1 Ge Jisu pe caisuimedung dage rangdi, "Mide teikemsia gwangme gailak, dede ainie caube dade gwang ziebi cipaude au teilu buida! 2 Pa hena keceu aidungde hangge de teimsia kedi swa au pecu pe ngwang gage keniaktsu kanglwe dui kedi gage kelien gaidi kecube yiki zie. 3 Nnui mriak lulo. N sinabe kemau tei cai, pecu kesiu lo; nah ma gade pa pe lungnreu lucai, pemau gibeu lo. 4 Pa ma gade tingnaige gage pia hena n dage kemau tei gaide, nah pia hena n da nreu gwang, rang eh, ‘Ih a lung nreulu da,’ de dicai pe mau gibeu di!"

5 Langkegaimedung Rampaube dage rangdi, "Anui kenlum tei ngkieng beulo." 6 Cine Rampaube rangdi, "Nnui kenlum ziegitsi pum lang nage de bam liecai, nnui aipau caimünbang dage, ‘Nang mlwak mpet lwe duikedi ga sap lu lo,’ debeu de cide nnui sam mzai zie. 7 Nnui mige pe kilame ge bam eh luh pu mede meurün kwala eh gwang de pe dade, ‘Kelwa gwang lwe taktyei bam ga ngngeilu’ de zieni? 8 Iciu meliene, pa pe dage, ‘A ziemne matyei kera mteilu, nah n kiakang kanglwe Ih matyei nah sak kebamdau a mapie bamlu, nah pecaine nang tyei nah saklude rangzie meni?’ 9 Pa teilo kebeu dungde tei kebeune pa kilabe de tei keherei delie zieni? 10 Cine nnuide teilo kebeube peciakne tei kelu dau, ‘Anui au kila teilu kebuime ma, nah anui ta nade rünne tei kelu lie,’" debeu.

11 Cinzwadi eh, Jisu Jerusalem ga gwang keladau, Samaria nah Galilee cuikui kakga tetkah gwang. 12 Cu pa renam ge ga lütlu, ge kempame hangkerei pecu redaulu. Penui kemdei ga sap bam,✝ 13 marang sahbak eh cu, "Jisu, Keledeubo, anuide ngau nggia lo." 14 Pa penuide ngaulu ge, penui dage rangdi, "Gwang delwe cingkumedung dage nnuide lialo."* Nah penui gwang keladau, penui yi ludi.✝ 15 Cidau penui hangge pa yi kedi ngau luge, marang sahbak eh Tinggwang de twa eh cailigwang dai. 16 Delwe pezu Jisu pi gage nkum pung eh pecu twa. Pa au Samariame* ge. 17 Cidau Jisu samkeli eh, rangdi, "Mina kerei mcilu meni? Dede daiga hang hekuibe la di no? 18 Sang aipaude gwale kedame hangge de gwang Tinggwang de ketwa gade mi?" 19 Ge Jisu pecu rangdi, "Cuhlu nah tetcu. N kenlum ne ncu teihemi luda."

20 Lang naige Phariseemedung daidau Tinggwang hegwang gwang ziebi keheteu dau, Jisu penui samkeli eh rangdi, "Tinggwang hegwangram au pe rehi ngau kegai gade gwang lak. 21 Mede penui, ‘Ainie, cide aika!’ mede ‘Luga!’ De ranglak. Kedanemene ainie, Tinggwang hegwangram au nnui kakga bam delu."

22 Cidau Pa pe caisuimedung dage rangdi, "Mina Nabe tingba ziedung nnui ngau keneu tingbadung ge gwang zeu, dede nnui cide ngaulak. 23 Nah penui nnui dage rang zie, ‘Ainie, aika!’ mede ‘Lunie, luga!’ Dede pet so mede penui cai sui so, 24 kedanemene tingkehepik dau tinggim lambie gede hepik kaige kedale baa cailigwangdi kela nzwa, Mina Nabe kegwang benai de cinzwa zie.* 25 Dede keraibe pa keherei süt kecu ngau zie nah cudau ceheu de peu pecu mlai dizie. 26 Nah mina Nabe tingbazie daude, Noah tingdau nzwa zie. 27 Noah liem ga nlüt di kemakta au mi matyei masak, nah henautei nah hemeu meu bam eh duidi kegwang dau mina peciakne de kegak tset kapdi. 28 Lot kelung tingdau de ci nzwa da, mi matyei, masak, malui, mazwa, maling, ki de tei bam. 29 Dede Sodom gade Lot tet kempet benai tinggim gade mi nah mitseu ruimie eh penuide ngkap ciaudi.* 30 Mina Nabe mi miakngau tei kegwang benai de cide nzwa zie. 31 Cipau nai, keheibe de kireu ga kebamme de pegu kilungga kebam de peu keu zielie nhung so; nah luhga kelame de peu caili gwang so. 32 Lot nau ha nsung lulo.* 33 Keheibe de pe teilung pwa pegu teilu neucai cide tei ngga dizie, dede pe teilung ngkap nggah kegaibe au cide kwak luzie. 34 Ih nnui dage ranglia zie, cipau ziude mi hangna zeu ga bamzie. Hangge de keuteu dizie, dede kedabe de au gidi zie.* 35 Mipui hangna ngngwa maniak bamzie. Hangge de keuteu dizie, nah kedabe de au gidi zie." 36 * [Mi hangna luhga lazie; hangge de keuteu dizie, dede kedabe de gidi zie.] 37 Cidau caisuime pe dade keteudi, "Daiga, Rampaubo?" Cine Jisu penui dade rangdi, "Daiga hepaau bambi, cika heraruidung de ngkwa bamla."✝