1 Cu Jisu ngangcuh pie nah makeheime ge ma kehekwabung gage penui makai kai kebam ngaulu. 2 Pecai pa makegah hemipui ge tamrine kena kai eh ngau. 3 Cine pa rangdi, "Ih nnui dage rangsiakte liazie, makegah hemipui aipaude mi kedame swa kaikie kilie. 4 Kedanemene aidungde pelane penui mahei kekiee gade makai kaigai. Dede aipau puide au, pe magah gade, pegu teu eh lung kera kebam pelane kaibeu dida."

5 Cu midung ge tangtsudung keyi ruipwa nah mi makaidungle pwa kerecaki tei hezuyi süt kelu ha rangla, ge pa rangdi, 6 "Kedanemene nnui aidungde ngau kebamdung de, tingnaige tangtsukang gede kedage reuga keswa pwabam kelak nah teimeu di mene bam kelak tingba gwang zie." 7 Cine penui pecu keteu eh rang, "Keledeubo, daidau aidungde teidi zieno, nah aidungde gwang kera tingdau daipai rehi teidi zieno?" 8 Ge pa rangdi, "Nnuide cwadi melu kerane mriak lulo. Kedanemene mina kekiee a zi teu eh gwang zie, rang eh, ‘Ih au Khrista da,’ nah, ‘Peting nna dida, cine penui caisui so.’ 9 Dede nnui hereu tei kecu nah ma kehebwak kesiu dau ngngi di so, kedanemene aidungde teirai gwang zie, dede cide zette eh penli dilak."

10 Pecai pa penui dage rangdi, "Heleuh ge heleuh kedage de keregi, nah hegwang ge hegwang kedage de ngngwa keregi cuh zie. 11 Nah kideu luga aika nnui kedidung teu nah herakum kum nah rapiadung cuh zie. Nah tinggim gade ma nretkei ketei nah marehidung ngau dizie. 12 Dede ma aidung peciakne tei kedi dwa, penui nnuireu gage penui ba hwa gai eh nnuide mneu zie, nah nnuide synagoguedung nah hebaangkidung gage tui gaizie, delwe hegwangme nah deuceudidung dwa a zi ziemne nnuide teugwang zie. 13 Cide nnuide zierang tei kera zuiyi peu zie. 14 Ciziemne nnui lung gade dainzwa mi sam keli mai siabi de mrai cet nswa so, 15 kedanemene Ih nnuide ranglu kebui samdung nah maci ngauraume nnuide rangkum gai kelak mede renia gai kelak ge peuzie. 16 Dede nnui puipei nah nnui siname nah nnui kibaume nah nnui zangmedung ne nnuide tuigai beuzie; nah penui nnui kangge de teitset dizie. 17 Nah a zi ziemne mina peciakne nnuide ngaurau dizie. 18 Dede nnui peutam leige de tei ngga dilak.* 19 Nnui liakelu gade, nnui keringria ngaulu zie.

20 Dede nnui Jerusalem de reugwame ne twagwa kelu kengau dau, cide renam ngkapdi kera ting nna di delie kecu ci lulo. 21 Cidau peu Judea deuzi ga kelungme de lamlwatu reu gage pak kailu, nah namdibe ga kebamme de peu tet dilu, nah deudi gwale kelame de peu cika nlüt so. 22 Kedanemene tingbazie aidungde Kesanglaisiu ga rauteu keladung tei canglu kera, hekumkepei tingba kecune. 23 Dede ainie cidau ting nlaigailak eh kelame nah nepam kelamedung au reilu buida! Kedanemene kideu ga keherei süt kecu gwang zie nah mina aidungde da lunghopbe gwang zie kecune. 24 Nah penui kiengtie mui gade kau dizie, nah heleuh peciakne kakga hebaang teila dizie, nah Jerusalem au Tinggwang de ci kemak Gentileme pidau tei dizie, Tinggwang de cikemakme ting cangdi kemaktane.

25 Pecai tingnaimiak, hekei nah hegidung gade marehi tei pet dizie, nah kideu ga kelung heleuh leune keherei süt zie, nah jaaidi nah dui nswak kwadung ziemne penuide keheu sam pwabam dizie. 26 Kideu reuga matei gwang keradung cet eh minadung ngngi eh penui swagahbam dizie, kedanemene tinggimdung kengkiengdung teu nlai gaizie kecune. 27 Iciu eh penui Mina Nabe kengkieng teu eh nah ndusüt eh hemwa gade kegwang ngau luzie. 28 Dede aidungde teicuh kecudau, nnui saplwe nah nnui peu ngangcuh lwe pielu, kedanemene nnuide rilu kera gwang nna kedine."

29 Pecai pa penui dage samgwa ge ranglia: "Tangzütbang nah tsingbangdung peciakne de pielo. 30 Pecai penei bwapet herizi, tinglumting nna gwang zeu kecu nnui ngau nah ci luzie. 31 Cinzwa, nnui ma aidungde ngau eh tei gwang kezeu dau, nnui Tinggwang hegwangram mna bam kedi ci lulo. 32 Ih nnui dage rangsiakte liazie, ma aidung peciakne tei cangdi kemakta aipau ceheude ngkapdi gailak. 33 Tinggim nah kideu gah dizie, dede a samdung au madaude gahdi lak.

34 Dede nlien nah sakmie kecu nah cudau teilung nangdung tei eh nnuilung naangbam melu kerane nah cipau tingba de zette gwang nnuide hekit teu di melu kerane nnuide mriak eh kwabam lulo, 35 kedanemene cide kideureu ga kelung leune pelane da hetak nzwa gwang zielu. 36 Dede peting pelane mriak nah kekie tei eh bamlu, iciude nnui ngkieng eh ma aidung peciakne teigwang kera gade mbailu kerane, nah Mina Nabe dwa saplu kerane."*

37 Cu Jisu tingba ramsangne kerecaki ga mide ledeu bamdi, dede pa tingmui tet mie Olivet deutu lie kecu ga bam dila. 38 Mina peciakne tingcang nuge peda gwangla kerecaki ga pe sam kingnei zielie eh.