1 Nah cipau tingdau, ainzwa eh teigwang, Caesar Augustus kideu peciakne de hezi rau lulo hezai kaidi. 2 Aide Quirinius Syria deuceudi tei kebam tingdau hezi kerau raitube. 3 Nah mileune de hezi rau kera pe nam rip ga gwangdi. 4 Nah Joseph de Galilee ga, Nazareth namdi gade, Judea deu, David namdi Bethlehem lie qu kela ga hangdi, kedanemene pa au David leuhme nah pe kiria mege kecune. 5 Pa hezi rau kera Mary de nzanglwe mie, pe naurang teipwa kebambe puide nah pa au nlaigailak ladi. 6 Nah penai Bethlehem ga kebam dau, pena de mna kera ting gwangdi. 7 Nah pa pe neraibe mipeina de mnalu, nah pa paidung le pecu kezuilu delwe pecu ketumkwak gage kaizeulu, kedanemene hebeuhki ga penui ziemne heni gah kedine.

8 Nah cipau cuikui ga meurünkekwame bam, penui au tingmui penui meurünhau de luhdung gade kwala. 9 Nah Rampaube samgwame ge penuida gwang, nah Rampaube kendude penuide tau twagwadi, nah penui ngngi sütdi. 10 Nah tinggimgwabe penui dage rangdi, "Ngngi so, kedanemene ainie, Ih nnuida misui yisüt kecu samliakeyi teu gwangla, cide mina leune da gwang zie. 11 Kedanemene henai nnui ziemne David namdi gage kelikelube de mnalu da, pa au Khrista Rampaube. 12 Nah aide nnui dage marehi teikelia ge zie: nnui ngiena de paidung le kezuilwe ketumkwak ga zeu bam eh ngaulu zie." 13 Nah zette tinggimgwabe de ngngwa eh tinggim ga kebam maadi ge gwang, Tinggwang de twa eh cu,

14 "Hutu ga kebam Tinggwang de peu hetwa pung kelube tei lulo,

nah kideu ga, pa pesui kelame minadung kakga

lungciepbe bam lulo."

15 Nah cinzwa eh, tinggimgwame penui dade tetpwa tinggim gwang kedidau, meurün kekwamedung hangge ge dage rangdi, "Kesang anui Bethlehem ga kecang mie go, delwe Rampaube anui dage lia kegai tei kedi ma aidungde pie go." 16 Nah penui zette cika mie nah Mary penai Joseph, nah ngiena ketumkwak ga zeu kebambe de ngaulu. 17 Penui pecu ngaukelu cai, hena ainade ha penui dage sam rang kebeude penui mide ranglia. 18 Nah meurünkekwame penui dage ma kerangdung de siukelu leune penui swagahdi. 19 Dede Mary au sam aidungde pelane pe mlung gage kaiteu eh mning ladi. 20 Pecai meurünkekwame, penuide rangkebeu nzwa, penui ngau nah siukelu pelane ziemne Tinggwang de teindu nah twa eh cailigwangdi.

21 Nah lang hesetne cang eh pe geurum luge, pe zi Jisu msiaklu, pecu tetlak kemak dwa tinggimgwabe ne pezi msiak kebeu de.

22 Nah Moses ne hezai kai kebeu nzwa, penuide teikemci tingbadung gwang cang luge, penai pecu Rampaube dage pwa peu kera pecu ngngwa Jerusalem ga hang.✝ 23 (Rampaube zai gage rau teukela nzwa, "Neraibe pei keheibede de Rampaube dwa de kemcibe tei zie"),✝ 24 nah Rampaube zai gage raupwa kela nzwa, "Tamhau kena mede ruipuine kena," ratak tei kerane. ✝ 25 Nah pielo, Jerusalem ga mige pe zi Simeon lie qu kelage bam, nah mina aipaude au renet lam mtingsüt nah masang eh, Israelme de helungtaumla beu kera kwakela kauge nah Kemci Rabe peda la. 26 Nah Kemci Rabe pa Rampaube Khrista de ngau kemak dwa pa ketsai ngau lak lie peda ge liagai. 27 Nah Kemci Rabe gade pa kerecaki ga lütlu, nah pe pui penai pe pei henanabe Jisu de hezaibe gade teilo kebeu nzwa tei kera ngngwa lüt luge, 28 pa pecu pwalu delwe Tinggwang de twa eh rangdi,

29 "Rampaubo, n sam de nzwa, peu n kilabe de pe lungciep eh tetlu culo.

30 Kedanemene a miakle n kelikelu de ngaulu delu,

31 cide nang mina pelane dwagade mtei luda:✝

32 Gentileme ziemne keuliakegai kebaa ge nah n minadung Israelme ziemne kendu ge."

33 Nah pe pei penai pe pui pe ha kerang de ziemne penai swagahdi. 34 Nah Simeon penaide samlambeu, delwe pe pui Mary dage rangdi, "Ainie, hena ainade de Israel ga mina kekiee kaudi kera nah cuhlu kera ziemne kedetlu nah rang kemmau marehi ge ziemne, ✝ 35 nah kingtie gele n keringria de reu zie, iciu eh mina kekieege lungcet keulialu kerane." 36 Cika Asher leuhme, Phanuel napui Anna, caihakecipui ge bamla. Pa au cing sütdi, pe relei gade mmi hena ge pe nahpei de ngngwa lungh, 37 nah pa au hemipui tei lunghla eh mmi riakheset eh mdai di. Pa madaude kerecaki pütdi lama, tingmui tingba kemmwang nah kekie gade Tinggwang gwatei bamla. 38 Nah cipauting siakdau pa nghanglwe Tinggwang de twa cuhdi nah Jerusalem de rikelu kwa kebam peciakne dage henanabe ha ranglia bamdi.✝ 39 Penui Rampaube zai nzwa ma pelane tei cang dige, penui Galilee deu ga, penui namceu Nazareth ga cailligwangdi.

40 Nah henanabe Jisu mmi nah ngkieng cuhlu, maci le puipung eh nah Tinggwang ngaugia peda la.

41 Cu pe pui pe pei mmi ramsangne Jerusalem ga Kahkegwang Ngyi ga mie muila. 42 Pa mmi kereiekena dige, penui hengyi zaibe mzui Jerusalem ga hang. 43 Hengyi tingbadung cang dige, penui kilung cailigwang keladau, henanabe Jisu Jerusalem ga bamdi. Dede pe pui pe pei cide ci ma. 44 Dede pa penui beuhmaa ga la delie kecu cet eh, penui langnai ge beuh tettei tiege* ga gwangdi. Pecai penai pecu penui kibaume nah zangnamedung kakgade peei cuhdi. 45 Dede penai pecu ngaulu ta dige, pecu peei eh penai Jerusalem ga cailigwangdi. 46 Lang cumne cai penai pecu kerecaki ga, keledeumedung kakga bam eh, nah penui kwa kingnei, nah penui dade maketeu bam eh ngaulu. 47 Nah pe sam siukelu leune pe maci nah pa samlidung de ziemne penui swagahdi. 48 Penai pecu ngau luge, penai swagahdi, nah pe pui pe dage rangdi, "Ana, daitei anai dage aiciu gai no? Pielo, n pei anai, anai lung keherei eh ncu peei la lie." 49 Dede pa penai dage rangdi, "Daitei nnai acu peei lano? Ih a Pei ki ga bam maikesia nnai ci meni?" 50 Dede pa penai dage kerang sam de penai cilu tadi. 51 Pecai pa penaide ngngwa Nazareth ga nghunglu nah penai sam mzai bamdi. Dede pe pui ma aidung pelane pe mlung gage kai pwa ladi.

52 Nah Jisu maci si reureulu nah lungh ngkieng cuhlu, nah Tinggwang nah mina suibe teilu.