1 Cidau hemaabe pekiene cuhlu, delwe Jisu de ngngwa Pilate dwaga ngngwa gwang. 2 Nah cika de penui pecu ngaukerau sam rang ndeudi, rang eh, "Anui mina aipaude anui leuhme de cwa kela ngaulu nah Caesar raha ha helo kaamla nah pa pekatei pecule Khrista lie rangla, nah hegwang ge lie eh." 3 Ge Pilate pecu keteugai, "Nang Jewme Gwangpei deni?" Dede pa pe sam keligai nah rang eh, "Nangne rangbam da." 4 Ge Pilate cingku kedimedung nah hemaabedung dage rangdi, "Ih mina aipaude dade kemau ge de ngau lumah." 5 Dede penui ketang si eh, ranggai, "Pa mina de kecung pwa eh, Judea deuceu pelane gade ledeu, nah Galilee deuceu gade ndeu eh, nah Jerusalem heni aika de." 6 Cu Pilate sam aide siulu ge, pa mina aipaude Galileeme mi mebi keteu. 7 Nah pa Herod kengkieng kangga* kelungme lie kecu cilu ge, pa pecu langpwa Herod dage kai, pa cidau ting Jerusalem ga bam.

8 Nah cidau Herod Jisu de ngau luge, pa pe suiyisüt di, kedanemene pa Jisu de peting ketie ge ngauneu sütla kedine, kedanemene pa peha siukelane, nah pa miswakegah bata pecu tei liazie ha regui kelane. 9 Cine Herod Jisu de ma kekieege keteu, dede Jisu ma gede pe sam keli ma. 10 Cu cingku kedimedung nah laisiukecime petai ga sap eh, pecu mmau süt bam. 11 Ge Herod nah pe reugwamedung de pecu kii nah henui teidi. Pecu peu paiheni keyi teulu delwe, pa Pilate dage pecu lang caili beu daidi. 12 Ge cipaunai gade Herod penai Pilate ngngwa zangna teidi, kedanemene aipau dwa penai kakga kengaurau lala.

13 Iciu ge Pilate cingku kedimedung nah keda muiteume nah minadung de qu hekwalu, 14 nah penui dage rangdi, "Nnui mina aipaude minadung de pungpang la lie ada ngngwa gwang beu, nah ainie, Ih, nnui dwade pecu keteu da, dede Ih mina aipaude nnui pecu mmau kela nzwa pemau gede ngaulu melie. 15 Dede Herod de pemau ngaulu mene pa anui dage pecu lang caili beu da, nah ainie, magade pecu teitsetdi maikesia mau gede pa tei nzeu ma. 16 Ciziemne, Ih pecu tei keherei gai eh pecu lungmpet dizie." 17 * [Dede Kahkegwang Ngyi benai Pilate hebaangme hangge de Jewme dage lungmpet beu la.] 18 Dede penui peciakne ngngwa sahbak eh ranggai, "Mina aipaude de ngngwa tet dilu, dede Barabbas de anuide lungmpet peulu!" 19 (Pa namdi ga ma kehebwak kauge nah mide daptsetdi, cine pecu hebaangki gage kaizeu.) 20 Pecai Pilate Jisu de lungmpet peu neu eh penui dage rangdai. 21 Dede penui sahbak eh, ranggai, "Gwaktsetdi, pecu gwaktsetdi." 22 Pecai de pa pekecumbe penui dage ranggai, "Daitei, mina aipau de daipai kemau ta ge tei nzeu no? Pa tsailu kebui mauge de Ih pe dade ngau luma. Ciziemne Ih pecu tei keherei gai eh, Ih pecu lungmpet di zie." 23 Dede penui rang mtei si eh sahbak eh pecu gwaktset dilo kiedi. Ciciu eh penui kwane ngkienglu. 24 Cine Pilate penui kie kelade peu zielie tiaklu. 25 Dede pa sorkari de ngaurau nah mide daptsetdi eh hebaangki gage bang kenzeube, penui kie kelabe de lungmpet beu di. Dede Jisu de au penui suibe tei lulo pwapeu di.

26 Nah penui pecu ngngwa mie keladau, penui Cyreneme ge Simon deudi gade gwang la eh pecu tuilwe pecu krus pwa gaibeu, delwe peu pwa lwe Jisu caisui gwang.

27 Cidau mina maadi ge, nah mipuidung pe ziemne penui suisia eh nah hei eh hap kelame, pecai suila. 28 Dede Jisu penuide nreu pie eh, rangdi, "Jerusalem puimedung, a ziemne hap so, dede nnuikatei nnui ziemne nah nnui namedung ziemne hap lu. 29 Kedanemene ainie, petingba gwang zeuda penui ainzwa rangzie, ‘Hena kegahpuidung, nah tetlak kemak puidung nah mipui madau gede nepam kemakme samlam pungtu lie.’ 30 Ciciu eh penui lamlwadung dage rang dizie, ‘Anui reuga meumie lo,’ nah kideutudung dage, ‘Anuide gumlu lo.’ 31 Kedanemene penui tsingring dage aikenzwa tei gaicai, tsingtsai dage au daikenzwa ge teigai zieno?"

32 Kemau ketei keda kena de, pecu ngngwa teitset di kerane ngngwa gwang.

33 Nah penui "Mipeura," lie qukela heni gega gwanglu ge, cika ge penui pecu gwak di, nah kemau keteime kena de si eh, hangge de pe zetle nah kedage de pe hile. 34 * [Dede Jisu rangdi, "A pei, penui mau gibeu lo,* kedanemene penui tei kebam de penui ci melu."] Pecai penui dacak tei eh pe paini mzilu. 35 Nah minadung petaiga sap eh piebam. Kedimedung de pecu henui tei bam eh, rang eh, "Pa kedame de kelilu la. Pa Khristabe Tinggwang ne kedet kelube de cai, peu pekatei pecu kelilu lo."✝ 36 Cidau reugwamedung de petaiga gwang kehiadui pecu peu nah pecu nuidi,✝ 37 nah rang eh, "Magade nang Jewme Gwangpei de cai, nkatei ncu kelilu lo." 38 Cidau pepeu reu gage de, "Aide Jewme Gwangpei da," de raugai.

39 Pecai kemaume gwak kenzeu kena hangge paube pecu kii eh ranggai, "Nang Khrista meni? Nkatei ncu de nah anaide de kelilu lo." 40 Dede sam keli eh, kedabe pecu kesiu eh ranggai, "Nang Tinggwang de hing meni? Nang de pa nzwa eh keherei zeu. 41 Nah anui au keherei kebam petau da. Kedanemene anai au anai ta ziehi ngau zeu. Dede mina aipaude au kemau ge de tei ma." 42 Cidau pa rangdi, "Jisu, Nang n hegwangram ga gwang kelu dau acu nsung gailo." 43 Cine Jisu pe dage rangdi, "Ih n dage rangsiakte liazie, henai gade nang kereluini ga acu ngngwa bamdi zieda."

44 Cidau tingna peting bam kereiekena di, nah kideureu peciakne ga tinghegi bam cum kecang mui bamdi. 45 Cidau tingnaimiak pe kebaa gadi. Kerecaki ga pailim de hak eh zina teidi.✝ 46 Jisu sahbak eh ranggai, "A pei n ba gage Ih a rabe kaila." Nah aide ranggai eh, pa pe ngi kamtube di. 47 Haireu kedibe ma cide ke tei ngau eh, pa Tinggwang de twa eh rangdi, "Kesang mina aipaude makesangme ge." 48 Nah mina aide pie zielie mbau kebam pelane cidungde tei kedi ngau eh, penui suisia eh penui hekarak kepeu eh kilung cailigwang di. 49 Dede pecu kecime pelane, nah mipui Galilee gade pe caisui kegwangmedung, kemdei ga sap eh ma cidung de pie bam.

50 Cu mige cika bam pezi Joseph lie kecuge, pa baudi ga peupei ge, hangkia keyi nah makesangme ge. 51 (Pa baudibe de nah penuitadung de ngngwa kesuizwa ma.) Pa au Jewme nam Arimathea ga kelung mege, nah pa Tinggwang hegwang tei gwang kera kwa kebamme ge. 52 Mina aipaude Pilate da gwang eh Jisu paau kielu. 53 Delwe pa cide lwak nghung lwe, langcim pai gage kezuilu, delwe pecu migede de madau gede kai kemak, tangtsu rau ge gage pecu pwazeudi. 54 Cipau nai Maketelei Tingba, nah Sabbath be ndeu lai bamdi. 55 Nah mipui Galilee gade pecu ngngwa mie kecume, perau nah pe paau dainzwa kungbi kecu ngau. 56 Ge penui cailigwang lwe marim kehenguidung nah macadung pei hekwalu. Nah Sabbath benai mtaklu, penui hezai teikebeu nzwa.