ନବୁକଦ୍ନିତ୍ସର୍ କାଜିଂ ବିଚାର୍
28 ରାଜା ନବୁକଦ୍ନିତ୍ସର୍ କାଜିଂ ଇସବୁ ଗିଟାତାତ୍ । 29 ବାର୍ ମାସ୍ନି ହାରିହାରାତ ହେୱାନ୍ ବାବିଲ୍ନି ରାଜାର୍-ମେଡ଼୍ ଇଞ୍ଜ ବୁଲାଜ଼ିମାଚାନ୍ । 30 ରାଜା ଇ କାତା ଇଚାନ୍, ଆନ୍ ଜାର୍ ବାଡ଼୍କାସ୍ନି ସାସ୍ତ ଆରି ଜାର୍ ସାକ୍ତିନି ପାଣ୍ କାଜିଂ ରାଜ୍ଦାନି କିନି କାଜିଂ ଇନାକା ରଚ୍ଚାଙ୍ଗ୍ନା, ଇଦାଂ କି ହେ ଗାଜା ବାବିଲ୍ ଆକାୟ୍ ?
31 ରାଜାତି ୱେଇଦ ଇ କାତା ମାନୁ ମାନୁ ଇ ସାର୍ଗେନିକା କାତା ଆତାତ୍, ଏ ରାଜା ନବୁକଦ୍ନିତ୍ସର୍, ନିଂ ଇ କାତା ଇଞ୍ଜ୍ନାଙ୍ଗା, ନି ତାଂ ରାଜି ହାଚାତ୍ । 32 ଆରେ, ଏନ୍ ଲକୁ ବିତ୍ରେତାଂ ଦେହାକିୟା ଆନାୟ୍ ଆରି ଜମିନିକା ପସୁକ୍ତି ଲାହାଂ ନି କୁଚ୍ନାକା ଆନାତ୍; ବାଡ଼୍ଦୁ ନିୟାୟ୍ ନିଂ କାଚ୍ରା ତିନ୍ୟା କିୟାନାତ୍; ଇଲାକେ ନି ଜପି ସାତ୍ ବାର୍ହୁ ବଡ଼ାଜ଼ି ହାନାତ୍; ହାରିହାରା ଇନେନ୍ ୱିଜ଼ୁତିଂ ମୁଡ଼୍ଦାକାନ୍, ହେୱାନ୍ ଜେ ମାନାୟାର୍ ରାଜିତ ରାଜ୍ କିନାନ୍ ଆରି ଇନେରିଂ ହେୱାନ୍ତି ମାନ୍, ହେୱାନିଂ ହେୱାନ୍ ହେଦାଂ ହିନାନ୍, ଇଦାଂ ଏନ୍ ପୁନାୟ୍ ।
33 ହେ ଦାପ୍ରେ ନବୁକଦ୍ନିତ୍ସର୍ କାଜିଂ ହେ କାତା ପୁରା ଆତାତ୍; ଆରେ, ହେୱାନ୍ ମାନାୟ୍ତି ବିତ୍ରେତାଂ ଦେହାକିୟା ଆଜ଼ି ବାଡ଼୍ଦୁ ଲାକେ କାଚ୍ରା ଚିଚାନ୍, ଆରେ ତା ଗାଗାଡ଼୍ ଆକାସ୍ନି କାକାର୍ତ ଉତ୍ତାତ୍, ହାରିହାରା ତା ତେମୁଲ୍ ଚେଚାଣ୍ ପଟିନି କେଲ୍ ଲାକେ ଆରି ତା ୱାଚ୍କାପାଡ଼ି ପଟିନି ୱାଚ୍କାପାଡ଼ି ଲାକେ ଗାଜାତାତ୍ ।
ନବୁକଦ୍ନିତ୍ସର୍ ଇସ୍ୱରତି ଗୁଣ୍କେର୍ନାକା
34 ଇଦାଂପାଚେ ହେ ୱେଡ଼ାନି ହାରିହାରାତ ଆନ୍ ନବୁକଦ୍ନିତ୍ସର୍ ସରଗ୍ ନିପ ଜପି ହୁଡ଼୍ତାଂ, ସାତ୍ ବାର୍ହୁ ପାଚେ ନା ବୁଦି ନା ଲାଗାୟ୍ ମାସ୍ଦି ୱାତାତ୍, ହେବେ ଆନ୍ ୱିଜ଼ୁତିଂ ମୁଡ଼୍ଦାକାନ୍ନି ଦନ୍ୟବାଦ୍ କିତାଂ ଆରି ଇନେନ୍ ୱିଜ଼୍ୱିଜିନାକାନ୍, ହେୱାନ୍ତି ଗୁଣ୍କେର୍ତାଂ ଆରି ହମାନ୍ୱାରି କିତାଂ; ଇନାକିଦେଂକି ହେୱାନ୍ତି ରାଜି ୱିଜ଼୍ୱିକାଡ଼୍ ଆରି ହେୱାନ୍ତି ରାଜି ଆଣ୍ଡ୍ରେନ୍ଦାଡ଼ିରେ ମାନ୍ଗାନାତ୍ । 35 ହେୱାନ୍, ପୁର୍ତିନିକାରିଂ ଲକୁରିଂ ଅଲପ୍ପା ହୁଡ଼ୁର୍; ଆରେ ହେୱାନ୍ ସାର୍ଗେନିକା ମେଲ୍ୟାର୍ ବିତ୍ରେ ଆରି ପୁର୍ତିନି ନିକାର୍ନି ବିତ୍ରେ ଜାର୍ ଇଚା ଇସାପ୍ରେ କାମାୟ୍ କିନାର୍; ଆରେ, ଇନେର୍ ହେୱାନ୍ତି କେଇ ଟେବାୟ୍ କିଦେଂ ଆଡୁର୍ ଆରି ଏନ୍ ଇନାକା କିନାୟା ଇଦାଂ ହେୱାନିଂ ଇଞ୍ଜେଙ୍ଗ୍ ଆଡୁର୍ । 36 ହେ ୱେଡ଼ାଲିଂ ନା ବୁଦି ନା ଲାଗାୟ୍ ମାସ୍ଦି ୱାତାତ୍ ଆରି ନା ରାଜିନି ଜାଜ୍ମାଲ୍ କାଜିଂ ନା ସାକ୍ତି ଆରି ଅଜଡ଼୍ ନା ଲାଗାୟ୍ ମାସ୍ଦି ୱାତାତ୍; ପାଚେ ନା ମତ୍ରି ଆରି ମାନିନିକାର୍ ନାଂ ଡେକ୍ତାତାର୍; ଆରେ, ଆନ୍ ଜାର୍ ରାଜିତ ରଚ୍ୟା ଆତାଂ ଆରି ନା ପାଣ୍ ବେସି ବାଡା ଆତାତ୍ ।
37 ଲାଗ୍ ଆନ୍ ନବୁକଦ୍ନିତ୍ସର୍ ହେ ସାର୍ଗେନିକା ରାଜାତିନି ଗୁଣ୍କେର୍ନାକା, ହାଂନାକା ଆରି ହମାନ୍ୱାରି କିନାଙ୍ଗା; ଇନାକିଦେଂକି ହେୱାନ୍ତି ସବୁ କାମାୟ୍ ହାତ୍ପା ଆରି ହେୱାନ୍ତି ହାଜ଼ି ସବୁ ନିୟାୟ୍ନିକା; ଆରେ, ଇମ୍ଣାକାର୍ ଗରବ୍ବେବାର୍ କିନାର୍, ହେୱାରିଂ ତାରେନ୍ କିଦେଂ ହେୱାନ୍ତି କେମ୍ତା ମାନାତ୍ ।