୍ଜି ବେସି ମନ୍‌ଦୁକ୍‌ ଆତାନ୍‌, ଆରେ ଦାନିୟେଲ୍‌ତିଂ ଉଦାର୍‌ କିନି କାଜିଂ ତା ବିସ୍ରେ ମାନ୍‌ଦିଆନ୍‌ କିତାନ୍‌: ଆରେ, ତାଂ ରକ୍ୟା କିନି କାଜିଂ ୱେଡ଼ାହାନି ପାତେକ୍‌ ସେସ୍ଟା କିତାନ୍‌ । 15 ଇବେ ହେ ଲକୁ ରାଜାତି ଲାଗାୟ୍‌ ରୁଣ୍ଡାଜ଼ି ରାଜାଙ୍ଗ୍‌ ଇଚାର୍‌, ଏ ଗାଜାରାଜା, ଏନ୍‌ ପୁନା, ରାଜା ଇମ୍‌ଣାକାପା ମୁନା ବଲ୍‌ କିବା ବିଦି ରଚ୍‌ଚିସ୍‌, ହେଦାଂ ଜେ ବାଦ୍ଲାଦେଂ ଆଡୁତ୍‌, ମାଦିୟ ଆରି ପାରସିକର୍ତିନି ଏଲେଂ ବିଦି ମାନାତ୍‌ ।

16 ହେବେ ରାଜା ବଲ୍‌ କିତିଲେ, ହେୱାର୍‌ ଦାନିୟେଲ୍‌ତିଂ ତାହି ସିୟଁକ୍ତି କ୍ଡଇଦ ତୁହିତାର୍‌ । ଆରେ, ରାଜା ଦାନିୟେଲ୍‌ତିଂ ଇଚାନ୍‌, ଏନ୍‌ ନିତ୍ରେ ନିତ୍ରେ ଇମ୍‌ଣି ପର୍‌ମେସ୍ୱର୍‌ତିନି ହେବା କିନାୟା, ହେୱାନ୍‌ ନିଂ ଉଦାର୍‌ କିଦ୍‌ନାନ୍‌ । 17 ଆରେ ର କାଲ୍‌ ତାହି କ୍ଡଇ ମୁମ୍‌ଦ ଇଟ୍‌ତାର୍‌; ଆରେ, ଦାନିୟେଲ୍‌ତି ବିସ୍ରେ ଇନେସ୍‌ ଇମ୍‌ଣାକାପା ବାଦ୍‌ଲା ଆନାତ୍‌, ଇଦାଂକାଜିଂ ରାଜା ଜାର୍‌ନି ଡାବୁଂତ ଆରି ଜାର୍‌ ମାନିନିର୍‌ତି ଡାବୁତ ହେଦାଂ ବାନା କିତାନ୍‌ । 18 ଇଦାଂପାଚେ ରାଜା ଜାର୍‌ ଇଞ୍ଜ ହାଲ୍‌ଜି ଉପାସ୍‌ତ ନାଣା ହୁଞ୍ଚାନ୍‌ ଆରି ବାଜାଜତର୍‌କୁ ତା ଲାଗାୟ୍‌ ଅୱାତାର୍‌; ଆରେ, ତାଦି ହୁଚ୍‌କାଣ୍‌କୁ ହୱାତାତ୍‌ ।

19 ଇଦାଂପାଚେ ରାଜା ଉଟ୍‌ଲାହାକାଡ଼େ ନିଂଜି ବେଗି ସିୟଁକ୍ତି କ୍ଡଇ ଲାଗାୟ୍ ହାଚାନ୍‌ । 20 ଆରେ, ହେୱାନ୍‌ କ୍ଡଇ ଲାଗାୟ୍‌ ଦାନିୟେଲ୍‌ତି ଲାଗେ ଏକିସ୍‌ ଆଡ଼୍‌ବିନି କାଟ୍‌ତ କୁକ୍ତାନ୍‌; ରାଜା ଦାନିୟେଲ୍‌ତିଂ ଇଚାନ୍‌, ଏ ଜିତି ପର୍‌ମେସ୍ୱର୍‌ତି ହେବାକାରି ଦାନିୟେଲ୍‌, ଏନ୍‌ ନିତ୍ରେ ନିତ୍ରେ ଇନେର୍‌ତି ହେବା କିନାୟା, ନିଦାଂ ହେ ପର୍‌ମେସ୍ୱର୍‌ ସିୟଁକ୍ତାଂ ନିଂ ଉଦାର୍‌ କିଦେଂ ଆଡ୍‌ଦାନାନ୍‌ କି ? 21 ହେବେ ଦାନିୟେଲ୍‌ ରାଜାଙ୍ଗ୍‌ ଇଚାନ୍‌, ଏ ଗାଜାରାଜା, ନିତ୍ରେଜିଆ । 22 ନା ପର୍‌ମେସ୍ୱର୍‌ ଜାର୍‌ ଦୁତ୍‌ ପକ୍‌ଚି ସିୟଁକ୍ତି ୱେଇ ଗେସ୍ତାନ୍‌ନା ଆରି ହେୱାଙ୍ଗ୍‌ ନାଦାଂ ମୁଡ଼େ କେତି କିୱିତାକ୍‍ନା; ଇନାକିଦେଂକି ହେୱାନ୍ତି ଲାଗେ ନା ଅଦସି ଚଞ୍ଜ୍‌ୟା ଆତାତ୍‌; ଆରେ, ଏ ଗାଜା ରାଜା, ଆନ୍‌ ନି ମୁମ୍‌ଦ ନେ ଇମ୍‌ଣାକାପା କେତି କିୱାତାଂନା ।

23 ହେବେ ରାଜା ବେସି ୱାର୍‌ୟା ଆଜ଼ି ଦାନିୟେଲ୍‌ତିଂ କ୍ଡଇଦାଂ ନିକ୍‌ଚି ତାହିୱାଦେଂ ବଲ୍‌ ହିତାନ୍ । ହେବେ ଦାନିୟେଲ୍‌ କ୍ଡଇଦାଂ ନିକ୍ୟାତାନ୍‌ ଆରି ଗାଗାଡ଼୍‌ତ ଇମ୍‌ଣାକାପା ବାନି ଗାଅ ଚଞ୍ଜ୍‌ୟା ଆୱାତାତ୍‌, ଇନାକିଦେଂକି ହେୱାନ୍ ଜାର୍‌ ପର୍‌ମେସ୍ୱର୍‌ତାକେ ପାର୍ତି କିଜ଼ି ମାଚାନ୍‌ । 24 ଇଦାଂପାଚେ ରାଜା ବଲ୍‌ ହିତିଲେ, ଲକୁ ଦାନିୟେଲ୍‌ତିନି ଦାବାକିନାକାରିଂ ତାହି, ହେୱାରିଂ, ହେୱାର୍‌ତି ହିମ୍‌ଣାଂ ଆରି ହେୱାର୍‌ତି ଡକ୍ରିକାଂ ସିୟଁକ୍ତି କ୍ଡଇଦ ତୁହିତାର୍‌; ଆରେ, ହେୱାର୍‌ କ୍ଡଇ ତାରେନ୍‌ ଆର୍‌ୱାଦାଂନେ ସିୟଁକ୍‌ ହେୱାରିଂ ମାଡିବହାଜ଼ି ହେୱାର୍‌ତି ପ୍ଡେନ୍‌ସବୁ ଗୁଣ୍ଡା କିତିକ୍‌ । 25 ହେଏଚେକାଡ଼୍‌ଦ ଦାରିୟାବସ୍‌ ସବୁ ପୁର୍ତିନିକାର୍‌, ସବୁ କୁଟୁମ୍‌, ଦେସ୍‍ନିକାର୍‌ ଆରି ବେଣ୍‌ନିକାର୍‌ତି ଲାଗାୟ୍‌ ଆକି ଲେକିକିତାନ୍‌; "ମି କାଜିଂ ବେସି ସୁସ୍ତା ଆୟେତ୍‌ । 26 ଆନ୍‌ ଇ ବଲ୍‌ କିନାଙ୍ଗା ଜେ, ନା ରାଜିନିକାର୍‌ ସବୁ ରାଜିନି ଲକୁ ଦାନିୟେଲ୍‌ତିନି ପର୍‌ମେସ୍ୱର୍‌ତି ମୁମ୍‌ଦ ତ୍ରିଗେର୍‌ ଆରି ପାଣ୍ଡ୍ରା ଆୟେର୍‌; ଇନାକିଦେଂକି ହେୱାନ୍‌ ଜିତି ପର୍‌ମେସ୍ୱର୍‌ ଆରି ନିତ୍ରେମାନି ମାପ୍ରୁ ଆରି ହେୱାନ୍ତି ରାଜି ତିର୍‌ ନିକା, ଆରେ ହେୱାନ୍ତି ରାଜ୍‌ ହାରିହାରା ପାତେକ୍‌ ନେ ମାନାତ୍‌ । 27 ହେୱାନ୍‌ ଉଦାର୍‌ କିଦ୍‌ନାନ୍‌ ଆରି ରକ୍ୟା କିଦ୍‌ନାନ୍, ଆରେ ହେୱାନ୍‌ ସାର୍ଗେତ ଚିନ୍‌ ଆରି କାବାନି କାମାୟ୍‌ ପୁରା କିନାନ୍; ହେୱାନ୍‌ ଦାନିୟେଲ୍‌ତିଂ ସିୟଁକ୍ତି ବାଡ଼୍‌କାସ୍‌ଦାଂ ଉଦାର୍‌ କିତାନ୍‌ନା ।" 28 ଇଲାକେ ଦାନିୟେଲ୍‌ ଦାରିୟାବସ୍‌ନି ରାଜ୍‌ ୱେଡ଼ାଲିଂ ଆରି ପାରସିକ କରସ୍‌ନି ରାଜ୍‌ ୱେଡ଼ାଲିଂ ଉନତି ଲାବ୍‌ କିତାନ୍ ।