1 Langnaige Jisu kerecaki ga mina de ledeu nah samliakeyi ranglia kebam dau, cingku kedime nah laisiukecimedung nah hangkiamedung de ngngwalwe peda gwang. 2 Nah penui pecu keteugai, "Nang daipai kengkieng teu aidungde teila bi anui dage ranglia lo, mede caune kengkieng aide ncu peuno?" 3 Cine pa penui dage keligai, "Ih de nnui dade mage keteu zie, nnui acu ranglia lo. 4 John duipum keteibe de: tinggim gade mi mina dade gwang no?" 5 Cidau penuikatei penui kakgade mpau bam eh, ranggai, "Anui magade, ‘Tinggim gade,’ decai pa, ‘Ciciu cai daitei nnui pecu nlumlu meno?’ de rangzie. 6 Dede magade anui, ‘Mina dade,’ de rangcai, mina peciakne anuide tangtsu samzie, kedanemene penui John de le pwane caihakecime ge lie lalu." 7 Cine penui dai gade gwang bi penui au cime lie de keligai. 8 Cidau Jisu penui dage rangdi, "Ih daipai kengkieng teu aidungde teila bi nnui dage rang delak."

9 Cidau pa samgwa aide minadung dage ranglia eh cu, "Mige kubetsi luhpak ge talu, delwe cide pwa kubetsi kenruime de peu di, delwe peting ketie ge deudi kedage ga gwang di. 10 Peting cangdi ge pa kilame gede lang pwa kubetsi kenruime dage kai, ciude penui pecu kubeluh gu petsi peu kerane. Dede kubetsi kenruime pecu dap eh mta langgi di. 11 Cidau pa kila kedage de langgai dai, dede penui pecu de dap nah hengam teisüt gai eh, penui pecu mta langgi di. 12 Pecai pa pe kecumbe de langgai dai, dede penui cipaude de tei rejam di nah pecu pwa kelien gidi. 13 Ge kubeluh mpaube rangdi, ‘Ih daipai teizie no? Ih ana akube de langgai zie da. Penui pecu au rüt zie ha.’ 14 Dede kubetsi kenruime pecu ngaulu ge, penuikatei penui kakgade resiu eh, rang, ‘Aide pe mapwabe da. Anui pecu daptset digo iciude pe mabam anui gu di zielu.’ 15 Ciciu eh penui pecu luh gwale teu mie daptset di. Ciciu cai kubeluh mpaube penuide pwa daipai teidi zie no? 16 Pa gwang delwe kubetsi kenruime de ngkap dizie, delwe kubeluh cide kedame de peu dizie." Dede penui aide siu luge, penui rangdi, "Ciciu di siabi!" 17 Dede pa penuide piegai eh rangdi, "Rauteu kela aide daino:

‘Tangtsu ta keteimedung gi kedibe tsukang de, cide pe kimiaktsube tei bam dida’?*✝

18 Keheibe de tangtsu cide reu ga cak kemieme de rüt pang dizie. Nah tangtsu cide keheibe reu ga cakmie cai cide pecu rüt kecai dizie."✝

19 Cipau tingsiak dau laisiukecime nah cingku kedime pecu tuilu neu eh cu, kedanemene penui mmau eh pa samgwa aide penuide rangzeu lie ci bamdi. Dede penui minadung de hing di.

20 Cine pecu ling bam eh, nah penui reketme de langgai peu makesangme rehi tei eh, iciu eh penui pe samrang kemau peeilu kerane, delwe pecu hezaibe nah deuceudibe kengkieng dage tuigai beulu kerane. 21 Penui Jisu dage keteu eh ranggai, "Keledeubo, nang kesangbe teu mi dage rang ledeu kela anui ci, nah heneuherüt tei lama, dede Tinggwang lampui kesangbe gade mide ledeu la. 22 Anui heraha Caesar de peu kecu petau mi meno?" 23 Dede pa penui ciem cidi nah penui dage rangdi, 24 "Acu dinarius ge keulia lo. Cika ge cau mie nah cau zi raupwa lano?" Cine penui rangdi, "Caesar mie." 25 Cidau pa penui dage rangdi, "Ciziemne Caesar gube pwa Caesar de peudilu, nah Tinggwang gube pwa Tinggwang de peudilu." 26 Iciu eh pa kerang samde ziemne penui mina dwagade pecu tui gailak di, dede pe sam siupwa penui swaga eh mlei tadi.

27 Pecai Sadduceemedung kangge peda gwang, ketsaime ringcuh daila melie de rang keladung ge, nah penui pecu keteu, 28 rang eh, "Keledeubo, Moses anui dage hezai rau kebeu ma gade mige pe swacingbe pe nau teilwe pe na lungh mene tsaidi cai pa pe naude ngngwa lung lwe pe swacingbe leuh mteulu maisia liebeu. 29 Iciuge caihereiswacing hang hena lage, cingtube pe nau tei luge pe na lungh mene tsaidi; 30 nah pekenabe 31 nah pekecumbe de cipau puide de luulu, nah cinzwa eh pehenabe de hena lungdiak mene tsaidi. 32 Pecai cipau puide de tsai di. 33 Ciziemne ketsaime ringcuhdai kecudau cipau puide caube nau zieno? Kedanemene hang hena baude pecu pe nau kap de kecune." 34 Cine Jisu penui dage rangdi, "Cudau name henau tei hemeu meu nah laktak tei bamla. 35 Dede caugamme lube teilung ga lunglu kebuime bi, nah ketsai gade ringcuh dailu buibi, henau tei hemeu meu mede meunui de teilak; 36 Penui tsai dailakta, kedanemene penui au tinggimgwame nzwa kecune; nah penui au Tinggwang name, ringcuhdai kecube name. 37 Dede ketsaime kwak cuhlu, Moses ne de tsinghum ha de gade keulia da, cika de pa Rampaube Abraham Tinggwang, nah Isaac Tinggwang, nah Jacob Tinggwang de qu. 38 Iciu eh pa au ketsaime Tinggwang ma, dede keringme Tinggwang, kedanemene pe dade peciakne ringkebam ziemne." 39 Ge laisiukecime keligai nah rangdi, "Keledeubo, nang rangdau da." 40 Kedanemene penui sam keda gede pecu keteu ngngi kedine.

41 Pecai Jisu penui dage keteu eh, "Dainzwa penui Khrista de David na lie rang lulai? 42 Kedanemene David pekatei de Leidung Laisiukwak gage rangkecu,

Rampaube a Rampaube dage rang,

‘A ba zetle bamlu,

43 Ih n ngauraume de pwa n pidau teidi kemaktane.’*

44 Ciziemne David pecu ‘Rampaube’, qu, cine dainzwa pa pena lulai?"

45 Mina pelane kingnei kebam dau, Jisu pe caisuimedung dage rangdi, 46 "Laisiukecimedung dade mriak lulo, pai ketiedung balwe tetla neu, nah litaknidung gade mide peu penuide kelum neu, nah synagoguedung gade hebam yitubedung ga, nah hengyidau hebam yitube ga bamneu kelame dade. 47 Penui hemipui gu süt tyei lala, nah hezai tei eh kekie tei tie süt lala. Penuide au mmau kieeki zie."