1 Cu aidungde cia, Rampaube mina keda 72* de kedetlu, delwe pa pekatei gwang kera renam ramsangga nah heni leune gage mina hangna na eh penuide mrai langgai. 2 Pa penui dage rangdi, "Luhlüt kera kiesüt zeu, dede heta keteime au cam lie. Ciziemne luhlüt Rampaube de peu pe luh gage hetaketeime de langgailu kerane kielu. 3 Nnui lampui ga rip gwang kwacu. Ainie, Ih nnuide meurünnadung nzwa heneudung kakga ge langgai zeu. 4 Rangkangbung ge, mede hebeuh nsung ge, mede picumdung de pung so, mede lampui gade migede de kelum so. 5 Nnui ki keheiga lüt de, keraibe, ‘Lungciepbe de peu ki aika bam kelube tei lulo!’ de eh ranglu. 6 Lungciep na ge bamcai, nnui lungciep peda bam luzie; dede mecai, cide nnui da gwang dailu zie. 7 Cu ki cika bam jüja lu, penui ne pwa kepeube tyei nah sak eh, kedanemene ma keteime pe ziehi ngau kerabe lu. Kige gade kige ga gwang so. 8 Nah nnui namdi keheiga kelüt ga, mi nnuide ngngwa kelu dau, nnui dwa gage kai kebeube tyeilu, 9 nah cika keteeime de teingkeibeu nah penui dage, ‘Tinggwang hegwangram nnui da mna bamdi delie,’ de eh rang lialu. 10 Cu nnui renam keheiga kelüt dau, nah mi nnuide ngngwalu mecai, lampui ga mie eh rang lo, 11 ‘Nnui nam rebui anui pi ga kup kebam de anui nnuide mmau eh hemui mpet gaila! Dede aide ci lulo, Tinggwang hegwangram au gwang mna bam dida.’ 12 Ih nnui dage ranglia zie, cipaunai cipau namdi de swa Sodom be lialu yiki zie.✝ 13 "Ainie, Chorazin! Ainie, Bethsaida! Magade heta kedi nnai dage tei kegaidung de Tyre penai Sidon namdi gage teigai cai, penai au ndaage rosopai nah mimüt teu eh penai helungnreu luzie delu. 14 Dede hetu ketiak benai n ziemne swa Tyre penai Sidon ziemne lialu yiki zie. 15 Nah nang, Capernaum, ncu tei cehu pwa tinggim tung zielie bamni? Ncu tei hena pwa Hades gage kaidi zie.✝ 16 Nnui kwa kingnei kelube a kwade kingnei lula, nah nnuide mlai kelabe acu de mlai lala, nah acu mlai kelabe acu langkegaibe de mlai la."

17 Ciu eh Mina riakhenaekena bau de penui suiyi eh nligwang eh, ranggai, "Rampaubo, herakesiabedung de n zi gade anui kanglie." 18 Pa penui dage rangdi, "Ih Satan tinggim gade ting kehepik nzwa hungkecu ngau bam. 19 Ainie, Ih nnuide heneidung nah heruinegapuidung reude daulu kebui, nah nnui ngauraume reude kengkieng peu dida, nah magede nnuide tei rezam lak.✝ 20 Iciuliede, herakesiadung nnui kang kedi ziemne nnui suiyi so, dede tinggim ga nnui zi raupwa zeudi kecune nnui suiyi lulo."

21 Cipau bamdakkak gade pa Kemci Rabe gade pe suiyi süt eh rangdi, "Ih ncu twa, a Pei, tinggim nah kideu Rampaubo, kedanemene nang ma aidungde keci kecetmedung dade kebaih teula eh, pwa henamedung de lia kegaine. Yeo, a Pei, iciu kecu nang nlungning delu." 22 "A Pei ne ma pelane acu nlumbeu dida, nah Peibe gwale migede Nabe caubi cima, nah Nabe gwale migede Peibe caubi cima nah peu lia zielie kedet kelume gwale pecu ci gailak." 23 Cipaucai pa nreu gwang ledeukelumedung dage nkim eh rangdi, "Nnui kengaudung pemiakle kengaumedung au samlam pungtu! 24 Kedanemene Ih nnui dage ranglia zie, caihakecime nah hegwangme kekiee nnui kengau de ngauneu, nah cide ngau luma; nah nnui kesiude siuneu gwang, nah siulu ma."

25 Cu ainie, Jewme zai kecime ge pecu kedak zielie saplwe ranggai, "Keledeubo, Ih kelungta kering ngaulu kerane daipai tei maisia no?" 26 Dede pa pe dage rangdi, "Hezai ga daipai raupwa lano? Nang dainzwa cide pei lano?" 27 Pa samkeli eh rangdi, "Nang Tinggwang n Rampaube de n mlung pelane teu, nah n keringria pelane teu, nah n kengkieng pelane teu, nah n kecet pelane teu kulu zie, nah n kidabe de n katei ncu nzwa kulu."✝ 28 Pa pe dage rangdi, "Nang rangdau da. Aide teilu, iciude nang ring luzie."✝ 29 Dede pa pekatei pecule nzeulie neu eh, Jisu dage rangdi, "Cau a kidabe no?" 30 Jisu sam keli eh rangdi, "Mige Jerusalem gade Jericho ga hungla ge pa sütketyeimedung kakga kaumie di, ge pe paini de gaudi nah penui pecu daptset nage gai eh tetdi. 31 Cu cidau cingkume ge lampui cika tet nghung, nah pa pecu ngaulu ge, pa pe nbie kedale de mria tetdi. 32 Cu cinzwa Levime gede, pa heni cika kegwang dau pecu ngaulu pe nbiele de mria tetdi. 33 Dede Samariame* ge, pa mbeu keladau, pa kebamni ga gwanglu, nah pa pecu ngau luge, pa ngau nggiadi. 34 Cine peda gwang eh maca nah zau ruigai eh pe rejam jamdung kangdi. Delwe pecu pekaune reuga ge teu gailu hebeuhki ga ngngwa gwanglu, delwe pema pielu. 35 Nah pecai benai pa denarii kena keu mpetlu, nah hebeuh ki kekwabe de peu eh rangdi, ‘Pema pielu, nah nang keheige mpet sidi de, Ih nligwang kecu dau, Ih ncu peudai zie.’ 36 Cipaume hangcum de n kecet gade caube sütketyeime kakga kauzeu kebambe gu kidabe no?" 37 Pa rangdi, "Pecu ngaunggia kebeube de." Ge Jisu pe dage rangdi, "Gwang eh nang cinzwa tei lulo."

38 Cu penui penui lampui ga gwang zeuge, pa renam gega lütlu, nah mipui ge pezi Martha pecu ngngwa gwang pekilung gwanglu. 39 Cu pa pe sinabepui Mary lie kecu ge bam, pa Jisu pibang ga bam eh pe keledeu sam kingnei bamdi. 40 Dede Martha au ma telei süt kebam ziemne leudi, nah pa gwang eh rangdi, "Rampaubo, a sinabepui acu pütdi eh akatei ma lamlui kebam, nang cide cetbam meni? Ciziemne, pecu acu nghalo de pe dage rang gailo." 41 Dede Rampaube pe sam keli eh pe dage rangdi, "Martha, Martha, Nang au ma kekieege teineu eh nlungnei bam, 42 dede mage au teu maisia. Kedanemene Maria au keyi lambie kedet luda, cide pe dade keuteu di gailak."